Tu Tena Kuzuela ni Athu a Tungu mu Nzumbi?

O NZAMBI MUTENI-IA-IOSO, ua bhana kikalakalu ku ji-anju. Mu kifika, Jihova, ua bhana o utuminu ua ngongo kua Jezú Kristu, ua bhana ué ku ji-anju, o kikalakalu kia ku kuatekesa o kuboka o njimbu iambote ia Nzambi. (Dijingunuinu 14:6) Maji o kuívua o misambu, ka ki bhana muthu. Muéne ka a tumina kuívua o misambu ietu. O misambu ietu tua tokala ngó ku i bhanga kua Nzambi.

Jihova muéne o ‘mukua kuívua o misambu.’ (Jisálamu 65:2) Muéne uivua o misambu ietu, ni ku itambuijila. Ia lungu ni musambu, o poxolo Nzuá ua sonekena o jiselevende ja mukua ja Jihova: “Kuma kima kioso ki tu mu bhinga, se kia xikina mu vondadi iê, [Nzambi u tuívua].” Mu kienhiki, etu tua k’jiia kuma muène u tuivua mu ioso i tu mu bhinga. O ki tuejiia kuila kiki kidi, tua k’ijiia ué kuma ioso i tu mu bhinga tu i tambula.”—1 Nzuá 5:14, 15.

Ki tua tokala ku samba ku ji-anju ja fiiele. Ene a belesela Nzambi ku maka alungu ni kuendesa o misambu. Mu ukexilu uebhi? Kioso o polofeta Daniiele kia sambe ia  lungu ni Jeluzaleme iexile kiphulungunzu kia hatu, Nzambi ua tambuijila o musambu, mu ku tumikisa o anju Ngabidiiele ni njimbu, phala ku mu suínisa.—Daniiele 9:3, 20-22.

O Kuila tu Tena Kuzuela ni Athu Afú?

O kuila tu tena kuzuela ni athu afú? Kuene misoso iavulu ilondekesa kuila kuene athu amba kuila, ene mu zuela ni athu afú. Mu kifika, saí muhatu mu ixi ia Irlanda, a mu sange ku kimbanda, iu ua mu ambela kuma ua zuela ni Alfredo, muadi uê uafú kua bhitile kiá semana jiiadi. O kimbanda, kia tangela o muhatu ua “Alfredo,” o maka ejidile ngó muéne ni muadi uê. Kiki kieji bhangesa o muhatu ku xikina kuila o nzumbi ia muadi uê, ia kexile ku muenhu ku mundu ua jinzumbi, iu ua mesenene kuzuela ni muhatu uê, mu kaxi ka kimbanda. Maji kiki, ki kiene ki longa o Bibidia, ia lungu ni athu afú. Tanga o kaxa iala ku luiji.

Kiebhi o misoso íii, kia tena ku i jimbulula? Iú ukexilu ua madimonho, ua ku nganala athu, mu ku a bhangesa o ku banza kuila athu afú kiá ala ni nzumbi, iala ku muenhu izuela kála ki tuevu mu maka a Alfredo. Mukonda diahi ene a bhanga kiki? A bhanga kiki, phala ku bhangesa athu ku dituna o milongi ia Bibidia, ni ku zozesa o kixikanu kia athu, ni ku bhangesa athu ku kamba ku dielela kua Jihova. Sé phata, Satanaji ni madimonho mê ene mu nganala o athu, ‘ni nguzu ioso ni iphata ni madiuanu a makutu, phala ku nganala athu oso a-nda ku texika.’—2 Tesalonika 2:9, 10.

 Ijiia-nakiu kuila, ki kale o imbanda, ni athu a sota o imbanda, a xikina muéne kuila ene mu zuela ni athu afú. Mu kidi, ene mu zuela muene ni athu, maji o athu enhá o madimonho, o jinguma ja Jihova. Kiene kimoxi ué, o athu ene mu banza kuila abhezi, a Nzambi, ene mu di nganala mudiâ. O poxolo Phaulu ua tu dimuna: “Kuma im’oio iene mú sata o matumbu, a i satela madimonho, ka i satela Nzambi.”—1 Kolindo 10:20, 21.

Mu kuijiia kuila tu tena ku samba kua Suke-ku ua tu zolo, ua mesena o mbote ietu, mukonda diahi tu mesena dingi ku samba ku muthu uéngi? O Bibidia i tu bhana o kidielelu kiki: “Jihova mesu mê ma bhita mu ngongo ioso, phala [kulondekesa] o ku suina kuê mu ku kudila ió oso ala ni muxima ua tenena kua muene.”—2 Malunda 16:9.

