Nwane A Ɔwɔ Kɛ Yɛ Nee Ye Di Ngitanwo Wɔ Ɛkɛ A?

NYAMENLE TUMIVOLƐ BEDEVINLI ne ɛva nwolɛ adenle bie mɔ ɛmaa sunsum nu abɔdeɛ bie mɔ. Kɛ neazo la, yeva azɛlɛ ye azo tumililɛ yewula Gyisɛse Kelaese asa nu yɛɛ yekpa anwumabɔvolɛma mɔ di nɔhalɛ la bie mɔ yemaa bɛlɛnea edwɛkɛhanlɛ gyima ne azo. (Yekile 14:6) Noko, asɔneyɛlɛ le ngakyile. Ɔtɛfale nzɛlɛlɛ ɛdielɛ ɔtɛmanle awie biala. Nyamenle mumua ne a tie yɛ nzɛlɛlɛ a.

Gyihova ‘tie nzɛlɛlɛ.’ (Edwɛndolɛ 65:2) Ɔtie yɛ nzɛlɛlɛ na ɔbua. Ɛzoanvolɛ Dwɔn hɛlɛle asɔneyɛlɛ nwo edwɛkɛ ɛhye hɔmanle ɔ gɔnwo mɔ mɔɔ sonle Gyihova la: “Saa yɛdua ye [Nyamenle] ɛhulolɛ zo yɛbiza ye debie biala a ɔtie yɛ. Na kɛmɔ yɛze kɛ yɛbiza ye debie a ɔtie yɛ la ati, eza yɛze kɛ yɛ sa ka mɔɔ yɛbiza yɛfi ye ɛkɛ ne la.”—1 Dwɔn 5:14, 15.

Anwumabɔvolɛma mɔɔ di nɔhalɛ la ɛngulo kɛ yɛkɔ bɛ nyunlu wɔ asɔneyɛlɛ nu. Bɛte asɔneyɛlɛ nwo ngyehyɛleɛ mɔɔ Nyamenle ɛyɛ la abo na bɛdi zolɛ. Ɔdwu mekɛ ne bie a, Gyihova dua bɛ nwo zo bua asɔneyɛlɛ bie mɔ. Wɔ adenle boni azo? Mekɛ mɔɔ ngapezonli Daneɛle yɛle nzɛlɛlɛ manle Gyihova wɔ Gyɛlusalɛm ɛzɛkyelɛ nwo la, Nyamenle buale Daneɛle  asɔneyɛlɛ ne ɔlua anwumabɔvolɛ Geebeleɛle mɔɔ ɔzoanle ye ɔmanle ɔhɔboale ye la azo.—Daneɛle 9:3, 20-22.

Asoo Mɔwuamra Nrɛlaleɛ Ɔ?

Asoo ɔwɔ kɛ yɛbɔ mɔdenle kɛ yɛ nee menli mɔɔ ɛwu la kɛli adwelie? Edwɛkɛ dɔɔnwo mɔɔ fane adwelie mɔɔ menli kile kɛ bɛ nee mɔwuamra ɛli anwo la wɔ ɛkɛ. Kɛ neazo la, awie mɔɔ tendɛ sunsum ɛtane nloa zo la hɔle raalɛ bie mɔɔ wɔ Ireland la anwo ɛkɛ na ɔhanle ɔhilele ye kɛ kenle ne mɔɔ aleɛ kye a ɔbanwu ye la ɔ nee Fred mɔɔ ɛnee le raalɛ ne ahu la lile adwelie. Noko, ɛnee Fred ɛwu dapɛne ekyi ɛze. Ahenle doale zo hanle edwɛkɛ mɔɔ ɛnee “Fred” ɛha mɔɔ ɔ ye die di kɛ ɔ ngome ala a ɔze la ɔhilele ye. Yemɔti ɛnee ɔnyɛ se kɛ raalɛ ne balie ali kɛ Fred de aze wɔ sunsum ewiade ne anu na ɔlɛdua ɛyɛvolɛ ne anwo zo yeabɔ mɔdenle ɔ nee ye ali adwelie. Noko akee, diedi ɛhye nee mɔɔ Baebolo ne ka ye wienyi wɔ gyinlabelɛ mɔɔ mɔwuamra wɔ nu anwo la ɛnyia.—Nea ɛlɛka ne mɔɔ wɔ ɔ bo ɛke la.

