Kʼuxi xuʼ xkichʼtik ta kʼux li meʼiletik ti stuk tstsʼites yalabike

¿MI XNOP xa noʼox avuʼun kʼu to yepal abtel tspas jun meʼil sventa tstsʼites stuk li yalabtake? * Skʼan lek xtojob ta stunesel skʼakʼal xchiʼuk yipal sventa ch-abtej, tskʼel sna, tsman li kʼusi chtun yuʼunike, tspas sveʼel xchiʼuk yan kʼusitik. Maʼuk noʼox taje, skʼan skʼel sventa lekuk noʼox xaʼi sba li yalabtake xchiʼuk ti akʼo mu x-ipajike, jech xtok skʼan xchʼak skʼakʼal sventa xchʼay yoʼonton li yalabe. Mi xuʼ to chile tspas li kʼusi tskʼan stuke.

Li totil o meʼil ti chʼabal snup xchiʼilik ti stuk tstsʼites xnichʼnab o yalabe buyuk xa noʼox xvinajik li avie xchiʼuk muʼyuk mas tsakbilik ta venta. Xi laj yal jun antse: «Kʼalal jtuk li kome, jaʼ to te laj kaʼi kʼuyelan chaʼi sba li meʼiletik ti stukike». Li voʼotike, ¿mi mu yakaluk chchʼay ta joltik ek li antsetik ti stuk yakal tstsʼites yalabike? Jkʼelbetik oxib srasonal sventa mu jchʼay ta joltik li antsetik taje.

Ti kʼu yuʼun skʼan xkichʼtik ta kʼuxe

Skʼanik koltael. Jun meʼon ants ti oy xa 41 sjabilale xchiʼuk ti chaʼvoʼ yole, xi laj yale: «Ta skoj ti ep tajek li kʼusitik jbainoje, mu xa noʼox stakʼ aʼyel kʼusi ta jpas». Kʼuchaʼal chkiltike, li antsetik ti stuk tstsʼites yalabik ta skoj ti chamem smalalik o ti iktabilike o ta skoj yan-o srasonale, xuʼ van mu stakʼ aʼyel kʼusi tspasik. Xi laj yal jun meʼile: «Toj echʼ xa noʼox maʼ ti jvokolkutike. ¡Lek xa yaʼel maʼ ti oy buchʼu xi skoltaunkutike!».

Xkuxet koʼontontik mi ta jkoltaantike. Kʼalal oy buchʼu ol kʼusi chkuche, ¿mi mu xi jmuyubajuk kʼalal ta jkoltatike? Li meʼiletik ti stuk tstsʼites yalabike skotol kʼakʼal ep kʼusitik sbainojik spasel ti xkoʼolaj kʼuchaʼal alal ikatsile. Mi chlokʼ ta koʼontontik skoltaelike, chkiltik ti melel li kʼusi chal Salmo 41:1 ti xi chale: «Xcuxet noʼox yoʼnton li bochʼo oy ta yoʼnton meʼonetique».

Tskʼan Dios ti akʼo jkoltaantike. Li Vivliae chal ti «me ta melel lec xchʼunoj [Dios li jun krixchanoe], muʼyuc cʼusi chopol tspas ta stojol li Jtotic Diose. Jaʼ noʼox jech tspas chac liʼi: Ta sqʼuel meʼon ololetic xchiʼuc meʼon antsetic ti cʼalal oy svocolique» (Santiago 1:27). Ta melel, li meʼiletik ti stukike skʼanik koltael kʼuchaʼal taje. * Jech xtok, xi chtojobtasvan Hebreos 13:16: «Mu me xchʼay ta avoʼntonic spasel li  cʼusitic leque, xchiʼuc ti tscʼan chacoltavanique. Yuʼun jaʼ li matanal toj lec chil Diose».

Tana un, ti laj xa kiltik kʼu yuʼun skʼan xkichʼtik ta kʼux li antsetik ti stuk tstsʼites yalabike, jkʼeltik kʼusitik xuʼ jpastik sventa jkoltatik xchiʼuk jkʼeltik kʼuxi xuʼ jtuneluk li koltael chkakʼbetike.

