Tshinela Eka Xikwembu

Xi Tiva “Mbilu Ya Vana Va Vanhu”

2 TIKRONIKA 6:29, 30

I MANI loyi a nga si tshamaka a titwa a tshikilelekile hikwalaho ka swiphiqo leswi hi langutanaka na swona? Minkarhi yin’wana swi nga ha tikomba onge a ku na munhu la nga twisisaka ku xaniseka loku hi langutanaka na kona kumbe ku vava loku hi ku twaka. Kambe u kona la yi twisisaka hi ku helela ndlela leyi hi titwaka ha yona, i Yehovha Xikwembu. Marito ya Solomoni lama nga eka 2 Tikronika 6:29, 30 ma nga hi chavelela.

Hi 1026 B.C.E Solomoni u endle xikhongelo xa ku nyiketeriwa ka tempele eYerusalema. Exikhongelweni xakwe, lexi kumbexana a xi lehe timinete ta khume, Solomoni u dzunise Yehovha tanihi Xikwembu xo tshembeka, Muhetisisi wa switshembiso ni Mutwi wa xikhongelo.—1 Tihosi 8:23-53; 2 Tikronika 6:14-42.

Solomoni u kombela Xikwembu leswaku xi yingisa swikombelo swa vagandzeri va xona. (Ndzimana 29) Hambileswi Solomoni a boxaka maxangu yo tala (ndzimana 28), u vule leswaku mugandzeri un’wana ni un’wana u tiva “khombo rakwe ni ku vaviseka kakwe.” Swi nga ha endleka leswaku munhu un’wana a karhatiwa hi xiphiqo xin’we kasi van’wana va langutane ni swiphiqo swo hambana-hambana.

Ku nga khathariseki xivangelo xa kona, vanhu lava chavaka Xikwembu va nga wu kuma mpfuno eka swiphiqo leswi va langutanaka na swona. Loko a ri karhi a khongela, Solomoni a a anakanya hi mugandzeri loyi a a ta ‘tshambuluta swandla’ a tshinela eka Yehovha hi xikhongelo lexi humaka embilwini. * Kumbexana Solomoni a a tsundzuka marito ya tata wakwe Davhida loyi loko a tshikilelekile a nga te: “Lahlela ndzhwalo wa wena eka Yehovha.”—Pisalema 55:4, 22.

Xana Yehovha a a ta angula njhani eka swikombelo leswi humaka embilwini swo lava mpfuno? Solomoni u kombele Yehovha a ku: “Onge wena u nga swi twa u ri ematilweni, ndhawu leyi u tshamaka eka yona, u fanele u rivalela u tlhela u nyika un’wana ni un’wana hi ku ya hi tindlela takwe hinkwato.” (Ndzimana 30) Solomoni a a swi tiva leswaku “Mutwi wa xikhongelo” wa khathala hi mugandzeri un’wana ni un’wana wakwe ku nga ri loko va ri hi ntlawa ntsena. (Pisalema 65:2) Yehovha u nyikela mpfuno lowu lavekaka, ku katsa ni ku rivalela mudyohi la hundzukaka hi mbilu hinkwayo.—2 Tikronika 6:36-39.

Ha yini Solomoni a a tiyiseka leswaku Yehovha u ta swi hlamula swikhongelo swa vagandzeri lava hundzukeke? Loko a ya emahlweni ni xikhongelo xakwe u te: “Hikuva [Yehovha] u tiva mbilu yakwe (hikuva wena u ri wexe u yi tiva kahle mbilu ya vana va vanhu).” Yehovha wa ma xiya maxangu kumbe ku vava loku mugandzeri un’wana ni un’wana wakwe wo tshembeka a lwaka na kona.—Pisalema 37:4.

Xikhongelo xa Solomoni xi nga hi chavelela. Swi nga ha endleka leswaku vanhu va nga yi twisisi hi ku helela ndlela leyi hi titwaka ha yona, ‘khombo ra hina’ ni ku ‘vaviseka ka hina.’ (Swivuriso 14:10) Kambe Yehovha u tiva timbilu ta hina naswona wa khathala swinene hi hina. Loko hi n’wi byela leswi nga etimbilwini ta hina hi xikhongelo, leswi swi ta hi pfuna leswaku hi kota ku langutana ni swiphiqo swa hina. Bibele yi ri: “Mi lahlela ku vilela hinkwako ka n’wina eka xona, hikuva xa mi khathalela.”—1 Petro 5:7.

[Nhlamuselo ya le hansi]