Toñojokelenuñaku Anvwali Ajiki

ANVWALI ajiki diwu amonaña kukala kweneni hampinji yadikitañawu nyidimu yawu kubadika antu amakwawu. Amonaña kukala kwakuvulu. Azataña nyidimu yayivulu hakwila nawu akameni chisaka. Neyi weñila mudimu, wekalaña cheñi nanyidimu yikwawu yidi neyi, kuya nakulanda yuma, kuteleka, kuwahisha mwitala, nikwakamena anyana. Kwekala cheñi nyidimu yakwakamena anyana neyi anakati, kuhema, nikukundeja anyana, neyi chinatwesheki, nukuwanaku mpinji yakuzatilamu tunyidimu twindi.

Chineli yisaka yawanvwali ajiki yinakuvulilaku nawa muchituñilu twayimonaña makonu, chinateli kutukalila kuyakamena. Mama yawantu wumu wahosheli hatooka nindi, “Hinelukili chikupu kukala kwamonañawu anvwali ajikiku, sampu mpinji yinekalili nvwali mujiki.” Chumanyi chimwatela kwila kulonda mutoñojokeleñaku anvwali ajiki? Komana mwatela kuyakamenaña? Tushinshikenu yuma yisatu yikutuleñela kusha maana kuyuma yakankilañawu.

Yuma Yikutuletesha Kuyitoñojokelaku

Anvwali ajiki amavulu akeñaña kuyikwasha. Mfwila wamumbanda wudi nayaaka 41 nawa wukweti anyana ayedi wahosheli nindi, “Mpinji yikwawu nakañanyaña kwiluka mwakwilila, nawa nyidimu yanvulilaña chikupu.” Amfwila awamayala hela awambanda, anvwali atemukawu kudi enikwawu, hela yuma yikwawu yatama yaleteshaña anvwali ajiki kutiya neyi chatiyiliyi mama yawantu wamujiki. Wahosheli nindi, “Tunakulomba wukwashu, nawa tunakufwila mutukwashi swayi!”

Kwazañaleshaña. Komana mwakwashahu dehi muntu wasendeli chiteli chalema? Neyi dimu, hadaha mwatiyili kuwaha hakwiluka nenu mwamukwashili. Chochimu, nyidimu yawanvwali ajiki hiyanateli kuyizata nkawawuku. Neyi musha maana kuyuma yinakaankiluwu kuhitila mukuyikwasha, mazu ekala hamukanda Masamu 41:1 akwikala alala kudenu akwila nawu: ‘Wayitoñojokaña azeya nakooleki: Yehova wakamupulwisha mwifuku datama.’

Kwamutiyishaña Nzambi kuwaha. Hamukanda waYakoba 1:27 hahosha nawu: “Yijila yamonañayi Nzambi Tata yetu nindi yalala yayiwahi, yoyakuhempula anshona abula atata jawu, niambanda anfwila hamonañawu lukadi, nakudihemba abuli kusampukila kuyuma yampata yamunu mwishina.” Ichi chabombelamu kutala anvwali ajiki. * Hamukanda waAheberu  13:16 hahosha nawu: “Hakwinza kwila yuma yayiwahi nikudyañana bayi muchivulamenaku; muloña Nzambi watiyaña kuwaha nanyilambu yidi chochochu.”

Chineli tuneluki dehi yuma yisatu yikutuletesha kutoñojokelaku anvwali ajiki, tushinshikenu yuma yimwatela kwila hakwila nawu muyikwashi, nichimwatela kwiluka nenu yuma yimukuyizatila yinateli kuyikwasha.

Kwiluka Yuma Yinakaankiluwu

Hadaha munateli kutoñojoka nenu mwatela kumwihula nvwali mujiki nenu, “Chumanyi chinatela kuyilila?” Ichi chikuletesha muntu yakañanyi kuyileja chikupu yuma yinakaankiliyi. Neyi chitwadiza hakusambila, mukanda waMasamu 41:1 wakonkomwena ‘hakutoñojokelaku.’ Mukanda wumu washimuna nawu izu dachiHeberu dalumbulula nawu, “kutoñojoka chikupu hayuma yakala kwaleñela muntu yakoñi mwamuwahi.”

Dichi, hakwila nawu muwani njila yayiwahi yakuyikwashilamu, mwatela kutoñojoka chikupu hakukala kunakumona nvwali mujiki. Shenuku kashinshi, kubadika kumona hohu nenu anakukabakana. Dihulenu nenu, ‘Neyi yami namonaña kukala kwamuchidiku, wukwashinyi wunadi kukeña?’ Kafwampi, anvwali ajiki amavulu anateli kuyileja nawu, hela neyi mukweseka kuzata nañovu himukutwesha kwiluka chikupu kukala kwamonaña nvwali mujikiku, chiña neyi ninenu mwikala anvwali ajiki. Hela chochu, neyi muzata nañovu mukwiluka kukala kwamonañawu nawa ‘chikuyileñela kutoñojokelaku’ anvwali ajiki.

Imbujolenu Chakutalilahu Chachiwahi chaNzambi

Kutalisha hakwakamena anvwali ajiki, Yehova Nzambi diyi hohu wayakamenaña mukukeña nawa munjila yayiwahi kubadika muntu wudi wejima. Nsona jajivulu jakonkomwenaña nawu Yehova Nzambi wayitoñojokelañaku nikuyakamena antuluwa, anshona, nianvwali ajiki. Neyi tushinshika njila Nzambi yakamenañamu antu azeya, tunateli kwiluka chakukwasha antu munjila yayiwahi. Tushinshikenu hayikuma yiwana yalema.

