Anersaat silarsuaanniittoqarpoq — kikkuuppalli?

Europami arnaq utoqqaq oqaluffimmut iserpoq rosenkransi tigummiarlugu inuusaliallu Mariap assingata saanut ataqqinnittumik seeqqummerluni. Afrikami ilaqutariit eqqarlimik ataqqisaasup ilerranut gini kuivaat. Amerikami angut inuusuttoq iisinnginniarlunilu meditererpoq neriulluni inngili sernissortigisorisani attaveqarfigissallugu. Asiami palasip pappiaqqanik qalipaatigissaartunik sanaat siuaasami anersaavannut pilliutigai.

INUIT taakku suna assigiissutigaat? Tamarmik isumaqarput silassorissusilinnik anersaat silarsuaanniittoqartoq attavigineqarsinnaasunik inuillu inuunerannut sunniuteqangaarsinnaasunik. Aatsaat taama isumaqartoqalinngilaq tupaallannartuunaniluunniit. Anersaalli silarsuaanniittut kikkuunerannik takorluukkat imminnut assortuuttutut ittut taama amerlatiginerat tupaallannartuuvoq.

Musliimit pallorfigaat Guuti ataaseq — Allah. * Inuit kristumiuunerartut oqartarput Guuti ataasiullunilu pingasuusoq, tassa Guuti Ataataq, Guuti Erneq aamma Guuti Anersaaq Illernartoq. Hindut isumaqarput tusindinit amerlanerusunik guuteqartoq. Allat oqartarput anersaat nunarsuarmiittut, soorlu uumasuni, orpinni, qaqqani kuunnilu. Suli allat inngilit, anersaapiluit, aliortukkat, nissimaat guutillu pillugit atuakkianit, filmilianit tv-kkullu aallakaatitassianit sunnerneqarsimapput.

Soorlu guutit pillugit takorluukkat assigiinngitsorujussuullutillu imminnut assortuuttutut ittut, taamatuttaaq taakku qanoq attaveqarfigineqartarnissaat pillugu isummat assigiinngitsorujussuullutillu imminnut assortuuttutut ipput. Soorunami attaveqarfiginneriaatsit tamarmik eqqortuusinnaanngillat. Immaqa ima nassuiarneqarsinnaavoq: Telefonikkut attaveqarfiginiagaqartinnata kina sianerfigissanerlugu nalunngittariaqarparput, qulakkeeqqaartariaqarparpullu sianerfiginiagarput ilumut piviusuunersoq akissaneraatigullu. Piviusuunngitsumut attaveqarfiginninniarneq iluaqutaanngilaq. Ajornerusorlu unaavoq: Peqquserluttumut attaveqarneq navianartuusinnaavoq.

Taavami kikkut anersaat silarsuaanniippat? Biibilimi apeqqut taanna akineqaannarnani aammali nassuiarneqarpoq kina attaveqarfigisariaqarneripput, qanorlu akineqarnissarput ilimagisinnaaneripput. Allaaserisat tulliuttut atuariassagitit. Tamakku Biibilimi qanoq sammineqarnerat immaqa tupaallaatigissavat.

[Quppernerup ataani ilanngussaq]