Teuk ta jsatik li kʼusitik chtun yuʼunike

Yikʼaluk van li kʼusi baʼyel chtal ta joltike jaʼ ti xi chkaltike: «¿Mi oy van kʼusi chtun avuʼun?», xi jchi. Pe skʼan onoʼox me oyuk ta joltik ti mu skotoluk meʼiletik chalbutik li kʼusitik chtun yuʼunike. Kʼuchaʼal laj kiltike, li Salmo 41:1 chal ti skʼan oyuk ta koʼontontike, jaʼ xkaltik ti oy kʼusi skʼan jpastike. Jlik livro ti tsjambe smelolal li jpʼel kʼop ta hebreo tunesbil ta versikulo liʼe, chal ti te smakoj «ti te ta jnopilantik baʼyele, ti ch-abtej tajek joltik sventa lek jtalelaltik jpastike».

Jech oxal, sventa jnaʼtik lek kʼuxi ta jkoltatik li antsetik ti stukike skʼan jnoptik lek li kʼusitik snuptanojike. Skʼan jkʼeltik skotol li kʼusitik mas xuʼ xtun yuʼunike. Xuʼ van xi jakʼbe jbatike: «¿Kʼusi van chtun kuʼun ti jechuk jvokol eke?». Jech onoʼox, ep meʼiletik ti jech svokolike xuʼ van tsnopik ti jaʼ noʼox snaʼik kʼuyelan svokolik li buchʼutik jech snupojik eke. Xuʼ van oy srasonik, pe mi chkakʼtik persa ti xkaʼibetik smelolal li kʼusi vokol chaʼiike, xuʼ me xkoltaj kuʼuntik.

Jchanbetik stalelal li Diose

Li buchʼu lek xuʼ jchanbetik stalelal sventa jkoltatik li buchʼutik jech tsots svokol snuptanojike, jaʼ li Jeova Diose. Li Vivliae ep ta velta chal ti oy tajek ta yoʼonton li meʼon antsetike, li buchʼu chʼabal stot smeʼike xchiʼuk li buchʼutik stuk tstsʼites yalab xnichʼnabike. Jech ta melel, muʼyuk buchʼu yan jech ti toj echʼ xa noʼox lek chkʼelvan xchiʼuk chkʼuxubinvane. Jech oxal chaʼa, jkʼeltik batel chantos kʼuyelan oy ta yoʼonton tskolta Dios li meʼiletik taje xchiʼuk jkʼeltik kʼuyelan xuʼ jchanbetik stalelal.

Oyuk ta koʼontontik jchikintatik li kʼusi chalike

Li ta Mantal laj yakʼbe voʼneal Israel li Jeovae, te laj yalbe skʼoplal li meʼon antsetik xchiʼuk li buchʼutik chʼabal stot smeʼike: «Ta xcaʼibe li scʼopique», xi (Éxodo 22:22, 23). ¿Kʼu yelan xuʼ jech xkakʼ ta koʼontontik ek? Jvules ta joltik ti ep ta velta stuk chaʼi sbaik ta skoj ti muʼyuk yan yijil krixchano ti xuʼ xchapbeik ti kʼuyelan chaʼi sbaike. Xi chal jun antse: «Kʼalal chvayik xaʼox li kalabtake, bakʼintike toj echʼ xa noʼox chopol tajek chkaʼi jba ta skoj ti jtuke, jech oxal ta jmil jba ta okʼel». Jaʼ yuʼun, kʼalal sta-o chkiltike xuʼ van xkaʼibetik skʼopik li meʼiletik taje. Ta melel, xuʼ xkoltaatik sventa chakʼbeik-o batel yipal kʼalal oy buchʼu chchapbeik ti kʼuyelan chaʼi sbaike.

Jpatbetik yoʼontonik ta jkʼopojeltik

Ta xchʼul espiritu li Jeovae laj yakʼ akʼo stsʼibaik salmoetik jlom j-israeletik, jaʼ xkaltik, kʼejojetik sventa chichʼ muyubtael Dios. ¿Kʼu van yelan laj yaʼi sba li meʼon antsetik xchiʼuk li buchʼu muʼyuk stot smeʼik kʼalal tskʼejintaik li kʼejojetik taje? Xuʼ jnoptik ti xkuxet yoʼontonike, yuʼun chvulesbat ta sjolik ti «jaʼ stotic cʼotem» li Jeovae xchiʼuk ti «jaʼ Jcʼopojel yuʼunic» ti chchabiatike (Salmo 68:5; 146:9). Li voʼotik eke xuʼ jpatbetik yoʼonton ta jkʼopojeltik li meʼiletik ti stuk tstsʼites yalabike, taje yikʼaluk me mu xchʼay-o ta sjolik. Jaʼ jech kʼot ta pasel ta stojolal Ruth. Leʼ xa mas ta jtob jabile mi jaʼuk xchʼay ta sjol kʼusi albat yuʼun jun yajtsʼaklom Cristo ti lek xtojob ta stsʼitesel xnichʼnabtake. Xi albate: «Jnaʼoj ti cha mil aba ta stsʼitesel li chaʼvoʼ avalabtake. Akʼbo-o yipal jech, yuʼun toj lek ti jech cha pase». Xi chal li Ruthe: «Ta melel kʼot ta koʼonton ti vaʼ yelan laj yalbune». Yuʼun jech kʼuchaʼal chal li Vivliae, kʼalal «xlamamet xa yutsil ti cʼope, sta to smuybajel» li jun krixchanoe (Proverbios 12:25, Ch). Jech oxal un chaʼa, ¿mi oy kʼusi xuʼ xa pas sventa xa  patbe yoʼonton junuk meʼon ants ti jech svokole?

