Ia Mafuta Atu i le Atua

E Silafia e Ia “Loto o le Fanau a Tagata”

2 NOFOAIGA A TUPU 6:29, 30

O AI ea se tasi o i tatou e leʻi lofitūina i luʻi ma faafitauli o le olaga? I nisi taimi, e foliga ai e aunoa ma se isi e malamalama i o tatou faafitauli ma mafatiaga. Ae peitaʻi, e malamalama lelei Ieova le Atua i o tatou faalogona, ma e faamāfanafanaina i tatou i upu a Solomona o loo i le 2 Nofoaiga a Tupu 6:29, 30.

O le tatalo a Solomona ina ua faapaiaina le malumalu i Ierusalema i le 1026 T.L.M., atonu e na o le sefulu minute le umi. Ae o loo viiviia ai e Solomona Ieova, o le Atua faamaoni, o Lē e faataunuuina ana folafolaga, ma o ia o le Faafofoga tatalo.—1 Tupu 8:23-53; 2 Nofoaiga a Tupu 6:14-42.

O loo augani atu Solomona i le Atua ia faafofoga mai i tatalo a ē e tapuaʻi atu iā te ia. (Fuaiupu 29) O loo taʻua e Solomona le tele o mafatiaga (fuaiupu 28), ae na ia taʻua, o loo iloa e tagata tapuaʻi taʻitoʻatasi “lona lava malaia ma lona tigā.” Ae atonu e ese le mea o mafatia ai se isi, mai i le mea o tigā ai le isi.

Po o le ā lava le tulaga, ae ia mautinoa e i latou e matataʻu i le Atua, o loo iai Lē e fesoasoani e tauave o latou mafatiaga. I le tatalo a Solomona, ua ia manatua ai le tagata tapuaʻi o loo “faaloaloa atu ona lima” iā Ieova i lana tatalo ma le lotoatoa. * Atonu o loo manatua e Solomona upu a lona tamā o Tavita ina ua matuā mafatia o ia, e faapea: “Ia tuuina atu iā Ieova ou popolega uma.”—Salamo 55:4, 22.

E faapefea ona tali mai Ieova i ōlega mai i le loto mo le fesoasoani? Na augani atu Solomona iā Ieova e faapea: “Ia e faafofoga mai i le lagi i le mea o loo e afio ai, ia e faamagalo mai, ma foaʻi mai i tagata taʻitoʻatasi e tusa ma ona ala uma.” (Fuaiupu 30) Na iloa e Solomona e manatu mai “Le Faafofoga tatalo” i ona tagata o se vaega faapea ma tagata taʻitoʻatasi. (Salamo 65:2) E saunia e Ieova le fesoasoani o loo manaʻomia, e aofia ai le faamagaloina o lē ua agasala a ua toe foʻi i le Atua ma lona lotoatoa.—2 Nofoaiga a Tupu 6:36-39.

Aiseā na mautinoa ai e Solomona e tali mai Ieova i le talosaga a le tagata tapuaʻi e salamō moni? Na taʻua atili i le tatalo a Solomona: “Auā ua e silafia lona loto (auā ua na o oe e silafia lelei loto o le fanau a tagata).” O loo silafia lelei e Ieova le malaia ma le tigā o loo i loto o ona tagata tapuaʻi uma, ma e mafatia ai foʻi o Ia.—Salamo 37:4.

E faamāfanafanaina i tatou i le tatalo a Solomona. Atonu e lē o malamalama lelei isi tagata i o tatou faalogona, i o ‘tatou lava malaia’ ma o ‘tatou tigā.’ (Faataoto 14:10) Peitaʻi, e silafia lelei e Ieova o tatou loto, ma e manatu alofa mai o ia iā i tatou. E amogofie a tatou avega pe a sasaa atu o tatou faafitauli iā te ia e ala i le tatalo. Ua faapea mai le Tusi Paia: “Ia taʻu atu o outou popolega uma iā te ia, auā o loo manatu mamafa mai o ia iā te outou.”—1 Peteru 5:7.

[Faaopoopoga i lalo]