Nso ke Eyen Fo Edibọrọ?

ETE YE EKA: Ke nsiondi Enyọn̄-Ukpeme eke January 15, 2010, page 16-20, nnyịn ima idọhọ mme ete ye eka ẹsinanam ye nditọ mmọ se ikemede nditịbe ke ufọkn̄wed. Ibuotikọ emi etịn̄ nsio nsio usụn̄ oro mbufo ẹkemede ndida ntịm nditọ mbufo idem nnọ nsio nsio afanikọn̄ oro mmọ ẹdisobode ke ufọkn̄wed. Ẹmekeme ndinanam se inemede mi ye nditọ mbufo ke mbubreyo oro ẹsinịmde Utuakibuot Ubon.

NDITỌWỌN̄ emi ẹdide Mme Ntiense Jehovah ẹsisobo ediwak afanikọn̄. Nditọ ufọkn̄wed mmọ ẹsibụp mmọ ntak emi mmọ mîtieneke ibuana ke ndusụk edinam nte edidian ubọk n̄kọm ọfọn̄ etakubom, usọrọ usen emana, ye mme edinam ini nduọkodudu. Edieke ẹbụpde eyen fo utọ mbụme emi, nso ke enye edibọrọ?

Ndusụk nditọwọn̄ emi ẹdide Christian ẹsibọrọ ibio ibio ẹte: “N̄kemeke ndinam utọ n̄kpọ oro. Nnyịn isinamke emi ke ido ukpono nnyịn.” Ẹkpenyene nditoro utọ nditọwọn̄ emi ke nsọn̄ọnda mmọ. Ndibọrọ ntem ekeme ndinam owo ibụpke mmọ aba mbụme. Edi Bible ọdọhọ “[iben̄e] idem kpukpru ini ndibọrọ owo ekededi” emi oyomde ndifiọk ntak emi inịmde se inịmde ke akpanikọ. (1 Pet. 3:15) Ndibọrọ, “N̄kemeke ndinam utọ n̄kpọ oro” inọhọ owo ntak emi nnyịn mînamke n̄kpọ. Idem ọkpọkọm ndusụk owo inyịmeke se itịn̄de, ndusụk ẹyema ndifiọk m̀mê se inamde enyene ntak.

Ediwak uyen ẹsida utọ n̄wed nte Kpep N̄kpọ to Akwa Andikpep ẹbụk mbụk Bible ẹnọ nditọ ufọkn̄wed mmọ. Mme mbụk emi ẹkeme ndiwụt ntak emi mme uyen emi ẹdide Mme Ntiense ẹsinamde n̄kpọ m̀mê ẹsitrede ndinam n̄kpọ. Ndusụk nditọ ufọkn̄wed ẹsinen̄ede ẹma ndikpan̄ utọn̄ n̄kop mme mbụk Bible emi, ndien ntre ke ẹsitọn̄ọ ediwak ukpepn̄kpọ Bible. Edi mmọ eken isikemeke nditie n̄kpan̄ utọn̄ n̄kop ofụri mbụk kiet mma. Ndusụk mbụk Bible isisọpke in̄wan̄a n̄kpri nditọ ufọkn̄wed ibọhọke ẹnen̄ede ẹtat mme mbụk emi. Ke ini ẹkekotde Minhee emi edide isua 11 usọrọ usen emana, enye ama ọdọhọ ufan esie ete: “Bible idọhọke isinam usọrọ usen emana. Ke utọ itie usọrọ ntem ke ẹkebịghi John Andinịm Owo Baptism ibuot.” Minhee ọdọhọ ke etie nte ofụri se iketịn̄de ikan̄wan̄ake ufan imọ.