Kɛzi yɛbahola yɛahilehile edwɛkɛ ɛhye mɔ anu ɛ? Adenle ko mɔɔ sunsum ɛtane ne mɔ fa zo bɛlɛbɛla menli la a le kɛ bɛkakyi bɛ nwo kɛ mɔwuamra la. Wɔ ɛke bɛyɛle bɛ nwo kɛ Fred la. Duzu ati a bɛyɛ zɔ a? Amaa bɛaye menli adwenle bɛavi mɔɔ Baebolo ne ka la azo na diedi nee anwodozo mɔɔ bɛlɛ ye wɔ Gyihova anu la aha aze. Kpolerazulɛ biala ɛnle nwo kɛ, Seetan nee sunsum ɛtane ne mɔ fa ‘adalɛ nwanwane ninyɛne mgbole, ngonyia, adalɛ nee amumuyɛ adenle zo twe bɛdabɛ mɔɔ ɔwɔ kɛ bɛminli la.’—2 Tɛsalonaekama 2:9, 10.

Nɔhalɛ nu, menli mɔɔ tendɛ sunsum ɛtane nloa zo nee bɛdabɛ mɔɔ bɛ nee bɛ di ngitanwo  la die di kɛ bɛ nee mɔwuamra di adwelie. Noko, saa ɔle nɔhalɛ kɛ bɛ nee awie di adwelie a ɛnee sunsum mɔɔ tia Gyihova la ɔ. Zɔhane ala a menli wɔ ɛkɛ mɔɔ bɛdie bɛdi kɛ bɛlɛsonle Nyamenle noko bɛvo a. Ɛzoanvolɛ Pɔɔlo luale sunsum nwuanzanwuanza ne azo vale kɔkɔbɔlɛ ɛhye mɔɔ anu yɛ se la manle: “Ewiade amra fa ninyɛne bɔ azu maa mbɔnsam, bɛmbɔ bɛmmaa Nyamenle.”—1 Kɔlentema 10:20, 21.

Saa yɛze kɛ yɛbahola yɛazɛlɛ Teasenli Bedevinli ne mɔɔ lɛ ɛlɔlɛ na ɔdwenle yɛ nwo la a, ɛnee duzu ati a ɔwɔ kɛ yɛsɛlɛ awie gyɛne wɔ asɔneyɛlɛ nu ɛ? Ye biala anu, Baebolo ne maa yɛ anwosesebɛ kɛ: ‘Gyihova fa ɔ nye bɔ ewiade ye anwo mgbɔlɔka, na ɔfa tumi ɔdie bɛdabɛ mɔɔ bɛdi nɔhalɛ bɛmaa ye la.’—2 Edwɛkɛsisilɛ 16:9.

[Edwɛkɛ mɔɔ bɛkpa wɔ mukelɛ 9]

Saa yɛze kɛ yɛbahola yɛazɛlɛ Teasenli Bedevinli ne mɔɔ lɛ ɛlɔlɛ na ɔdwenle yɛ nwo la a, ɛnee duzu ati a ɔwɔ kɛ yɛsɛlɛ awie gyɛne wɔ asɔneyɛlɛ nu ɛ?

[Ɛlɛka/Azekɛlata wɔ mukelɛ 8]

Nɔhalɛ Nee Adalɛ Edwɛkɛ

NƆHALƐ EDWƐKƐ: SEETAN WƆ ƐKƐ

“Seetan bɔbɔ kola kakyi ɔ nwo yɛ kɛ ɔle wienyi nu soanvolɛ.”—2 Kɔlentema 11:14.

“Bɛyɛ bɛ nye gyɛlɛmgbɛɛnye na bɛzinza! Na bɛ kpɔvolɛ ne, mɔɔ le Abɔnsam, lua nu ɛlɛkpo kɛ awenade, ɔlɛkpondɛ awie yeahye ye yeali.”—1 Pita 5:8.

“Awie biala mɔɔ yɛ ɛtane la le Abɔnsam ɛdeɛ, ɔluakɛ mɔlebɛbo ne Abɔnsam a lumuale yɛle ɛtane a.”—1 Dwɔn 3:8.

“Yemɔti bɛdu bɛ nwo bɛmaa Nyamenle. Bɛmmamaa Abɔnsam adenle, na ɔvi bɛ nwo ɔbanriandi.”—Gyemise 4:7.

