Eme Ọmọ Ra Ọ te Ta?

ESẸGBINI: Ma jọ Uwou-Eroro mai orọ January 15, 2010, ẹwẹ-obe avọ 16-20 ta udu họ owhai esẹgbini awọ inọ wha ru idhesẹvia kugbe emọ rai kpahe iyero nọ emọ na e be hae nyaku. A jọ uzoẹme nana kẹ iroro-ejẹ sa-sa nọ i ti fi obọ họ kẹ owhai ruẹrẹ emọ rai kpahe kẹ ebẹbẹ nọ a rẹ nyaku evaọ obọ isukulu. Wha sae rọ iroro-ejẹ nana ru idhesẹvia evaọ etoke Uwuhrẹ Ebaibol Uviuwou rai.

EMỌ nọ e rrọ Isẹri Jihova a be rẹriẹ ovao dhe ise-abọ buobu. Ẹsibuobu, ibe emọ-isukulu rai e rẹ nọ ae oware nọ o soriẹ nọ a gbe bi kuomagbe ai ru eghẹrẹ eware jọ họ, wọhọ oriruo, uzou nọ a re go kpotọ kẹ obiala, ehaa ẹdeyẹ, gbe iruẹru efa nọ i wobọ kugbe edẹ-eriosehọ orẹwho. Otẹrọnọ a nọ ọmọzae hayo ọmọtẹ ra onọ kpahe iruẹru itieye na, didi uyo ọ te kẹ?

Emọ mai jọ a kuyo no inọ: “Mẹ rẹ sai ru oyena ha. Onana o wọso egagọ mẹ.” Ma re jiri emọ itieye na kẹ aruọwha nọ a bi ro dikihẹ kẹ orọwọ rai. Uyo utioye na o rẹ sai ru ibe emọ-isukulu rai kpairoro vrẹ enọ efa nọ a hae nọ. Dede na, Ebaibol e ta udu họ omai awọ nọ ma ‘thomavẹrẹ re ma ta ẹkẹunu mai kẹ k’ohwo k’ohwo nọ o se omai re ma gbiku’ ẹrọwọ mai kẹe. (1 Pita 3:15) Ere oruo u vi ẹta nọ ma rẹ ta ọvo inọ, “Mẹ rẹ sai ru oyena ha.” Nọ amọfa a gbẹ make rọwo kugbe ẹjiroro nọ ma kẹ hẹ, o sae were otujọ re a riẹ oware nọ ma gbe bi kuomagbe ai ru eware jọ họ.

Izoge Isẹri Jihova buobu a rehọ ebe wọhọ Wuhrẹ Mi Owuhrẹ Ologbo Na ro gbiku Ebaibol kẹ ibe emọ-isukulu rai no. Ikuigbe Ebaibol nana i re fi obọ họ kẹ ahwo riẹ oware nọ o soriẹ nọ emọ Isẹri Jihova a bi ro ru oghẹrẹ eware jọ hayo siọ eware jọ ba eru. Emọ-isukulu jọ a rẹ gaviezọ ziezi kẹ ikuigbe Ebaibol, yọ emọ Isẹri Jihova a rehọ edhere nana mu uwuhrẹ Ebaibol họ kugbe ibuobu rai no. O rẹ sae jọ oware ehoo kẹ emọ isukulu jọ re a gaviezọ kẹ ikuigbe Ebaibol jọ no emuhọ te ekuhọ. A gbẹ roma totọ ru ikuigbe Ebaibol jọ vẹ hẹ, o rẹ sae jọ bẹbẹ kẹ emọ-isukulu re a wo otoriẹ rai. Nọ ogbẹnyusu riẹ jọ o zizie ọmọtẹ ikpe ikpegbọvo jọ nọ ọ rrọ omọvo Isẹri Jihova nọ a re se Minhee kẹ ehaa ẹdeyẹ, Minhee ọ ta kẹ ogbẹnyusu riẹ na nọ: “Ebaibol e ta kẹ omai hi inọ ma ru ehaa ẹdeyẹ. Evaọ ehaa ẹdeyẹ a jọ kpe Jọn Ọhọahwo-Ame nọ a gbiku riẹ evaọ Ebaibol na.” Dede na, wọhọ epanọ Minhee ọ ta uwhremu na, ọ ruẹ inọ o wọhọ nọ ogbẹnyusu riẹ na o wo otoriẹ uyo nọ ọ kẹ na ha.

