Ta eo Ajiri eo Nejõm Enaj Kar Ba?

RO JEMEN IM JINEN: Ilo magazine eo an Jãnwõde 15, 2010, ilo peij 16-​20, ej kwalok kin aurõkin an ro jemen im jinen kamelmel iben ajiri ro nejiir. Katak in ej letok melele ko remaroñ jibõñ kom ñõn kepoj ro nejimi ñe renaj jelmae melejoñ ko ilo jikuul. Bwelen kom maroñ kõmõne ien kamelmel kein ilo jotenin Kabuñ eo an Baamle eo.

AJIRI ro im rej Dri Kennan ro an Jeova rej iion elõñ melejoñ ko. Ekkã an dri jikuul ro kajitõk ibeir kin etke rejjab bõk kwonair ilo jet makõtkit ko einwõt, kabuñ ñõn flag eo, kemem, im kwojkwoj ko jet an lõl. Elañe ladrik ak ledrik eo nejõm ear jelmae kajitõk rõt kein, enaj kar ewi wãwen air uak?

Jet Kristian ajiri ro rar uak im ba: “Ijjab maroñ bõk kwonaõ kinke kabuñ eo aõ ejjab tõmak ilo men in.” Jej aikwij nebar ajiri rein kin air jutõk bin kin tõmak eo air. Uak eo air emaroñ kabwijrõk an ro jet wõnmanlok im kwalok kajitõk ko. Bõtab, Baibel eo ej rejañ kij ñõn ar “pojõk ien otemjej bwe [jen] uak ñõn jabrewõt armij ej kajitõk [iber] kin unin” tõmak ko ar. (1 Pit. 3:​15) Ar kõmõne men in ej kitibuj elaplok jen ar baj ba, “Ijjab maroñ.” Meñe ro jet remaroñ jab errã iber, ak jet remaroñ kõnan jela kin unin bebe ko ar.

Elõñ Kristian ajiri ro rar kwalok bwebwenato ko ilo Baibel ñõn dri jikuul ro mõtair ilo air kajerbal buk ko im rej berber ion Baibel eo, einwõt buk eo etan Katak jen Dri Kaki eo Elap. * Bwebwenato kein remaroñ jibõñ ñõn kemelele kin etke Kristian ajiri ro rej kõmõne ak jab kõmõne jet men ko. Jet dri jikuul ro rej lukkun itoklimo in roñjake bwebwenato ko jen Baibel eo, im elõñ rar jino katak Baibel ilo wãwen in. Bõtab, emaroñ bin ñõn an jet dri jikuul ro kõnan roñjake aolepen bwebwenato eo ilo Baibel eo. Jet bwebwenato ko ilo Baibel eo remaroñ bin ñõn an dri jikuul ro melele kaki elañe jejjab lukkun kemeleleiki ir kin bwebwenato eo. Ke kar kir Minhee, eo ej 11 yiõ ridtõn, ñõn kemem eo an juõn mõtõn, ear ba ñõn e: “Baibel eo ejjab ba bwe jen kemem ran in lotak ko. Juõn armij ilo Baibel eo etan Jon dri Baptais ear mij ilo juõn ien kemem.” Bõtab, Minhee ej kememej bwe eo mõtõn ear jab melele kin uak eo an.

Jet ien, emaroñ lap an jibõñ ñe jej kwalok ñõn bar juõn dri jikuul kin juõn pija ak bwebwenato ilo juõn ian buk ko ar. Ta elañe dri utiej ro an jikuul eo rejjab kamelim an ajiri ro kwalok buk ko jen kabuñ ko air ñõn dri jikuul ro jet? Emaroñ ke bolemen an ajiri ro nejir kwalok nan meñe ejelok jabrewõt buk ko ibeir? Ewi wãwen kwomaroñ jibõñ ro nejõm ñõn jojomare tõmak eo air?

