Palameni Kuli Lesa

Alishiba “Imitima ya Bana ba Bantu”

2 IMILANDU 6:29, 30

BONSE fye tulakwata amafya ica kuti tatwishiba ne fya kucita! Limo cimoneka kwati tapaba nangu umo uwishiba bwino ifyo tuleumfwa ne fyo tulecula na matontonkanyo. Lelo, kwaliba umo uwishiba bwino bwino ifyo tuleumfwa. No yu ni Yehova Lesa. Kuti twasanga icisansamushi mu mashiwi Solomone alandile, ayalembwa pali 2 Imilandu 6:29, 30.

Solomone alepepa ipepo lya kupeela itempele kuli Lesa mu Yerusalemu mu 1026 B.C.E. Mwi pepo apepele, ilyalepele nalimo amamineti 10, Solomone alumbenye Yehova ukuti ni Lesa wa cishinka, uufikilisha ifyo alaya, kabili uumfwa ipepo.—1 Ishamfumu 8:23-53; 2 Imilandu 6:14-42.

Solomone apapeete Lesa ukuti alekutika ku kupapaata kwa bantu bakwe. (Icikomo 29) Nangu ca kutila Solomone alumbwile amafya ayalekanalekana (icikomo 28), alishibe no kuti kapepa onse uwa kwa Lesa alishiba “icikuko cakwe” no “kukalipwa kwakwe.” Umuntu umo kuti nakwata ubwafya bumo ubulemucusha, e lyo umbi na o ali no bwafya bumbi ubumusakamike.

Te mulandu na mafya bengakwata, abatiina Lesa balikwata uwingabafwa mu mafya yabo. Mwi pepo Solomone apepele, aletontonkanya pali kapepa wa kwa Lesa umo na umo uwingapepa kuli Yehova ukufuma pa nshi ya mutima, ‘naimya na maboko yakwe.’ * Nalimo Solomone aibukishe ukuti ilyo Davidi wishi, ali sana no bulanda, atile: “Poosa icisendo cobe pali Yehova.”—Amalumbo 55:4, 22.

Bushe Yehova ali no kwasuka shani amapepo ya kufuma pa nshi ya mutima aya bantu balepapaata ukuti abafwe? Solomone apapeete Yehova ukuti: “Mukomfwe mu muulu, mu cifulo cenu, kabili mukabelele uluse no kupeela onse ukulingana ne mibele yakwe.” (Icikomo 30) Solomone alishibe ukuti ‘uumfwa ipepo,’ tasakamana fye bakapepa bakwe mu cinkumbawile, lelo alabasakamana ngo muntu umo umo. (Amalumbo 65:2) Yehova alafwa abalekabila ubwafwilisho, kabili alabelela uluse na babembu ababwelela kuli ena no mutima wabo onse.—2 Imilandu 6:36-39.

Mulandu nshi Solomone ashininkishishe ukuti Yehova alabelela uluse bakapepa bakwe abalapila? Solomone atwalilile ukupepa ukuti: “Pantu [mwe Yehova] mwalishiba umutima wakwe (pantu ni mwe mweka mwaishiba bwino imitima ya bana ba bantu).” Yehova alishiba icikuko no kukalipwa ificusha umubomfi wakwe onse, kabili na o wine alomfwa ububi.—Amalumbo 37:4.

Ipepo Solomone apepele kuti lyatusansamusha. Abantu banensu nalimo te kuti beshibe bwino ifyo tuleumfwa, e kutila, “icikuko cesu” no “kukalipwa kwesu.” (Amapinda 14:10) Lelo Yehova ena alishiba imitima yesu kabili alatusakamana icine cine. Nga twapepa no kumweba fyonse ifili mu mutima, tukashipikisha amafya. Baibolo itila: “Mulepoosa amasakamika yenu yonse pali ena, pantu asakamana imwe.”—1 Petro 5:7.

[Futunoti]