Evaọ ẹsejọ, u re fi obọ họ re a jọ obe mai jọ dhesẹ uwoho hayo ikuigbe na kẹ ibe ọmọ-isukulu. Kọ ẹvẹ otẹrọnọ enọ i wuzou isukulu a kuvẹ hẹ re emọ e jọ isukulu na dhesẹ ebe egagọ kẹ ibe emọ-isukulu rai? Kọ emọ mai a sai se isẹri ziezi ababọ eroruiruo ebe mai? Ẹvẹ whọ sai ro fi obọ họ kẹ emọ ra ta ẹkẹunu rai rọ thọ ẹrọwọ rai?

Ru Idhesẹvia Kugbe Emọ Na

Idhesẹvia nọ wha re ru kugbe evaọ obọ uwou u re fi obọ họ; esẹgbini a rẹ sai ru wọhọ ẹsenọ ae omarai a rrọ ibe emọ-isukulu nọ e be nọ emọ na enọ. Nọ emọ na e be daoma thọ ẹrọwọ rai na, o gwọlọ nọ esẹgbini a re jiri ai je dhesẹ oghẹrẹ nọ a sai ro ru uyo rai woma viere gbe oware nọ onana o rọ r’oja. Wọhọ  oriruo, ta kẹ ae inọ a hae ta eme nọ ehwa rai nọ a gbẹ rrọ isukulu a rẹ sai wo otoriẹ rai. Joshua, nọ ọ rrọ ikpe izii, ọ ta nọ ibe emọ-isukulu riẹ a wo otoriẹ eme wọhọ “obroziẹ-iroro” gbe “ọtẹruo” ho. Onana o soriẹ nọ ọ be hae rọ rehọ eme elọlọhọ ro lele ai ta ẹme.—1 Kọr. 14:9.

Nọ uyo nọ whọ be kẹ u te theri hrọ, o rẹ sai ru nọ emọ-isukulu jọ nọ e nọ onọ fihotọ a gbe wo isiuru kpahe ẹme na ha. Ẹkwoma ẹme na nọ a re ro lele ai jiroro jẹ nọ ae ẹkẹ unu rai, emọ Isẹri Jihova e rẹ sae rọ enẹ ru emọ na ruabọhọ isiuru rai. Haneul, ọmọtẹ nọ ọ rrọ ikpe ikpe, ọ ta nọ, “Ẹmeọta-kugbe o rẹ were ibe emọ-isukulu mẹ, orọnikọ ẹme nọ whọ rẹ rehọ ae keria ta kẹ hẹ.” Ẹmeọta-kugbe o gwọlọ nọ ohwo ọ rẹ nọ enọ, kẹsena ọ vẹ gaviezọ nọ ọdekọ ọ be ta iroro riẹ na.

Ẹmeọta-kugbe nọ a ruẹrẹhọ obotọ na u dhesẹ epanọ emọ Ileleikristi a sae rọ rehọ Ebaibol na lele ibe emọ-isukulu rai jiroro. U du gwọlọ nọ emọ i re fi eme nana họ uzou re a hae wariẹ ae ẹsikpobi hi—emaha i wo ohẹriẹ no ohwohwo, yọ uyo nọ u re kiehọ uyero jọ o rẹ sai wo ohẹriẹ no ofa. Fikiere, o gwọlọ nọ emọ Isẹri Jihova a re wo otoriẹ eme na, zihe ae ruọ eme obọrai, kẹsena  a vẹ tae evaọ edhere nọ u kiehọ uyero na gbe ibe emọ-isukulu rai. Who te wo emọ nọ e rrọ isukulu, rehọ ẹmeọta-kugbe nana ru idhesẹvia kugbe ai.

Re a wuhrẹ emọ, o gwọlọ oke gbe iruo egaga. Eyewọ Ileleikristi a rẹ rọ ehri-izi Ebaibol wuhrẹ emọ rai, je fi obọ họ kẹ ae ruẹ oware nọ u ro fo re a rria lele ehri-izi eyena.—Izie. 6:7; 2 Tim. 3:14.