Kamelmel Ibeir

Kamelmel ilo mweo emaroñ lap an jibõñ ñe ro jemen im jinen rej kõmõn bwe ren einwõt ñe rej dri jikuul ro. Ke ajiri ro rej kajeoñ jojomare tõmak eo air, ro jemen im jinen renaj kõnan nebar ir kin air kate ir im kwalok ñõn ir kin ewi wãwen remaroñ kakõmõnmõnlok wãwen air kemelele kin tõmak eo air im etke  rej aikwij kõmõne men in. Ñõn wanjoñok, rejañ ir ñõn air kajerbal nan ko me dri jikuul ro im rej ridtair wõt ir remaroñ melele kaki. Joshua, juõn ladrik im ej druatimjuõn yiõ ridtõn, ear ba bwe dri jikuul ro mõtõn rar jab melele kin nan ko einwõt “bõklikõt” im “tiljek.” Inem ear aikwij kajerbal nan ko rebirurulok ñõn an kemeleleik ir kin tõmak eo an.​—1 Kor. 14:⁠9.

Emaroñ mõkõj an joko an jet dri jikuul ro itoklimo elañe eaitok uak eo, meñe rar bõkmantak juõn kajitõk. Ilo an Kristian ajiri ro kemelele ikijen air kõmõn bwe en juõn bwebwenato, men in emaroñ drebij itoklimo eo an dri jikuul eo mõtair. Juõn ledrik etan Haneul im ej joñoul yiõ ridtõn, ej ba, “Dri jikuul ro mõta rekõnan bwe in bwebwenato ibeir im jab baj kemelele wõt ñõn ir.” Wãwen eo jemaroñ bwebwenato ibeir ej ilo ar kwalok kajitõk ko inem kanuij roñjake air kwalok lemnok ko air.

Bwebwenato ko ilõl rej kwalok kin wãwen Kristian ajiri ro remaroñ kemelele kin tõmak eo air ñõn dri jikuul ro mõtair. Ejjab juõn menin aikwij ñõn air kili bwebwenato kein kinke aolep ajiri ro reinjuõn jen dron im emaroñ oktõk air uak ekkar  ñõn wãwen eo ej walok. Kin men in, juõn Kristian ajiri ej aikwij melele kin point eo, im kwaloke ilo nan ko an mõke, inem kõmõne men in ilo juõn wãwen ekkar ñõn ien eo im dri jikuul ro. Elañe eor ro nejõm im rej ber ilo jikuul, kajeoñ in kamelmel ibeir kin bwebwenato ko ilo box eo.

Ej bõk ien im ar kate kij ñõn ar katakin ajiri ro. Ro jemen im jinen rekõnan katakin ro nejiir kin nan in kakabilek ko ilo Baibel eo im rejañ ir ñõn air mour ekkar ñõn nan in kakabilek kein.​—Dut. 6:7; 2 Tim. 3:​14.

Ilo ien Kabuñ eo an Baamle eo, kajeoñ in kamelmel iben ro nejõm kin bwebwenato ko ilo box ko itulõl, im lale ewi joñõn an keie men in. Kememej: Mejenkajik eo ejjab ñõn air kili uak ko ak nan ko. Ilo mol, kwomaroñ kamelmele wãwen eo elõñlok jen juõn alen im lelok uak ko reinjuõn jen dron im lale ewi wãwen an ajiri eo nejõm jela kilen ukoktak. Ke rej kajeoñ in kemelele kin berberin tõmak eo air, jibõñ ir ñõn kwalok kamanwa im joij. Ilo wãwen in, kwonaj katakin ro nejõm kin wãwen eo remaroñ jojomare tõmak eo air ñõn dri jikuul ro, ro dri turiir, im dri kaki ro air.

[Kõmel̦el̦e eo itulal̦]

[Bo̦o̦k/Pija ko ilo peij 4, 5]

KWOJKWOJ IN KEMEM KO

Meri: Yokwe Jon. Ikõnan kirtok yuk ñõn kemem en aõ.

Jon: Kommol Meri kin am lemnok kin ña. Ak imaroñ ke kajitõk, etke kwoj kemem?

