Swivono Leswi Kombiweke Vaprofeta

KU NGA khathariseki nkarhi lowu u nga wu hetaka u langute etilweni, a wu nge pfuki u swi vonile swivumbiwa swa moya. Hambi wo ringeta ku yingiserisisa, a wu nge twi nchumu. Kambe u nga tiyiseka leswaku swi kona. Hambileswi swi nga ni matimba naswona swi nga tlhariha swinene, swi ni mavito ni vumunhu byo hambana-hambana. Swin’wana swi hi endlela leswinene; kasi swin’wana swi lava ku hi vavisa. Kambe hinkwaswo ka swona swi hi langutile.

Xikwembu xa ntiyiso i Moya. (Yohane 4:24) Vito ra xona leri nge Yehovha, ri xi hambanisa ni swikwembu swa mavunwa. (Pisalema 83:18) Mupisalema u te: “Yehovha [u] nkulu naswona u fanele a dzunisiwa swinene. Wa chaviseka ehenhla ka swikwembu leswin’wana hinkwaswo. Hikuva hinkwaswo swikwembu swa vanhu i swikwembu leswi nga pfuniki nchumu; kambe loko ku ri Yehovha, u endle matilo. Xindzhuti ni ku vangama swi le mahlweni ka yena; ntamu ni ku saseka swi le vukwetsimelweni byakwe.”—Pisalema 96:4-6.

Swivono Leswi Humaka Eka Xikwembu Xa Ntiyiso

Bibele yi hi byela leswi: “A ku na munhu la tshameke a vona Xikwembu.” (Yohane 1:18) Ndlela leyi xi langutekaka ha yona ni ndlela leyi xi vangamaka ha yona a hi nge yi twisisi, hilaha swi nga hakona eka munhu la velekiweke a ri bofu naswona a nga yi tiveki mivala. Mudyondzisi lonene a nga swi kota ku hlamusela vana va xikolo mhaka leyi rharhanganeke lerova va kala va yi twisisa. Swi tano ni hi Xikwembu, hi ku tirhisa Rito ra xona, ku nga Bibele, xi hi hlamusela swilo leswi hi nga ta ka hi nga swi voni, kambe hi nga swi vonaka hi mahlo ya mianakanyo. Hi ku tirhisa swivono leswi kombiweke malandza ya khale yo tshembeka, Yehovha u hi pfuna leswaku hi vona xivandla xa moya hi mahlo ya mianakanyo naswona hi twisisa vuxaka lebyi hi nga na byona ni swivumbiwa leswi tshamaka kwalaho.

Hi xikombiso, xivono xin’wana lexi kombiweke Ezekiyele xi fanisa ku vangama ka Yehovha ni ndzilo, ribye ra safiri ni nkwangulatilo. Eka xin’wana, muapostola Yohane u vone Yehovha a ri exiluvelweni xakwe kutani a vula leswaku Xikwembu xi “fana ni ribye ra yaspere ni ribye ra risima ra muhlovo wo tshwuka.” Ku engetela kwalaho, u tlhele a vona “nkwangulatilo lowu rhendzeleke xiluvelo, lowu langutekaka ku fana ni emeralda.” Tinhlamuselo leti ti swi veka erivaleni leswaku ndlela leyi Yehovha a langutekaka ha yona a yi hlamuseleki.—Nhlavutelo 4:2, 3; Ezekiyele 1:26-28.

Yehovha u tlhele a komba muprofeta Daniyele xivono lexi eka xona a voneke ‘tintsumi ta 10 000 ti andzisiwe ka 10 000 leti a ti tshama ti yime emahlweni ka Yehovha.’ (Daniyele 7:10) Sweswo  swi fanele swi n’wi hlamarisile! Hambi ku ri ku vona ntsumi yin’we exivonweni swa hlamarisa, kambe hi mahlo ya mianakanyo, ringeta ku vona makume ya magidi ya tintsumi leti hetisekeke!

