Ayyaana Alamiyan Deˈiya Oonaara Gayttana Koshshii?

UBBAA Danddayiya Xoossay issi issi aawatettaa ayyaana meretatuyyo immiis. Leemisuwau, Yesuus Kiristtoosi saˈaa haaranaadan i sunttiis; qassi mishiraachuwaa yootiyoogaa kaalettiyoogan maaddanaadan ammanettida kiitanchata sunttiis. (Ajj. 14:6) SHin woosay hegeetuppe dummatees. Woosaa siyiyo maataa i oossinne immibeenna. Nu Xoossaa xalaalaakko woossana koshshees.

Yihooway ‘woosaa Siyiyaagaa.’ (Maz. 65:2) I nu woosaa siyidi zaarees. Woosaa xeelliyaagan kiitettida Yohaannisi banadan Yihoowayyo oottiyaageetuyyo hagaadan giis: “Xoossai koyiyoogaadan, ainne nuuni a woossikko, i siyiyoogaa nuuni [eroos]. . . . Nuuni woossiyo ubban i siyiyoogaa erikko, nuuni a woossidoogaa i immanaagaa eroos.”—1 Yoh. 5:14, 15.

Ammanettida kiitanchati nuuni etaara gayttanaadan woy etakko woossanaadan koyokkona. Issi issitoo etakka gujjiya, woosaa xeelliyaagan Xoossay giigissidobaa akeekoosonanne hegaara moggidi oottoosona. Ayba ogiyan? Hananabaa yootiya Daaneeli Yerusalaame xayuwaabaa Yihoowakko woossido wode, kiitanchaa Gabreela  baggaara minttettiya kiitaa kiittiyoogan Xoossay Daaneela woosaa zaariis.—Dane. 9:3, 20-22.

Hayqqidaageetuppe Yiya Kiitee?

Hayqqidaageetuura gayttanau nuuni koyana koshshii? Asay hayqqidaageetu ayyaanaara haasayidobadan yootiyo daro odoy deˈees. Leemisuwau, Ayerlandden deˈiya issi maccaasiyo iita ayyaanaa xeegiya maccaasiyaa haasayissaasu; he maccaasiyaa iira gayttanaappe kase qammi i azinaa Freeda haasayissidoogaa yootaasu. SHin, Freedi amarida saaminttaappe kase hayqqiis. Iita ayyaanaa xeegiya he maccaasiyaa, Freeda keettaayiyaa ba xallay eriyoobadan qoppiyoobaa Freeda giyo uri yootidoogaa odaasu. Freedi ayyaana alamiyan deˈiyoogaanne he maccaasee baggaara i banaara gayttanau koyiyoogaa a qoppanaagee erettidaagaa. SHin hegaadan qoppiyoogee hayqqidaageetubaa Geeshsha Maxaafay qoncciyan yootiyoobaara phalqqettiyaaba.—Hagaappe garssaara deˈiya saaxiniyaa xeella.

SHin hegaa mala oduwaa woygana danddayettii? Daydanttati asaa cimmanau goˈettiyo ogetuppe issoy, Freedaara gayttidaagan oottidoogaadan, hayqqidaageeta milatiyoogaa. Eti hegaadan oottiyoy aybissee? Geeshsha Maxaafay yootiyoobaappe asaa haassanaassanne Yihoowa bolli asau deˈiya ammanuwaa shugissanaassa. Seexaanaynne daydanttati ‘wolqqaama malaata ubbaa, worddo malaataanne garamissiyaabaa, qassi xayiya asata dumma iita cimuwan’ balettiyoogee qoncce.—2 Tas. 2:9, 10.

 Hayqqida asatuura gayttiyaabadan tumuppe qoppidi, moytilliyaa xeegiyaageetinne etakko biya asati deˈiyoogee qoncce. SHin eti gayttiyoy oonaarakka gidikko, Yihoowaara eqettiya ayyaanatuura gayttoosona. Hegaadankka, Xoossaayyo goynniyaabadan qoppiyaageeti deˈoosona; shin eti balidosona. PHauloosi ayyaanaa kaaletuwan, “Xoossaa ammanenna asati xalahetussi yarshshiyoogaappe attin, Xoossaassi yarshshokkona” yaagidi mintti akeekissiis.—1 Qor. 10:20, 21.

