Fesootaʻiga ma Foafoaga Agaga

UA TUUINA atu e le Atua e ona le malosi uma lava i nisi foafoaga agaga matafaioi eseese. O se faataʻitaʻiga, ua ia tuuina atu iā Iesu Keriso le pule i le lalolagi, ma tofia agelu faamaoni e faatonutonuina le galuega talaʻi. (Faaaliga 14:6) Ae e leʻi tuuina e le Atua i se isi le matafaioi o le faafofogaina o tatalo. Ua na o le Atua e tatau ona tuusaʻo atu i ai a tatou tatalo.

O Ieova “Le Faafofoga tatalo.” (Salamo 65:2) E faafofoga o ia ma tali mai i a tatou talosaga. Na tusi le aposetolo o Ioane i uso talitonu e faatatau i le tatalo: “Po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou. Afai tatou te iloa e faafofoga mai o ia i so o se mea e tatou te talosaga atu ai, e tatou te iloa e maua mea na tatou talosaga ai, auā na talosaga atu iā te ia.”—1 Ioane 5:14, 15.

E lē o mananaʻo agelu faamaoni e tatou te tatalo atu iā i latou. E latou te malamalama ma galulue e tusa ai ma le faatulagaga a le Atua e faatatau i le tatalo, ma e aafia ai i latou i nisi taimi. I le ā le auala? Ina ua ōle atu le perofeta o Tanielu iā Ieova e faatatau i le faaumatiaga o Ierusalema, na tali mai  le Atua e ala i le auina mai o le agelu o Kaperielu ma se feʻau faamāfanafana.—Tanielu 9:3, 20-22.

Feʻau Mai i Ē ua Oti?

Pe e tatau ona tatou faafesootaʻi atu i ē ua maliliu? E tele tala e taʻua ai e faapea na talanoa tagata ma agaga o ē ua maliliu. O se faataʻitaʻiga, o se fafine i Aialani, na faamatala atu i ai e se faataulāitu e faapea, na la talanoa ma Feleti, le toʻalua o le fafine, i le pō ua teʻa, ae e na o ni nai vaiaso talu ona maliu Feleti. Na faamatala atu e le faataulāitu i le fafine tala a Feleti na fai mai iā te ia, o mea sa manatu le fafine e na o i laʻua ma Feleti e iloa. Sa faigofie lava ona talitonu si nei fafine o loo ola pea Feleti i le mea o iai agaga, ma o loo taumafai e faafesootaʻi mai o ia e ala i lenei tagata ese. Peitaʻi e feteenaʻi lenā manatu ma aʻoaʻoga a le Tusi Paia e tusa ai ma le tulaga o ē ua maliliu.—Tagaʻi i le pusa o loo i lalo.

O le ā la le saʻo o nei faamatalaga? O se tasi auala ua faasesēina ai e temoni tagata, o le faafoliga mai lea i le tagata ua maliu, e pei o Feleti. Aiseā? Ina ia faasesēina ai tagata mai mea moni o loo i le Tusi Paia, ma faavaivai ai lo latou faatuatua iā Ieova. E mautinoa o loo faasesēina e Satani ma temoni tagata e ala i “galuega mamana, ma faailoga pepelo ma mea ofoofogia uma ma le amiolētonu, ma mea taufaasesē uma mo ē o le a fano.”—2 Tesalonia 2:9, 10.

E moni e iai taulāitu ma tagata faapena e  talitonu o loo latou faafesootaʻi atu i ē ua maliliu. Ae o le mea moni, o loo fesootaʻi atu i latou i foafoaga agaga o ē e tetee iā Ieova. E iai foʻi nisi e talitonu o loo latou tapuaʻi atu i le Atua, ae ua faasesēina. Na lapataʻi malosi mai le aposetolo o Paulo: “O mea ua faataulaga e nuu ese, ua latou faataulaga i temoni, ae e lē o le Atua.”—1 Korinito 10:20, 21.

Ua tatou iloa e mafai ona tatou tatalo atu i Lē e Pule Aoao, e alofa o ia ma e manatu mai iā i tatou, o lea, aiseā la e tatalo ai fua i se isi? Auā ua faamautinoa mai i le Tusi Paia: “E silasila solo fofoga o Ieova i le lalolagi uma, ina ia faaali atu lona malosi iā i latou e atoatoa o latou loto iā te ia.”—2 Nofoaiga a Tupu 16:9.

