Nganong Ilang Gisalikway ang Mesiyas?

SA DIHANG si Jesus dinhi sa yuta, ang mga tawo nahingangha sa iyang gipanulti ug nahibulong sa iyang mga milagro. Busa, daghan ang “nagbutang ug pagtuo kaniya” ug midawat kaniya ingong ang gitagnang Mesiyas, o Kristo. Sila nangatarongan: “Sa dihang ang Kristo moabot, himoon ba kaha niya ang mas daghang ilhanan kay sa gihimo niining tawhana?”—Juan 7:31.

Bisag daghan kaayong ebidensiya nga nagpaila kang Jesus ingong ang Mesiyas, ang kadaghanan sa nakakita ug nakadungog kaniya wala mahimong mga magtutuo. Ikasubo, bisan kadtong sa sinugdan mituo kaniya mitalikod sa ulahi. Nganong daghan kaayo ang nagsalikway kang Jesus ingong ang Mesiyas bisan pa sa daghan kaayong ebidensiya? Tagdon nato ang mga rason, ug samtang ato kanang buhaton, pangutan-a ang imong kaugalingon, ‘Ako ba usab kaha masayop sa akong pagtuo karon?’

Mga Pagdahom nga Napakyas

Sa pagkatawo ni Jesus, daghang Hudiyo ang nagpaabot sa Mesiyas. Sa dihang gidala ang batang si Jesus didto sa templo, siya gisugat niadtong “nagahulat sa kaluwasan sa Jerusalem” pinaagi sa gisaad nga Mesiyas. (Lucas 2:38) Sa ulahi, daghan sa nakakita sa mga gibuhat ni Juan nga Tigbawtismo ang nangutana: “Siya na ba kaha ang Kristo?” (Lucas 3:15) Unsa diay ang gidahom  sa mga Hudiyo niadtong unang siglo nga buhaton sa Mesiyas?

Gituohan sa kadaghanang Hudiyo nianang panahona nga ang Mesiyas moabot ug magpahigawas kanila gikan sa malupigong pagmando sa mga Romano ug magpasig-uli sa yutan-ong gingharian sa Israel. Sa wala pa magsugod ang ministeryo ni Jesus, dihay mga lider nga kusganong nangombinsir sa mga tawo sa pagrebelde batok sa kagamhanan. Lagmit kini ang nakaimpluwensiya pag-ayo kon unsay gidahom sa mga tawo bahin sa Mesiyas.

Si Jesus lahi ra kaayo sa mini nga mga Mesiyas. Wala niya ipasiugda ang kapintasan apan siya nagtudlo sa paghigugma sa ilang mga kaaway ug sa pagpasakop sa mga awtoridad. (Mateo 5:41-44) Wala siya mosugot nga himoon sa mga tawo nga hari. Hinunoa, siya nagtudlo nga ang iyang gingharian “dili bahin niining kalibotana.” (Juan 6:15; 18:36) Bisan pa niana, ang sayop nga mga pagtuo bahin sa Mesiyas nakaimpluwensiya pag-ayo sa mga tawo.

Si Juan nga Tigbawtismo nakakita ug nakadungog mismo ug milagrosong ebidensiya nga nagpamatuod kang Jesus ingong Anak sa Diyos. Bisan pa niana, sa dihang siya nabilanggo, siya nagpasugo ug mga tinun-an aron pangutan-on si Jesus: “Ikaw ba ang Usa nga Moanhi, o magpaabot pa ba kamig lain?” (Mateo 11:3) Tingali si Juan naghunahuna kon si Jesus ba gayod ang gisaad nga Manluluwas nga maoy motuman sa gilaoman sa mga Hudiyo.

Ang mga apostoles ni Jesus nalisdan sa pagsabot nganong siya patyon ug dayon banhawon. Sa dihang gipatin-aw ni Jesus kanila nga ang Mesiyas kinahanglang mag-antos ug mamatay, si Pedro “nagpinig kaniya ug nagbadlong kaniya.” (Marcos 8:31, 32) Wala pa masabti ni Pedro kon nganong si Jesus kinahanglang mamatay ingong Mesiyas.

Sa pagsulod ni Jesus sa Jerusalem sa dayon na ang Paskuwa niadtong 33 C.E., siya giabiba sa madasigong katawhan ingong Hari. (Juan 12:12, 13) Kalit kaayong nausab ang kahimtang! Nianang semanaha, si Jesus gidakop ug gipatay. Human siya patya, duha sa iyang mga tinun-an ang miingon: “Naglaom kami nga kining tawhana mao ang usa nga gitakdang magluwas sa Israel.” (Lucas 24:21) Bisag ang nabanhawng si Jesus nagpakita sa iyang mga tinun-an, anaa gihapon sa ilang hunahuna nga ang Mesiyas magtukod ug yutan-ong gingharian. Sila nangutana: “Ginoo, ipasig-uli mo ba ang gingharian sa Israel niining panahona?” Dayag nga ang sayop nga mga pagdahom bahin sa Mesiyas nakagamot pag-ayo sa ilang kasingkasing ug hunahuna.—Buhat 1:6.

