NGISHO nobe ungabuka etulu esibhakabhakeni sikhatsi lesidze, kute sidalwa semoya lotawusibona. Ngisho nobe ungalalelisisa, angeke uve ngisho sinye sato. Nanobe kunjalo, ungaciniseka kutsi tikhona. Tidalwa temoya tihlakaniphe kakhulu, tinemandla, futsi tinemabito kanye nebuntfu lobungafanani. Letinye tisentela lokuhle, kantsi letinye tifuna kusilimata. Tonkhe tinendzaba naloko lesikwentako.

Nkulunkulu weliciniso naye unguMoya. (Johane 4:24) Unelibito lakhe yedvwa lelimehlukanisa kubonkulunkulu bemanga labanyenti. Libito lakhe nguJehova. (Tihlabelelo 83:18, NW.) Umhlabeli wabhala: ‘Jehova mkhulu, ufanele kudvunyiswa kakhulu, ufanele kwesatjwa kunabo bonkhe bonkulunkulu. Ngobe bonkhe bonkulunkulu betive batithico, kantsi nguJehova lowenta emazulu. Ludvumo nebukhosi kusembikwakhe, emandla nenkhatimulo kusendlini yakhe lengcwele.’—Tihlabelelo 96:4-6.

Imibono Lemayelana NaNkulunkulu Weliciniso

LiBhayibheli litsi: “Kute lowase wabona Nkulunkulu.” (Johane 1:18) Angeke sikwati kukucondza kubukeka kanye nebukhatikhati bakhe, njengobe nemuntfu lotalwe angaboni angayicondzi imibala. Njengobe thishela lokahle achazela bafundzi indzaba lematima ngendlela labangayicondza, ngeliVi lakhe liBhayibheli, Nkulunkulu usichazela tintfo lesingatiboni asebentisa tintfo lesitibonako. Ngemibono lephefumulelwe leyaniketwa tikhonti letetsembekile tasendvulo, Jehova usisita kutsi sibone emazulu ngeliso lengcondvo, futsi sicondze buhlobo lesinabo nalabo labahlala khona.

Nasi sibonelo: Lomunye umbono lowaniketwa umphrofethi Hezekeli uhlobanisa inkhatimulo yaJehova nemlilo, kukhanya lokumanyatelako, isafire, kanye nemushi wenkosazana. Kulomunye umbono, umphostoli Johane wabona Jehova ahleti esihlalweni sakhe sebukhosi futsi watsi ‘unebuso lobukhatimulisa kwelitje lejasiphe nesadiyu.’ Waphindze watsi “lesihlalo sebukhosi sasitungeletwe ngumushi wenkosazana lowawufanana nelitje leliluhlata leliligugu.” Letinchazelo tisitjela kutsi kuba khona kwaJehova kuveta buhle lobungakavami nalobukhatimulako, kanye nekuthula.—Sembulo 4:2, 3; Hezekeli 1:26-28.

Nemphrofethi Danyela wabona umbono ngaJehova, futsi wabona ‘tinkhulungwane letilishumi tiphindvwe katinkhulungwane letilishumi [tetingilosi] time embikwakhe [Jehova].’ (Danyela 7:10) Lombono bewumangalisa kakhulu! Kubona ingilosi yinye nje kuphela, ngisho nasembonweni, kungaba yintfo lemangalisako. Asewucabange nje ubona tigidzigidzi tetingilosi letite sono!

 LiBhayibheli likhuluma ngetingilosi tikhatsi letingaba ngu-400, futsi tinhlobo tato tifaka ekhatsi emaserafi nemakherubhi. EBhayibhelini, emagama esiGriki nesiHebheru lahunyushwa ngekutsi “ingilosi,” asho “sitfunywa.” Ngako-ke, tingilosi tiyakwati kukhuluma todvwana, futsi etikhatsini letengcile betikhuluma nebantfu. Tingilosi atisibo bantfu labake baphila emhlabeni. Jehova watidala esikhatsini lesidze kakhulu ngembikwekutsi adale bantfu.—Jobe 38:4-7.

Embonweni waDanyela, letigidzigidzi tetingilosi tatihlangene kute tibone sentakalo lesibalulekile. Danyela wabona “umuntfu labenjengendvodzana yemuntfu” asondzela esihlalweni sebukhosi saJehova kute aniketwe ‘emandla ekubusa, nenkhatimulo, nebukhosi futsi bonkhe bantfu, netive, nebantfu bato tonkhe tilwimi batawukhotsama kuye bamkhonte.’ (Danyela 7:13, 14) ‘Lendvodzana yemuntfu’ inesikhundla lesibalulekile endzaweni yemoya, futsi inguJesu Khristu lovusiwe loniketwe ligunya lekubusa umhlaba wonkhe. Madvutane, kubusa kwakhe kutawutsatsa sikhundla sabo bonkhe bohulumende bebantfu futsi kucedze kugula, lusizi, kucindzeteleka, buphuya, kanye nekufa imbala.—Danyela 2:44.

Kubekwa kwaJesu esihlalweni sebukhosi kwatijabulisa kakhulu tigidzi tetingilosi letetsembekile, naletibafunela lokuhle bantfu. Kodvwa-ke lokubuhlungu kutsi akusito tonkhe tidalwa temoya letatitiva ngaleyo ndlela.

