Ihs Rehn Ngehn akan me Kitail Pahn Koasoiong?

KOHT Wasa Lapalahpie kin ketikihong ngehn teikan arail pwukoa kan. Karasepe, e ketikihong Sises Krais manaman en kaunda sampah oh e ketin pilada tohnleng lelepek teikan en sewese kaweidih doadoahk en kalohki rongamwahwo. (Kaudiahl 14:6) Ahpw kapakap mehkot me tohrohr. E sohte ketikihong emen, pwukoa en karonge kapakap akan. Atail kapakap pahn kohwongete Koht kelehpw.

Siohwa kin ketin “sapeng pekipek kan.” (Melkahka 65:2) E kin ketin karonge atail kapakap kan oh ketin sapeng. Me pid duwen kapakap, wahnpoaron Sohn ntinglahng ienge ladun Siohwa kan oh nda: “Kitail uhdahn kin kamehlele me pein ih pahn karonge atail pekipek kan, ma kitail pahn peki mehkot nin duwen kupwure. E kin ketin karonge atail pekipek kan; eri, pwehki atail ese me met me mehlel, a kitail pil kin ese me e kin ketikihong kitail mehkan me kitail kin peki reh.”—1 Sohn 5:14, 15.

Tohnleng lelepek kan sohte men kitail en likweriong de kapakap ong irail. Irail wehwehki oh kin kapwaiada sapwellimen Koht koasoandi ong kapakap. Ekei pak e kin pid irail. Ia duwe? Ni ahnsou me soukohp Daniel kapakap ong Siohwa duwen ohlahn  Serusalem, Koht karonge eh kapakap oh kadarala tohnleng Kapriel pwehn kihong ih lokaiahn kangoang.—Daniel 9:3, 20-22.

Me Melahr akan me Koasoi ong Kitail?

E konehng kitail en song koasoiong irail akan me melahr? Mie koasoi tohto me kin nda me mie aramas akan me kin koasoiong ngehn en irail kan me melahr. Karasepe, lih emen me mi Ireland tuhwong emen soun ketieni me ndaiong me pwohng en mwoweo, e koasoiong en liho eh pwoud, Fred. Ahpw Fred melahr wihk kei samwlahro. Aramaso me wia emen soun ketieni ndaiong liho soahng kei me “Fred” ndaiong oh lih menet kamehlele me dahme e ndao, ih kelehpw me ese. E mengei ong liho en kamehlele me Fred wie momour nan wasahn ngehn akan oh e songosong en tuhwong ih ni eh doadoahngki soun ketienio. Ahpw madamadau wet kin uhwong dahme Paipel kin mahsanih duwen irair en me melahr akan.—Kilang kakon.

Ia duwen atail kak kawehwehda soangen koasoi pwukat? Ehu ahl me ngehn saut akan kin pitiheki aramas iei en mwomwehda me dene irail aramas melahr akan me duwehte dahme wiawi ong Fred. Ia kahrepen arail kin wia met? Met pwehn kahrehiong aramas akan en sohpeisang dahme Paipel kin padahngki, kaluwetala arail pwoson oh pil arail likih Siohwa. E sansal me Sehdan oh nah ngehn saut akan kin pitiheki aramas “soangen manaman koaros oh pil kilel likamw oh kapwuriamwei kei. Oh e pahn pitiheki soangen widing koaros irail kan me pahn lekdekla.”—2 Deselonika 2:9, 10.

 Mie soun ketieni kan oh irail akan me kin iang irail me uhdahn kamehlele me irail kin tuhwong aramas me melahr. Ahpw ni mehlel irail kin tuhwong ngehn akan me kin uhwong Siohwa. Pil duwehte irail akan me lemeleme me irail kin kaudokiong Koht ahpw re sohte kin. Wahnpoaron Pohl ntingihdi kaweid kehlail wet: “Meirong me kin wiawi pohn pei sarawien me rotorot akan, kin wiawihong tepil kan, kaidehk ong Koht.”—1 Korint 10:20, 21.

Ia kahrepen atail pahn men kapakap ong emen tohrohr ni atail ese me kitail kak kapakap ong Ih me Keieu Lapalap oh me ketin poakohng oh nsenohkin kitail? Paipel kamehlelehiong kitail me: “KAUN-O kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.”—2 Kronikel 16:9.

