Wa Kwisamba Nandi mu Kīkalo kya Mishipiditu

LEZA Mwine Bukomo Bonso wāpele bipangwa bya ku mushipiditu bimo mingilo kampanda. Kimfwa i mupe Yesu Kidishitu Bulopwe bwa pano pa ntanda, ne i mutonge’ko bamwikeulu ba kikōkeji ba kukwasha mu mwingilo wa kusapula myanda miyampe. (Kusokwelwa 14:6) Inoko, milombelo i mwanda mukwabo. Kekudipo wapele kwivwana milombelo. Tulombelanga enka kudi Leza aye mwine.

Yehova ye “wivwananga kulombela.” (Mitōto 65:2) Wivwananga milombelo yetu, ne kwiilondolola. Mutumibwa Yoano wāsonekēle bakwabo ba mu mingilo ya Yehova pa mwanda utala milombelo amba: “Wivwane tulombe kintu, shi kika, shi kika, monka muswidile mutyima wandi, nankyo [Leza] witwivwana. Kadi shi tuyūkile’mba, witwivwananga ne byonso byo tulomba, nankyo tubayūka’mba ke tudi kala nabyo byakulomba byo twamulombele.”—1 Yoano 5:14, 15.

Bamwikeulu ba kikōkeji, kebasakengapo twisambe nabo nansha kulombela kobadi. Bayukile ne kulonda mpangiko ya Leza pa mwanda utala milombelo, mine ibatala ne abo bene. Mu muswelo’ka? Bine, mupolofeto Danyele pa kulombela Leza pangala pa masala a Yelusalema, Leza wālondolwele milombelo yandi na kutuma mwikeulu  Ngabudyele na musapu ukankamika.—Danyele 9:3, 20-22.

Le Misapu Itamba ku Bafu Nayo?

Lelo tufwaninwe kwisamba na boba bafwile? Kudi mānga mivule ilombola bantu banena amba besambile na mishipiditu ya bafu. Kimfwa mwana-mukaji wa mu Irlande wesambile na kilumbu, uno kilumbu wamulombola amba bwakya dyalelo’di nadi nesambe na obe mulume Fred. Aye papo Fred ke mufwe ke padi ne mayenga abala anga. Uno kilumbu, waendelela kufumika byadi binena “Fred,” myanda yadi ikulupile mukaja Fred amba wiiyukile kasuku kandi. I kipēla mukaja Fred kufula ku kunena amba mulumyandi i mūmi mu ntanda ya mishipiditu ne kukimba kwisamba nandi kupityila kudi uno mweni. Inoko kulanga namino i kupatanya byobya binena Bible patōkelela pa mwanda utala ngikadilo idi’mo bafwe.—Tala kapango kadi kunshi’ku.

Penepa, mānga ya uno muswelo ikokeja kushintululwa namani? Kingidilwa kimo kingidija bademona mwanda wa kongola bantu i kuvwala umbidi wa muntu mufwe, pamo na mobyaikadile kudi Fred. Kitungo kine? Kupalula bantu ku byobya bifundija Bible ne kuzozeja lwitabijo ne kikulupiji kyabo mudi Yehova. Ne kutatana kwine mpika, Satana ne bademona bandi bongolanga bantu “ne bukomo bonso, ne biyūkeno, ne bingelengele bya bubelabubela, ne bongojani bonso bwa bukondame bwa boba bakonakanibwa.”—2 Tesalonika 2:9, 10.

Pa kwitabija, bilumbu ne boba bapwene nabo batompanga kukulupija bantu amba  besambanga na bafu. Na bubine, shi besambanga na muntu kampanda, besambanga na mishipiditu ilwa na Yehova. Mu muswelo umo onka, kudi bantu bakulupile bya bubela amba batōtanga Leza. Mutumibwa Polo wālembele ku bukomo bwa mushipiditu kino kidyumu kisumininwe amba: “Bintu bitapa baJentaila, batapilanga bademona, ke Lezapo, mhm.”—1 Kodinda 10:20, 21.

Byotuyukile amba tubwanya kulombela kudi Mwine Mukatakata Mwine, witusenswe ne witutele mutyima, le kyotukasakila kadi kulombela kudi muntu mukwabo i kika le? Ne kadi, Bible witukulupija amba: “Meso a Yehova akeñenya kusambakanya ntanda yonsololo, konsokonso pi na pi, kwilomboja mukomo wa boba ba mutyima mubwaninine kwadi.”—2 Bilongwa 16:9.

