Mbaʼépa heʼíne nde raʼykuéra?

TUVAKUÉRA: Ñemañaha 15 de enero de 2010-pe (páhina 16-20) osẽkuri peteĩ artíkulo penemokyreʼỹva peñensaja hag̃ua pene família ndive. Ko artíkulo katu penemboʼéta pehekomboʼe hag̃ua chupekuéra ikatu hag̃uáicha ombohovái umi mbaʼe ijetuʼúva mboʼehaópe. Iporãta peñensajáramo pejapo jave Aty Jastudia Hag̃ua Ñande Rogayguándi.

UMI mitã oservíva Jehovápe ogueropuʼakavaʼerã heta mbaʼe ijetuʼúva mboʼehaópe. Pyʼỹinte iñirũnguéra oporandu mbaʼérepa ndopurahéiri himno nacional, ha ndofestehái kumpleáño térã ambue arete. Mbaʼépa nde ere ombohováine hag̃ua nde raʼykuéra?

Oĩ heʼítava: “Che ndaikatúi. Che rrelihiónpe ndojejapói umíva”. Jaguerohory koʼãichagua mitã ndohejáiva ipuʼaka hese hapichakuéra. Ikatu péicha noñeporanduvéima chupe mbaʼeve. Péro la Biblia heʼi tekotevẽha ‘ñaime ñambohovái hag̃uáicha umi oporandúvape’ ha ñamyesakã mbaʼérepa jaguerovia peteĩ mbaʼe (1 Ped. 3:15). Upévare ndahaʼeivaʼerã pe mitã heʼínteva: “Che ndaikatúi”, ha opa upépe. Oĩramo jepe nohenduséiva chupe, oĩta avei oikuaasevéva mbaʼérepa haʼe ndojapói umi mbaʼe.

Oĩ mitã oiporúva Ñaaprende Mboʼehára Guasúgui ha ambue puvlikasión omyesakã hag̃ua iñirũnguérape mbaʼérepa ojapo térã ndojapói peteĩ mbaʼe. Oĩ umi oñatendéva hesekuéra ha upe rire oñepyrũ ostudia la Biblia. Oĩ avei umi pyaʼe ikueráiva ha nopenavéima upe ojeʼévare. Hiʼarive Bíbliape oĩ heta párte hasýva mitã ontende hag̃ua ha tekotevẽ oñemyesakã chupekuéra. Jahechamína mbaʼépa oiko peteĩ mitãkuñaʼíre hérava Minhee. Peteĩ iñirũ oinvitárõ guare chupe ikumpleañorã haʼe ombohovái: “La Bíbliape ndeʼiriete jafestehavaʼerãha ñane kumpleáño. Nde piko ndereikuaái Juan Bautístape ojejuka hague peichahápe?”. Mbaʼépa oiko upe rire? Pe mitãkuñaʼi nontendéi Minhee heʼíva.

Jaʼekuaa ideprovechoitereiha ñane puvlikasionkuéra. Péro oĩ mboʼehára ndohejáiva hemimboʼekuéra ogueraha lívro oñeʼẽva rrelihiónre ohechauka hag̃ua iñirũnguérape. Upéicha jave, ikatúnepa nde raʼykuéra omyesakã umi livroʼỹre upe ogueroviáva? Mbaʼéichapa reipytyvõkuaa chupekuéra oñeʼẽ hag̃ua ijeroviáre?

Peñensajákena

Tekotevẽ peñensaja hendivekuéra ha upearã peẽ tuvakuéra ikatu peiko iñirũnguéraramo. Peñatende mbaʼéichapa umi mitã oñeʼẽ ijeroviáre ha peguerohory chupekuéra. Pejekuaa pene famíliape mbaʼéichapa ikatu omyesakã porãve umi mbaʼe oñeporandúva ha mbaʼérepa péicha osẽ porãvéta. Peje avei pende raʼykuérape toiporu umi ñeʼẽ ndahasýiva oñentende hag̃ua. Pór ehémplo peteĩ mitãʼi hérava Joshua orekóva 9 áño  heʼi iñirũnguéra ndoikuaaiha mbaʼépa heʼise pyʼapy ñeʼẽ ha jeroviaha. Upémarõ haʼe oiporu ambue ñeʼẽ oñemongeta hag̃ua hendivekuéra (1 Cor. 14:9).

