Vaaiga i le Afioaga o le Atua

E TUSA lava po o le ā le umi e te pulatoʻa ai i le lagi, e lē taitai ona e iloa atu ai se foafoaga agaga. E te fiu foʻi e faalogo, ae lē lagona sona leo, peitaʻi, e mautinoa o loo iai. E sili ona popoto ma malolosi, ma e iai foʻi o latou igoa ma uiga eseese. O nisi foafoaga agaga, e faia mea lelei iā i tatou, a o isi e mananaʻo ia tatou leaga. O loo vaavaai uma mai lava iā i tatou.

O le Atua moni, o le Agaga lava ia. (Ioane 4:24) O lona suafa o Ieova, ma ua iloga ai o ia mai i le tele o atua sesē. (Salamo 83:18) Na tusi le faisalamo: “Auā e sili Ieova ma e tatau ona matuā viia o ia. E mataʻutia o ia i lo o isi atua uma. Auā o atua uma o nuu o atua e lē aogā; a o Ieova, na ia faia le lagi. O loo i ona luma le mamalu ma le matagofie; o loo i lona malumalu foʻi le malosi ma le matagofie.”—Salamo 96:4-6.

Vaaiga e Faatatau i le Atua Moni

Ua faapea mai le Tusi Paia: “E leai lava se tasi ua vaai i le Atua.” (Ioane 1:18) E faigatā i se tagata ona iloa ona foliga ma lona matagofie, e pei ona faigatā i se tagata e tauaso ona iloa lanu eseese. Ae o se faiaʻoga lelei e faafaigofie ona faamatala se mataupu faigatā i ana tagata aʻoga, ma e faapena foʻi ona tatou iloa mai i le Afioga a le Atua mea e lē o mafai ona tatou vaaia, e ala i mea o loo tatou vāai i ai. E ala i vaaiga faagaeeina na faailoa atu e Ieova i ana auauna faamaoni anamua, ua fesoasoani mai ai o ia e faaata i o tatou mafaufau lotoā faalelagi, ma malamalama ai i la tatou faiā ma ē o loo iai i inā.

O se faataʻitaʻiga, na faailoa atu i le perofeta o Esekielu se vaaiga o loo faamatala ai le mamalu o Ieova e pei o le mumū o se afi, e pei o le pupula o le maa safaira ma le nuanua. I se isi vaaiga, na vaaia ai e le aposetolo o Ioane Ieova o loo afio i lona nofoālii, “ua pei ona foliga o se maa iasepi, ma se maa tāua lanu mūmū,” e iai “se nuanua e pei o le maa samaraki ua faataamilo i le nofoālii.” Ua tatou iloa mai i na faamatalaga, e sili ona mamalu ma matagofie le nofoālii o Ieova, e lelei ma e filemu.—Faaaliga 4:2, 3; Esekielu 1:26-28.

Na iloa foʻi e le perofeta o Tanielu se vaaiga e faatatau iā Ieova, o loo “tutū pea i ona luma [Ieova] le selau miliona [o agelu]. (Tanielu 7:10) E mautinoa, o se vaaiga uiga  ese! O se tulaga ofoofogia pe a tatou vāai i se agelu e toʻatasi. O lea la, e sili ona ofoofogia pe a vāai i le faitau miliona o agelu lelei atoatoa!

E toetoe lava faa-400 ona taʻua agelu i le Tusi Paia, e aofia ai serafi ma kerupi. O le upu Eleni ma le upu Eperu ua faaliliuina i le upu “agelu” i le Tusi Paia, e uiga uma i le “avefeʻau.” O lona uiga, e mafai ona fesootaʻi le tasi agelu ma le isi, ma sa fesootaʻi foʻi ma tagata i aso ua mavae. Ae o agelu, e lē o ni tagata na ola muamua i le lalolagi. Na faia e Ieova nei foafoaga agaga a o leʻi taitai ona faia le tagata.—Iopu 38:4-7.

O loo faaalia i le vaaiga na faailoa atu iā Tanielu, le faapotopoto atu o le faitau miliona o agelu, e molimauina se mea mataʻina. Na vaaia ai e Tanielu “se tasi e pei o le atalii o le tagata,” ua oo atu i le nofoālii o Ieova e tuuina mai iā te ia le “pule, o le mamalu ma le malo, ina ia auauna iā te ia o tagata ma nuu ma gagana uma.” (Tanielu 7:13, 14) O le “atalii o le tagata” o lē ua autū i ai mea i le lagi, o Iesu Keriso ua toe faatūina, ma ua tuuina atu iā te ia le pule i le lalolagi uma. Ua toeitiiti ona aveesea lea e lana pulega malo uma o tagata, ma faamutaina maʻi, faanoanoaga, sauāga, mativa, ma e oo lava i le oti.—Tanielu 2:44.

E mautinoa na matuā olioli le faitau miliona o agelu faamaoni ina ua nofotupu Iesu, ona e latou te mananaʻo ia lelei tagata. Ae, e lē o le lagona lenā o foafoaga agaga uma.

