Sumbedzani Uri Ni A Humbulela Vhabebi Vha Re Vhoṱhe

A SI vhathu vhanzhi vhane tshifhinga tshavho na maanḓa zwa ṱoḓea nga nḓila khulwane i fanaho na ine zwa ṱoḓea ngayo kha mubebi a re eṱhe. Vhabebi vha re vhoṱhe vha na khaedu nnzhi vhukuma. Vha fanela u hwala vhuḓifhinduleli hoṱhe ha u ṱhogomela na u alusa vhana. Nga nnḓa ha u vha na mushumo wa u ḓitshidza, vha dovha vha vha na miṅwe mishumo i ngaho u renga, u bika, na u alusa vhana. Hu dovha ha vha na ṱhoḓea ya u ṱhogomela mutakalo wa muṱa wavho, u ḓimvumvusa, na u tikedza maḓipfele a vhana vhavho, nahone arali zwi tshi nga konadzea, vha fanela u dovha vha vha na tshifhinga tsha muthu nga eṱhe.

Naho musalauno hu na miṱa minzhi vhukuma ine ya vha na mubebi muthihi fhedzi, i anzela u sa dzhielwa nṱha. Muṅwe mme o amba zwi tshi bva mbiluni a ri: “Ndo vha ndi sa ṱhogomeli uri hu na vhabebi vha re vhoṱhe, u swikela na nṋe ndi tshi vha muṅwe wavho.” Ni nga ita mini u itela u sumbedza uri ni a humbulela vhabebi vha re vhoṱhe? Naa ni fanela u vha vhilaelela? Kha ri haseledze nga ha zwithu zwiraru zwine zwa ita uri ri ṱhogomele ṱhoḓea dzavho.

Zwi Itaho Uri Ri Vha Humbulele

Vhabebi vhanzhi vha re vhoṱhe vha ṱoḓa thuso. Muṅwe mufumakadzi wa tshilikadzi wa miṅwaha ya 41 a re na vhana vhavhili o ri, “Nga zwiṅwe zwifhinga a thi ḓivhi uri ndi ite mini, ndi ḓipfa ndo tsikeledzwa nga vhuḓifhinduleli vhunzhi vhune nda vha naho.” U felwa nga mufarisi, u siiwa nga mufarisi, kana zwiimo zwi si zwavhuḓi zwo ita uri vhabebi vhanzhi vha re vhoṱhe vha ḓipfe nga nḓila i fanaho na ya muṅwe mme a re eṱhe. O ri: “Ri khou humbela thuso, ri khou i ṱoḓa nga maṱo matswuku!”

Zwi ita uri na inwi ni takale. Naa no no vhuya na thusa muṅwe muthu u hwala muhwalo une wa nga si hwaliwe nga muthu muthihi? Arali no no vhuya na mu thusa, ni nga vha no ḓipfa no fushea nga u ḓivha uri no mu thusa nga nḓila ye a vha a tshi i ṱoḓa. Nga hu fanaho, vhabebi vha re vhoṱhe vho hwala muhwalo u lemelaho vhukuma une wa si kone u hwaliwa nga muthu muthihi. Musi ni tshi vha thusa, ni ḓo tshenzhela vhungoho ha maipfi a re kha Psalme ya 41:1 ane a ri: “Wa mashudu ndi uyu ané a khathutshela mutshinyali.”

Zwi takadza Mudzimu. Yakobo 1:27 i ri: “Kushumele kuné Mudzimu a re Khotsi a vhona kwó ṱamba, kú si na tshika, ndi hoku: U londola zwisiwana na dzitshilikadzi vhuṱunguni havho.” Zwenezwi zwi katela na uri ri ṱhogomele vhabebi vha re vhoṱhe. * Vha-Heberu 13:16 i ri: “Ni si hangwe u itana nga zwivhuya na u ṋeana; ndi zwone zwidzimu zwiné Mudzimu a zwi takalela.”

 Musi ri tshi khou humbula nga ha zwiitisi zwenezwi zwiraru zwa u humbulela vhabebi vha re vhoṱhe, kha ri vhone uri ndi mini zwine na nga zwi ita u itela u thusa na nḓila ine na nga vha na vhungoho ngayo ha uri thuso ine na vha ṋea yone ndi ine vha i ṱoḓa.

