Ano an Sasabihon kan Aki Nindo?

MGA MAGURANG: Sa isyu kan Enero 15, 2010, pahina 16-20, nasambitan niamo an dapit sa pagkaigwa nin mga pag-ensayo kaiba kan mga aki nindo. An artikulong ini nagtatao nin mga ideya tanganing tabangan kamo na andamon an aki nindo na atubangon an mga kadepisilan sa eskuelahan. Tibaad boot nindong gibohon an mga pag-ensayong ini durante kan saindong banggi nin Pampamilyang Pagsamba.

AN MGA aking Saksi ni Jehova napapaatubang sa dakol na kadepisilan. An mga kaeskuela ninda parateng naghahapot kun taano ta dai sinda nakikikabtang sa nagkapirang aktibidad, arog baga kan pagsaludo sa bandera, pagselebrar nin birthday, asin mga project na may koneksion sa kapiestahan. Kun hapoton nin arog kaiyan an aki nindo, ano daw an isisimbag nia?

An nagkapirang Kristianong aki nagsasabi sana: “Dai ko puedeng gibohon iyan. Bawal iyan sa relihion mi.” Maninigong komendaran an mga aking iyan huli sa saindang marigon na paninindogan. Tibaad dai na sinda hapoton pa huli sa simbag ninda. Pero, sinasadol kita kan Biblia na magin “andam na gumibo nin pagdepensa sa atubangan nin lambang tawo na naghahagad sa [sato] nin rason” dapit sa mga tinutubod niato. (1 Ped. 3:15) Orog pa iyan sa pagsabing, “Dai ko puedeng gibohon iyan.” Dawa kun an iba dai oyon sa sato, tibaad gusto nindang maaraman an dahelan kan satong mga desisyon.

Dakol na hoben na Saksi an nag-eestorya sa saindang mga kaeskuela nin mga pangyayari sa Biblia paagi sa mga publikasyon na arog kan Makanood sa Dakulang Paratokdo. An mga estoryang ini puedeng makatabang na ikapaliwanag kan mga aking Saksi kun taano ta ginigibo ninda o dai ginigibo an nagkapirang bagay. An nagkapirang estudyante naghihinanyog na marhay sa mga estorya sa Biblia, asin dakol na pag-adal sa Biblia an naponan paagi kaini. An ibang estudyante tibaad nadedepisilan na maghinanyog sa sarong bilog na estorya sa Biblia. Kun dai lubos na ipapaliwanag an nagkapirang estorya sa Biblia, an mga aking nag-eeskuela tibaad madepisilan na gayo sa pagsabot kaiyan. Kan an 11 anyos na si Minhee imbitaran kan saiyang amiga sa birthday party, sia nagsimbag: “Dai man sinasabi sa sato kan Biblia na magselebrar nin birthday. Sarong karakter sa Biblia, si Juan na Bautisador, an ginadan sa birthday.” Minsan siring, nagirumdoman ni Minhee na garo dai nasabotan kan amiga nia an simbag nia.

Kun beses, makakatabang an pagpaheling sa kaeskuela nin sarong retrato o estorya sa saro sa mga libro niato. Paano kun magsabi an mga autoridad sa eskuelahan na dai sinda oyon na an mga aki magpaheling nin relihiosong mga publikasyon sa ibang mga estudyante? Epektibo daw na makakapagpatotoo an satong mga aki dawa mayo nin ano man na publikasyon? Paano nindo matatabangan an saindong mga aki na gumibo nin pagdepensa?