[Blurb nan pali 9]

Ia kahrepen atail pahn men kapakap ong emen tohrohr ni atail ese me kitail kak kapakap ong Ih me Keieu Lapalap oh me ketin poakohng oh nsenohkin kitail?

[Koakon/Kilel kan pali 8]

Mehlel de Sohte Mehlel?

SEHDAN KAIDEHN SOAI PWOAT: MEHLEL

“Sehdan pil kak kawekala pein ih, oh mwomwehda tohnleng en marain!”—2 Korint 11:14.

“Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla.”—1 Piter 5:8.

“Mehmen me kin mihmihte nan dihp, iei ih nein Tepilo me kin wiewia dihp sangete nin tapio.”—1 Sohn 3:8.

“Eri, kumwail peikiong Koht, oh pelianda Tepil, e ahpw pahn tangasang kumwail.”—Seims 4:7.

“Tepil . . . sangete nin tapio, ih sounkam aramas emen. E sohte kin miniminiong me mehlelo, pwehki me mehlelo sohte mi reh. Ni ahnsou me e kin koasoia likamw, e kin wiewiahte me e ahnlahr, pwehki ih likamw men, oh pil semen soangen likamw koaros.”—Sohn 8:44.

AHNSOUN MEHLA, KOAROS KIN KOHLA NAN WASAHN NGEHN AKAN: SOHTE MEHLEL

“Ke pahn doadoahk oh kakerehdi pwudowomw, pwe ke en koadoahkihada wahn pwelen sampah, ke lao pwurehng wiepwella, me ke wiawihda sang ie. Pwe ke wiawihda sang pwehl oh ke pahn pwurehng wiepwella.”—Senesis 3:19.

“Me momour kan ese me re pahn mehla, ahpw me melahr akan sohte ese mehkot.”—Eklesiasdes 9:5.

“Nantihong doadoahk laud ni soahng koaros me ke pahn wia met, pwe e sohte pahn mie wiewia, de lamalam, de loalokong, de erpit, nan wasahn me melahr akan—oh iei wasa me ke pahn kohla ie.”—Eklesiasdes 9:10.

“Ni ar kin mehla, re kin pwurehng wiepwella; oh ni ahnsowohte, ar koasoandi kan kin imwisekla.”—Melkahka 146:4.

TOHNLENG LELEPEK KAN KIN NSENOHKIN KITAIL: MEHLEL

“Sapwellime tohnleng kin sinsile irail kan me kin wauneki KAUN-O, oh kin kapitirailsang soahng keper kan.”—Melkahka 34:7; 91:11.

“Eri, dahkei tohnleng kan? Irail koaros iei ngehn kei me kin papah Koht, oh me Koht kin ketin kadarodo pwehn sewese irail kan me pahn ale komour.”—Ipru 1:14.

“I ahpw pil kilangada pil emen tohnleng me pipihr nan wehwe, me weuwa rongamwahu poatopoat ehu me e pahn lohkihong tohn sampah kan, wehi koaros, kadaudok koaros, lokaia koaros, oh sahpw koaros. E ahpw ngihl laudida, nda, ‘Kumwail lemmwiki Koht oh kapinga sapwellime roson lapalahpie!’”—Kaudiahl 14:6, 7.

SISES IEI KOHT: SOHTE MEHLEL

“I men kumwail en dehdehkihla mwahu padahk wet: duwen Krais eh tapwin aramas koaros, duwen ohl pwopwoud eh moangen eh pwoud, oh duwen Koht eh tapwin Krais.”—1 Korint 11:3.

“Pwe mehkoaros lao pahn lohdiong pahn manaman en Krais, iei ahnsou me pein Krais pahn ketin uhpahiong Koht me ketikihdiong mehkoaros pah. Eri, Koht ahpw pahn ketin kakaun mehkoaruhsie.”—1 Korint 15:28.

“I ndaiong kumwail ni mehlel: Sapwellimeo sohte kin wia mehkot ni pein eh koasoandi, pwe me e kin kilang me Sahmo kin ketin wia, ihte me e kin wia.”—Sohn 5:19.