¿Tlan nakatachuwinanaw espíritus?

JEHOVÁ tiku kgalhi xliputum litliwakga wi tuku kaliyawanit makgapitsi espíritus. La uma, liyawanit Jesucristo xlakata mapakgsina nawan kKatiyatni chu na kaliyawanit makgapitsi ángeles xlakata napulalinkgo natalichuwinan Dios (Apocalipsis 14:6). Pero, nitiku liyawanit xlakata nakgaxmata oraciones nema tlawanikgo latamanin. Wa xlakata, kajwatiya Jehová natlawaniyaw oración.

Anta kBiblia talichuwinan pi wa Jehová “Kgaxmata oración” (Salmo 65:2). Xlikana, akxni tlawaniyaw oración Jehová kinkakgaxmatniyan chu kinkakgalhtiyan. Apóstol Juan nachuna wan: «Na wa yuma ntalipawan ntu nkgalhiniyaw, mpi lapi wi mpala tu kskiniw, wa lantlata xtalakaskin wa nakinkakgaxmatniyan. Na lapi katsiyaw mpi kinkakgaxmatniyan nkaxatu kawa ntu kskiniw, katsiyaw mpi namakgamakglhtinanaw ntachuwin wa lantla kskiniw» (1 Juan 5:14, 15).

Chuna, ángeles tiku ni makgxtakgkgo Dios ni lakaskinkgo pi wa nakatlawaniyaw oración. Chu katsikgo pi Dios lakaskin kajwatiya natlawanikan oración chu na liwana katsikgo pi ni kalakgchan wa nakatlawanikan. Min kilhtamaku wata wa ángeles tlawakgo tuku kalikgalhtikan latamanin xʼoracionkan. Chuna la kgalhtika xʼoración Daniel akxni xlipuwama xlakata lu nitlan xwi  Jerusalén, Jehová makaminilh ángel Gabriel xlakata nawani tuku nalimatliwakglha (Daniel 9:3, 20-22).

¿Tlan tachuwinanaw tiku nikgonitta?

¿Pi tlan nakatachuwinamputunaw tiku nikgonitta? Lhuwa wankgo pi katachuwinankgo tiku nikgonitta. Anta kʼIrlanda chatum skuwana uma tuku wanilh chatum puskat tiku akglhuwata semanas xninit xchixku: «Kgotana katsisni ktachuwinalh min chixku Fred». Ama skuwana wanilh puskat pi mat Fred wi tuku xwaninit tuku kajwatiya xpuskat xlikatsit xwanit. Uma tuku wanilh tlan lakapala xlikanajlalh pi Fred tiku xninita xlikana xtachuwinamputun. Pero Biblia wan pi nipara tsinu la katachuwinankan ninin (kaʼakxilhti recuadro nema wi tutsu).

Pero ¿tiku tachuwinankgo akxni wankgo pi tachuwinankgolh ninin? Demonios litaxtukgo la tiku ninit, chuna la akxni skuwana wa pi xtachuwinanit Fred. ¿Tuku xlakata chuna tlawakgo? Ni lakaskinkgo pi nakatsiyaw tuku masiya Biblia chu ni nakanajlaniyaw Jehová chu na ni nalipawanaw. Liwana tasiya pi Satanás chu xdemonios limaklakaskinkgo “wantu ntlawakgo wantu laklanka taskujut laklanka likakni taskujut lakimpi naliaʼkgskgawiminankgo. Xawachi nakgalhiy tlanka litliwakga, wampi xlipaks wantu natlawa, kaj paks liaʼkgskgawiminan nawan wanti napatinankgoy” o nakamalakgsputukan (2 Tesalonicenses 2:9, 10).

Lhuwa skuwananin kanajlakgo pi tachuwinankgo tiku nikgonitta. Pero maski wi tiku tachuwinankgo ni wa ninin, wa demonios xtalamakgasitsin  Jehová. Nachuna, anamparakgo amakgapitsi talismanin nema tlawakgo latamanin chu lakpuwankgo pi makgapaxuwa Jehová maski ni chuna. Wa xlakata, xlakaskinka natlawaniyaw kuenta uma tastakyaw nema Dios matsokgnilh apóstol Pablo: «Kkawaniyan mpi wa ntu likaxtlawanankgoy akgmakgat chixkuwin, wa nkaxtlawananikgoy akgskgawini, na ni wa Dios» (1 Corintios 10:20, 21).

Komo tlan tachuwinanaw Dios tiku kgalhi xliputum litliwakga, chu lu kinkapaxkiyan, ¿tuku xlakata atanu tiku natlawaniyaw kioracionkan? Kalakapastakwi pi nitiku tlakg tlan nakinkakuentajtlawayan, Biblia wan: «Lakputsama kxlikalanka katiyatni, la nalimaklakaskin xlitliwakga xlakata nakamakgtaya tiku xliputum xnaku [o anima] skujnanikgo» (2 Crónicas 16:9).

