Biblia kinkawaniyan xlakata espíritus

KALAKAPI kʼakgapun chu liwana kakgaxpatti: maski lu naʼakxilha akgapun, nikxni katiʼakxilhti chu ni katikgaxpatti natachuwinanan chatum espíritu. Pero anta wilakgolh lakgskgalalan chu lakgtliwakga espíritus, kgalhikgo xtukuwanikan chu tanu tanu xtayatkan, makgapitsi tlan likatsikgo chu makgapitsi ni tlan likatsikgo. Chu xputumkan skgalalh akxilhmakgolh tuku tlawamaw.

Biblia wan pi Dios chatum espíritu chu kgalhi xtukuwani, Jehová, nema tlawa pi nalilakgapaskan xlakata lhuwa dioses anan nema ni xaxlikana (Salmo 83:18; Juan 4:24). «Kintikukan Dios [Jehová] snun lanka y tliwekge, minini namakglhtinan wakg kintalakgachixkuwinkan y lhuwa likaknit, wata wa xastaknan Dios y niti achatum. Porque wakg dioses nima talipawan ti xala nak alakatunu pulataman, nama ídolos y nitu talimakwan, wata kiDioskan tlawalh akgapun. Snun likaknit [...], [xtemplo] snun litsama ixlitliwakge y ixlilanka.» (Salmo 96:4-6.)

Tuku katsiyaw xlakata espíritus

Chuna la wan Biblia, «Dios, [niti] aʼukxilha» (Juan 1:18). Chuna la akxni wi tiku ni lakawanan akxni lakachin, ni lakgapasa colores, nachuna ni para chatum lataman akgatekgsa la xlilanka chu xlitliwakga Dios. Jehová lu tlan masiyaninan chu maklakaskin tachuwin nema lakapala akgatekgsaw xlakata nakinkamasiyaniyan xlakata espíritus nema nila kaʼakxilhaw. Anta kxTachuwin lichuwinan lhuwa tuku kamaʼakxilhnilh xlakskujnin xlakata espíritus chu tuku kilikatsitkan xlakata espíritus. Kaʼakxilhwi tuku kamaʼakxilhnika makgapitsi xlakskujnin Dios.

Makgtum, palakachuwina Ezequiel akxilhli xlilanka Jehová. Akxni lichuwinalh tuku akxilhli, lichuwinalh zafiro, chamakxkulit, lhkuyat chu tuku lu xmakgskgo. Apóstol Juan akxilhli Jehová xwi kxputawilh xalak akgapun, chu wa pi Dios «xtachuna xtasiyu nchiwix wa ntu wanikan jaspe, chu na xtachuna sardio», chu «akgtum chamakxkulit xwi kxtuntamakni laktawilh, luwa xtachuna esmeralda». ¿Tuku kinkamasiyaniyan uma tuku talichuwinan? Pi xlakatin Jehová tlan tamakgkatsi, ni anan taʼakglhuwit chu lu stlan (Apocalipsis [Revelación] 4:2, 3; Ezequiel 1:26-28).

Palakachuwina Daniel na wi tuku maʼakxilhnilh Dios. Akxilhli pi «pulakkaw, pulakkaw mil [ángeles] xyakgolh kxlakatin [Jehová]» (Daniel 7:10). ¡Lu stlan xtasiya! Maski kaj naʼakxilha chatum ángel kʼakgtum tamanixni max lu makgakglhanan, ¡kaj kalakpuwanti la max makgkatsilh Daniel akxni akxilhli lhuwa millones ángeles nema ni kgalhikgo talakgalhin!

Anta kBiblia makglhuwa kalichuwinan ángeles, max makgtutu ciento. Umakgolh lakgskgalalan  ángeles, nema tlan latachuwinan, makgasa kamaxkikgolh tamakatsinin makgapitsi latamanin. Uma tachuwin «ángel» xagriego chu xahebreo wamputun «makatsinina». Makgapitsi ángeles kawanikan serafín chu amakgapitsi querubín. Pero umakgolh ángeles ni wa latamanin tiku xlamakgolh kKatiyatni chu akxni nikgolh ankgolh kʼakgapun. Biblia wan pi Jehová katlawalh putum ángeles akxni nina xtlawakan chixku (Job 38:4-7).

