Ia Aʻoaʻo Lau Fanau

Se Mea Lilo E te Taʻu Atu i Isi

PE NA iai se mea lilo na taʻu atu iā te oe?— * E iai se mea lilo ou te fia taʻu atu iā te oe. Ua taʻua i le Tusi Paia “o le mea lilo paia ua leva ona natia.” (Roma 16:25) I le taimi muamua, e na o le Atua na silafiaina “le mea lilo paia.” Seʻi o ta vāai i mea na faia e le Atua ina ia iloa ai e le toʻatele o tagata lenei mea lilo.

Muamua, pe e te iloa le uiga o le upu “paia”?— O lona uiga e mamā pe matuā faapitoa. Ua taʻua la le mea lilo o le mea lilo paia, talu ai e mai i le Atua, o lē e paia. E te iloa o ai na fia iloaina lenei mea lilo faapitoa?— O agelu. Ua taʻua i le Tusi Paia: “E naunau tele agelu e vaavaai i nei mea.” Ioe, na latou fia malamalama i lenei mea lilo paia.—1 Peteru 1:12.

Ina ua afio mai Iesu i le lalolagi, na fetalai o ia e uiga i le mea lilo paia ma faamatalaina. Na fetalai o ia i ona soo: “Ua tuuina atu iā te outou le mea lilo paia o le malo o le Atua.” (Mareko 4:11) Pe e te iloa o le ā le uiga o le mea lilo paia?— O le Malo o le Atua, lea na aʻoaʻo i tatou e Iesu e tatalo i ai!—Mataio 6:9, 10.

Seʻi o ta vāai pe na faapefea ona “leva” ona avea le Malo o le Atua ma mea lilo, seʻia oo ina afio mai Iesu i le lalolagi ma faamatalaina. Ina ua solia e Atamu ma Eva le tulafono a le Atua ma tuliesea mai i le faatoʻaga o Etena, na iloa ai e auauna a le Atua, e finagalo pea le Atua e avea le lalolagi atoa ma parataiso. (Kenese 1:26-28; 2:8, 9; Isaia 45:18) Na latou tusi e uiga i le olaga fiafia o le a maua e tagata i le lalolagi, e ala mai i le Malo o le Atua.—Salamo 37:11, 29; Isaia 11:6-9; 25:8; 33:24; 65:21-24.

Seʻi manatu i le Pule o le Malo o le Atua. Pe e te iloa o ai na filifilia e le Atua e fai ma Pule o le Malo?— O lona Alo, le “Perenise o le Filemu,” o Iesu Keriso. Ua taʻua i le Tusi Paia: “O le a i luga o lona tauʻau le pulega a se perenise.” (Isaia 9:6, 7) E tatau ona ta “iloa lelei le mea lilo paia a le Atua, o le Keriso lea.” (Kolose 2:2) E ao ona ta iloa na tuuina e le Atua le ola o le uluaʻi agelu (lona Alo), o lē na ia faia, i le manava o Maria. O lenā Alo, o lē sa avea muamua ma agelu malosi, na auina mai e le Atua i le lalolagi e fai ma taulaga, ina ia mafai ai ona tatou maua le ola e faavavau.—Mataio 20:28; Ioane 3:16; 17:3.

Ae e iai isi mea e ao ona tatou iloa e uiga i lenei mea lilo, e ese mai i le filifilia e le Atua o Iesu e avea ma Pule o Lona Malo. O lenei mea lilo e aofia ai isi tane ma fafine, o ē o le a faatasi ma  Iesu ua toe faatūina i le lagi. O le a latou pule faatasi ma ia i le lagi!—Efeso 1:8-12.

Seʻi o ta aʻoaʻoina igoa o nisi o le a pule faatasi ma Iesu i le lagi. Na taʻu atu e Iesu i ona aposetolo faamaoni o le a alu i le lagi e saunia se nofoaga mo i latou. (Ioane 14:2, 3) Pe a tilofaʻia mau o loo mulimuli mai, o le a e iloa ai igoa o nisi o tane ma fafine, o ē o le a pule faatasi ma Iesu i le Malo o lona Tamā.—Mataio 10:2-4; Mareko 15:39-41; Ioane 19:25.

Na umi se taimi e lē o iloa le aofaʻi o ē o le a pule i le lagi faatasi ma Iesu, o se vaega o lona Malo. Ae o lea ua tatou iloa. Pe e te iloaina?— Ua taʻua i le Tusi Paia, e 144,000. O se isi vaega lenei o le mea lilo paia.—Faaaliga 14:1, 4.

Pe e te ioe o lenei “mea lilo paia o le malo o le Atua,” o se mea lilo pito i sili ona lelei e mafai ona iloa e se tasi?— O lea, seʻi o tatou aʻoaʻoina mea uma e uiga i lenei mea lilo, ina ia mafai ona tatou faamatala atu i isi tagata e toʻatele.

[Faaopoopoga i lalo]

FESILI:

▪ O le ā le taʻu o le mea lilo na ta talanoaina, ma aiseā ua taʻua ai faapea?

▪ O le ā lenei mea lilo, ma o ai na amata ona aʻoaʻoina ai tagata?

▪ O ā nisi mea ua e aʻoaʻoina e uiga i lenei mea lilo?

▪ E faapefea ona e faamatala atu i sau uō le mea lilo paia?

[Ata i le itulau 31]

Pe e te iloa o le ā le mea na taumafai agelu ia iloa?