San̄a Kpere Abasi

Enye Ọfiọk “Esịt Nditọ Owo”

2 CHRONICLE 6:29, 30

ANIE akanam mîkopke editịmede esịt iban̄a mme n̄kpọ-ata ye mme mfịna uwem emi? Ndusụk ini, imekeme ndikere ke owo ndomokiet itịmke ifiọk mme n̄kpọ-ata ye n̄kpọsọn̄ mfịna oro isobode. Edi odu owo kiet emi enen̄erede ọfiọk nte n̄kpọ etiede ye nnyịn, enye edi Jehovah Abasi. Se Solomon eketịn̄de ke 2 Chronicle 6:29, 30 ekeme ndidọn̄ nnyịn esịt.

Solomon ọkọbọn̄ akam ke ini ẹkeyakde temple Jerusalem ẹnọ Jehovah ke 1026 M.E.N. Ke akam esie emi ọkọniọn̄de n̄kpọ nte minit duop, Solomon ama otoro Jehovah nte Abasi akpanikọ, Andisu ntịn̄nnịm ikọ, ye Andikop akam.—1 Ndidem 8:23-53; 2 Chronicle 6:14-42.

Solomon ama ekpe Abasi ubọk ete okop n̄kpeubọk mme asan̄autom esie. (Ufan̄ikọ 29) Okposụkedi Solomon akasiakde ediwak afanikọn̄ (ufan̄ikọ 28), enye ọkọdọhọ ke mme asan̄autom Abasi kiet kiet ẹfiọk “ufen ye ubiak mmọ.” Owo kiet ekeme ndisobo mfịna kiet ke ini enye eken enyenede ata isio isio mfịna.

Inamke n̄kpọ m̀mê nso ke mmọ ẹsobo, mbon oro ẹbakde Abasi inyeneke ndibiom emi ikpọn̄. Ke ini Solomon ọkọbọn̄de akam oro, owo emi enye ekenyenede ke ekikere ekedi asan̄autom Abasi emi ‘editatde ubọk esie anyan’ ọbọn̄ akam ofụri esịt ọnọ Jehovah. * Ekeme ndidi Solomon ama eti nte ke ini David ete esie okosobode ikpọ mfịna, enye ama ọdọhọ ete: “Top mbiomo fo nọ Jehovah.”—Psalm 55:4, 22.

Didie ke Jehovah edinam n̄kpọ iban̄a n̄kpeubọk ofụri esịt oro owo ekpede oyom un̄wam? Solomon ama ekpe Jehovah ubọk ete: “Afo nyụn̄ tie ke heaven, kpa ebietidụn̄ fo kop, ndien fen nyụn̄ nam n̄kpọ nọ mmọ kiet kiet nte ekemde ye kpukpru usụn̄ mmọ.” (Ufan̄ikọ 30) Solomon ama ọfiọk ke “Andikop akam” ekere aban̄a mme asan̄autom esie nte otu ye nte owo kiet kiet. (Psalm 65:2) Jehovah esinọ un̄wam oro ẹyomde, esịnede edifen idiọkn̄kpọ owo oro afiakde etiene Abasi ke ofụri esịt.—2 Chronicle 6:36-39.

Nso inam Solomon enịm ke Jehovah oyokop n̄kpeubọk asan̄autom esie emi akabarede esịt? Solomon aka iso etịn̄ ke akam esie ete: “Afo [Jehovah ọmọfiọk] esịt mmọ: (koro afo ikpọn̄ etịm ọfiọk esịt nditọ owo).” Jehovah ọfiọk ufen m̀mê ubiak oro esịnede ke esịt anam-akpanikọ asan̄autom esie, Enye onyụn̄ ekere aban̄a oro.—Psalm 37:4.

Akam Solomon ekeme ndidọn̄ nnyịn esịt. Ekeme ndidi mme owo itịmke ifiọk nte etiede nnyịn ke idem, oro edi, ‘ufen nnyịn’ ye ‘ubiak nnyịn.’ (Mme N̄ke 14:10) Edi Jehovah ọfiọk esịt nnyịn onyụn̄ enen̄ede ekere aban̄a nnyịn. Ndin̄wan̄a esịt nnyịn nnọ enye ke ini ibọn̄de akam ekeme ndinam mbiomo nnyịn efere. Bible ọdọhọ ete: “[Ẹtop] kpukpru editịmede esịt mbufo ẹdori enye ke idem, koro enye ekerede aban̄a mbufo.”—1 Peter 5:7.

[Ikọ Idakisọn̄]