Tintsumi ti boxiwa minkarhi ya kwalomu ka 400 eBibeleni naswona ti katsa tiserafi ni makerubu. Rito ra Xigriki ni ra Xiheveru leri hundzuluxeriweke ri va “ntsumi,” eBibeleni ri vula “murhumiwa.” Xisweswo, tintsumi ta vulavurisana naswona enkarhini lowu hundzeke ti tshame ti vulavula ni vanhu. Kambe a ti si tshama ti hanya laha misaveni. Yehovha u ti vumbe emahlweni ko va a vumba vanhu.—Yobo 38:4-7.

Exivonweni xa Daniyele, tintsumi ta ntsandza-vahlayi a ti hlengeletanile leswaku ti ta vona xiendlakalo xa nkoka swinene. Kwalaho Daniyele u vone “loyi a fanaka ni n’wana wa munhu” a tshinela exiluvelweni xa Yehovha leswaku a ta nyikiwa “ku fuma ni xindzhuti ni mfumo, leswaku vanhu, vanhu va matiko ni tindzimi hinkwato va n’wi tirhela.” (Daniyele 7:13, 14) “N’wana wa munhu” u ni vutihlamuleri lebyikulu exivandleni xa moya, naswona i Yesu Kreste la pfuxiweke, loyi a nyikiweke vulawuri emisaveni hinkwayo. Mfumo wakwe wu ta siva tihulumendhe hinkwato ta vanhu naswona wu ta herisa vuvabyi, maxangu, ntshikilelo, vusiwana ni rifu.—Daniyele 2:44.

Ku vekiwa ka Yesu exiluvelweni swi tise ntsako lowukulu eka tintsumi to tshembeka ta ntsandza-vahlayi leti lavaka leswaku vanhu swi va fambela kahle. Kambe lexi twisaka ku vava hileswaku a hi tintsumi hinkwato leti a ti tsakile.

Valala Va Xikwembu Ni Vanhu

Eku sunguleni ka matimu ya vanhu, yin’wana ya tintsumi yi navele ku gandzeriwa hiloko yi xandzukela Yehovha kutani yi tiendla Sathana,  leswi vulaka “Mukaneti.” A ku na munhu la hombolokeke ku fana na Sathana mukaneti lonkulu wa Yehovha, loyi a nga xikombiso lexinene xa rirhandzu. Tintsumi tin’wana ti xandzuke na Sathana naswona Bibele yi ti vitana madimona. Ku fana na Sathana, madimona ma tihundzule valala lavakulu va vanhu. Hi wona lama vangaka ku xaniseka ko tala loku hi ku vonaka laha misaveni, loku katsaka vuhomboloki, vuvabyi, vusweti ni tinyimpi.

Hambileswi tikereke to tala ta Vujagana ti nga ha vulavuriki ngopfu hi Sathana, buku ya Bibele ya Yobo yi hi byela swo tala hi yena nileswi endleke leswaku a xandzuka. Yi ri: “Hiloko ku fika siku leri vana va Xikwembu xa ntiyiso va nga nghena ha rona va yima emahlweni ka Yehovha, kutani na Sathana a nghena . . . xikarhi ka vona.” Eka mbulavurisano lowu landzeleke, Sathana u hehle Yobo hi ku vula leswaku u tirhela Xikwembu hikwalaho ka swilo leswi xi n’wi endlelaka swona. Leswaku a tiyisekisa mhaka yakwe, Sathana u vangele Yobo nhlomulo hi ku dlaya swifuwo swakwe ni vana vakwe va khume. Endzhaku ka sweswo, u hlasele miri wa Yobo hinkwawo hi marhumba yo vava. Kambe leswi hinkwaswo swi ve nyuku wa mbyana.—Yobo 1:6-19; 2:7.

