Unsay Itubag sa Inyong Anak?

MGA GINIKANAN: Sa isyung Enero 15, 2010, panid 16-20, among gihisgotan ang paghimog praktis sesyon uban sa inyong mga anak. Kining artikuloha adunay mga ideya nga makatabang sa pag-andam sa inyong anak sa pagsagubang sa mga pagsulay sa eskuylahan. Mahimong magpraktis sesyon mo sa gabii sa inyong Pamilyahanong Pagsimba.

ANG batang mga Saksi ni Jehova makasinatig daghang pagsulay. Ang mga eskolmet sagad mangutana kon nganong dili sila moapil sa pipila ka kalihokan, sama sa pagsaludar sa bandera, pag-birthday, ug sa mga proyekto sa Christmas, Halloween, ug uban pa. Kon pangutan-on ang inyong anak niana, unsay iyang itubag?

Ang pipila ka batang Saksi moingon lang: “Dili ko puwede ana. Gidili na sa among relihiyon.” Sila angayng dayegon kay sila lig-ong mibarog. Tungod sa ilang tubag, mahimong dili na sila sukitsukiton. Apan, ang Bibliya nagtambag kanato nga mahimong “andam kanunay sa pagdepensa atubangan sa tanan nga mangayo [kanatog] katarongan” sa atong gituohan. (1 Ped. 3:15) Kana nagkahulogan nga dili ka lang moingon, “Dili ko puwede ana.” Bisag ang uban dili mouyon kanato, lagmit may gustong mahibalo kon nganong kana ang atong desisyon.

Daghang batan-ong Saksi ang nag-asoy ug mga estorya sa Bibliya sa ilang mga eskolmet gamit ang mga libro, sama sa Pagkakat-on Gikan sa Dakong Magtutudlo. Ang maong mga estorya makatabang sa pagpatin-aw kon nganong ang batang mga Saksi mohimo o dili mohimo sa pipila ka butang. Ang pipila ka estudyante mamati pag-ayo sa mga estorya, ug daghan ang nasugdag pagtuon sa Bibliya niining paagiha. Ang uban dili makatapos sa pagpamatig usa ka estorya. Kon dili detalyadong ipatin-aw, sila malisdan sa pagsabot sa pipila ka estorya. Sa dihang ang 11-anyos nga si Minhee giimbitar sa iyang amiga sa birthday party, siya miingon: “Ang Bibliya wala magsugo nga iselebrar ang birthday. Kini naghisgot nga si Juan Bawtista gipunggotan panahon sa usa ka birthday.” Apan si Minhee nahinumdom nga morag wala makasabot ang iyang amiga.

Usahay, makatabang ang pagpakitag hulagway o estorya diha sa usa sa atong mga libro ngadto sa laing estudyante. Apan, unsa may himoon kon did-an sa opisyales sa eskuylahan ang mga bata sa pagpakitag relihiyosong mga libro sa ubang estudyante? Makapamatuod ba ang atong mga anak bisag dili mogamit ug basahon? Sa unsang paagi matabangan ang inyong mga anak sa pagdepensa sa ilang pagtuo?

Magpraktis Sesyon

Makatabang ang pagpraktis sa balay, diin ang mga ginikanan modula sa papel ingong mga eskolmet. Samtang maningkamot ang mga bata pagdepensa sa ilang pagtuo, angay silang dayegon sa mga ginikanan ug tudloan kon unsaon pagpauswag ang ilang pagpangatarongan ug kon nganong angay kana. Pananglitan, isugyot ang paggamit ug mga pulong nga masabtan sa ilang kaedad.  Ang nuybe-anyos nga si Joshua nag-ingon nga ang iyang mga eskolmet wala makasabot kon unsa ang “konsensiya” ug “pagkamaunongon.” Busa migamit siyag simpleng mga pulong sa pagpangatarongan kanila.—1 Cor. 14:9.

Ang pipila ka estudyante nga mangutana mahimong mawad-ag interes kon taas kaayo ang itubag. Pinaagi sa pagpakig-estorya ug pagpangatarongan kanila sa batang mga Saksi, ang ilang interes magpabilin. Ang diyes-anyos nga batang babaye nga si Haneul miingon, “Gusto sa akong mga eskolmet nga mag-estoryahay lang mi, dili saysayan.” Aron magkaestoryahay, pangutana kanila ug pamatia pag-ayo ang ilang opinyon.

Ang mga estoryahay sa ubos magpakita kon unsaon pagpangatarongan sa batang mga Saksi sa ilang eskolmet. Kini dili kinahanglang memoryahon—managlahi ang matag bata, ug ang lainlaing kahimtang nagkinahanglag lainlaing tubag. Busa, angayng sabton sa batang Saksi ang ideya, isulti kana sa kaugalingong pulong, ug ipahayag sa paagi nga haom sa kahimtang  ug sa iyang eskolmet. Kon duna kay mga bata nga nag-eskuyla pa, sulayi ang pagpraktis niini uban kanila.

Ang pagbansay sa mga bata nagkinahanglag panahon ug paningkamot. Angayng isilsil sa Kristohanong mga ginikanan ang mga prinsipyo sa Bibliya diha sa ilang mga anak ug awhagon sila nga ipadapat kana.—Deut. 6:7; 2 Tim. 3:14.

