Tese Ônov Ou

Kwaghmyer u Ú Fatyô u Ôron Mbagenev Yô

ER I lu nahan, or ôr u kwaghmyer vee?— * M soo u ôron we kwaghmyer ugen. Ka icighan kwaghmyer. I yila kwaghmyer ne ken Bibilo ér, ‘kwaghmyer u a lu ken iuv hii sha ashighe a tsuaa la je zan zan’ yô. (Mbaromanu 16:25) Sha hiihii la, lu Aôndo tseegh fa “kwaghmyer” ne ye. De se nenge ase kwagh u Aôndo yange er sha er ior kpishi vea hingir u fan kwaghmyer ne yô.

Hiihii yô, ishember i icighan la, u fa inja i kpa?— Inja i ishember ne yô ka kwagh u a lu wang shin a lu a inja kpishi yô. Nahan i yila kwaghmyer ne ér icighan kwaghmyer sha ci u a due hen Aôndo, u a lu icighan Aôndo la. U hen wer ka unô yange ve soo u fan kwaghmyer u injaa nee?— Ka mbatyomov. Bibilo kaa ér: “Akaa ne yô, mbatyomov mba Shaav je kpaa, ka saren ve pe gbirin ashe ker.” Sha mimi yô, mbatyomov yange ve soo u kaven icighan kwaghmyer ne.—1 Peteru 1:12.

Shighe u Yesu va shin tar ne la, a ôr kwagh u icighan kwaghmyer ne shi a hii u pasen ior inja na kpaa. A kaa a mbahenen nav ér: ‘Ne yô, i na ne sha u fan kwaghmyer u tartor u Aôndo.’ (Marku 4:11) Se ôr ivur ne nahan u ver ishima u fa kwagh u a lu kwaghmyer ne kpa?— Ka kwaghmyer u Tartor u Aôndo, u Yesu yange tese se ér se eren msen ser u̱ va la!—Mateu 6:9, 10.

De se nenge er i hii ve Tartor u Aôndo lu kwaghmyer “hii sha ashighe a tsuaa la je” zan zan shighe u Yesu va hii u pasen kwagh u u shin tar ne la. Shighe u Adam man Ifa per tindi u Aôndo ve i zenda ve ken sule u Eden kera la, mbacivir Aôndo va hingir u fan ér ken hemen yô Aôndo una va gema tar ne cii ua hingir paradiso. (Genese 1:26-28; 2:8, 9; Yesaia 45:18) Nahan ve nger ve pase kwagh u msaanyol u ior vea lu a mi shin tar ne zum u vea lu sha ikyev i Tartor u Aôndo la.—Pasalmi 37:11, 29; Yesaia 11:6-9; 25:8; 33:24; 65:21-24.

Hen ase sha kwagh u Tor u Tartor u Aôndo la. U fa or u Aôndo yange tsua nan ér nana lu Tor kpa?— A tsua Wan na, u a lu “Wantor u Bem” la, ka Yesu Kristu je la. Bibilo kaa ér: “Tarkuran ngu sha vandegh Nagh.” (Yesaia 9:6, 7) Gba u we man mo se ‘fa kwaghmyer u Aôndo, ka Kristu je la.’ (Mbakolose 2:2) Gba u se fa ser Aôndo yange tôô uma u ortyom u hiihii (Wan na u ken jijingi) u yange gba la, a wa ken iyav mbu Maria. Nahan Wan na, u lu ortyom u ageegh ne, hingir un u Aôndo tindi shin tar ne sha u a va na nagh sha er se zua a uma u tsôron yô.—Mateu 20:28; Yohane 3:16; 17:3.

Nahan kpa, ka kwagh u Aôndo yange tsua Yesu sha u a lu Tor u Tartor Na la tseegh i gbe u se fa sha kwaghmyer ne  ga. Vegher ugen u kwaghmyer ne yô ka un ne: gba u nomso man kasev mbagenev vea za kohol Yesu, u yange i nder un shin ku la, vea lu a na sha. Vea tema tor a Yesu imôngo sha!—Mbaefese 1:8-12.

De se tôv se fa ati a mbagenev mba vea hemen vea Yesu imôngo sha la. Ngise Yesu kaa a mbaapostoli nav mba jighjigh mbara ér un ngu za sôron ve ijiir. (Yohane 14:2, 3) Aluer u ôr avur a Bibilo aa a lu shin heen ne yô, u nenge a ati a nomso man kasev kpuaa mba vea tema tor a Yesu imôngo sha Tartor u Ter na la.—Mateu 10:2-4; Marku 15:39-41; Yohane 19:25.

Yange i fa iyenge i ior mba vea tema tor a Yesu imôngo ken Tartor na la ga zan zan shighe kar naleghaa je. Kpa hegen ne se fa iyenge ve. We u fa iyenge ve kpa?— Bibilo kaa ér mba iorov 144,000. Kwagh ne kpa ka vegher u icighan kwaghmyer la.—Mpase 14:1, 4.

U nenge wer ken akaamyer cii, ka icighan “kwaghmyer u tartor u Aôndo” ne a hembe lun kwaghmyer u kpilighyol u i doo u or nana fa ga zee?— Aluer ka nahan yô, doo u se nôngo se hen kwaghmyer ne vindi vindi sha er se pase ior kpishi akaa ne er se fetyô la cii yô.

[Ngeren u shin kpe]

MBAMPIN:

▪ Mba yer kwaghmyer u se er kwagh na ne ér nyi, man er nan i yer kwaghmyer ne nahana?

▪ Kanyi i lu kwaghmyer nee, man ka an yange nan hii u tesen ior kwaghmyer shono?

▪ Ka akaa a ken kwaghmyer ne a nyi nahan u hene?

▪ U pase azende a ou icighan kwaghmyer ne nena?

[Foto u sha peeji 23]

U hen wer ka nyi mbatyomov yange ve soo u fana?