Yishimushimu ya Ndond ya Muspiritu

SHINSHIKIN nakash mwiur pa chisu chilemp mudi mu usotila, pakwez ukezap kuman muntu wa muspiritu. Tang matu, pakwez ukezap kutesh dizu dia muntu ap umwing. Chaad, ukutwish kwikal nich kashinsh anch a muspiritu adingaku. Antu a manangu ni usu upandikena, akwet majin ni mikadil yishalijadina. Amwing akutukwashing, pakwez akwau asotining kutusal nayimp. Awonsu inay atutekining mu manangu mau.

Nzamb wakin amwinend uding Spiritu. (Yohan 4:24) Ukwet dijin dimwing kusu disadila anch ashalijana ni anzamb avud a makasu. Dijin diend didi Yehova. (Kuseng 83:18) Nfund a kuseng wafunda anch: “[Yehova] ndiy kwend mujim, ufanyidina kumushiman nakash. Ufanyidina kumwov wom kupandikan anzamb awonsu a pansh. Mulong anzamb awonsu a antu adi anzamb amwamu. Pakwez [Yehova] ndiy kwend watanga maur. Kulim ni uyaj wa want yidi kurutu kwend, uyaj ni kujimb yidi mu chikumbu chend.”​—Kuseng 96:4-6, TMK.

Yishimushimu ya Nzamb Wakin

Bibil utulejin anch: “Kwikil muntu ap umwing wamumanap kal Nzamb.” (Yohan 1:18) Tukutwishap kutesh nawamp kurumburik kwa chifu ni uyaj wend, mudi mukatay kukangany mputames wa chivadik kuman ulombu udia kurutu kwend. Pakwez mudi mukatay mulej muwamp kurumburil malejan makasikena kudi an a shikol mu mazu makutwishau niyawiy kulejan, chawiy chilik chimwing kusutil ku Dizu diend Bibil, Nzamb urumburil yom yakad etu kuman kusutil ku yom tukutwisha kuman. Kusutil ku yishimushimu yamanau antu ashishamena a pasak, Yehova utukwashin kuman chipang cha mwiur ni kutesh kurumburik kwa urund wetu ni antu adia mwinimwa.

Chilakej, chishimushimu chimwing chamanay muprofet Ezekiel, chikwatijidin nich uyaj wa Yehova nich kasu, kulay, diyal dijalirikina, ni nkongal. Mu chishimushimu chikwau, kambuy Yohan umumen Yehova ushakamin pa Want wend ni ulondin anch Nzamb “wamekana mudi diyal dia usey dilayina dia mem ma matamb ap mudi diyal dia usey disuzina nakash,” uwejidin kand anch “ditand ading adiombilamu kudi nkongal ufanakena mudi diyal dia usey dia mem ma matamb.” Mazu minam matulejin anch kumekan kwa Yehova kudi kwa ufun umwing upandikenamu kuwap ni wa pakampwil, usangareshina, ni wa chisambu.​—Kujingunik 4:2, 3; Ezekiel 1:26-28.

Muprofet Daniel ni ndiy wamana mu chishimushimu cha Yehova, “tutikit tuvud [twa angel] ading iminy kurutu kwend [Yehova].” (Daniel 7:10) Yom yamanay yading yishimokishena mud ik! Kumuman mwangel umwing ap mu chishimushimu kukutwish kwikal kushimokishina  nakash, pakwez pakish bil kutongijokin piur pa tutikit ni tutikit twa angel awanyidina!

Angel ayijimbwil tupamp piswimp ni 400 mu Bibil, ni pakach pau kudi aserafin ni asherub. Mazu ma Grek ni Hebereu makarumwinau anch “mwangel” mu Bibil, mawonsu maad marumburikin “muruu”. Chawiy lel, Angel akutwish kwambamb umwing ni mukwau, ni pasak ading akat kwisamb ni antu. Angel kadiap antu ashakama pasak pa divu bwat. Yehova wayitanga yitang yiney ya muspiritu chisu chilemp nakash pasak kurutu kwa kumutang muntu.​—Job 38:4-7.

Mu chishimushimu cha Daniel, angel avud akumangana mulong wa kupan uman piur pa chishiken chimwing cha pakampwil. Chad Daniel wamana “mudi mwan a muntu” ukat kusejin kwi nkwas ya Yehova chakwel amwinkisha “usu wa kuyikel, ni uyaj, ni usu wa want, chakwel antu a michid yawonsu, ni a mitapu yawonsu, ni a jindim jawonsu amusadila ndiy.” (Daniel 7:13, 14) “Mwan a muntu,” wa kusambish udia mwin ndond ya muspiritu, udi Yesu Kristu wavumbulau, winkishau winyikel piur pa mangand mawonsu. Winyikel wend ukez kaswinkan piswimp ap winyikel wawonsu wa antu ni kudiosh mayej, runeng, kuzengol, uzwendj, ni rufu.​—Daniel 2:44.

Kumudish Yesu Want kwayisangaresha chakin kamu nakash angel avud ashinshamena, adinga asotina kuyikwash antu. Cha ushon, kadiap yitangil yawonsu ya muspiritu yisotininga kuyikwash antu.