Mag-ensayo Kaiba Ninda

Makakatabang an pag-ensayo sa harong, na an mga magurang an nag-aaktong kaeskuela. Mantang pinagmamaigotan kan mga aki na idepensa an saindang pagtubod, bobooton kan mga magurang na sinda tawan nin komendasyon huli sa paghihingoa ninda asin sabihon sa sainda kun paano ninda puedeng paoswagon an pangangatanosan ninda asin kun taano ta kapakipakinabang iyan.  Halimbawa, isuherir an paggamit nin mga tataramon na masasabotan kan mga estudyanteng kaedad ninda. Si Joshua, na nuebe anyos, nagsabi na dai nasasabotan kan mga kaeskuela nia an mga tataramon na “konsensia” asin “kaimbodan.” Kaya kaipuhan niang gumamit nin mas pasil saboton na mga tataramon kun nangangatanosan sa sainda.—1 Cor. 14:9.

An nagkapirang aking nag-eeskuela na naghahapot tibaad mawaran nin interes kun halawig an simbag. Paagi sa pakikipag-olay asin pakikipangatanosan sa sainda, puedeng mapagdanay nin mga hoben na Saksi an saindang interes. Si Haneul, na dies anyos na aking babae, nagsabi, “An gusto kan mga kaeskuela ko pag-oolay, bakong paliwanag.” Tanganing magkaigwa nin pag-oolay, maghapot dangan maingat na maghinanyog sa personal na mga opinyon ninda.

Ipapaheling kan mga pag-oolay sa ibaba kun paano an Kristianong mga aki puedeng mangatanosan sa mga kaeskuela ninda. Dai kaipuhan na tuomon an mga pag-oolay na ini—bakong parareho an mga aki, asin laen-laen man an simbag depende sa kamugtakan. Kun siring, kukuanon sana kan hoben na Saksi an ideya, sasabihon iyan sa sadiri niang tataramon, dangan ipapahayag iyan sa  paaging angay sa situwasyon asin mga kaeskuela nia. Kun igwa kamo nin mga aki na nag-eeskuela, iakto nindo kaiba ninda an mga pag-oolay na ini.

Kaipuhan an panahon asin paghihingoa sa pagsasanay sa mga aki. Gusto kan Kristianong mga magurang na itadom sa saindang mga aki an mga prinsipyo sa Biblia asin dagkahon sindang mamuhay kaoyon kan mga prinsipyong iyan.—Deut. 6:7; 2 Tim. 3:14.

Sa sunod na Pampamilyang Pagsamba, probaran na ensayohon kaiba kan saindong mga aki an mga pag-oolay na yaon digdi. Helingon nindo kun gurano ini kaepektibo. Tandaan na an pasohan bakong tuomon an mga simbag o tataramon. Sa katunayan, puede nindong iakto nin pirang beses an sarong situwasyon, na laen-laen an isinisimbag nindo asin helingon kun paano ibabagay kan mga aki an simbag ninda. Mantang pinagmamaigotan nindang ipaliwanag an basehan kan mga tinutubod ninda, tabangan sindang makapatalubo nin pagkarasonable asin pagkamataktika. Sa pag-agi nin panahon, matotokdoan nindo an saindong mga aki kun paano idepensa sa mga kaklase, kataed, patin maestra an mga tinutubod ninda.

[Kahon/Mga Ritrato sa pahina 4, 5]

PAGSELEBRAR NIN BIRTHDAY

Mary: Uy, John. Imbitado taka sa birthday party ko.

John: Salamat Mary ta nagirumdoman mo ako. Pero, may hapot ako, taano man ta ma-birthday party ka?

Mary: Tanganing iselebrar an birthday ko. Taano, dai mo isineselebrar an birthday mo?

John: Dai.

Mary: Taano man? Ogmahon ngani an pamilya mi kan mamundag ako.

John: Iyo man an pamilya mi. Ogmahon man sinda kan mamundag ako. Pero, sa heling ko bakong dahelan iyan na ako magselebrar kada taon. Dakol an nag-iisip na kun birthday party ninda, sinda an pinakamahalaga. Pero bako daw na an Dios an mas mahalaga? Asin bako daw na maninigo ta siang pasalamatan huling sia an nagtao sato nin buhay?

Mary: An boot mong sabihon dai ako dapat mag-birthday party?