Nuna siiqiyaanne nuussi qoppiya, Ubbaappe Gitaakko woossana danddayiyoogaa eriyo gishshau, hara uraakko woossanau aybissi koyiyoo? Geeshsha Maxaafay, “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees” yaagidi minttettees.—2 Odi. 16:9.

[Sinttaa 9n deʼiya misiliyaa qonccissuwaa]

Nuna siiqiyaanne nuussi qoppiya, Ubbaappe Gitaakko woossana danddayiyoogaa eriyo gishshau, hara uraakko woossanau aybissi koyiyoo?

[Sinttaa 8n deʼiya misiliyaa qonccissuwaa]

Tumaanne Wordduwaa

TUMAA: SEEXAANAY TUMUPPE DEˈIYAABA

“Seexaanai ba huuphen poo7o kiitanchcha milatanau ba meraa laammees.”—2 Qor. 11:14.

“Xalahe halaqai, intte morkkee, mittiyo uraa koyidi, gudiya gaammuwaadan gudiiddi, intte lanqqiyan yuuyiyo gishshau naagettitenne beegottite.”—1 PHe. 5:8.

“Xalahe halaqai koiroosappe nagaraa oottido gishshau, nagara ubba wode oottiya urai xalahe halaqaassa.”—1 Yoh. 3:8.

“Hegaa gishshau, intte Xoossau haarettite. Yaatidi xalahe halaqaa teqqite; i intteppe baqatana.”—Yaaq. 4:7.

“[Dabloosi] kaseppe doommidi, shemppo woridaagaa; tumatetti aani bainna gishshau, tumatettaakko shiiqi erenna. I wordduwaa haasayiyo wode, baappe haasayees; aissi giikko, i worddanchchanne qassi wordduwaukka aawa.”—Yoh. 8:44.

WORDDUWAA: HAYQQIYO WODE UBBA ASAY AYYAANA ALAMIYAU BEES

“Neeni biittau simmana gakkanaassi, daafuran ne som77oi cawattin oottido ne qumaa maana; aissi giikko, neeni biittaappe ekettadasa; neeni baana; neeni baanau simmana.”—Doo. 3:19.

“Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona.”—Era. 9:5.

“Ne kushee oottanau demmidobaa ubbaa ne kumetta wolqqan ootta; aissi giikko, neeni baanasan duufuwan oosoi, woikko halchchoi, woikko eri, woikko aadhdhida eratetti baawa.”—Era. 9:10.

“Eta shemppoi [“ayyaanay,” NW] kiyiyo wode, eti biittau simmoosona; eta halchchoi ubbai he gallassikka atti aggees.”—Maz. 146:4.

TUMAA: AMMANETTIDA KIITANCHATI NUNA MAADDOOSONA

“GODAA kiitanchchai GODAASSI yayyiya asata naagees; i eta yuushuwan gididi, eta ashshees. Aissi giikko, ne ogiyan ubban nena naagana mala, Xoossai ba kiitanchchata azazana.” —Maz. 34:7; 91:11.

“Kiitanchchati ubbai Xoossau oottanaunne atotettaa demmana asata maaddanau Xoossai kiittido ayyaanata gidokkonaayye?”—Ibr. 1:14.

“Sa7an de7iya asa ubbaayyo, zare ubbaayyo, qommo ubbaayyo, dumma dumma biittaa qaala ubbaayyoonne yara ubbaayyo merinaa wonggeliyaa mishiraachchuwaa awaajjanau, bolla saluwan paalliya hara kiitanchchaa taani be7aas. He kiitanchchai ba qaalaa xoqqu oottidi, ‘Xoossaayyo yayyite; a bonchchite’ . . . yaagiis.” —Ajj. 14:6, 7.

WORDDUWAA: YESUUSI XOOSSAARA LAGGE

“Kiristtoosi attumaasa ubbaayyo huuphe gidiyoogaa, attumaasi maccaasassi huuphe gidiyoogaanne qassi Xoossai Kiristtoosassi huuphe gidiyoogaa intte erana mala koyais.” —1 Qor. 11:3.

“Ubbabai Kiristtoosassi haarettidoogaappe guyyiyan, Kiristtoosi qassi ba huuphen ubbabaa bana haarissida Xoossaassi haarettana. Xoossai qassi ubbabaa wurssidi haarana.”—1 Qor. 15:28.

“Taani intteyyo tumaa odais; Na7ai barkka ainne oottenna. I ba Aawai oottishin be7iyoogaa xalaalaa oottees.”—Yoh. 5:19.