Mini’ e Rayog ni Ngan Non Ngak ko Giyow ko Kan?

GOT ni th’abi gel gelngin e ke pi’ boch e maruwel ngak boch e engel. Ni bod ni dugliy Jesus Kristus ni nge gagiyegnag e fayleng, ma pi engel e ke dugliyrad ni ngar pied e ayuw ko fare maruwel ni machib. (Revelation 14:6) Machane meybil e ba thil ya de dugliy Got boch e engel ni ngar motoyilgad ko meybil. Ya meybil rodad e kemus ni Got e nge motoyil ngay.

Jehovah e ma “fulweg taban e meybil” rodad. (Psalm 65:2) Ma motoyil ko meybil rodad ma ma fulweg taban. Apostal John e yol ngak e pi tapigpig rok Jehovah u murung’agen e meybil ni gaar: “Mmudugil u wan’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay. Demtrug e ngiyal’ ni gadad ra ning ban’en ngak ma be rung’ag e n’en ni gadad be yog; ere faanra gadad manang nib riyul’ e re bugithin ney, me ere ka gadad manang ni gadad ra ning ban’en ngak ma ra pi’ ngodad.”​—1 John 5:14, 15.

Pi engel nib yul’yul’ e dubrad ni ngad meybilgad ngorad. Yad manang ma yad be fol ko yaram rok Jehovah u murung’agen e meybil, ma ku yad ma meybil ngak Got. Uw rogon? Bod rogon Daniel ni reb e profet ni ke meybil ngak Jehovah ni bochan ni kan gothey yu Jerusalem, me fulweg Got taban e meybil rok me  l’og fare engel ni Gabriel fithingan nge pi’ e athamgil nga laniyan’.​—Daniel 9:3, 20-22.

Gur, Ma Non e Piin ni Kar M’ad Ngodad?

Ba fel’ ni ngad guyed rogon ni ngad nonad ngak e piin ni kar m’ad, fa? Boor e chep u murung’agen e girdi’ ni kar nonad ngak e piin ni kar m’ad. Bod rogon reb e ppin u Ireland ni kar mada’gow reb e sothuw, me yog fare sothuw ngak ni kar nonow Fred ni pumoon rok fare pin u reb e nep’ riy. Machane ke yim’ Fred ni ke yan in e wik. Me weliy fare sothuw e n’en ni ke yog “Fred” ngak, ni boch ban’en ni kemus ni yigoo fare pin rok e manang. Ere bochan e re n’em ma rayog ni nge mich u wan’ fare pin rok Fred ni ku bay Fred u bang ni kab fas, ma ke athamgil ni nge non ngak u daken fare sothuw. Machane lem ni aram rogon e ba togopuluw ko n’en ni be yog e Bible u murung’agen e piin ni kar m’ad.​—Mu guy fare kahol.

Ere uw rogon ni ngan weliy fan e chep ni aram rogon? Reb e kanawo’ ni ma fanay e pi moonyan’ ni ngar bannaged e girdi’ e yad ma yan u yaan e be’ ni ke yim’ ni bod Fred. Mang fan? Yad be guy rogon ni nge dabki mich e Bible u wan’ e girdi’ ma nge dabki pagan’ e girdi’ ngak Jehovah. Ere dariy e maruwar riy ni Satan nge pi moonyan’ rok e yad ma bannag e girdi’ “ma bay ngongliy gubin mit e maang’ang nge pow ni be ban, nge ngongol ni yira gin ngay, ma bayi bannag urngin e piin ni ngar maloggad nga urngin mit e ban nib kireb.”​—2 Thessalonika 2:9, 10.

Riyul’ ni bay e pi sothuw nge boch e girdi’ ni ma un ngorad ni kari mich u wan’rad ni yad be non ngak e piin ni kar m’ad. Machane  bin riyul’ riy, e yad be non ngak e pi kan nib kireb ni yad be togopuluw ngak Jehovah. Maku bay boch e girdi’ ni ke mich u wan’rad ni liyor ni yad ma tay e ba fel’ u wan’ Got, machane gathi riyul’ ni aram rogon. Kan thagthagnag nga laniyan’ Paul, me ginangdad ni gaar: “N’en ni ka ni pi’ ni maligach u daken e altar rok e piin ndar nanged Got e ka ni pi’ ngak e pi moonyan’, ma gathi ngak Got.”​—1 Korinth 10:20, 21.

Bochan ni gad manang ni rayog ni ngad meybilgad ngak Faen ni Th’abi Tolang, ni gadad ba t’uf rok ma ma lemnag rarogodad, ere mang fan ni ngad meybilgad ngak yugu reb e Got? Bible e be micheg ngodad ni gaar: “I Somol e ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircha’rad.”​—2 Kronicles 16:9.

