Beto Fwete Solula ti Nani na Insi ya Bampeve?

NZAMBI NKWA-NGOLO mepesaka mikumba yankaka na bigwangwa yankaka ya kimpeve. Mu mbandu, yandi mepesaka kiyeka ya kuyala ntoto na Yezu Kristu, mpi yandi meponaka bawanzyo ya kwikama sambu na kutwadisa kisalu ya kuzabisa nsangu ya mbote. (Kusonga 14:6) Kansi, yandi mesalaka ve mutindu yina sambu na bisambu. Yandi mepesaka ve kigangwa yankaka mukumba ya kuwa bisambu. Beto fwete samba kaka Nzambi yandi mosi.

Yehowa kele muntu ya “ke ndimaka bisambu ya bantu.” (Nkunga 65:3) Yandi kewaka bisambu na beto, mpi kepesaka mvutu. Sambu na yina metala kisambu, ntumwa Yoane kusonikilaka banduku na yandi bansadi ya Yehowa nde: “Kana beto ke lomba konso kima bonso kele luzolo na yandi, beto zaba mbote nde [Nzambi] ke wila beto. Kana beto zaba nde yandi ke waka mambu yonso ya beto ke lombaka na yandi, beto zaba mpi nde beto ke bakaka mambu yina ya beto ke lombaka yandi.”​—1 Yoane 5:14, 15.

Bawanzyo ya kwikama kezolaka ve nde beto sosa kusolula ti bo to nde beto samba bo. Bo kebakisaka mpi kesalaka kumosi ti ngidika yina Nzambi mebakaka sambu na kisambu, yina ketadilaka bo mbala mosi bantangu yankaka. Na nki mutindu? Ntangu profete Daniele kusambaka Yehowa na yina metala lufwa ya Yeruzalemi, Nzambi kupesaka Daniele mvutu na kutindaka wanzyo Gabriele ti nsangu mosi ya kepesa kikesa.​—Daniele 9:3, 20-22.

 Bansangu ya mekatuka na bafwa?

Keti beto fwete meka na kusolula ti bantu yina mefwaka? Masolo mingi ketubilaka masolo yina bo keyindulaka nde bantu kusolulaka ti bampeve ya bafwa. Mu mbandu, nkento mosi na Irlande kusolulaka ti nganga-ngombo mosi, yina kuzabisaka yandi nde na mpimpa ya meluta, yandi solulaka ti Fred, bakala ya nkento yango. Kansi, Fred kufwaka mwa bamposo meluta. Nganga yango kuzabisaka yandi mambu yina “Fred” kutubaka, mambu yina nkento na yandi vandaka kundima nde yandi kaka muntu kuzabaka yo. Yo zolaka kuvanda pete mpenza sambu yandi ndima nde Fred kuvandaka na luzingu na insi ya bampeve mpi vandaka kusala ngolo sambu na kusolula ti yandi na nzila ya nzenza yina. Kansi, bangindu yai kewakana ve ti mambu yina Biblia ketubaka pwelele na yina metala nkadilu ya bafwa.​—Tala lupangu yai kele na nsi.

Ebuna, inki mutindu beto lenda tendula masolo ya mutindu yai? Kisadilu mosi ya bademo kesadilaka sambu na kukusa bantu kele kudimonisa bonso muntu yina kufwaka, na mbandu yai, bo kudimonisaka bonso Fred. Lukanu na bo kevandaka inki? Lukanu na bo kevandaka ya kunata bantu na kubuya mambu yina Biblia kelongaka mpi na kulembisa lukwikilu ti ntima ya bo ketulaka na Yehowa. Kukonda ntembe, Satana ti bademo na yandi kekusaka bantu na nzila ya “mambu ya kuyituka ya mutindu na mutindu ti ya luvunu. Yandi [kesadilaka] mambu ya mbi ya mutindu na mutindu sambu na kukusa bantu yina ta vila.”​—2 Tesalonika 2:9, 10.

Ya kyeleka, kele ti banganga-ngombo mpi bantu yina kesalaka kumosi ti bo yina kekwikilaka  mpenza nde bo kesolulaka ti bantu yina mefwaka. Na kutuba ya kyeleka, kana bo kesolulaka ti konso muntu yina, bo kesolulaka ti bampeve yina kewakanaka ve ti Yehowa. Mutindu mosi, kele ti bantu yina kekwikilaka nde bo kesambilaka Nzambi kansi bo kekudikusaka. Ntumwa Polo kusonikaka lukebisu yai ya ngolo na nsadisa ya mpeve santu: “Madia yina ya bamimpani me pesa makabu na mesa-kimenga na bo, bo me pesa yo makabu na bampeve ya mbi kansi na Nzambi ve.”​—1 Korinto 10:20, 21.