Ndusụk ini, esifọn ndiwụt ekemmọ eyen ufọkn̄wed ndise, m̀mê mbụk Bible ke n̄wed nnyịn. Nso ke nditọ nnyịn ẹkpenam edieke ikpọ owo ufọkn̄wed ẹdọhọde owo ndomokiet okûda n̄wed ido ukpono ekededi edineme nneme ye nditọ ufọkn̄wed? Ndi nditọ nnyịn ẹkpekeme ndisụk nnọ ikọ ntiense uforo uforo kpa ye mîkamake n̄wed nnyịn? Didie ke afo ekeme ndin̄wam eyen fo ọdiọn̄ọ se akpanamde?

Nanam ye Mmọ Se Ekerede ke Ekeme Nditịbe

Ekeme ndin̄wam edieke mme ete ye eka ẹnamde nte idi nditọ ufọkn̄wed. Nte nditọ ẹdomode nditịn̄ ikọ n̄wụt se mmimọ inịmde ke akpanikọ, mme ete ye eka ẹkpenyene nditoro mmọ ke ukeme oro mmọ ẹsịnde nnyụn̄ n̄wụt mmọ nte ẹkpenamde  ọfọn akan oro, ye ntak ọfọnde ndinam ntem. Ke uwụtn̄kpọ, emekeme ndidọhọ mmọ ẹsitịn̄ ikọ oro edisọpde in̄wan̄a mme ubọkn̄ka mmọ. Joshua emi edide eyen isua usụkkiet ọdọhọ ke nditọ ufọkn̄wed mmimọ idiọn̄ọke se “ubieresịt” ye “nsọn̄ọnda” ẹdide. Ntre, enye ekenyene nditịn̄ ikọ oro ọsọpde an̄wan̄a mmọ.—1 Cor. 14:9.

Ke ini nditọ ufọkn̄wed ẹbụpde mbụme, ndusụk mmọ isimaha ọkpọsọn̄ ukwọrọikọ. Edi edieke mme uyen emi ẹdide Mme Ntiense ẹnemede nneme ẹnyụn̄ ẹkọkde ibuot ye mmọ, emi ekeme ndinam mmọ ẹnyene udọn̄. Haneul ekpri n̄kaiferi isua duop ọdọhọ ete, “Nditọ ufọkn̄wed nnyịn ẹma nneme, imaha ukpepn̄kpọ.” Bụp mbụme edieke oyomde mmọ ẹtiene ẹsịn uyo ke nneme, ekem nen̄ede kpan̄ utọn̄ kop se mmọ ẹtịn̄de.

Se itienede emi owụt nte nditọ nnyịn ẹkpekọkde ibuot ye nditọ ufọkn̄wed mmọ. Ufọn idụhe ndimụm se iwetde mi ndọn̄ ke ibuot, sia owo idịghe ukem. N̄ko, nsio nsio idaha ẹkeme ndiyom ẹnọ nsio nsio ibọrọ. Mmọdo, akpana uyen emi edide Ntiense enyene se ẹnemede mi  ke ekikere, emen enye etịn̄ ke ikọ idemesie nte ekemde ye se enye osobode ye nte nditọ ufọkn̄wed mmọ ẹnamde n̄kpọ. Edieke enyenede nditọ ke ufọkn̄wed, mbọk tie ye mmọ nam se idude ke ekebe emi.

Esida ini ye ukeme ndinọ nditọ ukpep. Mme ete ye eka emi ẹdide mme Christian ẹkpenyene ndikpep nditọ mmọ mme edumbet Bible nnyụn̄ n̄kpek mmọ ẹda mme edumbet emi ẹdu uwem.—Deut. 6:7; 2 Tim. 3:14.

