WASWE, enitaem samwan talem iu wanfala secret?​— * Wanfala secret stap wea mi laek talem iu. Long Bible disfala secret olketa kolem ‘holy secret wea stap haed for longfala taem.’ (Romans 16:25) Firstaem, God nomoa savve long datfala “holy secret.” Iumi bae lukim wanem God duim for mekem staka pipol savve long disfala secret.

Waswe, iu savve wanem nao disfala word “holy” hem minim?​— Hem minim klin or barava spesol. So datfala secret, hem holy secret bikos hem kam from God, wea holy. Iu tingse hu nao laek savve long disfala spesol secret?​— Olketa angel. Bible sei: “Olketa angel barava laek for minim olketa samting hia.” Tru nao, olketa laek tumas for minim disfala holy secret.​—1 Peter 1:​12.

Taem Jesus stap long earth, hem storyim datfala holy secret and explainim tu. Hem talem olketa disaepol bilong hem: “Iufala minim datfala holy secret abaotem kingdom bilong God.” (Mark 4:​11) Waswe, iu luksavve wanem nao datfala holy secret?⁠— Hem abaotem Kingdom bilong God wea Jesus lanem iumi for prea for hem!​—Matthew 6:​9, 10.

Distaem iumi bae lukim hao Kingdom bilong God hem wanfala secret “wea stap haed for longfala taem” kam kasem taem wea Jesus kam long earth and explainim datwan. Bihaen Adam and Eve no obeyim God and lusim garden long Eden, pipol bilong God luksavve plan bilong God for full earth kamap paradaes bae gohed kamap tru. (Genesis 1:​26-​28; 2:​8, 9; Isaiah 45:18) Olketa hia raet abaotem hapi wea pipol bilong God bae kasem taem Kingdom bilong God rulim disfala earth.​—Psalm 37:11, 29; Isaiah 11:​6-9; 25:8; 33:24; 65:21-​24.

Distaem, tingim King long Kingdom bilong God. Waswe, iu savve hu nao God chusim for King?​— Son bilong hem Jesus Christ, wea hem nao “Prince bilong Peace.” Bible sei: “Wei for rul olsem prince bae stap long shoulder bilong hem.” (Isaiah 9:​6, 7) Iu and mi mas lanem “stretfala savve abaotem datfala holy secret bilong God, wea hem nao Christ.” (Colossians 2:2) Iumi need for savve God tekem laef bilong firstfala angel (spirit Son) wea hem wakem and putim insaed long Mary. Datfala Son wea hem strongfala angel, hem nao datwan wea God sendem kam long earth olsem wanfala sakrifaes mekem iumi savve kasem laef olowe.​—Matthew 20:28; John 3:​16; 17:3.

Iumi savve God chusim Jesus for King long Kingdom, bat iumi need for savve long samfala samting moa abaotem disfala secret. Nara part long datfala holy secret hem nao for samfala man  and woman for stap long heven witim Jesus wea laef bak. Olketa bae rul witim Jesus long heven!​—Ephesians 1:​8-​12.

Distaem iumi storyim nem bilong samfala wea bae rul witim Jesus long heven. Jesus talem olketa faithful aposol bilong hem, hem bae go long heven and redyim ples for olketa. (John 14:​2, 3) Taem iu readim olketa scripture hia, iu bae lukim nem bilong tu-thri man and woman wea bae rul witim Jesus long Kingdom bilong Dadi bilong hem.​—Matthew 10:​2-4; Mark 15:39-​41; John 19:25.

For longfala taem, no eniwan savve haomas nao bae rul long heven witim Jesus insaed Kingdom bilong hem. Bat distaem iumi savve nao. Iu savve haomas?​— Bible sei hem 144,000. Diswan tu hem insaed long disfala holy secret.​—Revelation 14:​1, 4.

Waswe, iu agree hem bigfala privilege for savve long mining bilong disfala holy secret? ​— Sapos olsem, hem gud for iumi lanem staka samting abaotem disfala secret mekem iumi savve explainim long staka pipol.