 Fili o le Atua ma Tagata

E mai lava i le amataga o le tagata, o le fiasili naʻuā o se tasi agelu ia tapuaʻia o ia, na tetee ai iā Ieova, ma avea ai o ia ma Satani, o lona uiga o “lē e tetee.” Ua silimusa Satani i le leaga, ma e tetee malosi o ia iā Ieova, o lē e sili ona alofa. Na aufaatasi atu isi agelu i le fouvalega a Satani, ma ua taʻua i latou i le Tusi Paia o temoni. Ua avea i latou ma fili o tagata, e pei o Satani. O i latou ua māfua ai le tele o puapuaga i le lalolagi, faapea le lē faamasinotonu, maʻi, le mativa ma taua.

E seāseā ona talanoa le tele o lotu ua taʻua o Kerisiano e uiga iā Satani, ae o loo faamanino mai i le tusi o Iopu uiga ma uunaʻiga o lenei agelu fouvale. Ua taʻua e faapea: “Ua oo i le aso e ō mai ai atalii o le Atua moni e tutū i luma o Ieova, ma na sau ai foʻi Satani faatasi ma i latou.” I le talanoaga na sosoo ai, na fai atu ma le lē migao Satani i le Atua, e ala ona auauna Iopu iā te Ia ona o mea e na te maua mai ai. Na taumafai Satani e faamaonia ana tuuaʻiga i le faaoo o puapuaga e tele iā Iopu, faatamaʻia ana lafumanu ma fasiotia lana fanau e toʻasefulu. Ona ia taia lea o Iopu i se maʻi papala i lona tino atoa, ae e leʻi mafai ona faamaonia ai ana tuuaʻiga.—Iopu 1:6-19; 2:7.

E iai māfuaaga lelei ua onosaʻi ai Ieova iā Satani mo se taimi umi, ae ua toeitiiti aveesea le Tiapolo. E ui ina lē mafai ona tatou vāai i ai, ae e pei ona faamatalaina i le tusi o Faaaliga, e iai se mea tāua ua uma ona tupu i le lagi. Ua faapea mai le mau: “[Ona] tau ai lea o le taua i le lagi: O Mikaele [Iesu ua toe faatūina] ma ana agelu ua tau ma le tarako [Satani], ua tau foʻi le tarako ma ana agelu ma i latou, ae ua toʻilalo, ua lē toe maua foʻi se mea e nonofo ai i le lagi. Ona lafo ifo lea o le tarako tele, o le uluaʻi gata lea, ua igoa foʻi i le Tiapolo ma Satani, o lē ua faasesēina le lalolagi atoa; ua lafo ifo o ia i le lalolagi, ua lafo ifo foʻi ana agelu faatasi ma ia.”—Faaaliga 12:7-9.

Ia mātau, o loo taʻua e faapea “ua faasesēina le lalolagi atoa” e Satani. Ua ia faia faapea e ala i aʻoaʻoga pepelo a lotu, ma ua faaliliuese ai tagata mai iā Ieova ma lana Afioga. O se tasi o na pepelo, e faapea e ola pea le agaga o le tagata pe a oti. E tele ni aʻoaʻoga eseese e faavae i lenei manatu. O se faataʻitaʻiga, i Aferika ma Asia, e toʻatele ua talitonu, pe a oti le tagata, e ola pea lona agaga faatasi ma agaga o ona tuaa i se isi nofoaga. O le talitonuga foʻi lenā e faavae ai aʻoaʻoga o pulekatolio ma seoli.

Pe e Alu i le Lagi le Tagata pe a Oti?

Ae ā le aʻoaʻoga lea e talitonu i ai le faitau miliona o tagata e faapea, e ō tagata lelei uma i le lagi? Ioe, e iai se vaega itiiti o tagata lelei e ō i le lagi, peitaʻi, e faitau piliona tagata lelei ua maliliu. Ua faaalia mai i le Tusi Paia, e 144,000 tagata ua “faatauina mai i le lalolagi” e avea ma “ositaulaga” ma “tupu [e pule mai] i le lalolagi.” (Faaaliga 5:9, 10; 14:1, 3) O i latou ia o le a faia aʻe ai le malo o le Atua i le lagi, faatasi ma Iesu Keriso le Atalii o le tagata. O le a faaumatia e lea malo Satani ma ana temoni, ae avea le lalolagi ma parataiso. O le toʻatele o ē ua maliliu, o le a toe faatutūina i le ola i le lumanaʻi ma le faamoemoe e ola e faavavau i lenā Parataiso.—Luka 23:43.

O lea la, e faitau miliona foafoaga agaga o loo iai. Ae silisili iā i latou uma Ieova le Atua, o Lē na faia mea uma. E faitau miliona agelu o loo auauna faamaoni iā te ia. A ua faasesēina e Satani isi agelu e tetee iā Ieova ma ua latou faasesēina tagata. E lē gata i lea, e iai se vaega toʻaitiiti o tagata ua “faatauina” pe filifilia mai i le lalolagi, e faatino ni matafaioi faapitoa i le lagi. E tusa ai o lea manatu, seʻi o tatou iloiloina po o ai foafoaga agaga e mafai ona talanoa i ai, ma e faapefea.