Ku ni swivangelo leswi twalaka leswi endleke leswaku Yehovha a nga n’wi lovisi hi nkarhi wolowo Sathana Diyavulosi. Kambe u ta n’wi lovisa ku nga ri khale. Magoza man’wana yo n’wi lovisa se ma tekiwile naswona ma hlamuseriwa ebukwini ya Nhlavutelo. Yi ri: “Ku tlhekeka nyimpi etilweni: Mikayele [ku nga Yesu Kreste la pfuxiweke] ni tintsumi ta yena va lwa ni dragona [Sathana], dragona yona yi lwa yi ri ni tintsumi ta yona kambe a yi hlulanga, naswona ndhawu ya vona a ya ha kumekanga etilweni. Hiloko dragona leyikulu yi lahleriwa ehansi, nyoka ya khale, leyi vuriwaka Diyavulosi na Sathana, leyi xisaka misava hinkwayo leyi akiweke; yi lahleriwa ehansi emisaveni, ni tintsumi ta yona ti lahleriwa ehansi na yona.”—Nhlavutelo 12:7-9.

Xiya leswaku Sathana hi yena la “xisaka misava hinkwayo leyi akiweke.” U hambukisa vanhu hi ku va hlohlotela leswaku va dyondzisa tidyondzo ta mavunwa malunghana ni vukhongeri leswaku va nga vi na vuxaka na Yehovha ni Rito rakwe. Man’wana ya mavunwa yakwe hileswaku loko munhu a fa u ya exivandleni xa moya. Ku ni swilo swo hambana-hambana leswi vuriwaka malunghana ni mhaka leyi. Hi xikombiso, eAfrika ni le Asia, vanhu vo tala va vula leswaku loko vanhu va fa va ya hanya ni vakokwa wa vona. Dyondzo ya pagatori ni ya tihele ti seketela mhaka ya leswaku munhu u hambeta a hanya endzhaku ka rifu.

Xana Loko Vanhu Va Fa Va Ya eTilweni?

Ku vuriwa yini hi dyondzo leyi vanhu va timiliyoni va pfumelaka eka yona ya leswaku vanhu hinkwavo lavanene va ya etilweni loko va fa? I ntiyiso leswaku va kona vanhu lavanene lava nga ta ya etilweni kambe nhlayo ya vona i yitsongo swinene loko yi ringanisiwa ni tibiliyoni ta vanhu lava se va feke. Bibele yi vula leswaku vanhu va 144 000 “lava xaviweke emisaveni” va ta va “vaprista” ni “tihosi emisaveni.” (Nhlavutelo 5:9, 10; 14:1, 3) Vona swin’we ni N’wana wa munhu, ku nga Yesu Kreste, va ta vumba hulumendhe ya le tilweni, ku nga Mfumo wa Xikwembu. Xisweswo, hulumendhe yoleyo yi ta lovisa Sathana ni madimona yakwe naswona yi ta endla misava yi va paradeyisi. Vanhu vo tala lava feke va ta pfuxiwa hi nkarhi lowu faneleke leswaku va hanya hilaha ku nga heriki eParadeyisini leyi nga ta va kwala misaveni.—Luka 23:43.

Ku ni swivumbiwa swo tala swa moya leswi nga exivandleni xa moya. Lexikulu eka swona hinkwaswo i Yehovha Xikwembu, Muvumbi wa swilo hinkwaswo leswi hanyaka. Ku ni makume ya magidi ya tintsumi to tshembeka leti n’wi tirhelaka. Tintsumi tin’wana leti rhangeriwaka hi Sathana ti xandzukele Yehovha naswona ntirho wa tona i ku hambukisa vanhu. Ku engetela kwalaho, yi pimiwile nhlayo ya vanhu lava “xaviweke” kumbe lava hlawuriweke laha misaveni leswaku va ya hetisisa vutihlamuleri byo hlawuleka etilweni. Sweswi a hi kambisise leswaku i mani loyi ku nga vulavuriwaka na yena exivandleni xa moya naswona hi nga vulavula na yena njhani.