Pathian Hnaih Rawh

Ani Chuan “Mihring Fate Thinlung” A Hria

2 CHRONICLES 6:29, 30

BUAINA leh harsatna tâwk ngai lo tunge awm? A châng phei chuan kan harsatna leh rilru hrehawmna te min hriatthiampui thei an awm lo niin ka hre hial thei a ni. Mahse, kan rilru veizâwng hre thiam thei tuemaw chu a awm a ni—Pathian Jehova chu. Solomona thu, 2 Chronicles 6:29, 30-a kan hmuh aṭangin thlamuanna kan nei thei a ni.

B.C.E. 1026 khân Solomona chu Jerusalem-a biak in hlannaah a ṭawngṭai a. Minute sâwm vêl awh tûr a ṭawngṭainaah, Solomona chuan Pathian Jehova chu rinawmna Pathian, thutiamte Hlentu, leh ṭawngṭaina Ngaithlatu angin a chawimawi a ni.—1 Lalte 8:23-53; 2 Chronicles 6:14-42.

Solomona chuan Pathian hnênah amah betute ṭawngṭaina chu lo ngaithla tûrin a dîl a. (Châng 29) Solomona chuan hrehawmna chi hrang hrang (châng 28) sawi mah se, ani chuan mi tinin “an hri vei” an hriain, “an lungngaihna” an hre ṭheuh tih a sawi a. Tuemaw chu thil engemaw avângin a lungngai thei a, mi dang erawh chuan buaina dang daih a nei thei a ni.

Eng pawh lo ni ta se, Pathian ṭihtute tân an rit phurh chu mahni chauhva phurh a ngai lo. A ṭawngṭainaah, Solomona chuan Jehova hnêna thinlung tak zeta ṭawngṭaia ‘bân phar,’ Pathian betu mi mal tinte chu a hre reng a ni. * Ani chuan a pa Davida’n a lungngaih êm êm laia a sawi: “I rit phurh chu LALPA chungah nghat la,” tih chu a hre chhuak a ni ngei ang.—Sâm 55:4, 22.

Engtin nge Pathian Jehova chuan tihtakzeta ṭanpui dîlna chu a chhân lêt ang? Solomona chuan Pathian Jehova chu: “I awmna vânan lo ngaithla la, ngaidam la, mi tin an awm dân ang ṭheuh zêlin hlawhtlintîr ang che,” tiin a ngên a. (Châng 30) “Ṭawngṭaina ngaithlatu” chuan amah chibai bûktute chu a huho mai ni lovin, a mi mal tak pawhin a ngaihtuah tih Solomona chuan a hria a ni. (Sâm 65:2) Pathian Jehovah chuan thinlung zawng zawnga a hnêna lo kîr leh mi sualte ngaihdamna pawh tiamin, an mamawh ṭanpuina chu a pe a ni.—2 Chronicles 6:36-39.

Engvângin nge Solomona chuan Pathianin inlamlêtte ṭawngṭaina chu a ngaithla ang tih a hriat chian? Solomona chu heti hian a ṭawngṭai zawm a ni: “An thinlung i hre ṭheuh si a; (nangmah chauh hi mihring fate thinlung hretu i ni si a),” tiin. Jehova chuan amah betu rinawmte thinlunga awm an hri vei leh lungngaihna chu a hria a, chûng chu a ngai pawimawh a ni.—Sâm 37:4.

Solomona ṭawngṭaina aṭang hian thlamuanna kan hmu thei a. Kan mihringpuite chuan chhûngrila kan rilru veizâwng—kan “hri vei” leh kan “lungngaihna”—chu min hriatthiampui vek kher lo thei a. (Thufingte 14:10) Mahse, Jehova chuan kan thinlung a hria a, min ngaihsak hle a ni. Ṭawngṭaia a hnêna thinlung kan leih buakna chuan kan rit phurh a tizâng sawt thei a. Bible chuan: “Anin a ngaihsak ṭhin che u avângin in manganna zawng zawng ama chungah nghat vek rawh u,” tiin a sawi a ni.—1 Petera 5:7. (w10-E 12/01)

[Footnote]