Pero kalichuwinamparaw tuku akxilhli Daniel. Ángeles nema kaʼakxilhli xtamakxtumikgonit xlakata wi tuku lu xlakaskinka xʼama tatlawa: «chatum la xkgawasa chixku» talakatsuwilh kxputawilh Jehová, chu anta maxkika «tamapakgsin, chu lilanka chu pumapakgsin, xlakata kachikinin, pulaklhuwa kachikinin chu tanu tanu tachuwin putum naskujnikgo» (Daniel 7:13, 14). ¿Tiku uma nema wanikan «xkgawasa chixku»? Chatum tiku lu xlakaskinka liʼakxilhkan niku wilakgolh espíritus: Jesucristo nema lakastakwananita, tiku maxkika limapakgsin xlakata namapakgsinan kKatiyatni. Nialh makgas natawila xlakgxokgo putum mapakgsinanin xalak kkatiyatni chu namasputu putum tuku nitlan, talimaxkgen, tapatin, tajatat chu asta linin (Daniel 2:44).

Max akxni laksakka Jesús mapakgsina nawan, lhuwa millones xʼángeles Dios nema ni makgxtakgkgo lipaxuwakgolh, xlakata xlakan kinkapaxkikgoyan chu lakaskinkgo tlan nakinkakitaxtuniyan. Pero ni putum espíritus lipaxuwakgolh.

Nixatlan espíritus

Akxni katlawaka latamanin, chatum ángel tiku tlakg lhuwa limapakgsin xkgalhiputun. Lu xlakaskin nakakninanikan wa xlakata nialh kgalhakgaxmatli Jehová, chu lilakgapaska Satanás, uma tukuwani wamputun «Lakatayana». Wa tiku tlakg tlawa tuku nitlan chu wa  xapuxku xtalamakgasitsin Jehová Dios xapaxkina. Nachuna makgapitsi ángeles tatayakgolh Satanás. Biblia kalimapakuwi demonios, chu ni kapaxkikgo latamanin. Lhuwa tapatin, tuku nitlan tatlawa, tajatat, talimaxkgen chu guerras chuna lama xlakata demonios makilhtsukikgo tuku nitlan.

Lhuwa ksikulan nialh lu lichuwinankgo Satanás, pero Biblia kinkawaniyan xlakata uma espíritu. Kawiliw akgtum liʼakxilhtit, libro xla Job kinkawaniyan la likatsi chu tuku tlawaputun. «Chu chaʼalh kilhtamaku akxni xkamanan xaxlikana Dios ankgolh kxlakatin Jehová, chu asta Satanás na anta tanucha.» ¿Tuku tlawalh alistalh? Nipara tsinu limaxanalh akxni wa pi Job ni xmakgxtakga Dios kaj xlakata lhuwa tuku xmaxkikan. Xlakata nalimasiya pi xlikana tuku xkilhwama, lhuwa tuku limapatinilh Job: makgnilh putum xwakax, kamakgnilh kgalhkaw xkamanan, tlawalh pi kapasalh akgtum lu xalixkajni tajatat, putuminika xmakni taxtunilh tsitsi. Pero maski lhuwa tuku nitlan tlawanilh, Job ni makgxtakgli Dios (Job 1:6-19; 2:7).

