Nyis ni Idewo Joma gin Jonyuol Achiel

ADIER joma gin jonyuol achiel e utegi, nigi gik mang’eny madwarore gitim makawo kindegi koda tekogi moloyo joma moko. Pek ma giyudo ng’eny maok kwanre. Nyaka girit ting’ momedore mag pidho joodgi. Mopogore gi dhi e tich, bende dwarore ni gidhi e chiro, gitedi, gitim ler, kendo girit nyithindo. Kae to bende dwarore ni girit weche thieth, gimany ne nyithindo kinde mag yweyo, gijiw chuny nyithindgi, to kanyalore bende, gin giwegi gimany thuolo ma giyueyogo.

Kata obedo ni udi ma janyuol en achiel medore e oganda, yot ahinya mondo wi ji owil kodgi. En kamano mana kaka miyo moro nowacho kuome owuon ni, “Kane pok abedo janyuol achiel e ot, ne ok apar jonyuol ma kamago ahinya.” Inyalo timo ang’o mondo inyis ni idewo joma gin jonyuol achiel? Be onego inyis ni idewogi? We wanon ane gik moko adek momiyo onego wadewgi.

Gimomiyo Onego Wadewgi

Thoth joma gin jonyuol achiel, dwaro kony. Chi liel moro ma jahigini 41, to nigi nyithindo ariyo nowacho niya, “Nitie kinde moko maok ang’eyo gima onego atim, kendo aneno ni ting’ mang’eny ma an-go ohewa.” Tho mar jaot, kata bedo jaot mojwang’, koda gik mamoko maricho machalo kamago, osemiyo jonyuol modong’ kendgi owinj lit mana kaka miyo moro nowinjo. Nowacho niya, “Wakwayo kony, kendo wadwaro konyno ahinya!”

Dewo chalgi medoni mor iwuon. Be isega konyo ng’ato ting’o gimoro mapek mohewe? Ka en kamano, nyaka bed ni ne imor nikech ne ichiwo ne ng’ato kony madwarore. Kamano bende, jogo ma gin jonyuol achiel, chur gi ting’ mohewo ng’ato achiel. Ka ikonyogi kaka dwarore, ibiro neno adiera mag weche mayudore e Zaburi 41:1: “Ojahawi jalo ma keto chunye koparo jo modhier.”

Dewogi en gima moro Nyasaye. Jakobo 1:27 wacho kama: “Lemo maler, kendo ma onge mbala e nyim Nyasaye Wuoro, e ma: rito nyithi kiye gi mond liete e chandruokgi.” Timo mano oriwo konyo jogo ma gin jonyuol achiel. * Jo Hibrania 13:16 lero niya: “Kik wiu wil ngang’ gi timo maber kod pogo giu ni jo moko ma ongego, nikech mago e misengini ma Nyasaye morgo.”

 Ka waparo weche adekgi manyiso gimomiyo onego wadew joma gin jonyuol achiel e udi, koro we wane ane gima wanyalo timo mondo wakonygi, kendo kaka wanyalo bedo gadier ni kony mwachiwo en madwarore adier.

Ng’eyo Dwaro ma Gin-go

Nyalo nenore ni gima yot en mana penjo jal ma en janyuol achiel ni, “Anyalo konyi e yo mane?” Kata kamano, penjono ok mi ng’ato onyisi gigo machande gadier. Mana kaka ne owach motelo, Zaburi 41:1 jiwo ni ber ng’ato ‘oket chunye opar’ jomoko. Nonro moro lero ni wach ma otigo ka e dho-Hibrania, tiende en “paro matut kuom weche ma korgi tek mondo omi ng’ato otim gimoro e yo mariek.”

Omiyo, mondo ing’e kaka inyalo chiwo kony e yo maber moloyo, nyaka ipar matut kuom gigo sie machando jogo ma gin jonyuol achiel. Yaw wang’i, ine gik moko e yo matut. Penjri kama, ‘Dabed ni an e chal ma kamano, en kony mane ma daher mondo omiya? ’ Kuom adier, joma gin jonyuol achiel nyalo nyisi ni kata item nade, ok inyal ng’eyo chuth pek ma ng’at ma en janyuol achiel bedogo, mak mana ka in achiel kuomgi. Kata kamano, timo duto minyalo mondo ing’e chal ma gintie, biro konyi ‘keto chunyi opar’ jogo ma gin jonyuol achiel.

Luw Ranyisi Makare Chuth ma Nyasaye Oketo

Kodok korka dewo kendo konyo kaka dwarore joma gin jonyuol achiel, onge ng’at mosekonyogi e yor hera maloyo Jehova Nyasaye. Ndiko mang’eny jiwo ahinya kaka Jehova Nyasaye nyiso ni odewo mond liete koda nyithi kiye, to mano nyiso ni odewo joma gin jonyuol achiel. Kuom nono kaka Nyasaye osebedo ka konyo joma nigi chan, wanyalo puonjore kaka wanyalo chiwo kony madwarore gadier. Nitie weche ang’wen madongo monego wanon.

