Muanebe neambe tshinyi?

BALEDI: Mu Tshibumba tshia Nsentedi tshia 15/1/2010 mu dibeji dia 16-20 tuvua bakule bua kuenza manaya a tshilejilu ne bana benu. Tshiena-bualu etshi tshivua ne malu adi mua kunukuatshisha bua kuambuluisha bana benu bua kutantamena ntatu mu tulasa. Nudi mua kuambulula malu aa mu manaya a tshilejilu panudi nuenza Ntendelelu wenu wa mu dîku.

BANA badi Bantemu ba Yehowa batu bapeta ntatu ya bungi. Balongi babu batu babebeja misangu ya bungi bua tshinyi kabatu benza amue malu bu mudi kunemekela dibendele, kuenza mifikilu ya diledibua anyi kuenza malu atu bana benza bua fete kampanda. Bobu bele muanebe nkonko ya nunku, neandamune bishi?

Bamue bana bena Kristo batu bandamuna anu ne: “Tshiena mua kuenza bualu ebu to. Tshitendelelu tshietu ntshibubenge.” Tudi ne bua kuela bana aba kalumbandi bua mudibu balamate malongesha etu. Diandamuna diabu edi didi mua kupangisha bana nabu mua kubela nkonko mikuabu. Kadi Bible udi utukankamija bua ‘kudilongolola bua kukudimuna dîyi kudi muntu yonso udi utukonka bua’ malongesha etu. (1 Pet. 3:15) Bua kuandamuna katuena anu ne bua kuamba ne: “Tshiena mua kuenza bualu ebu to.” Nansha mudi bantu bonso kabayi mua kuanyisha tshitudi tuenza, kudi bakuabu badi mua kujinga kumanya tshitudi katuyi tuenzela bualu kampanda.

Bana ba bungi ba Bantemu batu balondela balongi babu miyuki ya mu Bible ku diambuluisha dia mikanda yetu bu mudi wa Longa malu kudi Mulongeshi Munene. Miyuki eyi idi mua kubambuluisha bua kumvuija tshitu bana ba Bantemu kabayi benzela amue malu. Kudi balongi batu bateleja bimpe miyuki ya mu Bible eyi, ne malonga a Bible a bungi mmatuadije mushindu eu. Bitu bikolela bakuabu bua kuteleja muyuki mujima. Kudi miyuki ya mu Bible idi mua kukolela bana padibu kabayi babumvuije nayi bimpe. Tshilejilu, bavua babikile Minhee nsongakaji wa bidimu 11 kudi mulunda wende mu fete wa mufikilu wa diledibua diende. Minhee wakamuambila ne: “Bible kena utuambila bua kuenza fete ya mifikilu ya diledibua to. Bakashipa muntu mukuabu wa mu Bible diende Yone mubatiji mu fete wa mufikilu wa diledibua.” Kadi Minhee udi uvuluka ne: bivua bimueneke anu bu ne: mulunda wende kavua mumvue diandamuna diende bimpe to.

Imue misangu, bitu bimpe kuleja mulongi mukuabu tshimfuanyi anyi muyuki mu mikanda yetu. Kadi netuenze tshinyi bikala bamfumu ba tulasa kabayi bitaba bua bana bikale bapeshangana mikanda ya malu a Nzambi? Bana betu badiku mua kuyisha bimpe nansha kabayi ne mikanda yetu anyi? Mmunyi mutudi mua kubambuluisha bua kumanya tshia kuamba?

Enzayi manaya a tshilejilu

Kuenza manaya a tshilejilu ku nzubu kudi kuambuluisha bikole. Baledi badi mua kuangata miaba ya balongi ba bana babu. Padi bana bateta mua kumvuija malongesha etu, mbimpe baledi bikala babela kalumbandi bua mudibu badienzeja ne kubaleja mudibu mua kulengeja mandamuna abu ne mudibi  ne mushinga bua kuenza nunku. Tshilejilu, nudi mua kuambila bana benu bua kuakula mu mushindu udi balongi babu mua kubumvua bimpe. Yoshua muana wa bidimu tshitema udi wamba ne: balongi babu kabatu bumvua miaku bu mudi “kondo ka muoyo” anyi “lulamatu” to. Ke bualu kayi utu ubeleshisha meji ne miaku idibu mua kumvua bimpe.​—1 Kol. 14:9.