Kakʼbetik li kʼusitik chtun yuʼunike

Li Jeovae laj yakʼ junantik mantaletik ti tun sventa sta sveʼelik li meʼon antsetik xchiʼuk li buchʼutik chʼabal stot smeʼike. Li vaʼ yelan taje, ta onoʼox staik skotol ora li kʼusitik chtun yuʼunike xchiʼuk muʼyuk chlajik ta kʼexlal (Deuteronomio 24:19-21; 26:12, 13). Jaʼ yuʼun chaʼa, lek ti jkoltatik li ta kʼusitik chtun yuʼunik li utsʼ-alaliletike. Kʼalal jech ta jpastike skʼan mu jaʼuk sventa chilutik yantik xchiʼuk skʼan mu xkakʼtik ta kʼexlal li buchʼu ta jkoltatike. Xuʼ van xkichʼbetik batel sveʼelik ta snaik, jkʼelanbetik kʼuʼil pokʼil ti lekik toe o xuʼ van jkoltatik ta smanbel yan kʼusitik ti chtun yuʼunike.

Jtaktik ta ikʼel kʼalal oy kʼusi ta jpas ta kutsʼ kalaltike

Li Jeovae laj yalbe mantal j-israeletik ti akʼo stsakik ta venta li meʼon antsetik xchiʼuk li buchʼu muʼyuk stot smeʼik li ta kʼin tspasik jujun jabile. Taje jaʼ sventa skʼupinik ta komon xchiʼuk yan yajtuneltak Dios li kʼinetike. Li Diose laj yalbe ti skʼan «cuxetuc noʼox [yoʼontonik]» ta jujuntale (Deuteronomio 16:10-15). Li avi eke, li yajtsʼaklomtak Cristoe skʼan «[xikʼik] ochel li bochʼo chcʼot ta [s]naique» (1 Pedro 4:9). ¿Mi xavojtikin junuk utsʼ-alalil ti stuk totil o meʼil yakal tstsʼites xnichʼnabtak o yalabtake? ¿Kʼu yuʼun mu xavikʼ ta veʼel ta ana? Mu xa nop ti persa mukʼta veʼel cha pase. Vuleso ta ajol li kʼusi laj yal Jesús kʼalal yakal chvulaʼaj ta sna yamigotake, laj yal ti jun chib noʼox li kʼusitik chtune o jun noʼox li kʼusi tsots skʼoplale (Lucas 10:42, NM).

Xuʼ stabeik lek sbalil

Li meʼiletik ti stuk tstsʼites yalabike snaʼojik ti jaʼ oy ta sba stukike, jaʼ yuʼun muʼyuk smalaojik ti oy buchʼu yan chtal spas li kʼusi oy ta sbaike. Manchuk mi jech, xuʼ oy tajek sbalil chaʼiik kʼalal ta jkoltatike. Jech laj yal Kathleen ti stuk la stsʼites oxvoʼ yalabtake: «Skʼan mu jmalatik ti skoltautik li yantike, pe jech noxtok un, mi laj kichʼtik koltaele oyuk ta koʼontontik ti jtojtik ta vokole». Jech oxal un chaʼa, jkoltatik ti bu kʼalal xuʼ kuʼuntike, yuʼun li Jeovae yaloj ti «jaʼ stuc [...] chacʼbe stojol li cʼusi lec [ta jpastike]» (Proverbios 19:17). Mi te ta koʼontontik li meʼon antsetike xchiʼuk li buchʼutik muʼyuk stot smeʼike, mas me xmuyubajik li stukike xchiʼuk jech li voʼotik eke.

[Tsʼibetik ta yok vun]

[Lokʼol ta pajina 24]

¿Mi xuʼ van xavikʼ ta veʼel ta ana?