Kaw thuolo mondo iwinjgi

E Chik ma nomiyo Jo-Israel machon, Jehova nowacho ni ‘adieri enowinj ywak’ jogo machandore. (Wuok 22:22, 23) Inyalo luwo ranyisi maberni e yo mane? Jogo ma gin jonyuol achiel jowinjo ng’ichno ahinya nikech gionge gi ng’at maduong’ machielo ma ginyalo wuoyogo. Miyo moro ma en janyuol achiel wacho niya: “Seche moko aywak ahinya sama nyithindo osedhi nindo. Kinde moko bedo kenda en gima tekna ahinya.” Ka owinjore, be inyalo kawo thuolo mondo ‘iwinj ywak’ mar jalno ma en janyuol achiel, manyalo hero nyiso ng’ato gima nie chunye? Kawo thuolo mondo iwinje ka ubet kama owinjore nyalo konye ahinya mondo onyagre gi pek mag bedo janyuol achiel.

Nyisgi weche majiwogi

Jehova nomiyo ondik wende kata zaburi ma Jo-Israel ne dhi wero e kinde mag lamo. Par ane jip ma mond liete koda nyithi kiye ne yudo kuom wero wende mondik kuom much Nyasaye ma ne paronegi kaka Jehova ne en ‘wuon-gi’ kendo ne en ‘jang’ad buchgi’ ma ne dhi konyogi. (Zaburi 68:5; 146:9) Wan bende wanyalo jiwo jalno ma en janyuol achiel gi weche monyalo paro kuom higini. Kata obedo ni higini 20 osekalo, Ruth, ma en janyuol achiel pod paro gi mor gima wuoro moro molony nowachone, ni: “Kaka ipidho yawuoti ariyogi, ber ndi. Dhi nyime timo kamano.” Ruth medo wacho kama: “Winjo ka wuoro ma kamano nyisa wechego, nomulo chunya ahinya.” Kuom adier, “twak mahoyo chuny chal gi yath” kendo nyalo jiwo jal ma en janyuol achiel e yo ma wan ok wanyal ng’eyo. (Ngeche 15:4) Be inyalo paro wach moro achiel minyalo jiwogo jal ma en janyuol achiel?

 Konygi gi gige ringruok ma gichando kadwarore

Chik ma Jehova nomiyo Jo-Israel machon noriwo koda chenro mondo mond liete koda nyithi kiye oyud chiemo e yo manyiso ni omigi luor. Kokalo kuom chenro kaka mago, jochan ne yudo chiemo moromogi ‘chamo . . . ma giyieng’.’ (Rapar mar Chik 24:19-21; 26:12, 13) Wan bende wanyalo konyo joot ma janyuol en achiel gi gige ringruok ma gichando, e yo mariek kendo ka wamiyogi luor. Be inyalo teronegi chiemo kata nyieponegi? Be in gi lewni ma jalno ma en janyuol achiel kata nyithinde nyalo rwako? Koso inyalo miyo jalno ma en janyuol achiel pesa mondo olo godo yore mag ode?

Many thuolo mondo ubed kanyachiel

Jehova nochiko ni mondo orwak mond liete koda nyithi kiye e nyasi ma ne itimo higa ka higa mondo gibende giyud mor kuom kikore kanyachiel gi Jo-Israel wetegi. Kuom adier, nonyisgi ni, nyaka ‘gimor.’ (Rapar mar Chik 16:10-15) E yo machalo kamano e kindewagi bende, ijiwo Jokristo niya, “rwakreuru uwegi ng’ato gi ng’ato,” timo kamano medo thuolo mag yudo mor kanyachiel. (1 Petro 4:9) Omiyo, donge dibed maber ka irwako joot ma janyuol en achiel e odi mondo uyud gago moro kanyachiel? Ok ochuno ni chiemo nyaka bed mang’eny. Kane Yesu olimo osiepene, nowacho ni gik matin kata ‘gimoro achiel e ma dwarore.’​—Luka 10:42.

Nyiso ni Idewogi Biro Miyogi Mor

Kathleen, ma en janyuol achiel kendo ma nopidho nyithindo adek, wacho ni wiye ok nowil ngang’ gi puonj mawacho ni: “Kik iket ni nyaka konyi; to ka okonyi, rwak konyno.” Mana kaka Kathleen, thoth joma gin jonyuol achiel ong’eyo ni ting’ mar pidho nyithindgi en margi giwegi. Omiyo, ok gigen ni jomoko biro timonegi gik ma gin giwegi ema nyaka gitim. Kata kamano, onge kiawa ni gimor rwako kony moro amora ma imiyogi. Inyalo konyo ot ma janyuol en achiel kendo inyalo yudo mor in iwuon kuom nyiso ni idewo jogo ma gin jonyuol achiel ka in gadier ni Jehova Nyasaye ‘nochuli gima isetimo maber.’​—Ngeche 19:17.

[Weche moler piny]

[Picha manie ite mar 23]

Osekalo kinde maromo nade nyaka ne igwel joot ma janyuol en achiel mondo oyud gago kodi? Donge diber kitimo kamano mapiyo kendo?