Bamue balongi padibu bela lukonko, badi balekela kuteleja padibu babapesha diandamuna dile. Bansonga Bantemu badi mua kulama ntema ya balongi babu padibu bayukila nabu ne babeleshisha meji. Haneul muana wa bakaji wa bidimu 10 udi wamba ne: “Balongi betu batu basue kuyukila nabu, kadi kabatu basue bua kubumvuija malu to.” Bua kuyukila ne muntu, mbimpe kumuela nkonko ne kumuteleja bimpe padiye wakula.

Miyuki idi ilonda eyi idi ileja mudi bana bena Kristo mua kueleshisha balongi babu meji. Kabiena bikengela kukuata miyuki eyi mu mutu to, bualu bana batu bashilangane ne tudi mua kuandamuna lukonko luonso bilondeshile nsombelu udiku. Nunku muana yonso udi ne bua  kukuata lungenyi lunene ludi mu muyuki ne kululeja mu ende mêyi bilondeshile nsombelu ne balongi babu. Nuenu bikale ne bana bakadi baya mu kalasa, nutete mua kuenza manaya a tshilejilu ne miyuki eyi.

Kulongesha bana kudi kulomba dîba dia bungi ne kudienzeja bikole. Baledi bena Kristo badi ne bua kubueja munda mua bana babu mikenji ya mu Bible ne kubasaka bua kuyitumikila.​—Dut. 6:7; 2 Tim. 3:14.

Mu Ntendelelu wenu wa mu dîku walonda, nutete mua kuenza manaya a tshilejilu ne bana benu ku diambuluisha dia miyuki eyi. Nenumone ne: nebibambuluishe bikole. Kadi nuamanya ne: kipatshila ki nka kukuata mandamuna anyi mêyi mu mutu to. Nudi mua kunayilula nsombelu kampanda misangu nansha ibidi, nufila mandamuna mashilangane ne numona tshidi bana benu benza. Padibu bateta mua kumvuija malongesha etu, nubambuluishe bua kuikalabu ne bupole ne bukalanga. Mu kupita kua matuku, nenulongeshe bana benu mua kumanya kuandamuna nkonko idi balongi babu, bena mutumba ne balongeshi babu babela bua malongesha etu.

[Kazubu/​Bimfuanyi mu dibeji 4]

MIFIKILU YA DILEDIBUA

Marie: Wetuawu Jean. Ndi musue bua ulue koku mu fete wa mufikilu wa diledibua dianyi.

Jean: Tuasakidila Marie bua muudi mungelele meji. Kadi ndiku mua kukuebeja tshiudi wenzela fete wa mufikilu wa diledibua diebe anyi?

Marie: Mbua kuvuluka dituku ditubu bandele. Wewe kutu wenza fete bua mufikilu wa diledibua diebe anyi?

Jean: Tòo.

Marie: Bua tshinyi kubenga kuenza fete? Bena mu dîku dietu si bavua basanke pavuabu bandele.

Jean: Nansha ba kuetu bavua basanke pabu pavuabu bandele. Tshiena ngela meji ne: ke tshidi mua kunsaka bua kuenza fete tshidimu tshionso to. Mu fete ya mifikilu ya diledibua, bantu ba bungi batu bela meji ne: bobu ke badi ne mushinga wa bungi. Kadi ki Nzambi udi ne mushinga wa bungi kupita bantu bonso anyi? Katuenaku mua kumuela tuasakidila bua mudiye mutupeshe muoyo anyi?

Marie: Udi musue kuamba ne: tshiena ne bua kuikala ngenza fete wa mufikilu wa diledibua dianyi anyi?

Jean: Abu mbualu budi bukutangila wewe nkayebe. Kadi ela meji bua bualu ebu: bantu ba bungi batu basue kupeta bintu dituku dia mufikilu wa diledibua diabu. Kadi Bible yeye udi wamba ne: muntu udi upeshangana bintu udi ne disanka kupita udibu babipesha. Pamutu pa tuetu kudiangata ne mushinga dituku dia mufikilu wa diledibua dietu, ki mbimpe kuela Nzambi tuasakidila, kuela meji bua bantu bakuabu ne kubenzela malu mimpe anyi?