U Pfesesa Zwine Vha Zwi Ṱoḓa

Zwi nga kha ḓi vhonala uri zwithu zwo teaho zwine ra nga zwi ita ndi u vhudzisa mubebi a re eṱhe uri, “Ndi nga thusa nga mini?” Naho zwo ralo, u vha vhudzisa mbudziso yo raloho a zwi anzeli u vha na mvelelo dzavhuḓi dza uri muthu onoyo a ni vhudze uri ndi mini zwine a ṱoḓa ni tshi mu thusa ngazwo zwa vhukuma. Samusi ro zwi ṱhogomela mathomoni, Psalme ya 41:1 i ri ri fanela u “khathutshela mutshinyali.” Iṅwe bugu yo sumbedza uri ipfi ḽa Luheberu ḽo shumiswaho henefha ḽi nga amba “u humbulela muthu nga ho dzikaho na u humbula nga ha nḓila dzine na nga piringulula ngadzo vhuleme hawe zwine zwa ḓo ita uri ni shumisane nae nga vhuṱali.”

Nga zwenezwo, u itela u wana nḓila ya khwine ine na nga thusa ngayo, ni fanela u humbula nga ho dzikaho nga vhuleme hoṱhe vhune mubebi a re eṱhe a sedzana naho. Lingedzani u pfesesa nga vhuḓalo vhuimo hawe. Ḓivhudziseni uri, ‘Arali ndo vha ndi kha vhuimo honoho, ndo vha ndi tshi ḓo ṱoḓa u thuswa nga nḓila-ḓe?’ Vhukuma, vhunzhi ha vhabebi vha re vhoṱhe vha ḓo ni vhudza uri, naho na zwi funa, ni nga si vhuye na vuwa no pfesesa nḓila ine vhabebi vha re vhoṱhe vha ḓipfa ngayo, nga nnḓa ha musi na inwi ni muṅwe wavho. Naho zwo ralo, u ita zwoṱhe zwine na nga kona u itela u vha pfela vhuṱungu kha vhuimo havho zwi ḓo ita uri ni kone u “khathutshela” vhabebi vha re vhoṱhe.

Edzisani Tsumbo Yo Fhelelaho Ya Mudzimu

Yehova Mudzimu u fhira vhathu vhoṱhe musi zwi tshi ḓa kha mafhungo a u ṱhogomela vhabebi vha re vhoṱhe nga nḓila ya lufuno na i bvelelaho. Maṅwalo manzhi a zwi bvisela khagala uri Yehova Mudzimu u a humbulela na u ṱhogomela dzitshilikadzi, dzitsiwana na vhabebi vha re vhoṱhe. Nga u ṱolisisa nḓila ine Mudzimu a ṱhogomela ngayo ṱhoḓea dza vhenevha vhathu vha re vhatshinyali, ri nga guda zwinzhi malugana na nḓila ine ra nga thusa ngayo nga nḓila ine vha i ṱoḓa. Hu na mbuno nṋa dzine ra ḓo dzi haseledza.

Ḓiṋeeni Tshifhinga Tsha U Vha Thetshelesa

Kha Mulayo we a u ṋea Vhaisiraele vha kale, Yehova o amba uri o vha a tshi ḓo ‘pfa zwililo zwa’ vhatshinyali. (Ekisodo 22:22, 23) Ni nga edzisa hani tsumbo yeneyi yavhuḓi? Vhabebi vha re vhoṱhe vha anzela u ḓipfa vhe na vhuludu, nahone hu si na muthu muhulwane ane vha nga amba nae. Muṅwe mme a re eṱhe o ri: “Musi vhana vha tshi ya u eḓela, nga zwiṅwe zwifhinga ndi a lila vhukuma. Nga zwiṅwe zwifhinga ndi vha na vhuludu vhu sa konḓelelei.” Arali zwo tea, naa ni nga kona u ḓiṋea tshifhinga tsha u ‘pfa zwililo’ zwa mubebi a re eṱhe ane a nga kha ḓi ṱoḓa u amba nḓila ine a ḓipfa ngayo? U mu thetshelesa nga fhasi ha zwiimo zwo teaho zwi nga mu thusa vhukuma uri a kone u sedzana na khaedu dza u alusa vhana e eṱhe.

Vha Khuthadzeni

Yehova o hevhedza uri hu ṅwalwe nyimbo khethwa kana dzipsalme dze dza vha dzi tshi imbiwa nga Vhaisiraele nga zwifhinga zwa vhurabeli. Edzani u humbula nḓila ye tshilikadzi dza Vhaisiraele na dzitsiwana vha vha vha tshi khuthadzwa ngayo musi vha tshi imba maipfi o hevhedzwaho nga Mudzimu e a vha a tshi vha humbudza uri Yehova o vha e “Khotsi” na “Mulamuleli” wavho na uri o vha a tshi ḓo vha vhofholola. (Psalme ya 68:5; 146:9) Na riṋe ri nga ṱuṱuwedza vhabebi vha re vhoṱhe nga maipfi ane vha ḓo dzula vha tshi a humbula. Naho ho no fhela miṅwaha ya 20, Ruth ane a vha mubebi a re eṱhe u kha ḓi humbula zwavhuḓi tshiṅwe tshiitea tshe khatsho muṅwe khotsi a re na tshenzhelo a mu vhudza uri: “Ni khou ita mushumo wavhuḓi vhukuma wa u alusa vhatukana vhaṋu vhavhili. Bvelani phanḓa ni tshi ita nga u ralo.” Ruth o ri: “U pfa maipfi eneo e a ambiwa nga onoyo khotsi, zwo nkwama nga maanḓa.” Vhukuma, “vhulenda ha lulimi ndi muri wa vhutshilo” nahone vhu nga ṱuṱuwedza mubebi a re eṱhe nga nḓila khulwane vhukuma. (Mirero  15:4) Naa ni nga kona u humbula nga ha zwithu zwo livhaho zwi bvaho mbiluni zwine na nga khuthadza ngazwo mubebi a re eṱhe?