[Faamatalaga faaopoopo i le itulau 9]

Ua tatou iloa e mafai ona tatou tatalo atu i Lē e Pule Aoao, e alofa o ia ma e manatu mai iā i tatou, o lea, aiseā la e tatalo ai fua i se isi?

[Pusa/Ata i le itulau 8]

Tala Moni po o Talafatu

TALA MONI: E IAI MONI LAVA SATANI

“E fai ma liua e Satani o ia lava e avea ma agelu o le malamalama.”—2 Korinito 11:14.

“Ia faaauau ona outou mafaufau lelei ma ia mataala. O loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te ʻaina.”—1 Peteru 5:8.

“O lē e faaauau ona agasala e mai i le Tiapolo lava ia, auā na agasala le Tiapolo mai i le amataga.”—1 Ioane 3:8.

“O le mea lea, ia outou gauaʻi atu i le Atua ae ia tetee atu i le Tiapolo, ona sola ese ai lea o ia mai iā te outou.”—Iakopo 4:7.

‘⁠O le Tiapolo, o ia o le fasioti tagata talu le amataga, e leʻi tumau lava o ia i le upu moni, auā e lē o i totonu iā te ia le upu moni. Pe a tautala o ia i tala pepelo, e tautala o ia e tusa ma lona lava manatu, auā o ia o sē e pepelo ma le tamā o le pepelo.’—Ioane 8:44.

TALAFATU: E OLA PEA AGAGA O TAGATA UMA PE A MALILIU

“E te ʻai au meaʻai ma le afu o ou mata seʻia e toe foʻi atu i le eleele, auā na faia mai ai oe. Auā o le efuefu oe, e te toe foʻi atu lava i le efuefu.”—Kenese 3:19.

“O ē ua ola ua latou iloa e oti i latou; a o ē ua oti, latou te lē iloa se mea.” —Failauga 9:5.

“O mea uma ua e iloa e faia e ou lima, inā faia ia ma lou malosi, auā e leai se galuega, po o ni fuafuaga, po o le poto, po o le atamai i le Tuugamau o loo e alu atu i ai.” —Failauga 9:10.

“E alu ese lana mānava, e toe foʻi atu o ia i le eleele; e faaumatia i lea lava aso ona manatunatuga.”—Salamo 146:4.

TALA MONI: E MANATU MAI AGELU FAAMAONI IĀ I TATOU

“E tolauapi le agelu a Ieova e siʻosiʻomia ai i latou o ē e matataʻu iā te ia, ma e na te laveaʻiina foʻi i latou.”—Salamo 34:7; 91:11.

“Pe e lē o agaga [agelu] uma ea i latou mo le auaunaga, ua aauina atu e auauna mo i latou o ē o le a maua le faaolataga?” —Eperu 1:14.

“Ona ou iloa lea o le isi agelu o loo lele i le taulotoaʻiga o le lagi, ua iā te ia le tala lelei e faavavau e folafola atu, o se tala fiafia i ē o loo nonofo i le lalolagi, ma nuu uma, ma ituaiga uma, ma gagana uma, ma tagata uma, ua faapea atu ma le leotele: ‘Ia matataʻu i le Atua ma ia faamamaluina o ia.’”—Faaaliga 14:6, 7.

TALAFATU: E TUTUSA IESU MA LE ATUA

“Ou te manaʻo ina ia outou iloa, o le ulu o tane taʻitoʻatasi uma o Keriso; o le ulu o le fafine o le tane; a o le ulu o Keriso o le Atua.”—1 Korinito 11:3.

“Pe a tuuina i lalo o mea uma iā te ia, ona tuuina i lalo foʻi lea e le Alo o ia lava i Lē na tuuina i lalo o mea uma iā te ia, ina ia pule aoao le Atua i le aoao o mea.” —1 Korinito 15:28.

“E moni, e moni, ou te fai atu iā te outou, E lē faia e le Atalii se mea i lona lava loto, a o mea ua ia vaai i ai o loo faia e le Tamā.”—Ioane 5:19.