Human sa pagkayab ni Jesus sa langit ug sa pagbubo ug balaang espiritu, tin-awng nasabtan sa iyang mga tinun-an nga ang Mesiyas magmando ingong langitnong hari. (Buhat 2:1-4, 32-36) Si apostol Pedro ug Juan maisogong nagsangyaw bahin sa pagkabanhaw ni Jesus ug nagpamatuod nga sila gipaluyohan sa Diyos pinaagi sa paghimog mga milagro. (Buhat 3:1-9, 13-15) Linibo sa Jerusalem ang nahimong mga magtutuo. Apan, ang kadagkoan sa mga Hudiyo wala mahimuot niini. Sila nagsupak sa mga apostoles ug sa mga tinun-an, sama sa ilang gihimo kang Jesus. Nganong ang Hudiyong relihiyosong mga lider kusganong nagsalikway kang Jesus?

Gisalikway sa Relihiyosong mga Lider

Sa dihang miabot si Jesus dinhi sa yuta, ang relihiyosong pagtuo ug mga kostumbre sa mga Hudiyo halayo na kaayo kon unsay gitudlo sa inspiradong Kasulatan. Ang relihiyosong mga lider nianang panahona—ang mga Saduseo, Pariseo, ug mga eskriba—nagpalabi sa pagpatuman sa mga tradisyon sa tawo inay sa sinulat nga Pulong sa Diyos. Kadaghan nila akusahi si Jesus nga naglapas kono sa Balaod tungod sa iyang pagpang-ayo panahon sa Igpapahulay. Pinaagig pagyagyag nga dili Kasulatanhon ang ilang mga pagtulon-an, gihagit ni Jesus ang ilang awtoridad ug ang ilang mga pangangkon nga sila inuyonan sa Diyos. Sukwahi kanila, si Jesus kabos ug kagikan ug wala maedukar sa ilang relihiyosong tunghaan. Lisod gayod kaayo sa maong garbosong mga tawo sa pagdawat kang Jesus ingong ang Mesiyas! Nakapasuko pag-ayo kanila ang maong komprontasyon nga tungod niana sila  “nagsabotsabot batok [kang Jesus] aron ilang mapatay siya.”—Mateo 12:1-8, 14; 15:1-9.

Nan sa unsang paagi ikapatin-aw sa relihiyosong mga lider ang katakos ni Jesus sa paghimog mga milagro? Dili nila ikalimod nga nahitabo ang mga milagro. Apan, aron walay motuo kang Jesus, sila nagpasipala kaniya pinaagi sa pag-ingon nga ang iyang gahom gikan kang Satanas. Matod nila: “Kining tawhana dili maghingilin sa mga demonyo gawas nga pinaagi kang Beelzebub, ang magmamando sa mga demonyo.”—Mateo 12:24.

Duna pay laing dakong rason nganong wala gayod nila ilha si Jesus ingong ang Mesiyas. Human banhawa ni Jesus si Lazaro, nagsabotsabot ang mga lider sa lainlaing relihiyosong mga grupo ug miingon: “Unsay atong buhaton, tungod kay kining tawhana nagbuhat ug daghang ilhanan? Kon pasagdan lang nato siya niini, silang tanan magbutang ug pagtuo kaniya, ug moanhi ang mga Romano ug kuhaon ang atong dapit ug ang atong nasod.” Kay nahadlok nga mawad-ag gahom ug posisyon, sila nagkunsabo sa pagpatay kang Jesus ug Lazaro!—Juan 11:45-53; 12:9-11.

Gipihig ug Gilutos sa Katilingban

Tungod sa tinamdan sa Hudiyong relihiyosong mga lider sa unang siglo, ang tanan nagpanuko sa pagdawat kang Jesus ingong ang Mesiyas. Kay mapasigarbohon sa ilang prominenteng mga posisyon, sila nagtamay sa tanan nga nagpakitag pagtuo kang Jesus, nga nag-ingon: “Aduna bay usa sa mga magmamando o sa mga Pariseo nga nagbutang ug pagtuo kaniya?” (Juan 7:13, 48) Ang ubang Hudiyong mga lider, sama kang Nicodemo ug Jose nga taga-Arimatea, nahimong mga tinun-an ni Jesus, apan ila kining gihilom tungod sa kahadlok. (Juan 3:1, 2; 12:42; 19:38, 39) Gimando sa Hudiyong mga lider nga “kon may magsugid kaniya ingon nga Kristo, palagpoton siya gikan sa sinagoga.” (Juan 9:22) Ang maong tawo mahimong inayran ug tinamay sa katilingban.