Vha Thuseni Nga Zwithu Zwi Vhonalaho Musi Zwi Tshi Ṱoḓea

Mulayo we Yehova a u ṋea Vhaisiraele vha kale wo vha u tshi katela na uri hu ṱhogomelwe dzitshilikadzi na dzitsiwana uri dzi wane zwiḽiwa nga nḓila ine ya sa dzi tsitsele tshirunzi. Nga ṅwambo wa ndugiselelo dzo raloho, vhenevha vhatshinyali vho vha vhe na zwiḽiwa zwo eḓanaho zwa uri “vha ḽe vha fure.” (Doiteronomio 24:19-21; 26:12, 13) Na riṋe ri nga kona u ita zwenezwi nga nḓila ya vhuṱali i sa vha tsitseli tshirunzi, ri nga thusa vhabebi vha re vhoṱhe nga zwithu zwi vhonalaho musi zwi tshi ṱoḓea. Naa ni nga kona u vha rengela zwithu zwi ṱoḓeaho hayani na vha isela? Naa ni na zwiambaro zwine mubebi a re eṱhe kana vhana vhawe vha nga zwi ambara? Kana naa ni nga vha fha tshelede u itela uri mubebi a re eṱhe a kone u renga zwithu zwine vha zwi shaya muṱani?

Fhedzani Tshifhinga Navho

Yehova o ṋea ndaela ya uri dzitshilikadzi na dzitsiwana dzi katelwe kha vhuṱambo ha ṅwaha muṅwe na muṅwe, he khaho vha vha vha tshi nga ḓiphina nga vhukonani na vhaṅwe Vhaisiraele. Zwi re zwone ndi uri vho vhudzwa uri vha “takale.” (Doiteronomio 16:10-15) Nga hu fanaho na ṋamusi, Vhakriste vha ṱuṱuwedzwa uri vha ‘takale na vhaeni.’ (1 Petro 4:9) Ndi ngani ni sa lingedzi u ramba mubebi a re eṱhe uri a ḓe a ḽe na vhoiwe zwiḽiwa hayani haṋu? A zwo ngo fanela u tou vha tshimima tshihulu-hulu kana ha vha na zwithu zwinzhi-zwinzhi. Musi Yesu a tshi khou ḓiphina nga vhukonani muḓini wa khonani dzawe o ri: “Tshililelwa nga tshi vhe tshithihi.”—Luka 10:42.

Vha Ḓo Zwi Dzhiela Nṱha Musi Ni Tshi Vha Humbulela

Kathleen, mubebi a re eṱhe we a alusa vhana vhararu o amba uri a nga si vhuye a hangwa nyeletshedzo yavhuḓi ine ya ri: “Ni songo lavhelela tshithu, fhedzi ni livhuhe zwithu zwoṱhe.” U fana na Kathleen, vhabebi vhanzhi vha re vhoṱhe vha a zwi ḓivha uri u alusa vhana ndi vhuḓifhinduleli vhuhulwane. Nga zwenezwo, a vha lavheleli uri vhaṅwe vha vha itele zwithu zwine vhone vha fanela u ḓiitela zwone. Naho zwo ralo, a zwi timatimisi uri vha a takalela thuso iṅwe na iṅwe ine vha i ṋewa. Ni nga shela mulenzhe kha mutakalo wavho na dakalo ḽaṋu nga u sumbedza uri ni a humbulela vhabebi vha re vhoṱhe, ni na vhungoho ha uri Yehova Mudzimu ‘u ḓo ni fha zwe na zwi ṋea vhaṅwe.’—Mirero 19:17.

[Ṱhaluso i re magumoni a siaṱari]

[Tshifanyiso kha siaṱari 23]

No guma lini u ramba muṱa wa mubebi a re eṱhe uri u ḓe u ḽe na vhoiwe zwiḽiwa? Zwi ḓo vha zwavhuḓi uri ni ite zwenezwo nga u ṱavhanya.