John: Desisyon mo iyan, Mary. Pero, isip-isipa ini. Mantang dakol an gustong mag-ako nin mga regalo sa birthday ninda, sinasabi kan Biblia na igwang orog na kaogmahan sa pagtao kisa pag-ako. Imbes na an sadiri niato an tawan nin espesyal na atension sa satong birthday, bako daw na marahay na pasalamatan an Dios, isipon an iba, asin gumibo nin marahay sainda?

Mary: Dai ko lamang naisip iyan. Di, dai ka rineregalohan kan mga magurang mo?

John: Siempre rineregalohan. Pero, dai na ninda hinahalat an birthday ko. Rineregalohan ninda ako noarin man gusto ninda. Halat ka Mary, gusto mong maaraman kun paano nagpoon an pagselebrar nin birthday?

Mary: Paano man nanggad?

John: Kun gusto mo, sa aga igwa akong ieestorya saimo dapit sa sarong birthday na nangyari kaidtong haloy nang panahon.

PAGSALUDO SA BANDERA

Gail: Claire, taano ta dai ka nagsasaludo sa bandera?

Claire: Marahay ta naghapot ka, Gail. Pero, hapoton taka nguna, taano ta nagsasaludo ka?

Gail: Dahel namomotan ko an satong nasyon.

Claire: Namomotan mo man si Mama mo, bako daw Gail? Pero, nagsasaludo ka saiya?

Gail: Siempre dai. Pero, aram mo, nagsasaludo ako sa bandera ta iginagalang ko iyan. Ika, dai mo iginagalang an bandera?

Claire: Iginagalang ko iyan. Alagad dai ta man sinasaludohan an gabos na tawo o bagay na iginagalang ta, bako daw?

Gail: Tama ka, iginagalang ko an maestra ta, pero dai ako nagsasaludo saiya. Seguro, dai ko lang aram kun taano ta nagsasaludo ako sa bandera.

Claire: Aram mo Gail, dakol an naniniwala na an bandera simbolo kan nasyon ninda. An pagsaludo dian nangangahulogan na gigibohon ninda an gabos para sa saindang nasyon. Pero ako bakong arog kaiyan. Dai ko puedeng itao sa nasyon ta an buhay ko huli ta an Dios an nagtao sako nin buhay. Nagdesisyon akong itao saiya an buhay ko. Kaya dawa ngani iginagalang ko an bandera, dai ako nagsasaludo dian.

Gail: Naiintindihan ko na.

Claire: Marahay Gail ta napag-olayan ta ini. Asin kun gusto mong maaraman kun taano ta ginigibo ko o dai ginigibo an nagkapirang bagay, maghapot ka sana sako. Nasambit palan sa Biblia na kaidtong haloy nang panahon, sarong hade sa Babilonya an nagboot sa mga tawo na magduko sa atubangan nin sarong imahen. May mga habong magduko—dawa pa mameligro an buhay ninda.

Gail: Talaga? Anong nangyari sainda?

Claire: Iestorya ko iyan saimo atyan mantang nangungudto kita.

POLITIKA SA ESKUELAHAN

Mike: Tim, siisay sa heling mo an dapat magin presidente sa klase ta?

Tim: Mayo akong pipilion sainda, Mike.

Mike: Taano man?

Tim: May napili na akong pinakamarahay na lider. Bilang Kristiano, nanuga ako na ki Jesus ako masunod. Kaya dai na ako puedeng magpili nin ibang lider. Pero, aram mo daw kun taano ta sa heling ko sia an perpektong Lider?

Mike: Dai, anong pakiaram ko dian?

Tim: O sige, pero kun gusto mong maaraman, maoogma akong sabihon saimo.

[Ritrato]

“Uy, John. Imbitado taka sa ‘birthday party’ ko”

[Ritrato sa pahina 3]

“Taano ta dai ka nagsasaludo sa bandera?”