Siya Nahibalo sa “Kasingkasing sa mga Anak sa Katawhan”
Pakigsuod sa Diyos
Siya Nahibalo sa “Kasingkasing sa mga Anak sa Katawhan”
KINSA kanato ang wala mabug-ati sa mga problema sa kinabuhi? Usahay, daw wala gayoy makasabot sa atong mga kalisdanan o sa hilabihang kaguol nga atong gibati. Apan, may usa nga bug-os nga makasabot kanato, si Jehova nga Diyos. Kita mahupay sa mga pulong ni Solomon nga mabasa sa 2 Cronicas 6:29, 30.
Si Solomon nag-ampo panahon sa inagurasyon sa templo sa Jerusalem niadtong 1026 B.C.E. Sa iyang pag-ampo, nga tingali may gitas-ong diyes minutos, gihimaya ni Solomon si Jehova ingong maunongong Diyos, Tigtuman sa mga saad, ug Tigpatalinghog sa pag-ampo.—1 Hari 8:23-53; 2 Cronicas 6:14-42.
Si Solomon naghangyo sa Diyos nga dunggon unta ang pangaliyupo sa iyang mga magsisimba. (Bersikulo 29) Bisag gihisgotan ni Solomon ang daghang kasakitan (bersikulo 28), siya nasayod nga ang matag magsisimba nahibalo sa “iyang hampak” ug mibati sa “iyang kasakit.” Dili parehog problema ang gipas-an sa matag usa.
Bisan unsa man ang kahimtang, ang mga mahinadlokon sa Diyos wala mag-inusara sa pagpas-an sa ilang mga problema. Sa iyang pag-ampo, nahinumdom si Solomon sa tagsatagsa ka magsisimba kinsa tingali ‘magbayaw sa iyang mga kamot’ diha sa kinasingkasing nga pag-ampo kang Jehova. a Lagmit nahinumdoman ni Solomon nga sa naguol pag-ayo ang iyang amahang si David, kini miingon: “Itugyan ang imong palas-anon kang Jehova.”—Salmo 55:4, 22.
Unsaon pagtubag ni Jehova ang sinserong mga pangaliya? Si Solomon nangamuyo kang Jehova: “Maminaw ka unta gikan sa mga langit, ang dapit nga imong puloy-anan, ug ikaw magapasaylo ug mohatag sa matag usa sumala sa tanan niyang mga dalan.” (Bersikulo 30) Nahibalo si Solomon nga ang “Tigpatalinghog sa pag-ampo” nahingawa sa iyang mga magsisimba dili lamang ingong grupo kondili ingong mga indibiduwal. (Salmo 65:2) Si Jehova motaganag gikinahanglang tabang, lakip ang pagpasaylo sa makasasala nga mobalik sa Diyos sa bug-os nga kasingkasing.—2 Cronicas 6:36-39.
Nganong nakaseguro si Solomon nga dunggon ni Jehova ang mga pangaliya sa mahinulsolong magsisimba? Sa pagpadayon sa iyang pag-ampo, si Solomon miingon: “Tungod kay ikaw [Jehova] nahibalo sa iyang kasingkasing (tungod kay ikaw lamang ang nahibalo sa kasingkasing sa mga anak sa katawhan).” Si Jehova nasayod sa hampak o kasakit nga gihambin sa matag matinumanong magsisimba, ug Iya kining gihatagag pagtagad.—Salmo 37:4.
Makapahupay nato ang pag-ampo ni Solomon. Ang atong isigkaingon tingali dili bug-os makasabot sa atong gibati, ang atong “hampak” ug “kasakit.” (Proverbio 14:10) Apan si Jehova nasayod sa atong kasingkasing, ug siya nahingawa gayod kanato. Kon atong ipahungaw kaniya ang atong mga kaguol diha sa pag-ampo, mas mogaan ang atong mga problema. “Itugyan kaniya ang tanan ninyong mga kabalaka,” nag-ingon ang Bibliya, “kay siya may kahingawa kaninyo.”—1 Pedro 5:7.
[Footnote]
a Niadtong unang panahon, ‘ang pagbayaw sa mga kamot’ maoy usa ka aksiyon nga himoon sa usa sa dihang mag-ampo.—2 Cronicas 6:13.