[Epígrafe xla página 9]

Komo tlan tachuwinanaw Dios tiku kgalhi xliputum litliwakga, chu lu kinkapaxkiyan, ¿tuku xlakata atanu tiku natachuwinamputunaw?

[Recuadro xla página 8]

¿Xlikana o ni xlikana?

XLIKANA LAMA SATANÁS: XLIKANA

«Sampi watiya Satanás [...], xʼángel xkgakganat litaxtuy.» (2 Corintios 11:14.)

«Lakatitum nalakapastakatit, chu na skgalalh natawilayatit, xampi wa Akgskgawini, xtachuna xatsinksni lapanit, lama kmintuntamaknikan, putsama wanti nachipay, naway.» (1 Pedro 5:8.)

«Wa nti ntlaway ntalakgalhin, wa xla Akgskgawini; xampi wa Akgskgawini, asta xalipulana ntsukunit lakgalhinan.» (1 Juan 3:8.)

«Dios nti nkatamakamastanitit, na kalakgapaxtokgtit [o katatlankaninitit] Akgskgawini, chuna nakatsalaniyan.» (Santiago 4:7.)

«Akgskgawini [...] akxni lakatsukulh makgnina xwanit, chu ni tamakgxtakgli kxaxlikana, xlakata ni xkgalhi tuku xaxlikana. Akxni lichuwinan taʼakgsanin, chuwinan chuna la likatsi, xlakata xaʼakgsanina chu xmakilhtsukina taʼakgsanin.» (Juan 8:44, NM.)

AKXNI WI TIKU NIY ESPÍRITU WAN: NI XLIKANA

«Nawaya kaxtalanchu pero pulana naxunuya [o naxkgekga] asta akxni nataspitparaya kkatiyatna, xlakata anta tiyaka. Xlakata pokgxni wix chu kpokgxni napimparaya.» (Génesis 3:19.)

«Wantiku staknankgo liwana katsikgo pi nanikgo, pero wantiku nikgonit, xlakan nialh tuku katsikgo.» (Eclesiastés 9:5.)

«Putum tuku tlan litlawaya mimakan, katlawa, xlakata ni anan taskujut chu nituku lay lakkaxwilikan talakapastakni chu nipara takatsin nipara liskgalala anta Seol niku pimpat [niku kamaknukan latamanin akxni nikgo].» (Eclesiastés 9:10.)

«Chatum chixku [niy], y ixmakni, tiyat talakgspitparaj, y wakg tu ixlaklhkanit natlawa nak ixlatamat, kan xamakgtum lakgsputkgoj.» (Salmo 146:4.)

XALAKTLAN ÁNGELES KINKAMAKGTAYAPUTUNKGOYAN: XLIKANA

«Ixʼángel Kintikukan kamakgtakgalha [o kakuentajtlawa] ti takgaxmatnij y kalekgawaj.» (Salmo 34:7; 91:11.)

«Wa ángeles ¿mpa ni paks wa spiritu nti lakskujnanikgoy ntamalakgachakgonit namakgtayakgoy nti nalakgchankgoy akgaputaxtut.» (Hebreos 1:14.)

«Ktiʼukxilhli achatum ángel, xkgosma kxlikitat akgapun, wa nti xkgalhiy xlipan xatlan tamakatsinin, lakimpi naliʼakgchuwinanikgokan wa nti lamakgo kxokgspun katuxawat, chu nchixkuwin nkaniwa xalanin nkakgatunu tiyat, [...] chu lantla ni ntipalit tachuwin anan lantla xlikatlanka nkatuxawat. Luwa palha xwan: “Kapikuanitit Dios, chu na kamaxkitit nkakni”.» (Apocalipsis 14:6, 7.)

JESÚS XTACHUNA DIOS: NI XLIKANA

«Klakaskin mpi nakatsiyatit mpi wa nCristo, xapuxku lantla xlipaks nchixkuwin; chu wa nchixku, na wa xpuxku mpuskat; chu wa Dios, xpuxku nCristo.» (1 Corintios 11:3.)

«Na akxni mpaks wa namapakgsiy, wa xaKam, nalitamakgaxtakga xmalana nawan wa nti makamaxkilh xlipaks nkatuwaj namapakgsiy, lakimpi man wa Dios nti nalikgantaxtuy xlipaks nkatuwaj.» (1 Corintios 15:28.)

«Xlikana ntu kkawaniyan: Ni la ntu akstu tlawa xaKam, lapi ni wa ntu [...] xaTlat ntlaway, sampi xlipaks wa ntu xla ntlaway, na wa yuma makxtum tatlaway xaKam.» (Juan 5:19.)