Kaʼans a paalaleʼex

Junpʼéel secreto jeʼel u páajtal u tsikbaltaʼaleʼ

¿AKʼÁAT wa ka in tsikbaltech junpʼéel secreto? *... Paʼatik in jáan tsikbaltiktech. Teʼ Bibliaoʼ le secretoaʼ kʼaj óolaʼan bey «kiliʼich baʼal taʼakaʼaneʼ» yéetel ku yaʼalik xaneʼ «desde jach úuchjeakil x-mukul taʼakaʼak» (Romanos 16:25, NM). Tsʼoʼoleʼ chéen Jéeoba Dios ojéeltmil kaʼachi. Baʼaleʼ koʼox ilik baʼax tu beetaj utiaʼal ka ojéeltaʼak.

Yáaxeʼ ¿kʼajaʼan wa tech baʼax u kʼáat u yaʼal le tʼaan kiliʼichoʼ?... Junpʼéel baʼal kiliʼicheʼ jach kʼaʼanaʼan, limpio yéetel minaʼan baʼax kʼaas ichil. Tumen Dios juntúul máax santoeʼ, le secreto xan u yoojloʼ láayliʼ santoeʼ, le oʼolal kʼaj óolaʼan bey «kiliʼich baʼal taʼakaʼaneʼ». ¿A wojel wa máaxoʼob taak u yojéeltkoʼob kaʼach le secretoaʼ?... Letiʼe angeloʼoboʼ. Ilawil baʼax ku yaʼalik le Bibliaaʼ: «Le baʼaloʼobaʼ tak le angeloʼob u kʼáat u yiloʼoboʼ» (1 Pedro 1:12).

Jesuseʼ u yojel xan kaʼach le secretoaʼ, yéetel letiʼ yáax tsʼáa ojéeltbil. Ka taal way Luʼumeʼ tu yaʼalaj tiʼ u disipuloʼob: «Tiʼ teʼexeʼ Jajal Dios tsʼáaik a wojéelteʼex u taʼakbil baʼaliloʼob u [reino]» (Marcos 4:11). ¿Ta tsʼáaj cuenta baʼax táakaʼan ichil le kiliʼich baʼal taʼakaʼanoʼ?... Ichileʼ táakaʼan u Reino Dios, le gobierno tu kaʼansajtoʼon Jesús ka k-kʼáat tiʼ Jéeoba ich oracionoʼ (Mateo 6:9, 10).

Jeʼex t-iloʼ, xáanchaj mix baʼal ojéelaʼan yoʼolal u Reino Dios. Desde ka jóoʼsaʼab Adán yéetel Eva tu jardinil Edén yéetel tak táanil tiʼ u taal Jesús yéetel u tsʼáaik ojéeltbil le secretooʼ, le máaxoʼob meyajt Dios úuchjeakoʼ maʼ yaʼab baʼax u yoojloʼob kaʼach yoʼolal u Reino Diosiʼ. Baʼax u yoojloʼob kaʼacheʼ Jéeobaeʼ u kʼáat u kaʼa sut paraísoil le Luʼumaʼ (Génesis 1:26-28; 2:8, 9; Isaías 45:18). Jujuntúul tiʼ letiʼobeʼ tu yaʼaloʼob bukaʼaj jaʼtsil kun kuxtal máak way Luʼum ken taalak u Reino Diosoʼ (Salmo 37:11, 29; Isaías 11:6-9; 25:8; 33:24; 65:21-24).

Baʼaleʼ ¿máax tu yéeyaj Dios utiaʼal ka u beet u reyil tiʼ le Reinoaʼ? ¿A kʼáat wa a wojéelte?... Tu yéeyaj Jesucristo, u Hijo. Le Bibliaoʼ ku yaʼalikeʼ yaan u tsʼaʼabal páajtalil tiʼ utiaʼal u gobernar bey «u [reyil] jeetsʼel[ileʼ]» (Isaías 9:6, 7). Le oʼolal maʼalob ka yanaktoʼon kʼaj óolal tiʼ «u kiliʼich taʼakbil baʼal Dios; lelaʼ Cristo» (Colosenses 2:2, NM). ¿Baʼax unaj k-ojéeltik yoʼolal Cristo? Yáaxeʼ, Jéeobaeʼ tu chʼaʼaj u kuxtal u Hijo, le yáax ángel tu beetaj teʼ kaʼanoʼ, yéetel tu tsʼáaj tu jobnel María utiaʼal ka síijik bey wíinikeʼ. Tsʼoʼoleʼ u Hijo Dioseʼ tu kʼubaj u kuxtal t-oʼolal utiaʼal ka yanaktoʼon kuxtal minaʼan u xuul (Mateo 20:28; Juan 3:16; 17:3).

Beoraaʼ yaan in tsikbaltiktech uláakʼ baʼax táakaʼan ichil le kiliʼich baʼal  taʼakaʼanoʼ: Dioseʼ tu chʼaʼtuklaj u yéeyik xiiboʼob yéetel koʼoleloʼob utiaʼal ka xiʼikoʼob kajtal yéetel Jesús teʼ kaʼanoʼ. ¿Baʼax a tuklik ken u beetoʼobiʼ?... Yaan u gobernaroʼob yéetel Cristo (Efesoiloʼob 1:8-12).

¿A kʼáat wa a wojéelt máaxoʼob kun gobernar yéetel Jesús?... Ichiloʼobeʼ táakaʼan le apostoloʼoboʼ, tumen Jesuseʼ tu yaʼalajtiʼobeʼ yaan u preparartik junpʼéel kúuchil utiaʼal u yantaloʼob teʼ kaʼanoʼ (Juan 14:2, 3). Utiaʼal a wojéeltik bix u kʼaabaʼ jujuntúul tiʼ le máaxoʼob kun gobernaroʼob tu Reino Diosoʼ, xok Mateo 10:2-4, Marcos 15:39-41 yéetel Juan 19:25.

¿Jaytúul túun le máaxoʼob kun bin kaʼanoʼ? Leloʼ táakaʼan xan ichil le kiliʼich baʼal taʼakaʼanoʼ, tumen máan yaʼab jaʼaboʼob mix máak ojéeltmil. Baʼaleʼ bejlaʼeʼ k-ojel. Le Bibliaoʼ ku yaʼalikeʼ 144,000 juntúulaloʼob (Apocalipsis 14:1, 4).

¿Bix a wilik le u taʼakbil baʼaloʼob u reino Diosoʼ? ¿Máasaʼ jach jatsʼuts?... Le oʼolaleʼ maʼalob ka seguernak a kaanbal tu yoʼolal, beyoʼ jeʼel u páajtal a wáantken in tsikbalt tiʼ uláakʼ máakoʼobeʼ.

[Tsolajiloʼob]

KʼÁATCHIʼOB:

▪ ¿Bix u kʼaabaʼ le secreto tsʼoʼok in tsikbaltiktechoʼ, yéetel baʼaxten bey u kʼaabaʼoʼ?

▪ ¿Tiʼ baʼax ku tʼaan le secretooʼ, yéetel máax yáax tsʼáa ojéeltbil?

▪ ¿Baʼaxoʼob kʼajaʼantech tu yoʼolal?

▪ ¿Bix jeʼel a tsolik le secreto tiʼ a amigoʼoboʼ?

[U tsolajil le oochel teʼ táan juʼun 31]

¿Baʼax taak u yojéeltik kaʼach le angeloʼoboʼ?