¿Puëdentsikku espïritukunawan parlëta?

ALLÄPA Puëdeq Jehoväqa, llapan alli espïritukuna imëkata rurayänampaqmi tukï cargota qoshqa. Jesucristutam churashqa Patsata gobernamunampaq y angelkunatanam Diospita yachatsikïta dirigichö yanapakuyänampaq churashqa (Apocalipsis 14:6). Pero kikimpaqqa huk alläpa precisaq rurëtam haqishqa: nunakunapa mañakïnintam wiyan. Tsëmi pëllaman mañakunantsik.

Bibliaqa “mañakïkuna Wiyaq” ninmi Jehoväpaq (Salmo 65:2). Tsëmi pëman mañakushqaqa wiyamantsik y contestamantsik. Tsë rasun kanqantam apóstol Juan kënö nir qellqarqan: “Sitsun pe munashqanno imatapis mañacushun, wiyamäshunmi. Sitsun musyantsic imatapis mañaconqantsicta Dios wiyamanqantsicta, musyecantsicnam mañaconqantsic maquintsiccho cuentana quecanqanta” (1 Juan 5:14, 15).

Tsënömi, alli kaq angelkunaqa manam pëkunawan parlanata ni pëkunaman mañakunata munayantsu. Pëkunaqa musyayanmi Diosllaman mañakunapaq kaqta y tsënömi respetayan pëlla mañakï Wiyaq kanqanta. Höraqa, nunakunapa mañakïninta contestar angelkunawanmi yanapan. Këman pensarishun, Jerusalén marka alläpa ankupëpaq o llakipaypä këkaqta rikar  Daniel Diosman mañakïkuptinmi, Jehoväqa angel Gabrielta kacharqan alläpa shumaq willakïwan yanaparinampaq (Daniel 9:3, 20-22).

¿Wanushqakunawan parlashwantsuraq?

¿Mëchöraq wanushqakuna këkäyan? ¿Allitsuraq kanman pëkunawan parlëta munanqantsik? Pëkunawan parlayanqantam wakin nunakunaqa willakuyan. Irlanda nacionchömi huk bruja, semänallaraq viuda tikrashqa warmiman witirir, “qanyan ampim qowëki Fredwan parlarqo” nirqan. Nïkurnam, ishkanlla musyayanqampaq wanukushqa nunan parlanqanta bruja willarqan. Tsë wanushqa nuna warminwan parlëta munanqanta bruja ninqanqa rasumpanömi karqan. Pero wanushqakunawan parlëta mana puëdenqantsiktam Bibliaqa yachatsikun (hawanchö recuadrota rikäri).

Tsëpenqa, ¿pitaq tsë brüjawan parlaqqa karqan? Demoniokunam wanushqa nunatukurkur parlapäyarqan. ¿Imapaqtaq tsëta rurayan? Biblia yachatsikunqanta mana käyinapaq o mana mayanapaq y Jehoväman mana markakunapaq o mana yärakunapämi. Clärom këkan Satanaswan demoniokunaqa ‘espantaquipaq señalcunata y milagrucunatam rurayan’ y tsënöpam ‘tuqui nicachaq engañuncunawan pushan condenadu nunacunata’ (2 Tesalonicenses 2:9, 10).

Brüjokuna y tsëman ëwaqkunaqa wanushqa nunakunawan rasumpa parlëkäyanqantam creiyan. Tsëta rurarninqa, Jehová  Diospa chikeqnin espïritukunawanmi parlëkäyan. Hina wakin religionkunachönam tukïta rurayan Diosta kushitsiyanqanta pensar, pero rasun kaqchöqa manam pëtatsu kushitsiyan. Tsëmi, “sakrifikäyashqan[taqa], demoniyupaqmi sakrifikäyan, i manam Dyospaqtsu” nir apóstol Pablu qellqanqanman alli yarpachakunantsik (1 Corintios 10:20, 21, QKW).

Tsëmi, Alläpa Puëdeq y kuyakoq Diosnintsikwan parlëta puëdikarqa, ¿imapaqnaraq huk espïritukunawanqa parlashwan? Ama qonqashuntsu, manam pëpita más alliqa pipis cuidamäshuntsu, tsëmi Bibliaqa kënö nimantsik: “Llapan shonqunkunawan pëllata kuyaqkunataqa, kallpanwan yanapanampaqmi nawinkunaqa hinantin patsata rikëkan” (2 Crónicas 16:9).

[9 kaq päginachö ninqan]

Alläpa Puëdeq y kuyakoq Diosnintsikwan parlëta puëdikarqa, ¿imapaqnaraq huk espïritukunawanqa parlashwan?

