Spiritu—Nos Por Mira Nan?

NI MASKE kuantu bo keda wak den shelu, lo bo no mira niun spiritu. I ni maske kuantu bo purba skucha, lo bo no tende niun tampoko. Sinembargo, bo por tin sigur ku nan ta eksistí. Nan ta kriaturanan masha inteligente i poderoso, i kada un di nan tin nan propio nòmber i personalidat. Algun ta yuda nos, i otronan ta hasi nos daño. Pero un kos ta sigur, nan tur tin bista riba nos.

E Dios berdadero mes ta un Spiritu. (Juan 4:24) E tin un nòmber úniko ku ta distinguié for di e tantísimo diosnan falsu ku ta eksistí. Su nòmber ta Yehova. (Salmo 83:18 *) E salmista a skirbi: “[Yehova] ta grandi, i digno di ser alabá na gran manera; tambe e mester wòrdu temí mas ku tur dios. Pasobra tur e diosnan di e pueblonan ta ídolo, ma ta [Yehova] a traha e shelunan. Splendor i mahestat ta su dilanti, fortalesa i bunitesa ta den su santuario.”​—Salmo 96:​4-6.

Vishonnan di e Dios Berdadero

Beibel ta bisa nos: “Ningun hende no a mira Dios nunka.” (Juan 1:18) Meskos ku un hende ku a nase siegu no por visualisá koló, nos tampoko no por visualisá Dios su aparensia i splendor. Pero meskos ku un bon maestro ta splika kos kompliká na su studiantenan usando vokabulario ku nan konosé, asina Dios, mediante su Palabra, Beibel, ta deskribí kosnan ku nos no por mira usando kosnan ku nos por mira. Mediante vishonnan inspirá ku sirbidónan fiel di pasado a haña, Yehova ta yuda nos visualisá e patio selestial i komprondé nos relashon ku esnan ku ta biba einan.

Por ehèmpel, un vishon ku profeta Ezekiel a haña ta kompará e gloria di Yehova ku kandela, splendor, safiro i un regenbog. Den un otro vishon, apòstel Juan a mira Yehova riba su trono i a bisa ku Dios “tabata manera un piedra di yaspe i un sardio den aparensia.” El a bisa tambe ku “tabatin un regenbog rònt di e trono ku tabata manera un esmeralda den aparensia.” E deskripshonnan ei ta indiká ku Yehova su bunitesa ta eksepshonal, i su presensia ta agradabel i trankilisante.​—Revelashon 4:​2, 3; Ezekiel 1:​26-28.

Profeta Daniel tambe a mira Yehova den un vishon. Den e vishon ei el a mira ku “dies mil biaha dies mil [angel] tabata pará [Yehova] su dilanti.” (Daniel 7:10) Esei lo mester tabata un bista masha impreshonante! Si bo  mira ún angel den vishon mes ta algu masha maravioso, ban kòrda un gran kantidat di angel perfekto!

Beibel ta menshoná angel kasi 400 biaha. Angel tin diferente rango, entre otro esun di serafin i kerubin. Den Beibel tantu e palabra griego komo e palabra hebreo pa “angel” ta nifiká “mensahero.” Esei ta laga nos komprondé ku angel por komuniká ku otro, i den pasado nan a komuniká ku hende. Sinembargo, angel no ta alma di defuntu. Yehova a krea e spiritunan akí hopi tempu promé ku el a krea hende.​—Jòb 38:​4-7.

Den su vishon Daniel a mira un multitut di angel reuní pa presensiá un evento remarkabel. Despues Daniel a mira “unu manera un yu di hende” aserká Yehova su trono p’e risibí “dominio, gloria i un reino, pa tur pueblo, nashon i hende di tur idioma por sirbié.” (Daniel 7:​13, 14) E “yu di hende,” un figura importante den e region di spiritu, ta Hesukristu resusitá, kende a haña e privilegio di goberná riba henter e tera. Pronto su gobièrnu lo remplasá tur gobièrnu humano i pone un fin na malesa, tristesa, opreshon, pobresa i asta morto.​—Daniel 2:44.

Sin duda Hesus su entronisashon a trese hopi alegria pa e multitut di angelnan fiel, kendenan ke lo mihó pa hende. Pero lamentablemente, no ta tur spiritu a sinti asina.