Akankuny a Nzamb ni Antu

Kwinsambishin kamu kwa rusangu ra antu, mwangel umwing, wasota anch asambisha kumwifukwil, wamubwambwila Yehova ni wisala  amwinend Satan, dijin dirumburikina anch “Mukankuny.” Satan chifanikesh chipandakena kujimb cha uyimp, ndiy wasambisha kumubwambwil Yehova udia chifanikesh cha rukat. Angel akwau amulondula Satan mu wintombuj wend—Bibil uyitazukin anch ayilembil. Mudi Satan, ayilembil ikala akankuny a chisum a antu. Mar mavud madia pa divu, kuburen kutentam, mayej, uzwendj, ni njit yidi yibudikin ya chibachikin chau.

Ap anch kwisambin piur pa Satan kwikadil kal chom chakad usey mu ma egliz ma Kristendom mavud, buku wa Bibil wa Job uletin ronganyin piur pa mutapu udiau angel antombuj ni yibachikin yau. Ulondin anch: ‘Pa dichuku dimwing an a Nzamb wakin eza ni kwimekesh kurutu kwa [Yehova], niyend Sakudimban waseja, wiman pakach pau.’ Mu mambamb malondwila, Satan walonda pakad kalimish anch Job wading ukat kumusadil Nzamb ching kusu mulong wa yom yadingay ni kutambul kudi ndiy. Mulong wa kumekesh anch kutadik kwend piur pa kushinshaman kwa Job kwading kwakin, Satan wamuletina mar makash, wajipa yisak yend ya anam ni anend awonsu dikum. Kupwa, ndiy wamubula Job makwalong ma yitat yiyimp ya tushiny ku mujimbu wend wawonsu. Yoziu yawonsu ya Satan yakanganya kumekesh yalonday.​—Job 1:6-19; 2:7.

Kudi mayingish mawamp mamekeshina mulong wak Yehova wamulikidila Satan chisu chilemp, pakwez ndiy kakezap kumulikidil chikupu. Piswimp ap Djabul akez kumudiosh. Akwatin kal jinzau ja kusambish ni jilejenau mu buku wa Kujingunik, mwinimwa diswin adichirishin kwinyim mulong wa kumekesh kand chishiken chikwau cha usey nakash mwi ndond ya muspiritu kandikal chishikenap. Tutangin anch: “Njit yijim yamekana mwiur: Mikayel [Yesu Kristu wavumbulau] ni angel end ading ni kurish nend nnak mujim, nnak mujim ni angel end warisha nau, awiy kapandikanap, ap kusu ndond yau kayitanap kand mwiur. Nnak mujim amudjibwila pansh, ndiy nnak mukur upidilau anch Djabul ni Satan, sakadimban wa mangand ma kabuj, amudjibwila pansh, ni angel end ayidjibwila nend.”​—Kujingunik 12:7-9, TMK.

Tal alondin anch Satan udi “sakadimban wa mangand ma kabuj.” Ndiy ukat kuyidimb antu kusutil ku kukasikesh makasu ma chirelijon ni kuyidiosh kudiay Yehova ni ku Dizu diend. Makasu mudi minam mimedin ku chitongijok cha kwel anch ku rufu muntu mwawonsu uyiling kwi ndond ya muspiritu. Kudi kushalijan kuvud pa chitongijok chinech. Chilakej, mu Afrique ni mu Asie antu avud itiyijining anch ku rufu antu ayiling mwin ndond ya muspiritu mudinga angakau. Malejan ma pirgatwar ni ma karung ka misiny mimedin ni mawiy piur pa chitongijok chakwel anch muntu ukat kudandamen kwikal mwom kupwa kwa rufu.

Ov, Kudi Mwom wa Mwiur​—Kupwa Kwa Rufu?

Ov, chidi nchik piur pa chitiyij chitiyijinau tutikit twa antu tudia mu mangand mawonsu, anch antu awonsu awamp ayiling mwiur? Chidi chakin anch antu amwing awamp ayiling mwiur, pakwez uvud wau udi ukemp kwilikej ni tutikit ni tutikit twa antu afila kal. Bibil ulejen anch antu 144000 akwez “[kuyikwol] ku mangand” ni akez kusal mudi “in kupesh” ni “kuyikel pa mangand.” (Kujingunik 5:9, 10; 14:1, 3) Pamwing ni Yesu Kristu, Mwan a muntu akez kusal Want wa mwiur, Want wa Nzamb. Winyikel winou ukez kumudiosh Satan ni ayilembil end ni ukez kasal anch divu dikala paradis. Antu avud afila kal akez kuyivumbul mu machuku ma kurutu nich ruchingej ra kushakam chikupu mu Paradis pa divu.​—Luka 23:43.

Chawiy lel, mu wiswimp, kudi yitang yivud yidia mwin ndond ya muspiritu. Mujim pakach pau udi Yehova Nzamb, Sakatang wa mwom wawonsu. Tutikit ni tutikit twa angel ashinshamena amusadidil ndiy. Angel akwau, ayipwita kudi Satan, ni kuyidiosh mu urund nenday Yehova ni kuyisadin mulong wa kuyidimb antu. Chikwau kand, uvud kanang wa antu ‘akwolau’ ap atondau pa divu mulong wa kutambul yisend ya pakampwil mwiur. Nich yiney mu manangu, tushinshikinany amboku anany tukutwisha kwambamb nau mwi ndond ya muspiritu, ni mutapu tufanyidina kwisamb nau.