Šetša Batswadi ba se Nago Balekane

KE BATHO ba mmalwa feela bao ba swaraganego le go diriša nako ya bona e ntši le maatla go feta batswadi ba se nago balekane. Ba lebeletšana le ditlhohlo tše dintši kudu. Ba swanetše go phetha boikarabelo bja go godiša bana. Ntle le go šoma mošomo wa boiphedišo, ba swanetše go ya mabenkeleng, go apea, go hlwekiša, le go dira mediro ya botswadi. Ke moka ba swanetše go hlokomela bana ka tša maphelo, boithabišo le go ba thekga maikwelong, le gona, ge e ba go kgonega ba swanetše go hwetša nako ya bona ka noši.

Gaešita le ge malapa a batswadi ba se nago balekane a oketšega kudu e bile a tlwaelegile setšhabeng lehono, a ka hlokomologwa gabonolo. Mma yo mongwe o dumetše ka go lebanya gore: “Ke be ke sa šetše batswadi ba se nago balekane go ba go fihlela ge ke e-ba yena.” O ka dira’ng go šetša batswadi ba se nago balekane? Na o swanetše go tshwenyega ka bona? A re hlahlobeng mabaka a mararo a dirago gore re šetše dinyakwa tša bona.

Mabaka a go ba Šetša

Batswadi ba bantši ba se nago balekane ba nyaka thušo. Mohlologadi yo a nago le nywaga e 41 le bana ba babedi o boletše gore: “Go na le dinako tšeo ke sa tsebego gore ke dire’ng, le gona ke ikwa ke imelwa ke boikarabelo bjoo ke nago le bjona.” Bohlologadi, go tlogelwa goba maemo a mangwe a sa kgahlišego a dira gore bontši bja batswadi ba se nago balekane ba ikwe kamoo mma yo mongwe yo a se nago molekane a ikwago ka gona. O itše: “Re kgopela thušo gomme re e tsoma e le ruri!”

Go oketša lethabo la gago. Na o kile wa thuša motho yo mongwe go rwala morwalo woo o bego o mo imela? Ge e ba go le bjalo, o ka ba ile wa ikwa o kgotsofetše ka ge o tseba gore o thušitše motho yo mongwe. Ka mo go swanago, batswadi ba se nago balekane ba rwala morwalo woo ka dinako tše dingwe e ka bago o mogolo bakeng sa motho o tee. Ge o ba thuša, o tla lemoga go nepagala ga seo se boletšwego go Psalme 41:1 (NW) ge e re: “Go thaba le ge e le mang yo a šetšago mmotlana.”

Go kgahla Modimo. Jakobo 1:27 e re: “Mohuta wa borapedi bjo bo hlwekilego le bjo bo sa šilafalago ponong ya Modimo wa rena le Tate ke wo: Ke go babalela ditšhiwana le bahlologadi ditlaišegong tša bona.” Se se akaretša go hlokomela batswadi ba se nago balekane. * Baheberu 13:16 e re: “Le se ke la lebala go dira botse le go abelana le ba bangwe dilo tšeo le nago le tšona, gobane  Modimo o kgahlišwa ke dihlabelo tše bjalo.”

Re nagana ka mabaka a a mararo a go thuša batswadi ba se nago balekane, ga bjale a re boneng seo o ka se dirago go thuša batswadi ba se nago balekane le kamoo o ka kgonthišegago ka gona gore thušo ya gago e tla šoma.

Go Lemoga Dinyakwa tša Bona

Go ka bonala potšišo e bonolo yeo o ka e botšišago motswadi yo a se nago molekane e ka ba e rego, “Nka thuša bjang?” Lega go le bjalo, go a kwešišega gore se ga se gantši se feleletša ka gore yo mongwe a go botše seo a se nyakago e le ka kgonthe. Ka ge go lemogilwe pejana, Psalme 41:1 e re kgothaletša go ‘šetša.’ Puku e nngwe ya ditšhupetšo e hlalosa gore lentšu la Seheberu leo le dirišitšwego mo le ka bolela “mogato wa go nagana ka thulaganyo ya dikgopolo tše raraganego woo o ka feleletšago ka tirišano e bohlale.”

Ka gona, go bona tsela e kaone-kaone yeo o ka thušago ka yona, o swanetše go naganišiša ka ditlhohlo tšeo batswadi ba se nago balekane ba lebeletšanago le tšona. E-ba šedi, o se ke wa fo lebelela ka go se šetše. Ipotšiše gore, ‘Ge nkabe ke le boemong bjo, ke be ke tla nyaka go thušwa bjang?’ Go ba gona, batswadi ba bantši ba tla go botša gore, gaešita le ge o leka, o ka se ke wa kgona go kwešiša ka botlalo gore go ba motswadi yo a se nago molekane go bjang, ntle le ge o le yena. Lega go le bjalo, go dira sohle seo o ka se kgonago go kwešiša maemo a bona go tla go dira gore o kgone go ‘šetša’ batswadi ba se nago balekane.

Ekiša Mohlala o Phethagetšego wa Modimo

Ge go tliwa tabeng ya go hlokomela batswadi ba se nago balekane, ga go yo a dirilego se ka lerato le ka botlalo go feta Jehofa Modimo. Mangwalo a mantši a gatelela go šetša le go tshwenyega ga Jehofa Modimo ka bahlologadi, dišuana gotee le batswadi ba se nago balekane. Ka go hlahloba tsela yeo Modimo a arabelago ka yona dinyakweng tša babotlana, re ka ithuta go gontši mabapi le go nea ba bangwe thušo ya kgonthe. Go na le dintlha tše nne tše bohlokwa tšeo re swanetšego go di ela hloko.