Evaọ etoke Uwuhrẹ Ebaibol Uviuwou rai notha, daoma rehọ ẹmeọta-kugbe nọ ọ rrọ ẹwẹ-obe nana ru idhesẹvia kugbe emọ ra. Ruẹ epanọ onana o rẹ sai gine fi obọ họ te. Kareghẹhọ inọ orọnikọ utee na họ re a fi eme na họ uzou re a hae wariẹ ae ẹsikpobi hi. Wha sae tubẹ rehọ uyero ovona ru idhesẹvia unuẹse buobu, re a kẹ iyo sa-sa evaọ onọ ovona, rọ ere ruẹ epanọ emọ ra a te rọ rehọ idhere obọrai kẹ uyo na. Nọ a be daoma dhesẹ orọwọ rai vevẹ na, fi obọ họ kẹ ae wuhrẹ epanọ a rẹ rọ ma ẹme rai te ziezi, je dhesẹ orimuo. Nọ wha bi dhe onana erueruo na, wha ti fi obọ họ kẹ emọ rai riẹ epanọ a sae rọ thọ ẹrọwọ rai evaọ aro ibe emọ-isukulu rai, egbẹrioma, gbe iwuhrẹ rai.

[Ẹkpẹti/Iwoho nọ e rrọ ẹwẹ-obe avọ 4]

EHAA ẸDEYẸ

Meri: Jọn, mẹ gwọlọ nọ whọ nyaze ehaa ẹdeyẹ mẹ.

Jọn: Me yere owhẹ ziezi Meri, nọ who ro zizie omẹ. Kọ mẹ sae nọ owhẹ oware nọ o soriẹ nọ whọ rọ gwọlọ ru ehaa ẹdeyẹ ra?

Meri: Mẹ be rehọ iẹe ghọghọ rọ kareghẹhọ ẹdẹ nọ a yẹ omẹ. Kọ who re ru ehaa rọ kareghẹhọ ẹdẹ nọ a yẹ owhẹ?

Jọn: Ijo, me re ru hu.

Meri: Fikieme who gbe ru hu? Ahwo uviuwou mẹ a ghọghọ okenọ a ro yẹ omẹ.

Jọn: Ere ahwo uviuwou mẹ re. Rekọ me roro nọ oyena o rẹ whae ze nọ me je ru ehaa k’ukpe k’ukpe he. Evaọ ehaa ẹdeyẹ rai, ahwo buobu a re bru ọghọ họ omarai thesiwa. Kọ ogbẹrọnọ Ọghẹnẹ ọvo o te Ọnọ a rẹ kẹ orro utioye na?

Meri: Kọ whọ be ta nọ mẹ siọ ehaa ẹdeyẹ mẹ ba eru?

Jọn: Meri, whẹ ọvo ọ rẹ jẹ iroro yena kẹ omara. Rekọ mẹ gwọlọ nọ who roro kpahe onana. Ahwo buobu a rẹ gwọlọ nọ amọfa a kẹ ae ekẹ evaọ ehaa ẹdeyẹ rai, rekọ Ebaibol e ta nọ ẹkẹ evawere e mae rrọ vi emio. Ukpenọ ma rẹ rehọ ẹdẹjọ wọhọ ẹdeyẹ nọ ma re ro bru ọghọ họ omamai, kọ o gbẹ mai fo re ma hai yere Ọghẹnẹ kẹdẹ kẹdẹ, roro kpahe amọfa je ru ewoma kẹ ae?

Meri: Me ri ti roro kpahe oyena vievie he. Kọ whọ be ta nọ ọsẹgboni ra a be hae kẹ owhẹ ekẹ hẹ?

Jọn: A be hae kẹ omẹ ekẹ. Rekọ a rẹ hẹrẹ bọo ẹdeyẹ mẹ tao ho. Oke kpobi nọ u no rai eva ze a rẹ kẹ omẹ okẹ. Rekọ, Meri hẹrẹ tao, kọ o te were owhẹ re whọ riẹ epanọ ehaa ẹdeyẹ i ro muhọ?

Meri: Kọ whọ sae vuẹ omẹ?

Jọn: U woma, odẹnotha me ti gbiku jọ kẹ owhẹ kpahe ehaa ẹdeyẹ jọ nọ a ru oke lelehie nọ u kpemu.