Ang pagsupak batok sa mga apostoles ug tinun-an ni Jesus sa ulahi nakapasilaob sa mapintas nga paglutos. Kay maisogong nagsangyaw ang mga apostoles, sila gitaral sa Sanhedrin, ang kinatas-ang korte sa mga Hudiyo. (Buhat 5:40) Ang tinun-ang si Esteban gibutangbutangan sa mga magsusupak nga siya nagpasipala kono. Siya gihukman sa Sanhedrin ug gibato hangtod mamatay. Dayon, “dihay dakong paglutos batok sa kongregasyon nga didto sa Jerusalem; ang tanan gawas sa mga apostoles nahitibulaag sa tibuok nga mga rehiyon sa Judea ug Samaria.” (Buhat 6:8-14; 7:54–8:1) Si Saulo, nga sa ulahi nahimong si apostol Pablo, maoy usa sa nanguna sa paglutos nga gipaluyohan sa hataas nga saserdote ug sa “katigoman sa mga ansiyano.”—Buhat 9:1, 2; 22:4, 5.

Bisan pa sa lisod nga mga kahimtang, kusog nga miuswag ang Kristiyanidad mga katuigan human mamatay si Jesus. Apan bisan tuod nga linibo ang nahimong mga magtutuo, diyutay ra gihapon ang mga Kristohanon sa Palestina sa unang siglo. Kon ang usa mopaila sa dayag nga siya tinun-an ni Kristo, siya kinahanglang andam nga isalikway sa katilingban ug moagom ug kapintasan.

Unsang Leksiyon ang Atong Makat-onan Niadtong Nagsalikway Kang Jesus?

Oo, tungod sa sayop nga pagtuo, pagpit-os sa katilingban, ug paglutos, daghan sa unang siglo ang wala motuo kang Jesus. Karon, nakaimpluwensiya usab sa daghan ang sayop nga mga ideya bahin kang Jesus ug sa iyang mga pagtulon-an. Pananglitan, daghan ang natudloan nga ang Gingharian sa Diyos anaa ra sa ilang kasingkasing o moabot kini sa tawhanong mga paningkamot. Ang uban nakombinsir sa pagdangop sa siyensiya o teknolohiya aron masulbad ang mga suliran sa tawo, busa para nila dili na kinahanglang motuo pa sa Mesiyas. Daghang modernong kritiko ang miergo nga ang mga panghitabo  sa ministeryo ni Jesus nga girekord sa Bibliya dili tinuod, ug sila maoy hinungdan nga nahuyang ang ilang pagtuo kang Jesus ingong ang Mesiyas.

Tungod sa maong mga ideya ug teoriya, daghan ang nalibog bahin sa papel sa Mesiyas o wala na lang magpakabana niini. Apan sa pagkatinuod, alang niadtong buot mosusi sa ebidensiya, mas daghan ang mabatonang pamatuod karon nga si Jesus mao ang Mesiyas kon itandi sa unang siglo. Anaa ang tibuok Hebreohanong Kasulatan nga naundan ug daghang tagna bahin sa kon unsay buhaton sa Mesiyas ug ang rekord sa upat ka Ebanghelyo sa Bibliya kon unsay gihimo ni Jesus ingong katumanan sa maong mga tagna. a

Daghan gayod kitag ebidensiya aron makahimog maalamong desisyon niining butanga. Ug dinalian ang paghimo niini nga desisyon. Ngano? Kay gibutyag sa Bibliya nga ang Hari sa Gingharian sa Diyos, si Jesus, sa dili madugay maglaglag niadtong nagdaot sa yuta ug magpatunghag matarong nga pagmando nga maghatag sa tanang masinugtanong sakop ug kinabuhing walay kataposan sa paraiso sa yuta. (Daniel 2:44; Pinadayag 11:15, 18; 21:3-5) Maimo kining kahibulongang kaugmaon kon ikaw maningkamot karon sa pagkat-on bahin kang Jesus ug sa pagpasundayag ug pagtuo kaniya. Hinumdomi ang mga pulong ni Jesus: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”—Juan 3:16.

[Footnote]

[Blurb sa panid 20]

Ilhon kaha nimo ang Mesiyas kon ikaw nabuhi sa panahon ni Jesus?

[Hulagway sa panid 21]

Ayaw tugoting ang sayop nga mga pagtuo mopugong kanimo sa pagkat-on sa kamatuoran bahin kang Jesus