[Kilombuelelu ku bandu 9]

Mu kuijiia kuila tu tena ku samba kua Suke-ku ua tu zolo, ua mesena o mbote ietu, mukonda diahi tu mesena dingi ku samba ku muthu uéngi?

[Kilombuelelu/​Foto ku bandu 8]

Ilongesu ia Kidi, ni ia Makutu

ILONGESU IA KIDI: SATANAJI MUTHU UA KIDI

“[Satanaji] mukuâ ku di bhangesa kala anju ia mukengeji.”—2 Kolindo 11:14.

“Kalenu ku mesu azele, mu di lange! Kuma o nguma, Diabhu, ua di bhange, mukuâ ni hoji iala mu zuma, u nhunga jinga mu [jimbandu] jenu mu kusota uoso a mu dia.”—1 Phetele 5:8.

“Uoso u jijila kuta ituxi, ua tokala kua Diabhu, kuma o Diabhu mukua ituxi tundé ku dimatekenu dia mundu.”—1 Nzuá 3:8.

“Tolokenu kua Nzambi; zokenu-phe ni Diabhu, muéne u mi lenga.”—Tiiaku 4:7.

“O Diabhu, . . . kijibhanganga tunde ku dimatekenu dia mundu, o mu kidi ka nangiê-mu, mukonda moxi diê ki mu moneka kidi. Diabhu kia zuela o makutu, u zuela ima iê-muène, kuma kiene o kífua kiê! Mukonda muène mukua makutu, muène tata ia makutu oso.”—Nzuá 8:44.

ILONGESU IA MAKUTU: KIOSO ATHU KIA FUA A KITUKA JIMZUMBI KU DIULU

“Ku suualu ia pholo ié kuene ku a kà dia o mbolo ié, katé ki ua kà vutuka ku mavu.”—Dimatekenu 3:19.

“Kuma ió oso ala ni muenhu ejiia kuila a-nda kúfua, maji o ió afu kiá k’ejiia dingi kima kioso-kioso.”—Ndongixi 9:5.

“Kioso kia kuiza bhu maku phala ku ki bhanga, bhanga-kiu muene katé bhuoso bhua suku o nguzu ié, mukonda o mu mbila mu ua-nda kuia, kana-mu dingi kikalakalu, mba ufunu, mba uhete, mba kuijiia kuoso- kuoso.”—Ndongixi 9:10.

“Mukonda o an’athu o kubhuima kuâ kúbhua, ene anga a vutuka ku mavu; mu kizuua kienhókio, o ilunji ié ioso ia di boto.”—Jisálamu 146:4.

ILONGESU IA KIDI: O JI-ANJU JA FIIELE A MESENA O MBOTE IETU

“Anjo ia Jihova i kala jinga ku kilangidilu kia iá a mu kuatela uôma, hé u a kudila.”—Jisálamu 34:7; 91:11.

“O kiki-phe, ji-anju kima kiahi bhu pholo iê? Ene oso ala jinzumbi ji sedivila, a a tumu ku sedivisu mukonda dia ibhinganu ia tokala o kubhuluka.”—Jihebeleu 1:14.

“Anga ngi mona anju iamukua ia mu bhita bhulu, ia di lèka, o bhu ala kubhitila, uasu o mbambe ni diulu. Uambata o jingolokela ji xalelà-ku ja Njimbu Iambote, phala ku ji kolela athu oso a tungu mu ngongo, ku ifuxi ioso, ni madimi, ni madiembu. Anga u tanga ni dízui dia suina uixi: ‘Nzambi mu kuatedienu uôma, mu ximanienu o unéne uê!’”—Dijingunuinu 14:6, 7.

ILONGESU IA MAKUTU: JEZÚ NI NZAMBI MUTHU UMOXI NGÓ

“Maji nga mesena-phe mu k’ijiia kuma o diiala dioso, ua mu kala ku pholo Kristu; o muhatu ua mu kala ku pholo o diiala, o Kristu, ua mu kala ku pholo Nzambi.”—1 Kolindo 11:3.

“Maji kioso kia kà zubha ima ioso kutolokela Kristu, hé i kala bhoxi dia ungana uê, kiene ue kiua, o Mona muene, kia kà di tula bhoxi dia ungana ua Nzambi, ió ua tena kutolola o ima ioso, iú ua i tula bhoxi dia ungana ua Kristu. Kienhokio kiene kiua Nzambi kia kà kala mù tumina sé mbambe ku thandu dia ima ioso.”—1 Kolindo 15:28.

“Jezú anga u kuata dingi mù zuela, uixi: Kidi, kidi, ngi mi ambela: Mona ka tena kubhanga kima k’ubheka uê, kala u bhanga ngó ioso ia mona Tata kubhanga. Kuma ioso ima i bhanga Tata, ni Mona u i bhanga kiò-muene.”—Nzuá 5:19.