Wuhrẹ Emọ Ra

Oware Udidi Jọ nọ Whọ rẹ Sae Vuẹ Amọfa

KỌ OHWO jọ ọ vuẹ owhẹ oware udidi no ẹdẹjọ?— * Me wo ojọ nọ mẹ gwọlọ vuẹ owhẹ. Onana yọ oware udidi ọrẹri. A jọ Ebaibol na ta nọ ‘u dhere anwọ anwae ze.’ (Ahwo Rom 16:25) Evaọ oke ọsosuọ, Ọghẹnẹ ọvo ọ riẹ oware yena nọ ‘u dhere’ na. Joma ruẹ epanọ Ọghẹnẹ o ro rovie oware nana nọ u dhere na kẹ ahwo buobu.

Orọ ọsosuọ, kọ whọ riẹ oware nọ “ọrẹri” u dhesẹ?— Ẹme nana o dhesẹ oware ofuafo, hayo oware obọdẹ. Fikiere, a se oware udidi nana edidi ọrẹri keme obọ Ọghẹnẹ u no ze, ọnọ ọ rrọ ọrẹri. Amono who roro nọ a jẹ gwọlọ riẹ oware udidi nana?— Ikọ-odhiwu. Ebaibol na e ta nọ: “Eware [nana] ikọ-odhiwu i rẹrobẹ re a ruẹ.” Ẹhẹ, a jẹ gwọlọ wo otoriẹ oware udidi ọrẹri nana.—1 Pita 1:12.

Nọ Jesu ọ ziọ otọakpọ, ọ ta ẹme kpahe oware udidi nana, je ru ei vẹ kẹ ahwo. Ọ ta kẹ ilele riẹ nọ: ‘A kẹ owhai eware ididi uvie Ọghẹnẹ.’ (Mak 4:11) Kọ who muẹrohọ oware nọ oware udidi na u kiekpahe?— U kiekpahe Uvie Ọghẹnẹ, onọ Jesu o wuhrẹ omai inọ ma lẹ kẹ na!—Matiu 6:9, 10.

Enẹna, joma ruẹ epanọ Uvie Ọghẹnẹ o rọ jọ oware udidi “anwọ oke anwae ze” bẹsenọ Jesu ọ rọ ziọ otọakpọ je ru ei vẹ kẹ ahwo. Nọ Adamu avọ Ivi a ghẹmeeyo kẹ uzi Ọghẹnẹ no, nọ Ọghẹnẹ o le ai no ọgbọ Idẹn na no, idibo Ọghẹnẹ a ruẹ vuhumu uwhremu na inọ o gbẹ rrọ ẹjiroro Ọghẹnẹ re otọakpọ na kpobi u zihe ruọ aparadase. (Emuhọ 1:26-28; 2:8, 9; Aizaya 45:18) A kere kpahe evawere nọ ahwo a te reawere riẹ evaọ okenọ Uvie Ọghẹnẹ u ti su otọakpọ na.—Olezi 37:11, 29; Aizaya 11:6-9; 25:8; 33:24; 65:21-24.

Enẹna, roro kpahe ohwo nọ ọ rrọ Osu Uvie Ọghẹnẹ. Kọ whọ riẹ ohwo nọ Ọghẹnẹ ọ salọ re ọ jọ Osu na?— Ọmọ riẹ, Jesu Kristi “Ovie Udhedhẹ” na. Ebaibol e ta nọ: “Isuẹsu e [te] jọ obọ riẹ.” (Aizaya 9:6, 7) O gwọlọ nọ te omẹ te owhẹ ma re wo ‘eriariẹ eware ididi Ọghẹnẹ. Kristi họ oviede eware ididi na.’ (Ahwo Kọlọsi 2:2) O gwọlọ nọ ma rẹ riẹ inọ Ọghẹnẹ ọ rehọ uzuazọ ukọ-odhiwu ọsosuọ nọ ọ ma (Ọmọ ẹzi), o te fi uzuazọ riẹ họ eva Meri. Ọghẹnẹ o vi Ọmọ yena nọ ọ jọ ukọ-odhiwu ologbo na ziọ otọakpọ obonẹ wọhọ idhe ẹtanigbo re ma sai wo uzuazọ ebẹdẹ bẹdẹ.—Matiu 20:28; Jọn 3:16; 17:3.

Dede na, u te no ẹriẹ nọ ma riẹ inọ Ọghẹnẹ ọ salọ Jesu re ọ jọ Osu Uvie Riẹ no, eware efa e riẹ nọ o gwọlọ nọ ma rẹ gbẹ riẹ kpahe oware udidi nana. Ojọ  rai họ, amọfa a ti kuomagbe Jesu evaọ obọ odhiwu, te ezae gbe eyae. A ti lele iei su evaọ obọ odhiwu!—Ahwo Ẹfẹsọs 1:8-12.

Joma riẹ edẹ ahwo jọ nọ i ti lele Jesu su evaọ obọ odhiwu. Jesu ọ vuẹ ilele riẹ nọ i wo ẹrọwọ inọ o bi kpohọ obọ odhiwu re ọ nyae ruẹrẹ oria họ kẹ ae. (Jọn 14:2, 3) Who te se ikereakere nọ e rrọ obotọ na, whọ te ruẹ edẹ umutho ezae gbe eyae jọ nọ i ti lele Jesu su evaọ Uvie Ọsẹ riẹ.—Matiu 10:2-4; Mak 15:39-41; Jọn 19:25.

Evaọ etoke lelehie, ohwo ọvo ọ riẹ unu ahwo nọ a ti lele Jesu su evaọ obọ odhiwu hu. Rekọ nẹnẹ na, ma riẹ unu ahwo na no. Kọ whọ riẹ unu rai?— Ebaibol e ta nọ a bu te idu udhuhrẹ gbe ene (144,000). Onana yọ abọjọ oware udidi na re.—Eviavia 14:1, 4.

Kọ whọ rọwo nọ “eware ididi uvie Ọghẹnẹ” na họ oware udidi nọ o mai gbunu kpaobọ nọ ohwo ọ rẹ sae riẹ?— O tẹ rrọ ere, joma daoma wuhrẹ kpahiẹ ziezi re ma sai ru ei vẹ kẹ ahwo buobu.

[Oruvẹ-obotọ]

ENỌ:

▪ Ẹvẹ a se oware udidi nọ ma ta ẹme kpahe na, kọ fikieme a je sei ere?

▪ Eme họ oware udidi nana, kọ ono ọ kaki mu ahwo họ ewuhrẹ kpahe iẹe?

▪ Eware jọ vẹ who wuhrẹ kpahe oware udidi nana no?

▪ Oghẹrẹ vẹ whọ sai ro ru oware udidi na vẹ kẹ ogbẹnyusu ra?

[Uwoho nọ o rrọ ẹwẹ-obe avọ 23]

Eme who roro nọ ikọ-odhiwu na a jẹ gwọlọ riẹ?