[Caption on page 9]

Bochan ni gad manang ni rayog ni ngad meybilgad ngak Faen ni Th’abi Tolang, ni gadad ba t’uf rok ma ma lemnag rarogodad, ere mang fan ni ngad meybilgad ngak yugu reb e Got?

[Caption on page 8]

Tin Riyul’ nge Tin De Riyul’

BIN RIYUL’: SATAN E BA RIYUL’

“Ya ku rayog rok moonyan’ ni nge piliyeg ir nge bod yaan ba engel ko tamilang.”​—2 Korinth 11:14.

“Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.”​—1 Peter 5:8.

“Ma en nra i denen i yan e ke par ni ke mil suwon ngak fare moonyan’, ya fare moonyan’ e ke denen ko tabolngin.”​—1 John 3:8.

“Ere mpied gimed nga pa’ Got ngam paged famed ngak. Mi gimed togopluw ngak fare moonyan’, me mil romed.”​—James 4:7.

“Fare moonyan’. . . ni ma thang e fan rok e girdi’; dariy ba ngiyal’ ni ke yib nga ba’ rok e tin riyul’, ya dariy e tin riyul’ rok. Ya ngiyal’ nra lifith l’ugun riy e aram e be rin’ ban’en ni mecham ngak, ya ir be’ ni ma lifith l’ugun me ir e chitamangin urngin e malulifith.”​—John 8:44.

BIN NI DE RIYUL’: NAP’AN NI RA YIM’ BE’ MA RA YAN KO GIYOW KO KAN

“Ya thingari yib e athuw u dakenam ma ga maruwel nib gel nge yog ni pi’ e but’ e ggan ngom, nge yan i mada’ ko ngiyal’ ni ngam sul riy ko but’ ni ir e ni ngongliyem ngay. Ni ngongliyem ko but’, ere bay kum ngal’ ni but’ bayay.”​—Genesis 3:19.

“Piin nib fos e yad manang ni bay ra m’ad, machane piin nib yam’ e dariy ban’en ni yad manang.”​—Eklesiastes 9:5, BT.

“Demtrug ko mang e ga be rin’ ma ngam rin’ ni kari mus rogom riy, ni bochan e dakuriy ban’en ni ngan rin’, ma dariy e tafinay, ma dariy e llowan’, ma dariy e gonop u lan e fayleng ko yam’ ni aram e gin ni ngam man ngay.”​—Eklesiastes 9:10, BT.

“Nap’an ni yad ra yim’, mi yad ra sul ko ab; rofen nem e gubin e tin ur tanomniged e ra mus.”​—Psalm 146:4, BT.

BIN RIYUL’: PI ENGEL NIB YUL’YUL’ E YAD MA RUNGUYDAD

“Engel rok Somol e ma matanagiy e piin ni bay madgun Somol u wan’rad, me chuwegrad ko riya’.”​—Psalm 34:7; 91:11.

“Ma pi engel e yad e mang? Yad e pi kan ni yad ma pigpig ngak Got ni ma l’ograd ngar ayuweged e piin ni ngar thapgad ngak Got.”​—Hebrews 1:14.

“Mu gguy yugu reb e engel ni be changeg nib tolang u fithik’ e nifeng, ni ba’ rok e thin ndabi math biid, ni Thin Nib Fel’ ni nge weliy ngak e girdi’ nu fayleng, ni urngin e pi nam nge ganong nge thin nge gubin mit e girdi’. Me gaar ni ba ga’ laman: ‘Nge yib madgun Got ngomed.’”​—Revelation 14:6, 7.

BIN NI DE RIYUL’: JESUS E TAAREB ROGON NGAK GOT

“Gub adag ni ngam nanged fan ni Kristus e ir e lolugen urngin e pumoon, ma pumoon e ir lolugen leengin, mi Got e lolugen Kristus.”​—1 Korinth 11:3.

“Ma ngiyal’ ni yira tay urngin ban’en riy nga tan pa’ Kristus ni ir e nge gagiyegnag, ma aram e ir, ni ir e Fak Got, e bayi ta’ ir nga tan pa’ Got ni ke ta’ urngin ban’en nga tan pa’ Kristus; ma aram e Got e bay i gagiyegnag urngin ban’en.”​—1 Korinth 15:28.

“Nggog e tin riyul’ ngomed: en ni Fak Got e dariy ban’en ni be rin’ ni ir e tafinay rok; ke mus ni tin ni be guy ni be rin’ Chitamangin e ir e be rin’.”​—John 5:19.