Sa sunod ninyong Pamilyahanong Pagsimba, sulayi ang pagpraktis sa mga estoryahay nga gisugyot dinhi. Tan-awa kon unsa kini ka epektibo. Hinumdomi nga ang tumong dili ang pagmemorya sa mga tubag o sa mga pulong. Gani, mahimo ninyong ipasundayag sa daghang beses ang usa ka situwasyon, nga ipahayag ang lainlaing tubag ug tan-awa kon unsaon pagtubag sa inyong anak. Samtang naningkamot sila sa pagpatin-aw sa ilang gituohan, tabangi sila nga mahimong makataronganon ug mataktikanhon. Sa lakat sa panahon, makakat-on ang inyong mga anak sa pagdepensa sa ilang pagtuo ngadto sa ilang mga klasmet, silingan, ug mga magtutudlo.

[Kahon/Mga hulagway sa panid 4]

SELEBRASYON SA BIRTHDAY

Mary: Hi John. Imbitado ka sa akong birthday party.

John: Salamat sa pag-imbitar nako, Mary. Tigselebrar diay ka sa imong birthday?

Mary: Siyempre. Ikaw diay, dili ka ba nagaselebrar sa imong birthday?

John: Dili.

Mary: Ngano man? Ang among pamilya nalipay sa dihang ako natawo.

John: Nalipay man sab ang among pamilya. Pero para nako, dili kana rason nga magselebrar ko. Panahon gud sa birthday party, ang daghan maghunahuna nga sila ang labing importante. Pero dili ba ang Diyos maoy mas importante?

Mary: Unya, dili diay ko angay magselebrar sa akong birthday?

John: Naa ra na nimo. Pero hunahunaa kini. Daghang tawo ang gustong modawat ug mga regalo sa ilang birthday, pero ang Bibliya nag-ingon nga may labaw nga kalipay sa paghatag kay sa pagdawat. Imbes maghunahuna lamang sa kaugalingon panahon sa atong birthday, dili ba maayo nga kita maghunahuna sa uban, ug magbuhat ug maayo kanila?

Mary: Wala gyod ko makahunahuna ana. Sa ato pa, dili diay ka hatagag regalo sa imong mga ginikanan?

John: Siyempre makadawat sab ko ug mga regalo gikan sa akong mga ginikanan. Pero di na sila maghulat sa akong birthday. Hatagan ko nila ug regalo bisag kanus-a nila gusto. Unya Mary, gusto ka bang mahibalo kon kanus-a nagsugod ang selebrasyon sa birthday?

Mary: Nahibalo diay ka?

John: Oo, estoryahan tika ugma sa usa ka birthday nga giselebrar sa karaang panahon.

PAGSALUDAR SA BANDERA

Gail: Claire, nganong dili man ka mosaludar sa bandera?

Claire: Salamat sa pagpangutana. Pero nganong mosaludar man ka niana?

Gail: Kay gimahal ko ang akong nasod.

Claire: Di ba gimahal sab nimo ang imong mama, pero mosaludar ka ba niya?

Gail: Dili. Mosaludar ko sa bandera kay gitahod ko kini. Dili ba diay ka motahod sa bandera?

Claire: Gitahod ko kana. Pero mosaludar ba kita sa tanang tawo ug butang nga atong gitahod?

Gail: Dili. Tuod no, gitahod ko ang atong maestra, pero wala man ko magsaludar niya. Ambot ba kon nganong mosaludar ko sa bandera.

Claire: Abi nimo, daghan ang nag-isip sa bandera ingong simbolo sa ilang nasod. Ang pagsaludar nagpasabot nga buhaton nila ang tanan alang sa ilang nasod. Pero di ko uyon niana. Dili nako ikahatag ang akong kinabuhi sa nasod kay ang Diyos maoy naghatag kanakog kinabuhi. Nakadesisyon na ko nga ihatag nako ang akong kinabuhi kaniya. Busa, bisag ako nagtahod sa bandera, dili ko mosaludar niana.

Gail: Ah, nakasabot na ko.

Claire: Nalipay ko nga nangutana ka. Kon gusto kang mahibalo kon nganong duna koy ginahimo o wala himoa, pangutan-a lang ko. Abi nimo, sumala sa Bibliya, may hari sa Babilonya nga nagsugo sa iyang katawhan sa pagyukbo sa usa ka imahen. Ang pipila wala moyukbo bisag nameligro ang ilang kinabuhi.

Gail: Tinuod ka? Unsay nahitabo nila?

Claire: Estoryahan tika unyang udto.

POLITIKA SA ESKUYLAHAN

Mike: Tim, kinsay gusto nimong mapresidente sa atong klase?

Tim: Wala koy gidapigan nga kandidato.

Mike: Nganong wala man?

Tim: Duna na koy labing maayong lider, si Jesus. Busa dili na ko mopilig laing lider. Nahibalo ka ba kon nganong siya ang labing maayong Lider?

Mike: Wala, ug dili ko interesado.

Tim: Aw, kon gusto ka nang mahibalo, malipay ko sa pagsulti kanimo.

[Hulagway]

“Hi John. Imbitado ka sa akong birthday party”

[Hulagway sa panid 3]

“Nganong dili man ka mosaludar sa bandera?”