Tiyililenu nakanañachima

MuNshimbi jayinkeliyi aIsarela akushankulu, Yehova wayilejeli nindi “chalala ami nakatiya kudila” kwawantu akabishawu. (Kwidika 22:22, 23) Munateli kwimbujola ñahi ichi chakutalilahu chachiwahi? Anvwali ajiki atiyaña wuudi chikupu hamuloña wakushakama chakadi mukwawu mukulumpi wakuhanjeka nindi. nvwali mujiki wumu wahosheli nindi: “Neyi anyana anayi dehi nakukama, mpinji yikwawu nakuminaña dakudidilila. Mpinji yikwawu wuudi wanswejelaña.” Neyi chinatwesheki, komana kwila mumona mpinji ‘yakutiya kudila’ kwanvwali mujiki wunakukeña kuyileja nsañu yidi kumuchima windi nehi? Neyi mumona nenu kumutiyilila nvwali mujiki nakanañachima kunateli kumukwasha, mana kwetu hatela kuya nkawinduku, chikuwaha neyi wukuya hamu namana kwetu hela namuhela mukwawu.

Hoshenu mazu akukolesha

Yehova woneneni ansoneki atumina twajila, hela masamu embileñawu aIsarela hampinji yakudifukula. Fwikijenu antuluwa nianshona amuIsarela chayikolesheleñawu hakwimba tumina tuyonenawu kudi Nzambi twayanukishileña nawu Yehova wadiña ‘tata yawu’ nawa ‘nsompeshi’ yawantuluwa nianshona nawa wayikundejeleña. (Masamu 68:5; 146:9) Anetu nawa tunateli kuhosha mazu akukolesha akwanukañayi nvwali mujiki hela munahiti yaaka. Ruth, nvwali mujiki, wanukaña mazu amulejeli tata yawantu wumu wakuluka yitembi, hela chakwila munahiti dehi yaaka 20, wamulejeli nindi: “Wunakuzata mudimu walema hama hakukulisha anyaneyi ayedi awamayala, wutwalekuhu.” Ruth wahosheli nindi: “Awa mazu anlejeliyi ankwashili hama.” Eñañi, ‘mazu amawahi aleteshaña kutiya kuwaha’ nawa anateli kukolesha nvwali mujiki kubadika chitwatoñojokaña. (Yishimu 12:25) Kuduhu yuma yayiwahi yimwatoñojokaña,  yimwatela kumuhamekelahu nvwali mujiki?

Neyi chinatwesheki yinkenu yuma yakumujimba

Nshimbi jaYehova jayinkeliyi Isarela jabombelelumu kwakamena antuluwa nianshona nikuyinka yakudya munjila yakalemesha. Iyi nshimbi yaleñeleleña atuzweñi kwikala nayakudya yayivulu ‘yakudya. . . nakwikuta.’ (Kuhituluka 24:19-21; 26:12, 13) Anetu nawa tunateli kukwasha chisaka chanvwali mujiki, chinakaankili yuma yakumujimba munjila yakalemesha nawa yamaana. Kwila muyitwalila yakudya hela yuma yikwawu kwitala dawu nehi? Komana mukweti yakuvwala yimwatela kumwinka nvwali mujiki hela anyanindi? Kwila mumwinka nvwali mujiki mali kulonda yalandi yuma yinakukeñeka muchisaka nehi?

Hanjekenu nawu

Yehova wayilejeli aIsarela kuyaña nawantuluwa nianshona kuyawija yamunza yahachaaka nichaaka, kwadiluñisheleñawu nawakwawu aIsarela. Nawa ayilejeli nawu: “Wakazañalalaña.” (Kuhituluka 16:10-15) Nimakonu akwaKristu ayileja ‘kudyañana’ nawa kwaleñelaña kwikala nampinji yakuhanjeka nakuzañalala. (1 Petulu 4:9) Kwila mutambika chisaka chanvwali mujiki kwitala denu nakudya nawu nehi? Bayi nawu chiña muteleka yakudya yayivuluku. Yesu wahosheli nindi, “Chuma chimu hohu chikuwanina” hampinji yadiña nakuhanjeka kwitala dawamabwambu jindi.—Luka 10:42.

Neyi Muyitoñojokelañaku Akusakilila

Kathleen, nvwali wamujiki wakulishili anyana asatu wahosheli nindi hinamba kavulamena iku kufumba kwakuwahi kwakwila nawu: “Bayi mukuhwelela nenu akuyinkaku; tambwilenu yejima yikuyinkawu.” Kufwana Kathleen, anvwali ajiki amavulu eluka nawu akweti mudimu wakukulisha nanyanawu. Dichi, hiyakuhwelelaña nawu akwawu kuyizatila nyidimu yawuku. Chakadi nikujina, asakililaña hawukwashu wejima watambwilañawu. Neyi mutoñojokelañaku anvwali ajiki, mukuyizañaleshaña ninenu mukuzañalala, nawa mukukuhwelela nenu Yehova Nzambi ‘wakayifweta cheñi hachuma chachiwahi chimuneli.’—Yishimu 19:17.

[Tumazu twaheshina]

[Mwevulu wudi hefu 23]

Mpinjinyi yimwatambikili chisaka chanvwali mujiki kwitala denu nakudiila hamu? Kwila muyitambika kwitala denu nehi?