Thlarau Khawvêl Nêna Inbiakpawhna

PATHIAN ENGKIMTITHEIA chuan mawhphurhna eng engemawte chu thlarau thil siam dangte hnênah a pe a. Entîr nân, lei chunga rorêlna chu Isua Krista kutah a dah a; tin, vântirhkoh rinawmte chu chanchin ṭha hrilhna kaihruai tûrin a ruat bawk. (Thu Puan 14:6) Mahse, ṭawngṭaina erawh chu a danglam bîk a. Ṭawngṭaina ngaithla tûra mawhphurhna chu tu hnênah mah a pe lo. Kan ṭawngṭaina chu ama hnênah chauh kan hlân tûr a ni.

Pathian Jehova chu “ṭawngṭaina ngaithlatu” a ni a. (Sâm 65:2) Kan ṭawngṭainate chu a ngaithlain, a chhâng bawk a ni. Ṭawngṭaina chungchângah tirhkoh Johana chuan Jehova chhiahhlawh dangte hnênah heti hian a ziak a: “Engpawh a duhzâwng anga kan dîl chuan [Pathianin] min ngaihthlâksak ṭhin . . . tichuan engpawh kan dîl apiang min ngaihthlâksak tih kan hriat chuan a hnêna kan thil dîla chu kan hmu tawh tih kan hria a ni,” tiin.—1 Johana 5:14, 15.

Vântirhkoh rinawmte chuan anmahni biak pawh tum emaw, an hnêna ṭawngṭaina hlan emaw chu an duh lo. A chânga anmahni tel a ngaihna ṭawngṭaina chungchânga Pathian ruahmanna siam chu an hre thiamin, an thlâwp bawk a ni. Eng kawngin nge? Aw le, Jerusalem chhiatna chungchângah Jehova hnêna zâwlnei Daniela a ṭawngṭai chuan, Pathian chuan thu thlamuanthlâk tak pe tûra vântirhkoh Gabriela tîrin a chhâng a ni.—Daniela 9:3, 20-22.

 Mitthi Tawhte Hnên Aṭanga Thuchah?

Mitthi tawhte biak pawh chu kan tum tûr a ni em? Mitthi tawhte thlarau ni âwm takte nêna inbiakna chungchâng thu thang tam tak a awm a. Entîr nân, Ireland rama nu pakhat chu dawithiam pakhatin a zân hmasa khân chawlhkâr hnih thum vêl kaltaa thi tawh a pasal Fred-a nêna an inbiak thu a hrilh a ni. Chu dawithiam chuan amah chauhvin a hriat an nupa kâr thil chungchâng “Fred-a” thusawite chu a sawi chhâwng a ni. A nupui tân chuan Fred-a chu thlarau khawvêlah a la nung a, ramhuai zâwl kaltlangin rawn biak pawh a tum nia thu tâwp siam chu a awlsam hle ngei ang. Amaherawhchu, chutianga thu tâwp siam chuan mitthite dinhmun chungchânga Bible thusawi chu a kalh chiang hle dâwn a ni.—A hnuaia bâwm hi en rawh.

Chuti chu, engtin nge hetiang thilthlengte hi kan hrilhfiah tâk ang? Ramhuaite’n mite an bum dân kawng khat chu mitthi tawhte lema chan hi a ni a, tûn ṭumah chuan Fred-a lemah an chang a ni. Eng nge an tum chu? Bible zirtîrna aṭanga mite lâk pên leh Jehova an rinna leh rinchhanna tihchauhsak hi a ni. Rinhelhrual lohvin, Setana leh a ramhuaite chuan mite chu “thiltihtheihna tinrêng te, chhinchhiahna tinrêng te, dâwt thilmak tinrêng te . . . boral mêkte tân fel lohna bumna tinrêng nên” an bum a ni.—2 Thessalonika 2:9, 10.

Mitthite be pawp tak tak nia inhriatna nei ramhuai zâwlte leh an ṭhiante chu an awm tak zet a. A nihna takah chuan, mi  biak pawh an nei tak tak a nih pawhin, an biak pawh chu Jehova dodâltu thlaraute an ni. Chutiang bawkin, Pathian bia nia inhre sual an awm bawk. Tirhkoh Paula chu he vaukhânna thu khauh tak ziak tûra thlarauva thâwk khum a ni: “Jentailte inthawina chu Pathian lakah ni lovin, ramhuaiho lakah an inthawi ṭhîn a ni,” tiin.—1 Korinth 10:20, 21.

