Lekel ki vreman viv dan lesyel?

Lerop, en madanm aze i antre dan en legliz avek en saple dan son lanmen, avek bokou respe i azenou devan en stati Mari. Lafrik, en fanmir i vid zin akote latonm enn zot fanmir ki zot vreman respekte. Lanmerik, en zenn onm i medite e zennen avek lespwar ki i pou kapab kominik avek sa enn ki i krwar i son lanz gardyen. Lazi, en pret i bril bann lobze ki’n ganny fer avek papye kouler konman en lofrann pour lespri bann zanset.

KI SA bann dimoun i annan an komen? Zot tou zot krwar ki dan lesyel i annan bann lespri entelizan ki nou kapab kominik avek e ki zot annan sa abilite pour enfliyans lavi bann imen en kantite. Byensir, sa krwayans pa ni nouvo, ni sirprenan. Me sa ki sirprenan se plito sa kantite lopinyon ki pa an armoni avek kanmarad konsernan lekel ki viv dan lesyel.

Mouslim i ador zis en Bondye, Allah. * Dimoun dan bann larelizyon Kretyen i dir ki Bondye i en Trinite, setadir Bondye Papa, Bondye Garson ek Bondye Sent-Espri. Bann Endou i krwar ki i annan plis ki mil bondye. Lezot dimoun i dir ki i annan lespri ki viv dan serten zannimo, pye dibwa, ros ek larivyer. Me i annan lezot ankor ki ganny enfliyanse par bann liv, film ek progranm televizyon baze lo lanz, demon, nanm ek bann bondye.

Zis parey i annan diferan pwennvi kontradiktwar lo bann bondye, i osi annan plizyer diferan pwennvi kontradiktwar lo ki mannyer pour kominik avek zot. I lozik pour mazinen ki pa tou mwayen ki byen. Mazin li dan sa fason: Avan ki nou telefonn en dimoun, nou bezwen konnen lekel nou pe telefonnen. Nou bezwen asire ki sa dimoun ki nou pe telefonnen i vreman egziste e ki i pou reponn nou. I pa fer sans pour nou esey kominik avek en dimoun ki pa egziste. Deplis, pli pir ankor, si nou ti pe kominik avek en dimoun ki fer krwar ki i en lot dimoun i kapab danzere.

Alor, lekel ki vreman viv dan lesyel? Labib pa reponn zis sa kestyon me i osi eksplike avek ki nou kapab kominike e ki nou kapab ekspekte an retour. Kontinyen lir. Ou kapab sirprann pour vwar sa ki Labib i revele lo sa size.

[Not anba lo paz]