Ikatu avei peteĩ mitã ombaʼeporandu ne famíliape, péro pyaʼe ikuerái ipukuetereírõ oñembohováiva chupe. Mbaʼépa ojapokuaa upéicha jave? Nde raʼykuéra oñemongetáramo iñirũndi, ha heʼi umi mbaʼe omopensavaʼerã chupe, omokyreʼỹta hapichápe oñatende hag̃ua hese. Péicha ojapo Haneul, peteĩ mitãkuñaʼi orekóva 10 áño. Haʼe heʼi: “Che irũnguéra oñeʼẽse avei, nohenduséi peteĩnte oñeʼẽ memérõ”. Pene família oñemongeta porãséramo hapichándi, tekotevẽ ombaʼeporandu chupe ha upéi ojapysaka heʼívare.

Koʼág̃a jahecháta mbohapy mbaʼe ikatúva oñeporandu jepi umi mitãme. Natekotevẽi oikuaapa de memória hikuái. Jaikuaaháicha umi mitã idiferénte opensa lája. Koʼã ehémplo rupive ne família oikuaátama  mbaʼéichapa ombohovaivaʼerã tahaʼe haʼéva upe oñeporandúva chupekuéra. Perekóramo mitã ohóva eskuélape ikatu peiporu koʼã ehémplo peñensaja hag̃ua hendivekuéra.

Añetehápe ijetuʼu pehekomboʼe pene famíliape ha tekotevẽ peñemotiémpo upearã. Péro peñehaʼãvaʼerã pemboʼe chupekuéra mbaʼépa heʼi la Biblia ha mbaʼérepa iporã akóinte iñeʼẽrendu (Deu. 6:7; 2 Tim. 3:14).

Ág̃a pejapo vove Aty Jastudia Hag̃ua Ñande Rogayguándi peñensajami ko rrekuádrope oĩva, ha pehecháta mbaʼéichapa ideprovécho. Péro penemanduʼáke ndahaʼeiha umi mitã oaprende hag̃ua de memória. Iporãta peñensaja heta vése ha pekambiaʼimi jepi umi mbaʼe pejéva jahecha mbaʼéichapa ombohovái hikuái. Peipytyvõkena chupekuéra pyʼaguapýpe omyesakã hag̃ua ogueroviáva. Péicha pehecháta koʼẽrõite haʼekuéra opredikatamaha ndahaʼéi iñirũnguérapente síno avei imboʼehára ha ivesinokuérape.

[Taʼanga ha rrekuádro oĩva páhina 4-pe]

UMI KUMPLEÁÑO

María: Juan, afestehatahína che kumpleáño ha aipota reju.

Juan: Grásiamante cheinvita haguére. Péro eremína chéve, mbaʼére piko nde refesteha ne kumpleáño?

María: Eʼa, ha enterove ningo ofesteha! Nde piko nderefestehái mbaʼe?

Juan: No, che ndafestehái.

María: Ha mbaʼére piko? Che tuvakuéra ovyʼaiterei che anasérõ guare.

Juan: Ha che tuvakuéra ningo ovyʼánte avei. Péro ndahaʼéi upe haguére rojapóva voi peteĩ fiésta. Reikuaápa, heta vése oñembojeroviaiterei pe ikumpleáñovape ha opensáma voi haʼe tuichaiterei mbaʼeha. Péro Ñandejárape añoite ñamombaʼevaʼerã ha chupe jaagradesevaʼerã jaikove haguére.

María: Mbaʼe piko la eréva? Anichéne ere ndovaleiha afesteha che kumpleáño.