Mutindu beto zaba nde beto lenda samba Muntu ya Kuluta Yonso, yina kezolaka mpi kekebaka beto, sambu na nki beto tazola kusamba muntu yankaka? Nkutu, Biblia kendimisa beto nde: “Mfumu Nzambi ke talaka bantu yonso ya nsi-ntoto ya mvimba sambu na kusadisa bayina me kudipesaka na yandi mpenza.”​—2 Bansangu 16:9.

[Bangogo sambu na kubenda dikebi ya kele na lutiti 9]

Kuzaba nde beto lenda samba Muntu ya Kuluta Yonso, yina kezolaka mpi kekebaka beto, sambu na nki beto tazola kusamba muntu yankaka?

[Lupangu/Kifwanisu ya lutiti 8]

Mambu ya Kyeleka mpi ya Luvunu

DYAMBU YA KYELEKA: SATANA KELE MUNTU YA KYELEKA

“Satana yandi mosi mpi lunga kukusa nde yandi kele wanzio yina ke nata nsemo.”​—2 Korinto 11:14.

“Beno fweti kudiyala, beno fweti kangula meso na beno. Sambu mbeni na beno Satana ke kwendaka kuzieta bonso ntambu yina ke dila; yandi ke sosa muntu ya kudia.”​—1 Piere 5:8.

“Muntu yina ke salaka kaka masumu, yandi kele muntu ya Satana, sambu katuka na luyantiku, Satana ke salaka masumu.”​—1 Yoane 3:8.

“Yo yina beno lemfuka na Nzambi; beno vanda bambeni ya Satana, ebuna yandi ta tina beno, yandi ta kwenda ntama.”​—Yakobo 4:7.

“Katuka na luyantiku tii ntangu yai, [Satana] kele muntu ke fwaka bantu. Yandi ke zingaka na mambu ya kieleka ve, sambu mambu ya kieleka kele na yandi ve. Ntangu yandi ke tubaka luvunu, luvunu yina ke katukaka na ntima na yandi, sambu yandi kele muntu ya luvunu mpi tata ya luvunu.”​—Yoane 8:44.

DYAMBU YA LUVUNU: NA NIMA YA LUFWA BANTU YONSO KEKWENDAKA NA INSI YA BAMPEVE

“Na kubaka madia nge ta basikaka mutoki tii kuna nge ta vutuka na ntoto yina ya mono salaka nge. Sambu nge kele ntoto, nge ta vutuka mpi na ntoto.”​—Kuyantika 3:19.

“Bantu yina ke na moyo, bo ke zaba nde bo ta fwa; kansi bantu ya kufwa kuzaba kima ve.”​—Longi 9:5.

“Sala ngolo konso kima yina ya nge zola kusala; sambu na nsi ya bafwa [mazyamu] kisika ya nge ke kwenda, kisalu kele ve, ngindu kele ve, mayele mpi kele ve.”​—Longi 9:10.

“Ntangu bo ta fwa, bo ta vutuka na ntoto; na kilumbu yo yina bangindu na bo yonso ta suka.”​—Nkunga 146:4.

DYAMBU YA KYELEKA: BAWANZYO YA KWIKAMA KEKEBAKA BETO

“Wanzio ya Nzambi me ziungaka bantu yina ke lemfukaka na yandi, yandi ke katulaka bo na kigonsa.”​—Nkunga 34:8; 91:11.

“Bawanzio kele banani? Bo yonso kele bampeve yina ke sadilaka Nzambi, bayina ya yandi ke tindaka sambu na kwenda kusadisa bantu yina ta guluka.”​—Baebreo 1:14.

“Mono monaka wanzio ya nkaka ke kwenda kuluta na kati-kati ya zulu; yandi vandaka na nsangu ya mbote ya mvula na mvula sambu na kuzabisa na bantu ya nsi-ntoto, na bantu ya makanda yonso ti ya bandinga yonso ti ya bansi yonso. Yandi vandaka kutuba na ndinga ya ngolo nde: ‘Beno wa Nzambi boma, beno pesa yandi lukumu!’”​—Kusonga 14:6, 7.

DYAMBU YA LUVUNU: YEZU KELE KITESO MOSI TI NZAMBI

“Mono zola beno zaba nde Kristo kele mfumu ya konso muntu, bakala kele mfumu ya nkento na yandi, Nzambi kele mfumu ya Kristo.”​—1 Korinto 11:3.

“Ntangu Nzambi me tula bambeni na yandi yonso na nsi ya kiyeka ya Kristo imene, yandi mosi Mwana ta lemfuka na Nzambi yina me tulaka bima yonso na nsi ya kiyeka na yandi Mwana; mpidina Nzambi ta yalaka bima yonso mpenza.”​—1 Korinto 15:28.

“Mono ke tubila beno mambu ya kieleka: Mwana ke salaka ata mambu mosi ve na ngolo na yandi mosi; yandi ke salaka kaka mambu yina ya yandi ke monaka na Tata na yandi.”​—Yoane 5:19.