តើអ្នកណាជាបុគ្គលវិញ្ញាណ?
តើអ្នកណាជាបុគ្គលវិញ្ញាណ?
នៅទ្វីបអឺរ៉ុប ស្ត្រីវ័យចាស់ម្នាក់ចូលទៅក្នុងវិហារមួយដោយមានខ្សែអង្កាំនៅដៃ ហើយលុតជង្គង់ដោយគោរពនៅមុខរូបសំណាកនាងម៉ារៀ។ នៅទ្វីបអាហ្វ្រិក គ្រួសារក្រីក្រមួយច្រួចស្រានៅជិតផ្នូរនៃញាតិសន្ដានដែលពួកគេគោរព។ នៅទ្វីបអាម៉េរិក បុរសវ័យក្មេងម្នាក់តមអាហារ ហើយសញ្ជឹងគិតដោយសង្ឃឹមថានឹងទាក់ទងជាមួយអ្វីដែលគាត់ជឿថាជាទេវតារបស់គាត់ដែលការពារគាត់។ នៅទ្វីបអាស៊ី សង្ឃម្នាក់ដុតរូបផ្សេងៗធ្វើពីក្រដាសពណ៌ជាគ្រឿងបូជាទៅវិញ្ញាណឬព្រលឹងដូនតា។
តើមនុស្សទាំងនេះជឿអ្វីដូចគ្នា? ពួកគេទាំងអស់គ្នាជឿថាមានបុគ្គលវិញ្ញាណនៅស្ថានសួគ៌ដែលមនុស្សអាចទាក់ទងបាន ហើយដែលអាចមានឥទ្ធិពលខ្លាំងលើជីវិតមនុស្ស។ ជំនឿនេះមិនមែនថ្មីឬមិនគួរឲ្យយើងភ្ញាក់ផ្អើលទេ។ អ្វីដែលគួរឲ្យភ្ញាក់ផ្អើលគឺថាមានជំនឿជាច្រើនដែលប្រទាំងគ្នាស្តីអំពីអ្នកណាជាបុគ្គលវិញ្ញាណ។
អ្នកកាន់សាសនាអ៊ីស្លាមគោរពបូជាព្រះមួយអង្គគឺអាឡា។ * បណ្ដាជនក្នុងពិភពគ្រិស្តសាសនានិយាយថាព្រះជាព្រះបីអង្គរួមជាព្រះតែមួយដែលមានព្រះដែលជាបិតា ព្រះដែលជាបុត្រនិងព្រះដែលជាវិញ្ញាណបរិសុទ្ធ។ អ្នកកាន់ព្រហ្មញ្ញសាសនាជឿថាមានព្រះជាងមួយពាន់។ បណ្ដាជនឯទៀតនិយាយថាបុគ្គលវិញ្ញាណស្ថិតនៅក្នុងសត្វខ្លះៗ ដើមឈើ ថ្មនិងស្ទឹង។ ក៏ប៉ុន្តែ អ្នកឯទៀតជឿព័ត៌មានដែលមានក្នុងសៀវភៅ ភាពយន្តនិងកម្មវិធីទូរទស្សន៍ស្តីអំពីទេវតា វិញ្ញាណកំណាច ខ្មោចនិងម្រេញគង្វាលនិងព្រះផ្សេងៗ។
មានទស្សនៈជាច្រើនផ្សេងពីគ្នានិងដែលប្រទាំងគ្នាអំពីព្រះ ហើយទស្សនៈអំពីរបៀបទាក់ទងនឹងព្រះទាំងនោះ ក៏ខុសគ្នាហើយប្រទាំងគ្នាដែរ។ យើងអាចសន្និដ្ឋានយ៉ាងសមហេតុសមផលថា មិនមែនវិធីទាក់ទងទាំងអស់ជាមួយព្រះសុទ្ធតែត្រឹមត្រូវទេ។ សូមគិតដូច្នេះ: មុនយើងប្រើទូរស័ព្ទ យើងត្រូវដឹងថាយើងចង់ទូរស័ព្ទទៅអ្នកណា ហើយយើងត្រូវជឿជាក់ថាបុគ្គលនោះពិតជាមានមែន ហើយនឹងព្រមនិយាយជាមួយយើង។ បើយើងព្យាយាមទាក់ទងនឹងបុគ្គលដែលមិនមានទេ នោះគ្មានប្រយោជន៍អ្វីឡើយ។ អាក្រក់ជាងនេះទៅទៀត ការទាក់ទងនឹងជនបោកប្រាស់អាចនាំឲ្យមានគ្រោះថ្នាក់។
ដូច្នេះ តើអ្នកណាជាបុគ្គលវិញ្ញាណ? គម្ពីរបរិសុទ្ធមិនគ្រាន់តែឆ្លើយនឹងសំណួរនេះទេ តែក៏ពន្យល់ថាលោកអ្នកត្រូវទាក់ទងនឹងអ្នកណា ហើយអ្នកនោះនឹងមានប្រតិកម្មយ៉ាងណា? សូមអញ្ជើញអានអត្ថបទបន្តបន្ទាប់។ លោកអ្នកប្រហែលភ្ញាក់ផ្អើលអំពីអ្វីដែលគម្ពីរបើកបង្ហាញ។
[កំណត់សម្គាល់]
^ វគ្គ 4 «អាឡា»មានន័យថា«ព្រះ» មិនមែនជាឈ្មោះទេ។