Juan: Upévako Mari ndémante reikuaáta. Ha oiméne katuete rehecha mbaʼéichapa entéronte oipota umi rregálo, péro la Biblia heʼi javyʼaveha ñande ñameʼẽrõ ñande rapichápe. Mbaʼépa nde ere? Iporãvépa ñapensa mbaʼépa ojerregaláta ñandéve, térãpa iporãve jaagradese Ñandejárape ha ñaipytyvõ ñande rapichápe?

María: Che napensáiva voi koʼã mbaʼére. Upéicharõ piko nde tuvakuéra nanderregalái voi mbaʼeve?

Juan: Cherregala ningo, péro nohaʼarõi og̃uahẽ raẽ che kumpleáño upearã, oimeraẽ árantema ogueru chéve. Ha koʼág̃a eremi chéve Mari, ndépa reikuaa mbaʼépa ojejapo yma umi kumpleañohápe?

María: Ndaikuaái.

Juan: Upéicharõ koʼẽrõ amombeʼúta ndéve mbaʼépa oikovaʼekue yma peteĩ kumpleañohápe.

HIMNO NACIONAL

Gisela: Carla, mbaʼére piko nde nderepurahéiri voi pe himno?

Carla: Iporãite ko reporandúva chéve. Péro, mbaʼérepa nde repurahéi?

Gisela: Ha chéngo ahayhu ñane retã.

Carla: Ha upévako ndaivaíri. Péro umi ótro tetã ningo iporãnte avei, ajépa?

Gisela: Heẽ, iporã avei.

Carla: Amoĩta ndéve peteĩ ehémplo: nde rehayhu nde sýpe, ajépa? Ha reñemboʼýpa henondépe káda día ha repurahéi chupe?

Gisela: Nahániri. Péro enterovénte opurahéi pe himno ha che upévarente apurahéi avei.

Carla: Ha ndépa reikuaa mbaʼérepa heta tapicha opurahéi pe himno? Ojapo openságui hetã iporãveha umi ótrogui, ha oĩ voi omano hag̃uáicha hesehápe. Péro che napensái upéicha. Ñandejára rupi ñande jaikove ha upévare che ameʼẽse chupe che rekove, ndahaʼéi peteĩ tetãme. Upévare ndapurahéiri pe himno.

Gisela: Heẽ, antendéma.

Carla: Avyʼa reporandu haguére chéve. Ág̃a oĩrõ ambue mbaʼe reikuaaséva, eporandu jeýnte chéve. Reikuaápa, Bíbliape oñemombeʼu yma peteĩ rréi ojapouka hague peteĩ estátua ha heʼi entéro umi hénte oñesũvaʼerãha henondépe. Ha oĩramo ndojaposéiva upéva pe rréi heʼi ojejuka hag̃ua.

Gisela: Añete piko ere! Ha mbaʼe oiko?

Carla: Koʼẽrõ amombeʼúta ndéve rrekréope.

UMI VOTASIÓN OJEJAPÓVA MBOʼEHAÓPE

Miguel: Diego, mbaʼére nereñekandidatái presidenterã? Chéverõ g̃uarã nde reikoitéta cheraʼa.

Diego: Grásia chamígo, péro che ndaikatumoʼãi.

Miguel: Ha mbaʼére piko?

Diego: Che astudia la Biblia ha añehaʼã ahaʼanga Jesúspe, ha haʼe arakaʼeve ndoikeivaʼekue mbaʼeveichagua eleksiónpe. Reikuaápa mbaʼérepa?

Miguel: No, ha ndaikuaaséi.

Diego: Vuéno, péro ág̃a reikuaasérõ ikatu reñemboja cherendápe ha amombeʼúta ndéve reikuaasemíva.

[Taʼanga]

“Afestehatahína che kumpleáño ha aipota reju”

[Nóta oĩva taʼanga ndive páhina 3]

“Mbaʼére piko nde nderepurahéiri pe himno?”