Min hmangaihtu leh min ngaihsaktu Chungnungbera hnêna kan ṭawngṭai theih avângin, engah nge mi dang hnênah kan ṭawngṭai duh tehrêng ang? Tihah chuan, Bible-in he thutiam thlamuanthlâk tak hi min pe si a: “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni,” tiin.—2 Chronicles 16:9. (w10-E 12/01)

[Phêk 9-naa thu lâk chhuah]

Min hmangaihtu leh min ngaihsaktu Chungnungbera hnêna kan ṭawngṭai theih avângin, engah nge mi dang hnênah kan ṭawngṭai duh tehrêng ang?

[Phêk 8-naa bâwm/milem]

Thu Dik leh Dik Lo

THU DIK: SETANA CHU A AWM TAK TAK

“Chu chu a mak lo ve; Setana meuh pawh êng tirhkohvah a insiam chawp si ṭhîn a.”—2 Korinth 11:14.

“Ngaihven ula, fîmkhur rawh u; in khingpui Diabola chu sakeibaknei rûm ṭhîn angin a ei theih tûr zawngin a phi ruai ṭhîn.”—1 Petera 5:8.

“Thil tisualtu chu diabolaa chhuak a ni; diabola chuan atîr ata thil a tisual si a.”—1 Johana 3:8.

“Chutichuan Pathian thu thuin awm rawh u; amaherawhchu Diabola dodâl rawh u, tichuan a tlân bosan ang che u.”—Jakoba 4:7.

“Diabola . . . chu atîr ata tualthat a ni, thutakah a awm lo, a chhûngah thutak rêng a awm loh avângin. Dâwt thu a sawiin ama tihchhuah a sawi a ni ṭhîn; dawthei a ni si, dâwt pa pawh a ni.”—Johana 8:44.

THU DIK LO: MI AN THIH HIAN THLARAU KHAWVELAH AN KAL VEK

“Leia i kîr leh hma loh chuan i hmaia thlantui luang zawih zawihin chaw i ei tawh ang; lei aṭanga lâk chhuah i ni si a: vaivut i ni a, vaivutah i kîr leh tûr a ni.”—Genesis 3:19.

“Mi nungdamte chuan an la thi dâwn tih an hre si a, mitthi erawh chuan engmah an hre lo.”—Thuhriltu 9:5.

“I kutin tih tûr a hmuh apiang chu theihtâwpin ti rawh; thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo.”—Thuhriltu 9:10.

“A thawin a chhuahsan a, ani chu a leilungah a kîr leh a; chu mi nî ngei chuan a ngaihtuahnate chu a bo nghâl a ni.”—Sâm 146:4.

THU DIK: VANTIRHKOH RINAWMTE CHUAN MIN NGAIHSAK

“Amah ṭihtute chu, an vêlah LALPA vântirhkoh chuan a awm chilh a, a chhanhim ṭhîn.”—Sâm 34:7; 91:11.

“Anni [vântirhkohte] zawng zawng chu rawngbâwlna thlaraute, chhandamna rochungtu tûrte tân rawngbâwl tûra tirh chhuah an ni lo vem ni?”—Hebrai 1:14.

“Leia awmte hnênah leh hnam tinrêng te, chi tinrêng te, ṭawng tinrêng te, mi tinrêng te hnêna tlângaupui tûra chatuana chanchin ṭha nei vântirhkoh dang vanlaizâwla thlâwk ka hmu a; tin, ani chuan aw ring takin, . . . ‘Pathian chu hlau ula, chawimawi rawh u,’ . . . a ti a.”—Thu Puan 14:6, 7.

THU DIK LO: ISUA CHUAN PATHIAN A TLUK

“Mipa tawh phawt lû chu Krista a ni, hmeichhe lû chu mipa a ni, Krista lû chu Pathian a ni tih in hriat ka duh a ni.”—1 Korinth 11:3.

“A hnuaia engkim dahin a awm hun chuan Fapa ngei pawh chu a hnuaia engkim dahtu hnuaiah chuan dahin a awm bawk ang, Pathian chu engkima engkim a nih theihna tûrin.”—1 Korinth 15:28.

“Tih tak meuhvin, tih tak meuhvin ka hrilh a che u, Fapain mahniin engmah a ti thei lo, Pa thiltih a hmuh chauh lo chu.”—Johana 5:19.