Domo ndinam se itịn̄de emi ye nditọ fo mbubreyo en̄wen emi ẹdinịmde Utuakibuot Ubon. Se nte oro edin̄wamde mmọ. Ti ete ke owo idọhọke ẹmemụm mme ikọ emi ẹdọn̄ ke ibuot. Ke akpanikọ, ẹmekam ẹkeme ndinam emi ediwak ini, ẹnọ nsio nsio ibọrọ ẹnyụn̄ ẹse nte nditọ mbufo ẹdinamde n̄kpọ. Nte mmọ ẹdomode nditịn̄ ntak emi inịmde n̄kpọ ke akpanikọ, n̄wam mmọ ẹfiọk nte ẹkpekọkde ibuot ẹnyụn̄ ẹnyenede mbufiọk. Nte ini akade, nditọ fo ẹyefiọk se ẹkpebọrọde owo ekededi oro obụpde se mmọ ẹnịmde ke akpanikọ, edide eyen ufọkn̄wed mmọ, m̀mê mbọhọidụn̄, m̀mê mme andikpep.

[Ekebe/Mme Ndise ke page 4]

USỌRỌ USEN EMANA

Monica: Sam, idịghe eyedi usọrọ usen emana mi?

Sam: Mbọk amanam etieti nditi utọ owo nte ami. Edi yak mbụp fi ise, ‘Ntak emi oyomde ndinam usọrọ usen emana fo?’

Monica: Nyom ndisịn usọrọ nda nti usen emi n̄kamanade. Ndi usunamke okwo?

Sam: Baba-o, nsinamke.

Monica: Ntak-a? Ubon nnyịn ẹma ẹkop inemesịt ini n̄kamanade.

Sam: Ọwọrọ ubon mbufo onyụn̄ etie nte eke nnyịn. Ubon nnyịn ẹma ẹkop inemesịt n̄ko ke ini n̄kamanade. Edi n̄kereke ke n̄kpenyene ndisịn usọrọ kpukpru isua ke ntak oro. Ke ini ẹnamde usọrọ usen emana, ekese owo oro ẹnamde usọrọ emi ẹnọ ẹsikere ke mmimọ idi n̄kpọ ikan ke itie usọrọ oro. Edi ndi ukereke ke Abasi akam edi n̄kpọ akan owo? Mmọdo, ndi nnyịn ikpakam ikọmke enye ke ndikọnọ nnyịn uwem?

Monica: Ndi ikọ fo ọwọrọ ke ikpanaha nnam usọrọ usen emana mi?

Sam: Afo enyene ndibiere enye oro. Edi kere ise. Ediwak owo ẹsima ndibọ enọ usen emana, edi Bible ọdọhọ ke owo oro ọnọde owo n̄kpọ okop inemesịt akan owo emi ọbọde-bọ. Mmọdo, utu ke nditie n̄kere mban̄a idem nnyịn kpọt ke usen emana nnyịn, ndi nnyịn ikpakam idaha ifet oro ikọm Abasi, ikere iban̄a mbon en̄wen, inyụn̄ inam nti n̄kpọ inọ mmọ?

Monica: Ọmọdiọn̄ọ ke akanam n̄kereke-kere n̄kpọ n̄ka afan̄ oro. Edi ndi oro ọwọrọ ke ete ye eka fo isinọhọ fi enọ ndomokiet?

Sam: Ẹsinọ. Edi mmọ isibetke tutu esịm usen emana mi mbemiso ẹnọde mi n̄kpọ. Mmọ ẹsinọ mi n̄kpọ ini ekededi oro mmọ ẹmade. Yak kan̄a ise, ndi akpama ndifiọk nte usọrọ usen emana ọkọtọn̄ọde?

Monica: Mbọk tịn̄ nọ mi ekpedi ọmọfiọk.

Sam: Ọfọn, n̄kpọn̄ nyobụk mbụk usọrọ usen emana oro ẹkenamde ata anyan ini ko nnọ fi.

EDIKỌM ỌFỌN̄ ETAKUBOM

Eme: Offiong, ntak emi mûsudianke ubọk ke n̄kan̄, ke ikpanesịt, m̀mê ke iso ukọm ọfọn̄ etakubom-o?