Marie: Tshitu muanji kuela meji bua bualu ebu to. Mbuena kuamba ne: baledi bebe kabatu bakupesha bintu anyi?

Jean: Batu bampesha. Kadi kabatu bindila anu dituku dia mufikilu wa diledibua dianyi to. Batu bampesha bintu dîba dionso didibu basue. Kadi Marie, kuenaku musue kumanya mutu fete ya mifikilu ya diledibua mituadije anyi?

Marie: Ngambilaku.

Jean: Nanku, malaba nenkulondele bualu bua fete wa mufikilu wa diledibua uvua muenzeke kale menemene.

KUNEMEKELA DIBENDELE

Gail: Claire, bua tshinyi kutu unemekela dibendele?

Claire: Tuasakidila bua lukonko luebe Gail. Kadi meme ndi musue kuanji kukuebeja bua tshinyi wewe udi udinemekela?

Gail: Ndi ndinemekela bualu ndi munange ditunga dietu.

Claire: Ndi mumanye ne: udi munange mamuebe, ki mmuomu anyi? Kadi utu umukosela mpala bu mutubu bakosela dibendele anyi?

Gail: Mu kuamba kuimpe, ntu ndikosela mpala bualu ndi ndinemeka. Wewe kutu unemeka dibendele anyi?

Claire: Ntu ndinemeka. Kadi katuena ne bua kukosela muntu yonso anyi tshintu tshionso tshitudi tunemeka mpala to, ki mmuomu anyi?

Gail: Bushuwa, ntu nnemeka mulongeshi wetu, kadi tshitu mmukosela mpala to. Ndi mumona ne: tshiena mumanye tshindi ndinemekela to.

Claire: Gail, bantu ba bungi batu bela meji ne: dibendele didi dileja mpala wa ditunga diabu. Padibu badikosela mpala anyi badinemekela, badi baleja ne: badi mua kuenza tshintu tshionso bua ditunga diabu. Kadi meme tshiena mua kuenza nanku to. Tshiena mua kufila muoyo wanyi bua ditunga dietu, bualu Nzambi ke uvua muumpeshe. Ke bualu kayi ndi mufile muoyo wanyi kudiye. Nunku nansha mundi nnemeka dibendele, tshitu ndinemekela to.

Gail: Ngumvu mpindieu.

Claire: Kadi Gail, umanye ne: ndi musanke bikole bua lukonko luebe elu. Wewe musue kumanya tshindi ngenzela bualu kampanda anyi tshiyi mbuenza udi mua kungebeja kakuyi bualu to. Kadi udi mumanye ne: Bible udi wamba ne: ku kale kuvua mukalenge mukuabu wa mu Babulona uvua mutumine bantu dîyi bua kuinamina lupingu anyi? Kuvua bantu bakabenga mua kuluinamina nansha muvuabu basue kubashipa.

Gail: Bulelela anyi? Ntshinyi tshivua tshibafikile?

Claire: Nenkulondele bualu buabu mu dikisha.

MIANZU YA MU TULASA

Mike: Tim, udi wela meji ne: nnganyi udi ne bua kuikala mfumu mu kalasa ketu emu?

Tim: Tshiena ku luseke lua muntu nansha umue udi mufile mpala.

Mike: Bua tshinyi?

Tim: Bualu nkadi ne mfumu muimpe menemene. Bu mundi muena Kristo, ndi mudisuike bua kulonda Yezu. Nunku tshiena mua kusungula mfumu mukuabu to. Kadi udiku mumanye bua tshinyi ndi ngela meji ne: Yeye ke mfumu muimpe mutambe anyi?

Mike: Tòo, tshiena nansha musue kumanya to.

Tim: Kakuena bualu to. Dîba dionso diwajinga kumanya nengikale ne disanka bua kukuambila.

[Tshimfuanyi]

“Wetuawu Jean. Ndi musue ulue koku mu fete wa mufikilu wa diledibua dianyi”

[Tshimfuanyi mu dibeji 3]

“Bua tshinyi kutu unemekela dibendele?”