Lhuwa tuku xlakata Jehová nina malakgsputu Satanás, pero liwana katsiyaw pi nialh lhuwa kilhtamaku tsankga. Chuna kanajlayaw xlakata tuku akxilhka xlakata espíritus nema talichuwinan klibro xla Apocalipsis, katsiyaw pi lakkaxwilikanita tuku natlawanikan. ¿Tuku lalh? «Alistalh yuma lipikua ntiʼanalh ntatalatlawan nkakgapun; wa cha Miguel [Jesucristo, nema lakastakwananita], chu xʼángeles xtalatlawamakgo luwa wa ntu nkgalhiy xpakgan [Satanás]; cha nchu wa luwa, chu xʼángeles, na chuna ntamakgapuspitkgolh. Wampi ni makalakgolh, na niʼalh tatakgsli xputawilh nkakgapun. Pus chi titamakaxtuka yama ntlanka luwa ntu nkgalhiy xpakgan, wa ntu watiya xamakgan luwa wa nti wanikan Akgskgawini xawa Satanás, wa cha nti akgskgawi xlipaks ntachixkuwitat; anta nkatuxawat ntimakankaj, na paks titamakankgoka xʼángeles.» (Apocalipsis 12:7-9.)

La uku, xlakata Akgskgawini makaminka kKatiyatni, kaʼakgskgawima latamanin. ¿La tlawa? Malakgatumi taʼakgsanin xla nixaxlikana takanajla nema tlawa pi natamakgatliniyaw Jehová chu ni nakatsiyaw tuku xlikana masiya Biblia. Akgtum taʼakgsanin nema tlakg talakgatuminit wa pi akxni niyaw anaw latamayaw kxpulatamatkan espíritus. Kalichuwinaw akgtum liʼakxilhtit, kʼÁfrica chu kʼAsia, lhuwa kanajlakgo pi akxni nanikgo akxtum natatawilakgo xnatlatni kxpulatamatkan espíritus. Kʼalakatanu kachikin kanajlakgo pi anan pupatin, chu chuna kanajlakgo xlakata lakpuwankgo pi wi tuku ni niy akxni niyaw.

¿Ankgo kʼakgapun putum tiku tlan likatsikgo?

Pero ¿tuku anan kʼakgapun? Lhuwa lakpuwankgo pi putum tiku tlan likatsikgo ankgo kʼakgapun. Pero kaj xataputlakgen latamanin tiku ankgo kʼakgapun chu ni malakgchani la xlilhuwa tiku nikgonitta. Biblia kinkawaniyan pi kaj 144,000 “wa nti kalakmaxtukanit kxlakgstipankan ntachixkuwitat” o latamanin. Chu ¿tuku naʼankgo tlawakgo? Nakamapakgsikgo latamanin chu sacerdotes nalitaxtukgo (Apocalipsis 5:9, 10; 14:1, 3). Umakgolh latamanin natamapakgsinankgo Jesucristo tiku litaxtu «xkgawasa chixku» nema lichuwinawa, akgtum tamapakgsin xalak akgapun: xTamapakgsin Dios. Uma tamapakgsin namalakgsputu Satanás chu xdemonios chu natlawa pi Katiyatni akgtum paraíso nawan. Nachuna lhuwa tiku nikgonitta nalakastakwanankgo chu nakamaxkikan talakaskin nalakgpalikgo xtayatkan xlakata putum kilhtamaku nalatamakgo kxakalipaxaw katiyatni (Lucas 23:43).

Chuna la akxilhwi, tlan nawanaw pi anan pulaktu niku wilakgolh lhuwa millones espíritus. Jehová tiku katlawalh putum tuku staknan wa xapuxku. Na wilakgolh lhuwa millones ángeles nema ni makgxtakgkgo. Na wilakgolh Satanás chu xdemonios: ángeles tiku nialh kgalhakgaxmatkgolh Jehová chu tlawaputunkgo pi nialh nastalaniyaw Dios. Chu xaʼawatiya, na wilakgolh makgapitsi “wa nti kalakmaxtukanit kxlakgstipankan ntachixkuwitat”, xlakata wi tuku lu xlakaskinka natlawakgo kʼakgapun. Wilakgolh lhuwa espíritus, pero ¿tiku tlan nakatachuwinanaw? ¿Chu la natlawayaw? Kaʼakxilhwi.