[8 y 9 kaq päginachö dibüju y recuadru]

¿Rasumpatsuraq o manatsuraq?

RASUN KAQ: SATANASQA RASUMPAM KAN

“Quiquin diablupis shumaq anjelmanmi ticrarin.” (2 Corintios 11:14.)

“Alli penseniquicunawan cabal nunana car, mäcoq mäcoq cayë. ¡Paqtaraq, mana alliman ishquiyanquiman! Porqui chiquiyäshoqniquicuna diabloqa, imeca mallaqashqa leonnomi qaparir qayarir, purican qamcunapa marcäquiniquicunata ushacäratsinanpaq.” (1 Pedro 5:8.)

“Pipis jutsata rurarnenqa, diablupa nunanmi; porqui qallananpitam diabloqa jutsata ruraq carqan.” (1 Juan 3:8.)

“Dios Yayata cäsucuyë. Diabluta chiquirnin, munanqantaqa ama rurayëtsu. Tseno chiquiyaptiquim diablu euconqa.” (Santiagu 4:7.)

“Unepita patsam diabloqa asesinu carqan. Mana rasonpa caqcuna gustaptinmi, pëchoqa ni ima rasonpa caq cantsu. Uliquillata parlarmi, imeca badulaqui nunano quecan. Pëqa allapa ulim; tsemi nunacunatapis ulicatsin.” (Juan 8:44.)

MANA RASUN KAQ: WANUSHQAKUNAQA ESPÏRITUKUNAMANMI TIKRAYAN

“Allpaman tikranqekiyaqmi sudornikita alli ramarraq mikunki, tsëpita rurashqa karnin. Allpam kanki y allpamanmi kutinki.” (Génesis 3:19.)

“Kawëkaqkunaqa musyayanmi wanuyänampaq kaqta; pero wanushqakunaqa manam imatapis musyayannatsu, manam kantsu uryë , ni ima rurë, ni yachë ni musyëpis [pamparäyanqanchöqa].” (Eclesiastés 9:5.)

“Rurëpaq kaqkunata makiki tarinqantaqa, kallpëkiwan rurë, porque ëwëkanqëki Seolchöqa [llapan wanushqakuna kekäyanqanchoqa] mananam kannatsu ni ima rurë, ni imaman yarpë, ni yachë, ni musyaq kë.” (Eclesiastés 9:10.)

“Espïritun yarquriptinqa, pëqa allpam tikrarin, tsë höram llapan pensënin ushakärin.” (Salmo 146:4.)

RASUN KAQ: DIOSTA SIRVEQ ANGELKUNAQA YANAPAMANTSIKMI

“Jehoväta mantsaqkunataqa angelninmi hirurupëkan, y imëkapitam libran.” (Salmo 34:7; 91:11.)

“Llapan anjelcunapis jäninollam cayan. Pecunataqa Diosmi cachamushqa, salbasionta erensiatano chasquiyänanpaq caq nunacunata yanapananpaq.” (Hebreus 1:14.)

“Tsepitanam riquecorqä juc anjelta sielupa chopincho bolaquicaqta. Tse anjelmi que patsacho täraq nunacunata willapänanpaq apecamorqan mana nunca ushacaq alli willaquita. Tse alli willaquitaqa apecamorqan jinantin nasioncunacho tuqui nicachaq nunacunata, y tuqui idioma parlaq nunacunata willapänanpaqmi. Tse anjelmi fuertipa queno nimorqan: ‘Puedeq Diosta adorecuyë y alabecuyë’.” (Apocalipsis 14:6, 7.)

MANA RASUN KAQ: JESUSQA DIOSWAN IGUALMI

“Jina quetam willapäriyeniquita munarqö: Diospa mandadunchomi Jesucristu quecan. Teyta Jesucristupa mandadunchonam llapan ollqu caqcuna quecayan, y ollqu caqcunapa mandaduncunachonam warmicuna cayänan.” (1 Corintios 11:3.)

“Tsemi Jesucristupa muneninman Dios llapan imecatapis churashqa captin, Jesucristu llapanta Diospa muneninman churanqa. Tsepitanam quiquin Jesucristupis tsurin carnin, Diospa mandadunman churacärenqa. Tsenam Diosllana llapanpa mandacoqnin canqa.” (1 Corintios 15:28.)

“Rasontam rasontam niyaq. Diospa Tsurin manam quiquin munashqantatsu ruran, sinoqa Papänin rurashqancunata ricanqantam ruran. Porqui Papänin llapan rurashqancunatam tsurinpis ruranqa.” (Juan 5:19.)