[Bushintuludi pa paje 9]

Byotuyukile amba tubwanya kulombela kudi Mwine Mukatakata Mwine, witusenswe ne witutele mutyima, le kyotukasakila kadi kulombela kudi muntu mukwabo i kika le?

[Kapango/Kifwatulo pa paje 8]

Bubine ne Bubela

BUBINE: SATANA I MUNTU UDI’KO BINE

“Satana nandi wialamunanga aye mwine, kādi mwikeulu wa mu mwinya.”—2 Kodinda 11:14.

“Tūkijai mityima, tengelai, wimushikilwe, ke dyabola kadi, unangakana bwa ntambo ubuluma, ukimba wakubokota.”—1 Petelo 5:8.

“Ino yewa ulongalonga bubi i wa dyabola; ke-muntu aye dyabola ulōnanga bubi ne kungalwilo kwine.”—1 Yoano 3:8.

“Penepo kōkelai Leza; mumukomene dyabola, nandi ukemunyema.”—Yakoba 4:7.

“Dyabola . . . wadi ntapañani ne kungalwilo kwine, ne kwimanapo mu byabinebine, mpika, ke-muntu mwandi munda byabinebine mutupu’byo. Kadi pābepanga bubela i bwa aye mwine bwābepa, mwanda i wabubela, e enka shandya ne bubela bwine.”—Yoano 8:44.

BUBELA: BONSO BAFWA BENDANGA MU KĪKALO KYA MISHIPIDITU

“Ino ukamwena bidibwa byobe ku byanga bya ku mpala yobe, poso’nka ne byojoka ku biloba; mwanda e mo walupwilwe, ke-wi-muntu wi biloba, kabidi i kubiloba konka kokajokela.”—Ngalwilo 3:19.

“Bōmi bayukile’mba bakafwa; nanshi bafwe kebayukilepo nansha kimo kine.”—Musapudi 9:5.

“Byonsololo bitana dikasa dyobe kulongalonga’byo ne bukomokomo bobe, shi bika shi bika; ino kekudipo mingilo nansha kusambakanya bintu pamo miswelo ne miswelo, nansha kuyukidija, nansha ñeni mu kibundu koenda’kwa.”—Musapudi 9:10.

“Muya wandi wenda, walukila ku biloba byandi, mu dyodya difuku dimo dyonka mifwatakanyo yandi ībaoneka.”—Mitōto 146:4.

BUBINE: BAMWIKEULU BA KIKŌKEJI BETUTELE MUTYIMA

“Mwikeulu wa Yehova webēla umbukata bwa nsakwa boba bamwakaminwe, webanyongolola.”—Mitōto 34:7; 91:11.

“Lelo boba bonsololo [bamwikeulu] kebadipo bashipiditu bakwashi, batalwilwe kukwasha boba bakapyana lupandilo’ni?”—Bahebelu 1:14.

“Namwene mwikeulu mukwabo wipapa umbukata mwa mūlu, wa myanda-miyampe ya nyeke ya kusapwila bēkele panopantanda, ne mizo yonso, ne bisaka byonso, ne ndimi yonso, ne bantu bonso bēne kumo. Kadi wanena ne diwi dikatampe’mba: Akamwai Leza mumutumbike ntumbo.”—Kusokwelwa 14:6, 7.

BUBELA: YESU UDINGAKENE PAMO NA LEZA

“Nemusakila’mba, muyūke, mutwe wa mwana-mulume i Kidishitu; ino mutwe wa mwana-mukaji, i mulume, kadi mutwe wa Kidishitu nao, i Leza.”—1 Kodinda 11:3.

“Pa kunekenībwa bintu byonso kudi aye, ne Mwana mwine nandi ukamukōkela, enka aye wakunekenya bintu byonso kudi aye, mwanda wa kunena’mba, Leza ēkale wa byonso ne umbyonsololo.”—1 Kodinda 15:28.

“I binebine byo nemunena’mba: Mwana kayūkapo kwilongela kintu aye mwine, nansha kika, nansha kika, poso wamona Shandi ulonga’kyo.”—Yoano 5:19.