E Iai Foafoaga Agaga—O Ai i Latou?

I Europa, ua ulufale atu ai i le falesā se loomatua o loo uu lana rosalio, ma tootuli i luma o le faatusa o Maria. I Aferika, ua sasaa ai e se ulugalii se fagu malosi i le tuugamau o se tasi sa aloaʻia o lo latou aiga. I Amerika, o loo anapogi ai se talavou ma manatunatu loloto, i le faamoemoe e fia fesootaʻi ma lona agelu tausi. I Asia, ua faamū ai e se faitaulaga faatusa e fai i pepa felanulanuaʻi, e fai ma taulaga i agaga o ona tuaa ua leva ona maliliu.

O LE ā le mea e tutusa ai nei tagata? E talitonu i latou uma, e iai foafoaga agaga atamamai e mafai ona fesootaʻi i ai, ma e latou te taaʻina olaga o tagata. O le mea moni, e lē fou lenā talitonuga pe faateʻia ai. Ae o le mea e ofo ai, o le tele o talitonuga eseese e faatatau i nei foafoaga agaga.

E tasi le Atua e tapuaʻi i ai tagata Mosalemi, o Allah. * Ae ua fai mai lotu Kerisiano, e tapuaʻi i le Atua Tolutasi, lea e faia aʻe i le Atua le Tamā, le Atua le Alo, ma le Atua le Agaga Paia. E faitau afe atua tane ma atua fafine e talitonu i ai tagata Hinitū. A ua fai mai nisi, e nonofo foafoaga agaga i nisi o manu, laau, papa ma vaitafe. Ae e talitonu isi i faamatalaga i tusi ma ata tifaga e faatatau i agelu ma temoni, ma atua fafine ma atua tane.

E eseese manatu ma talitonuga e uiga i atua, ma e eseese foʻi manatu i le auala e fesootaʻi ai ma i latou. A o le mea moni, e lē mafai ona saʻo uma na auala eseese. O se faataʻitaʻiga: A o leʻi telefoni atu i se isi, e tatau ona tatou iloa po o ai lea e telefoni atu i ai, ma ia mautinoa, e iai moni se tagata faapena o le a tali mai. E leai se uiga e telefoni atu ai, pe afai e leai se tagata faapena. Ae e sili ona leaga, pe a tali mai se tagata taufaasesē.

O lea la, pe e iai moni ni foafoaga agaga? E lē gata e maua i le Tusi Paia le tali o lenei fesili, a ua faamatala mai ai po o ai e faafesootaʻi i ai, a o le ā foʻi le tali mai. Ia faitau i mataupu o sosoo mai, ona e iloa ai lea o le tali mai i le Tusi Paia.

[Faaopoopoga i lalo]