Enemigu di Dios i Hende

Na prinsipio di historia humano, un angel ku a deseá di haña adorashon a bira kontra Yehova i a bira Satanas, ku ta nifiká “Resistidó.” I siendo ku e ta e persona mas malbado,  e ta totalmente diferente for di Yehova, kende ta e persona mas amoroso. Tabatin otro angelnan ku a djòin Satanas den su rebelion. Beibel ta yama nan demoño. Meskos ku Satanas, e demoñonan akí a bira enemigu kruel di hende. Un gran parti di sufrimentu, inhustisia, enfermedat, pobresa i guera ku tin riba tera ta debí na nan influensia.

Maske hopi religion di kristiandat no ta papia masha mas di Satanas, e buki bíbliko di Jòb ta yuda nos komprondé e personalidat i motivashon di e angel rebelde akí. E teksto ta bisa: “Awor a yega un dia ku e yu hòmbernan di Dios a bin pa presentá nan mes dilanti di SEÑOR, i Satanas tambe a bin den nan.” Den e kòmbersashon ku a sigui, Satanas sin ningun klase di rèspèt a lansa e akusashon di ku Jòb tabata sirbi Dios puramente pa loke e tabata haña a kambio. Den un intento pa proba ku e tin rason, Satanas a kousa hopi problema i sufrimentu pa Jòb, i a pon’é pèrdè tur su bestianan i tur su dies yunan. Despues di esei, el a laga Jòb su kurpa sali tur na blufein. Pero tòg, Satanas no a logra proba ku e tabatin rason.​—Jòb 1:​6-19; 2:7.

Tin bon motibu pakiko Yehova a tolerá Satanas pa asina tantu tempu, pero lo e no toler’é pa semper. Pronto lo eliminá Diabel. E buki di Revelashon ta deskribí e promé pasonan ku a ser tumá kaba. E buki akí ta mustra nos un evento importante ku a tuma lugá den e region di spiritu ku di otro manera nunka nos lo a haña sa. Nos ta lesa: “Tabatin guera den shelu, Miguel [Hesukristu resusitá] i su angelnan tabata hasi guera kontra e dragon [Satanas]. I e dragon i su angelnan tabata hasi guera, i nan no a prevalesé, i no tabatin lugá mas pa nan den shelu. I e gran dragon a wòrdu tirá abou, e kolebra di antigwedat, kende ta wòrdu yamá Diabel i Satanas, kende ta gaña henter mundu; el a wòrdu tirá abou riba tera, i su angelnan a wòrdu tirá abou huntu kuné.”​—Revelashon 12:​7-9.

Tuma nota ku Beibel ta bisa ku Satanas “ta gaña henter mundu.” E ta gaña hende usando siñansanan religioso ku ta basá riba mentira pa alehá nan for di Yehova i su Palabra. Ún di e siñansanan akí ta ku tur hende ku muri ta bai na e region di spiritu. Tin hopi vershon di e siñansa akí. Por ehèmpel, na Afrika i Asia hopi hende ta kere ku ora hende muri nan ta bai serka nan antepasadonan den un mundu di spiritu. E siñansa di purgatorio i fièrnu tambe ta basá riba e idea ku spiritu di hende ta sigui biba ora nan muri.

Hende Ta Bai Shelu Ora Nan Muri?

Pero kiko di e kreensia ku miónes di hende rònt mundu tin, esta ku tur bon hende ta bai shelu? Ta bèrdat ku tin bon hende ta bai shelu, pero nan ta masha tiki na komparashon ku e míles di miónes di hende ku a muri. Beibel ta bisa ku ta 144.000 hende lo “wòrdu kumprá for di tera” i lo sirbi komo “saserdotenan” i lo “reina riba tera.” (Revelashon 5:​9, 10; 14:​1, 3) Huntu ku e Yu di hende, Hesukristu, nan lo forma e gobièrnu selestial, e Reino di Dios. E gobièrnu ei lo pone un fin na Satanas i su demoñonan i hasi e tera un paradeis. Mayoria di hende ku a muri lo ser resusitá den futuro ku speransa di biba pa semper den e Paradeis ei riba tera.​—Lukas 23:43.

Pues, a base di e informashon akí nos por konkluí ku ta eksistí un gran kantidat di spiritu den e region di spiritu. Yehova Dios, e Kreador di tur bida, ta e ser Supremo. I tin miriada di angel ku ta sirbié fielmente. Bou di direkshon di Satanas, otro angelnan a bira kontra Yehova i ta trata na gaña hende. Ademas, un kantidat limitá di hende a “wòrdu kumprá,” òf skohí, for di tera pa karga responsabilidatnan spesial den shelu. Ku esaki na mente, laga nos ban wak awor ku ken nos por komuniká den e region di spiritu, i kon nos mester hasi esei.

[Nota]