Lekel ki nou devret kominik avek?

BONDYE TOU PWISAN in konfye serten responsabilite avek bann lanz. Par egzanp, sa responsabilite pour diriz later in donn avek Zezi Kri e in apwent bann lanz fidel pour ede diriz sa travay pour anons sa bon nouvel. (Revelasyon 14:6) Me i totalman diferan avek lapriyer. I pa’n donn personn sa responsabilite pour ekout lapriyer. Nou lapriyer i devret ganny adrese direkteman avek Bondye li menm.

Zeova i sa Enn ki “ekout lapriyer.” (Psonm 65:2) I ekout nou lapriyer e i reponn zot. Konsernan lapriyer, zapot Zan ti ekrir bann serviter Zeova: “Si nou demann keksoz dapre son lavolonte, [Bondye] pou ekout nou. Alor, si nou konnen ki i ekout nou dan nenport kwa ki nou demande, nou konnen ki nou posed deza sa ki nou’n demande.”—1 Zan 5:14, 15.

Bann lanz fidel pa anvi ki nou esey kominik oubyen priy avek zot. Zot konpran e korpere avek sa laranzman ki Bondye in met an plas konsernan lapriyer. Parfwa zot menm enplike direkteman dan sa laranzman. Dan ki fason? Bon, kan profet Danyel ti priy Zeova konsernan Zerizalenm ki ti’n ganny dezerte, Bondye ti reponn lapriyer Danyel par anvoy  lanz Gabriyel avek en mesaz pour ankouraz li.—Danyel 9:3, 20-22.

Eski nou kapab ganny mesaz sorti kot bann ki’n mor?

Eski nou devret esey kominik avek bann dimoun ki’n mor? I annan en kantite zistwar kot dimoun in swadizan koz avek lespri bann dimoun mor. Par egzanp, en madanm Irlann ti ganny kontakte par en dimoun ki envoke. Sa dimoun ti dir li, ki son swar avan, i ti’n ganny en konversasyon avek son msye Fred. Me pourtan Fred ti’n mor detrwa semenn avan. Sa dimoun ki envoke ti konmans rakont li sa ki “Fred” ti’n dir li lo bann keksoz ki son madanm ti krwar zis li ki ti okouran. Pa i ti pou’n vreman fasil pour sa madanm krwar ki Fred i ankor vivan kekpar e ki i ti pe esey kominik avek li atraver sa dimoun! Me sa konklizyon pa an armoni avek sa ki Labib i klerman dir lo kondisyon bann dimoun mor.—Vwar bwat.

Ki mannyer nou kapab eksplik bann tel keksoz parey? En zouti ki bann demon i servi pour anbet dimoun i par fer krwar ki zot menm zot sa bann dimoun ki’n mor. Dan sa ka zot ti pe fer krwar ki Fred i ankor vivan. Avek ki bi zot fer sa? Pour fer dimoun pa krwar dan sa ki Labib i dir e pour afeblir zot lafwa ek konfyans dan Zeova. San dout, Satan ek son bann demon i “fer tou sort mirak ek bann trik pour tronp dimoun . . . servi lemal dan tou sort kalite fason pour tronp bann ki’n destinen pou ganny detri.”—2 Tesalonisyen 2:9, 10.

Sa i sir, i annan dimoun ki envoke e i annan  bann ki asosye avek zot ki senserman krwar ki zot pe kominik avek bann dimoun ki’n mor. An realite, si zot pe kominik avek okenn dimoun, se bann lanz ki opoz Zeova ki zot pe kominik avek. Pareyman, i annan bann dimoun ki krwar ki zot pe ador Bondye me zot in tronpe. Zapot ti ganny enspire pour ekrir sa lavertisman byen enportan: “Sakrifis ki bann payen i ofer, zot ofer li avek bann demon, non pa avek Bondye.”—1 Korentyen 10:20, 21.

Akoz nou pou anvi priy avek en lot dimoun kan nou konnen ki nou kapab priy avek sa Enn Siprenm ki kontan nou e ki enterese avek nou? Apre tou, Labib i donn nou sa lasirans: “An sa ki konsern Zeova, son lizye pe ale vini partou lo later pour li montre son lafors an faver bann ki zot leker i tou pour li.”—2 Kronik 16:9.

[Portre lo paz 9]

Akoz nou pou anvi priy avek en lot dimoun kan nou konnen ki nou kapab priy avek sa Enn Siprenm ki kontan nou e ki enterese avek nou?

[Portre lo paz 8]

Vre oubyen fo?

SATAN I VREMAN EGZISTE: VRE

“Satan limenm i degiz konman lanz lalimyer.”—2 Korentyen 11:14.

“Reste vizilan e vey byen. Zot lennmi, dyab pe pas partou konman en lyon ki kriye, pe rode ki i pou devore.”—1 Pyer 5:8.

“Sa ki fer pese i apartenir a dyab, parski dyab in fer pese depi okonmansman!”—1 Zan 3:8.

“Soumet zot avek Bondye, me reziste kont Dyab e i ava sov lwen avek zot.”—Zak 4:7.

“Dyab . . . depi okonmansman i en kriminel, i pa’n zanmen kontan laverite, akoz napa laverite dan li. Ler i koz manti, i koz selon son natir, akoz i manter e papa tou mansonz.”—Zan 8:44.

TOU DIMOUN KI MOR I AL DAN LESYEL: FO

“Ou pou transpire pour ganny ou dipen ziska ou retourn dan sirfas later, parski ladan menm ki ou ti sorti. Parski ou lapousyer e ou pou retourn dan lapousyer.”—Zenez 3:19.

“Bann vivan i konnen ki zot pou mor, me bann mor, zot pa konn nanryen ditou.”—Eklezyast 9:5.

“Tou sa ki ou lanmen i trouve pour fer, fer li avek ou lafors, parski napa ni travay, ni plan, ni konnesans, ni lasazes dan Seol [latonm] sa landrwa kot ou pe ale.”—Eklezyast 9:10.

“Son lespri i sorti, i retourn dan son sirfas later, sanmenm sa zour son bann panse i disparet.”—Psonm 146:4.

BANN LANZ FIDEL I ENTERESE AVEK NOU: VRE

“Lanz Zeova pe kanpe toultour bann ki annan lakrent pour li, e i sov zot.”—Psonm 34:7; 91:11.

“Pa zot bann lespri [oubyen lanz] ki servi Bondye, e ki ganny anvoye pour donn led tou bann ki devre ganny sove?”—Ebre 1:14.

“Mon ti war en lot lanz pe anvole atraver lesyel, avek en levanzil eternel pour anons tou zabitan later, tou nasyon, tribi, lalang ek pep. I ti kriy avek en lavwa for: ‘Donn Bondye loner e rann li glwar.’”—Revelasyon 14:6, 7.

ZEZI I EGAL AVEK BONDYE: FO

“Mon oule ki zot konpran ki Kris i sef tou zonm, ki en mari i sef son madanm e Bondye i sef Kris.”—1 Korentyen 11:3.

“Kan tou keksoz in ganny soumet avek Kris, alor Garson limenm, i a soumet son lekor avek sa enn ki’n soumet tou keksoz avek li, e alor Bondye i ava tou pour tou dimoun.”—1 Korentyen 15:28.

“An verite, an verite, Garson pa kapab fer nanryen lo limenm, i fer sa ki i war son Papa pe fer.”—Zan 5:19.