Ba theetše ka kelohloko

Molaong woo a o neilego Isiraele ya bogologolo, Jehofa o tsebaditše gore o “tlo kwa sellô” sa bao ba nyakago thušo. (Ekisodo 22:22, 23) O ka ekiša bjang mohlala wo o mobotse? Batswadi ba se nago balekane gantši ba ikwa ba lewa ke bodutu, ba se na motho yo mongwe yo mogolo yoo ba ka bolelago le yena. Motswadi yo mongwe yo a se nago molekane o llile ka gore: “Ge bana ba robala, ka dinako tše dingwe ke lla lebaka le letelele. Ka dinako tše dingwe go thata go kgotlelela go lewa ke bodutu.” Ge go swanetše, o ka itira yo a hwetšagalago gore o ‘kwe sello’ sa motswadi yo a se nago molekane yo a ka bago a nyaka go ntšha sa mafahleng? Ge o mo theetša ka kelohloko le le maemong a swanetšego, seo se ka dira go gontši go mo thuša go lebeletšana le ditlhohlo tša go ba motswadi yo a se nago molekane.

Ba kgothatše

Jehofa o ile a budulela go ngwalwa ga dikopelo tše kgethwa, goba dipsalme, tšeo Baisiraele ba bego ba tla di opela dinakong tša borapedi. Nagana ka kgothatšo yeo bahlologadi ba Baisiraele le ditšhiwana ba bego ba e hwetša ge ba be ba opela mantšu a buduletšwego ke Modimo, ao a bego a ba gopotša gore Jehofa ke ‘tate’ le “moahloledi” wa bona le gore o tla ba imolla. (Psalme 68:5; 146:9) Le rena re ka kgothatša motswadi yo a se nago molekane ka mantšu ao a ka dulago a a gopola nywaga e sa tlago. Gaešita le ge go fetile nywaga e 20, Ruth e lego mma yo a se nago molekane, o sa gopola nakong ya ge tate yo a nago le phihlelo a be a mmotša gore: “Ruri o dira modiro o mobotse wa go godiša barwa ba gago ba babedi. Tšwela pele.” Ruth o hlalosa gore: “Go kwa mantšu ao a e-tšwa go yena go ile gwa nkgoma kudu.” Ruri, “polelo e botho ke sehlare sa bophelo” gomme e ka kgothatša motswadi yo a se nago molekane go feta kamoo re ka naganago. (Diema 15:4, PK) Na o ka nagana  ka kgothatšo e itšego e lebanyago le yeo e tšwago pelong yeo o ka kgothatšago motswadi yo a se nago molekane ka yona?

Thuša ka dilo tše di bonagalago

Molao wa Jehofa go Isiraele ya bogologolo o be o akaretša dithulaganyo tša gore bahlologadi le ditšhiwana ba hwetše dijo ka tsela e hlomphegago. Ka ditokišetšo tše bjalo, babotlana ba ba ile ba ‘ja ba khora.’ (Doiteronomio 24:19-21; 26:12, 13) Le rena, ka tsela e bohlale le e hlomphegago, re ka thuša lapa leo le hlokago la motswadi yo a se nago molekane ka dilo tše di bonagalago. Na o ka le išetša dijo goba mokotla wa korosari ka gae? Na o na le diaparo tšeo motswadi yo a se nago molekane goba bana ba gagwe ba ka di aparago? Goba na o ka thuša motswadi yo a se nago molekane ka tšhelete gore a reke dilo tšeo di nyakwago ke lapa la gagwe?

Gwerana le bona

Jehofa o ile a laela gore bahlologadi le ditšhiwana ba akaretšwe menyanyeng ya setšhaba ya ngwaga le ngwaga, moo ba bego ba ka ithabiša ba na le Baisiraele-gotee. Ge e le gabotse, ba ile ba botšwa gore: “O thabê.” (Doiteronomio 16:10-15) Ka mo go swanago le lehono, Bakriste ba kgothaletšwa go ‘amogelana ka borutho,’ ba dire gore go be le dibaka tša go thabela bogwera. (1 Petro 4:9) Ka gona, ke ka baka la’ng o sa laletše lapa la motswadi yo a se nago molekane go tlo ja lapeng la gago? Ga go nyakege gore e be tša matsaka. Ge a be a thabela bogwera ka lapeng la bagwera, Jesu o itše: “Go nyakega dilo tše sego kae goba selo se tee feela.”—Luka 10:42.

Go ba Šetša ga Gago go tla Lebogwa

Kathleen, motswadi yo a se nago molekane yo a godišitšego bana ba bararo, o re a ka se ke a lebala keletšo ye e bohlale, “O se ke wa letela selo; leboga selo se sengwe le se sengwe.” Go swana le Kathleen, batswadi ba bantši ba se nago balekane ba lemoga boikarabelo bja bona bja go godiša bana. Ka gona, ga ba letele gore ba bangwe ba ba direle seo bona ba swanetšego go se dira. Go sa šetšwe seo, ga go pelaelo gore ba leboga thušo e nngwe le e nngwe yeo ba e newago. O ka tlaleletša lethabong la bona le go la gago ka go šetša batswadi ba se nago balekane, o kgodišegile gore Jehofa Modimo “o tla go putsa bakeng sa seo o se dirilego.”—Diema 19:17, New Century Version.

[Mongwalo wa tlase]

[Seswantšho go letlakala 24]

Ke neng la mafelelo moo o kilego wa laletša motswadi yo a se nago molekane lapeng la gago bakeng sa dijo? Ke ka baka la’ng o sa dire bjalo kgaufsinyane?