EYERE OBIALA

Elo: Komẹ, fikieme whọ gbẹ be hae rọ nyawo kẹ obiala ha?

Komẹ: Elo, me yere owhẹ ziezi nọ whọ rọ nọ omẹ. Whaọ, mẹ gwọlọ nọ whọ vuẹ omẹ oware nọ o soriẹ nọ whẹ omara whọ be rọ nyawo kẹ obiala.

Elo: Fikinọ me you orẹwho mẹ.

Komẹ: Elo, ababọ avro, mẹ riẹ nọ who you oni ra. Kọ whọ rẹ nyawo kẹ oni ra ro yere iei?

Elo: Ere? Whaọ, fikiọ adhẹẹ nọ me wo kẹ obiala oye o soriẹ nọ mẹ be rọ nyawo kẹ obiala. Kọ who wo adhẹẹ kẹ obiala?

Komẹ: Ee. Rekọ j’omẹ nọ owhẹ onọ jọ, Kọ ma rẹ nyawo kẹ ohwo kpobi gbe oware kpobi nọ ma wo adhẹẹ kẹ?

Elo: Uzẹme whọ ta na, me wo adhẹẹ kẹ iticha mai, rekọ mẹ rẹ nyawo kẹe he. Obọnana, o wọhọ nọ mẹ gbẹ riẹ oware nọ o soriẹ nọ mẹ be rọ nyawo kẹ obiala ha.

Komẹ: Elo, ahwo buobu a rehọ e riẹ nọ obiala u dikihẹ kẹ orẹwho rai. Ẹkwoma obiala nọ a rẹ nyawo kẹ yọ a bi dhesẹ inọ a re ru oware kpobi kẹ orẹwho rai. Rekọ o rrọ ere kẹ omẹ hẹ. Mẹ rẹ sae rehọ uzuazọ mẹ kpobi kẹ orẹwho mẹ hẹ, keme Ọghẹnẹ họ Ọnọ ọ kẹ omẹ uzuazọ. Mẹ gba riẹ mu no inọ ọye mẹ rẹ rehọ uzuazọ mẹ kẹ. Fikiere, dede nọ me wo adhẹẹ kẹ obiala, mẹ rẹ nyawo kẹe he.

Elo: Ẹme ra na o vẹ omẹ ẹro.

Komẹ: Elo, eva e were omẹ inọ whọ rọ ẹme nana ze. Oke kpobi nọ whọ gwọlọ riẹ oware nọ o soriẹ nọ me bi ro ru hayo nọ me bi ro ru oware jọ họ, iviena, hae nọ omẹ. Whaọ, Ebaibol e ta nọ oke lelehie nọ u kpemu, ovie Babilọn o juzi kẹ ahwo inọ a guzou kpotọ kẹ ẹmema jọ nọ o ro vi. Ahwo jọ a rọwo guzou kpotọ vievie he—ghelọ uye nọ a ta nọ a te kẹ ae.

Elo: Ẹẹhẹ? Kọ eme ọ via kẹ ae?

Komẹ: Oke ibreki, mẹ te vuẹ owhẹ oware nọ o via kẹ ae.

IVOTU EVAỌ OBỌ ISUKULU

Ọthuke: Azino, evaọ usu emọ-eklase na, ono who roro nọ o fo imonitọ hayo osu eklase mai?

Azino: Mẹ rrọ abọ ohwo ọvo ho.

Ọthuke: Fikieme?

Azino: Me wo osu nọ ọ mai woma nọ o bi su omẹ. Wọhọ Oleleikristi, mẹ yaa eyaa inọ Jesu me re lele. Fikiere, mẹ rẹ sae salọ osu ọfa ha. Kọ whọ riẹ oware nọ me ro roro nọ ọye họ Osu nọ ọ mai woma?

Ọthuke: Ijo, yọ mẹ gwọlọ riẹ hẹ.

Azino: Uwoma, oke kpobi nọ whọ tẹ gwọlọ riẹ, o te were omẹ re mẹ vuẹ owhẹ.

[Uwoho]

“Jọn, mẹ gwọlọ nọ whọ nyaze ehaa ẹdeyẹ mẹ”

[Uwoho nọ o rrọ ẹwẹ-obe avọ 3]

“Fikieme whọ gbẹ rọ nyawo kẹ obiala ha?”