Offiong: Sọsọn̄ọ etieti ke ndiyom ndifiọk ntak. Edi mbọk yak mbụp fi ise, ‘Ntak emi afo esinamde oro?’

Eme: Sia mmama idụt nnyịn.

Offiong: Amama eka fo, n̄kọ ntre? Ntak emi mûsudianke-dian ubọk ke n̄kan̄ m̀mê ke iso ukọm enye?

Eme: Mm, mfiọkke, edi nsikọm ọfọn̄ etakubom ntre ndiwụt ke mmokpono enye. Ndi unyeneke ukpono unọ ọfọn̄ etakubom?

Offiong: Mmenyene. Edi ndi imesidian ubọk ke n̄kan̄ m̀mê ke iso ikọm kpukpru owo m̀mê kpukpru n̄kpọ emi ikponode?

Eme: Afo emenen; mmokpono andikpep nnyịn, edi nsidianke ubọk ke n̄kan̄ m̀mê ke iso n̄kọm enye. Ọfọn, yak ndọhọ ke mfiọkke ntak emi nsikọmde ọfọn̄ etakubom ntre.

Offiong: Eme, ediwak owo ẹda ọfọn̄ etakubom nte n̄kpọ emi adade aban̄a idụt mmọ. Mmọdo, ndidian ubọk ke n̄kan̄, ke iso, m̀mê ke ikpanesịt n̄kọm enye ọwọrọ ke mmọ ẹben̄e idem ndinam n̄kpọ ekededi nnọ idụt mmọ. Edi ami n̄kemeke ndinam oro. N̄kemeke ndiyak uwem mi nnọ idụt nnyịn sia Abasi ọkọnọ mi uwem. Mbiere ndiyak uwem mi nnọ Abasi. Ke ntre, okposụkedi emi n̄kponode ọfọn̄ etakubom idụt nnyịn, n̄kemeke ndidian ubọk ke n̄kan̄ m̀mê ke iso n̄kọm enye.

Eme: Ikọ fo an̄wan̄a mi do ndien.

Offiong: Nte ededi, mmokop inemesịt nte adade nneme emi edi. N̄ko, okpoyom ndifiọk ntak emi nnamde n̄kpọ m̀mê ntak emi mmenamke n̄kpọ, mbọk di dibụp mi. Edi yak kan̄a ise; ọmọfiọk ke Bible ọdọhọ ke edidem Babylon ke eset ama ọdọhọ kpukpru owo ẹnụhọ ẹnọ mbiet. Ndusụk owo ikamaha ndinụhọ, kpa ye oro ẹkedọhọde ke ẹyewot owo ekededi emi mînụhọke.

Eme: Etịn̄ akpanikọ? Mbọk nso iketịbe inọ mmọ?

Offiong: Nyetịn̄ nnọ fi ke ini mbre-udia.

MBRE UKARA NDITỌ UFỌKN̄WED

Asukwo: Eyo, ekere ke anie ikpedi adaibuot ubet ukpepn̄kpọ nnyịn?

Eyo: Ndaha nnọ owo ndomokiet.

Asukwo: Ntak-a?

Eyo: Mmenyenyene adausụn̄ oro ọfọnde akan kpukpru mme adausụn̄. Ami ndi Christian, ntre mmọn̄wọn̄wọn̄ọ nditiene Jesus. Ntak edi oro mmen̄kemeke ndimek adausụn̄ en̄wen. Edi ndi ọmọfiọk ntak emi n̄kerede ke Jesus edi adausụn̄ oro mînyeneke mbiet?

Asukwo: Mfiọkke, nnyụn̄ nyomke ndifiọk.

Eyo: Ọfọn, ini ekededi oro oyomde ndifiọk, nyokop inemesịt nditịn̄ nnọ fi.

[Ndise]

“Sam, idịghe eyedi usọrọ usen emana mi?”

[Ndise ke page 3]

‘Ntak emi mûsudianke ubọk ukọm ọfọn̄ etakubom-o?’