Titsa TaNkulunkulu Netebantfu

Ekucaleni kwemlandvo webantfu, lenye yetingilosi yachutjwa sifiso sekufuna kukhontwa, futsi yamfulatsela Jehova yase itenta Sathane, lokusho “uMphikisi.” Sathane usidalwa  lesikhohlakele kunato tonkhe, futsi umelene ngalokuphelele naJehova, lonelutsandvo lolukhulu. Letinye tingilosi tahlubuka kanye naSathane. LiBhayibheli litibita ngekutsi ngemadimoni. NjengaSathane, emadimoni atitsa tebantfu letinesibhuku. Abangele kuhlupheka, kungalungi, kugula, buphuya, kanye netimphi letinyenti emhlabeni.

Nanobe tinkholo letinyenti letitsi tebuKhristu tingasakhulumi ngaSathane, incwadzi yeliBhayibheli yaJobe isenta sicondze buntfu kanye netisusa talengilosi lesihlubuki. Itsi: “Kwatsi ngalelinye lilanga emadvodzana aNkulunkulu atsatsa tindzawo tawo embikwaSimakadze, naSathane watfolakala asemkhatsini wawo.” Enkhulumeni leyalandzela, ngekwedzelela Sathane watsi Jobe abekhonta Nkulunkulu ngobe kukhona lakuzuzako. Etama kufakazela tinsolo takhe, Sathane wehlisela Jobe kuhlupheka lokukhulu, wabulala imfuyo kanye nebantfwana bakhe labalishumi. Ngemuva kwaloko, wahlasela Jobe ngematfumba labutfukako labegcwele umtimba wakhe wonkhe. Onkhe lamachinga aSathane ehluleka kufakazela emavi akhe.—Jobe 1:6-19; 2:7.

Kunetizatfu letinhle tekutsi Jehova ayekele Sathane sonkhe lesikhatsi, kodvwa angeke amyekele phakadze. Ngekushesha Develi utawubhujiswa. Tinyatselo tekucala setivele titsatsiwe futsi tichazwa kahle encwadzini yeSembulo, lapho sembulelwa khona lesinye sentakalo lesibalulekile lesenteka endzaweni yemoya, lebesingeke size sisibone. Siyafundza: “Kwesuka imphi ezulwini. Mikhayeli [Jesu Khristu lovusiwe] netingilosi takhe balwa nanyokangwenya [Sathane]; nyokangwenya akanye netingilosi takhe naye walwa, kodvwa behlulwa bonyokangwenya; kwabate indzawo yabo ezulwini. Nyokangwenya lomkhulu walahlelwa phansi, leya nyoka yasemandvulo, lebitwa ngekutsi nguMhlebi nome nguSathane, uMkhohlisi wemhlaba wonkhe. Wajikijelwa phansi emhlabeni kanye netingilosi takhe.”—Sembulo 12:7-9.

Caphela kutsi kutsiwa Sathane ‘ungumkhohlisi wemhlaba wonkhe.’ Udukisa bantfu ngekutfutfukisa emanga enkholo kute abente bafulatsele Jehova kanye neliVi lakhe. Lamanye emanga lawasebentisako ngulatsi bonkhe bantfu nabafa bendlulela endzaweni yemoya. Lenkholelo ichazwa ngetindlela letehlukehlukene. Nasi sibonelo: E-Afrika nase-Asia, labanyenti bakholelwa kutsi bantfu nabafa bendlulela endzaweni yemoya lapho kuhlala khona bokhokho babo. Timfundziso tekuhlushwa kwebantfu labafile ngembikwekutsi baye ezulwini, kanye nesihogo, tisekelwe emfundzisweni yekutsi umuntfu uchubeka aphila ngemuva kwekufa.

Ngemuva Kwekufa, Umuntfu Uya Ezulwini Yini?

Kutsiwani ngenkholelo leyemukelwa tigidzi tebantfu emhlabeni wonkhe, letsi bonkhe bantfu labalungile baya ezulwini? Kuliciniso kutsi labanye bantfu labalungile baya khona, kodvwa linani labo lincane nalicatsaniswa netigidzigidzi tebantfu labafile. LiBhayibheli litsi bangu-144 000 bantfu ‘labahlengwe emhlabeni’ futsi batawuba ‘baphristi’ kanye ‘nemakhosi layawubusa etikwemhlaba wonkhe.’ (Sembulo 5:9, 10; 14:1, 3) Bakanye naJesu Khristu loyiNdvodzana yemuntfu, batawukwakha hulumende wasezulwini, lokunguMbuso waNkulunkulu. Lohulumende utawubhubhisa Sathane kanye nemadimoni akhe, futsi wente umhlaba ube lipharadisi. Esikhatsini lesitako, linyenti lebantfu labafile litawuvuswa futsi libe nelitsemba lekuphila phakadze emhlabeni loliPharadisi.—Lukha 23:43.

Sesifundzile kutsi endzaweni yemoya kuhlala tigidzigidzi tetidalwa. Nkulunkulu Jehova uphakeme kunato tonkhe, futsi unguMdali wato tonkhe tintfo letiphilako. Kunetigidzigidzi tetingilosi letimkhonta ngekwetsembeka. Letinye tingilosi letiholwa nguSathane tahlubuka kuJehova, futsi nyalo tidukisa bantfu. Ngetulu kwaloko, linani lelincane lebantfu liye ‘lahlengwa,’ nobe lakhetfwa emhlabeni kute lifeze imitfwalo lekhetsekile ezulwini. Sicabanga ngaloku, asesihlolisise kutsi ngubani lesingachumana naye endzaweni yemoya nekutsi loku kufanele sikwente njani.