‘Abɔnsam bɔ ɔ bo amuala la ɛnee ɔle kɔdiawu. Yeanli nɔhalɛ ɛlɛ, ɔboalekɛ nɔhalɛ nretee zɛhae ɛnle ye nu. Saa ɔbɔ adalɛ a ɛnee ɔlɛyɛ mɔɔ ɔwɔ kɛ ɔyɛ la, ɔboalekɛ ɔle alane, yɛɛ ɔle adalɛ kɔsɔɔti bɛ ze.’—Dwɔn 8:44.

ADALƐ EDWƐKƐ: MENLI WU A BƐKAKYI SUNSUM

“Ɛbahwi ɛ ti anwo na wɔanyia aleɛ wɔali, kɔkpula mekɛ mɔɔ ɛkɛzia ɛkɛhɔ azɛlɛ ye anu bieko la, ɔluakɛ nuhua yɛɛ ɛvi ɛrale a; ɛle ndɛtɛlɛ na ɛbazia wɔahɔ ndɛtɛlɛ nu.”—Mɔlebɛbo 3:19.

“Anyewɔzoamra ze kɛ bɛbawu, na mɔwuamra ɛnze ɛhwee.”—Nolobɔvo ne 9:5.

“Debie biala mɔɔ ɛkɛzɔ nu kɛ ɛyɛ la, fa wɔ anwosesebɛ yɛ, ɔluakɛ gyima anzɛɛ ndwenlenwo anzɛɛ adwenle anzɛɛ nrɛlɛbɛ biala ɛnle Ɛbolɔ mɔɔ ɛlɛkɔ la.”—Nolobɔvo ne 9:10.

“Saa ye ɛnwomenle ne fi ye nu a ɔsia ɔkɔ ye ndɛtɛlɛ ne anu; kenle ko ne ala ɛnee ye ngyehyɛlɛ biala ɛzɛkye.”—Edwɛndolɛ 146:4.

NƆHALƐ EDWƐKƐ: ANWUMABƆVOLƐMA MƆƆ DI NƆHALƐ LA DWENLE YƐ NWO

‘Gyihova soanvolɛ sinza bɛdabɛ mɔɔ bɛsulo ye la, na ɔdie bɛ ngoane.’—Edwɛndolɛ 34:7; 91:11.

“Bɛmɛ a le sunsum bie mɔ [anwumabɔvolɛma] mɔɔ sonle Nyamenle na ɔsoɔzoa bɛ ɔmaa bɛkɔboa bɛdabɛ mɔɔ ɔwɔ kɛ bɛnyia ngoane la.”—Hibuluma 1:14.

“Eza menwunle kɛ Nyamenle soanvolɛ ko ɛdu faa lua anwomanyunlu, na ɔlɛ damɛnlangoate nrɛlaleɛ ne, mɔɔ le Edwɛkpa ne ɔlɛba yearabɔ ye nolo yeahile menli ngakyile, mbusua ekpunli ekpunli, aneɛ ngakyile, nee maanle maanle kɔsɔɔti mɔɔ wɔ aleɛabo la. Na ɔdeanle nu ɔhanle kɛ, ‘Bɛzulo Nyamenle, na bɛye ye ayɛlɛ.’”—Yekile 14:6, 7.

ADALƐ EDWƐKƐ: GYISƐSE NEE NYAMENLE SƐ

“Mekpondɛ kɛ bɛte ɔ bo kɛ nrenya biala amenle a le Kelaese, raalɛ biala amenle a le ɔ hu, yɛɛ Kelaese amenle a le Nyamenle.”—1 Kɔlentema 11:3.

“Saa bɛfa ninyɛne kɔsɔɔti bɛwula Kelaese belemgbunlililɛ ne abo a, akee ɔdaye Ralɛ mumua ne, ɔbava ɔ nwo yeawula Nyamenle mɔɔ vale ninyɛne kɔsɔɔti wulale ɔ bo la abo, amaa Nyamenle ali ninyɛne kɔsɔɔti azo belemgbunli.”—1 Kɔlentema 15:28.

“Meka nɔhalɛ ne meahile bɛ: Ralɛ ne angome ɛnli ɔ ti anwo ɛnyɛ debie biala; ɔyɛ mɔɔ ɔkɛnwu kɛ Selɛ ne ɛlɛyɛ la ala angome.”—Dwɔn 5:19.