E haafatata ˈtu i te Atua

Ua ite oia “i te aau o te taata atoa”

PARALEIPOMENO 2, 6:29, 30

O VAI tei ore aˈenei i teimaha i te mau fifi o te oraraa? I te tahi mau taime, e au ra e aita e taata e taa ra i ta tatou e faaruru ra e to tatou mauiui. Hoê râ te taa maitai ra i to tatou huru aau, o te Atua ra o Iehova. E tamahanahanahia tatou e te mau parau a Solomona i roto i te Paraleipomeno 2, 6:29, 30.

Te pure nei Solomona a avarihia ˈi te hiero i Ierusalema i 1026 hou to tatou tau. I roto i ta ˈna pure, ahuru minuti paha te maoro, te faahanahana ra oia ia Iehova mai te Atua taiva ore, tei faatupu i te mau parau fafau, e tei faaroo i te pure.—Te mau arii 1, 8:23-53; Paraleipomeno 2, 6:14-42.

Te taparu ra Solomona i te Atua ia faaroo i te mau tiaororaa a to ˈna feia haamori. (Irava 29) Noa ˈtu e te faahiti ra oia i te mauiui e rave rahi (irava 28), te tapao ra o ˈna e ua ite te taata haamori taitahi “i to ˈna iho ino e to ˈna iho ati.” Te mauiui ra paha te tahi no te tahi ohipa, area vetahi atu no te hoê fifi taa ê ïa.

Noa ˈtu eaha te tupuraa, eita te feia e mǎtaˈu ra i te Atua e amo o ratou anaˈe i ta ratou hopoia. Te haamanaˈo ra Solomona i ǒ nei i te taata haamori taitahi o te ‘hohora i tana rima’ no te haafatata ˈtu ia Iehova i roto i te pure haavare ore. * E peneiaˈe atoa i te parau a to ˈna metua tane ra o Davida a ahoaho rahi ai oia: “E tuu oe i ta oe hopoia ia Iehova ra.”—Salamo 55:4, 22.

E nafea Iehova e pahono ai i te mau aniraa haavare ore no te tauturu? Te taparu ra Solomona ia Iehova: “A faaroo mai ai i nia i te raˈi, i to oe iho vahi, a faaore ai i te hara, a faaau mai ai oe i te utua tei au i ta ˈna atoa ra mau parau.” (Irava 30) Ua ite oia e te tâuˈa ra “tei faaroo i te pure” i te taata haamori taitahi eiaha noa râ ei pǔpǔ. (Salamo 65:2) E tauturu iho â e e faaore Iehova i te hara a te taata e hoˈi mai ia ˈna ra ma to ˈna aau atoa.—Paraleipomeno 2, 6:36-39.

No te aha Solomona i papu ai e e pahono Iehova i te mau tiaororaa a te taata haamori tatarahapa? Te na ô faahou ra oia: “O oe hoi [Iehova] te ite i to ˈna aau; o oe, oe anaˈe ra te ite i te aau o te tamarii a te taata nei.” Te ite ra Iehova i te ati e te ino i roto i te aau o to ˈna taata haamori taiva ore taitahi, e te haapeapea ra Oia ia ratou.—Salamo 37:4.

E tamahanahanahia tatou e te pure a Solomona. Eita paha te taata e taa maitai i to tatou huru aau: to ‘tatou iho ino e to tatou iho ati.’ (Maseli 14:10) Te ite ra râ Iehova i to tatou aau, e te tâuˈa rahi roa maira oia. Ia haamahorahora tatou i to tatou aau ia ˈna i roto i te pure, e mâmâ mai ïa ta tatou hopoia. “E huri i to outou ahoaho atoa i nia ia ˈna; oia hoi te tiai mai ia outou,” ia au i te Bibilia.—Petero 1, 5:7.

[Nota i raro i te api]