Meri: Ñõn kememe ran in lotak eo aõ. Kwojjab kememe ran in lotak eo am ke?

Jon: Ijjab.

Meri: Etke kwojjab? Baamle eo aõ rar lukkun mõnõnõ ke iar lotak.

Jon: Baamle eo aõ rar bareinwõt lukkun mõnõnõ ke iar lotak. Bõtab ijjab tõmak bwe eñin ej un eo unin ij aikwij kememe ran in lotak eo aõ kajjojo yiõ. Ilo ran in kemem ko air, elõñ rej lemnok bwe relukkun aurõk ilo ran eo. Ak ejjab ke bwe Anij eo eaurõktata? En kar jab E eo ke jej kamolol e kin an letok mour ñõn kij?

Meri: Ej melelen ke bwe in jab kemem?

Jon: Ej bebe eo am mõke. Bõtab, lemnok mõk kin men in, meñe elõñ armij ro rej mõnõnõ in bõk menin letok ko ilo ran in kemem eo air, ak Baibel eo ej ba bwe elaplok mõnõnõ ilo lelok jen bõk. Jen ar lemnok kin kij mõke ilo ran in kemem eo ar, ejjab ke emõnlok bwe jen kamolol Anij, lemnok kin ro jet, im kõmõn emõn ñõn ir?

Meri: Ijañin kar lemnok kin men in. Inem jemõm im jinõm rej ke lewoj jabrewõt menin lewoj ñõn yuk?

Jon: Aet, rej. Bõtab rejjab kõtar mae ran in lotak eo aõ. Rej letok ñõn iõ menin letok ko ilo jabrewõt ien rekõnan. Meri kwokõnan ke jela ewi wãwen kwojkwoj in kemem ko rar jino walok?

Meri: Aet.

Jon: Eokwe, ilju inaj kwalok ñõn yuk juõn bwebwenato ekaitoktoklimo kin juõn kemem ear walok ilo ien ko etto.

KABUÑ ÑÕN FLAG EO

Linda: Lynn, etke kwojjab kabuñ ñõn flag eo?

Lynn: Kommol Linda kin am kajitõk. Ak imaroñ ke kajitõk ibõm mokta, etke kwoj kabuñ ñõn flag eo?

Linda: Kinke ij yokwe ailiñ eo aõ.

Lynn: Linda, ijela bwe kwoj yokwe jinõm. Bõtab, kwoj ke kabuñ ñõn e?

Linda: Ijjab. Ak ij kabuñ ñõn flag eo kinke ij koutieje. Kwojjab koutiej flag eo ke?

Lynn: Aet, ij koutiej flag eo. Bõtab baj lemnok mõk, jej ke kabuñ ñõn aolep armij ro im men ko jej koutieji?

Linda: Jaab. Emol, ij koutiej dri kaki eo aõ, ak ijjab kabuñ ñõn e. Bwelen ijjab lukkun jela kin etke ij kabuñ ñõn flag eo.

Lynn: Linda, elõñ armij rej lemnok bwe flag eo ej jutõk kin ailiñ eo air. Air kabuñ ñõn flag eo ej melelen bwe renaj kõmõn jabrewõt men ko kin ailiñ eo air. Ak ejjab eñin wãwen iñjake eo aõ. Ijjab maroñ lelok mour eo aõ ñõn ailiñ eo aõ kinke Anij eo ear letok mour ñõn iõ. Iar bebe bwe in lelok mour eo aõ ñõn E. Inem meñe ij koutiej flag eo, ak ijjab kabuñ ñõne.

Linda: Ij melele kiõ.

Lynn: Linda, imõnõnõ bwe kwar bõkmantak men in. Im elañe kwokõnan jela kin etke ij kõmõni ak jab kõmõni jet men ko, kwon jab ãliklik in kajitõk iba. Kwojela Linda, Baibel eo ej ba bwe ilo ien ko etto, ear or juõn kiñ in Babilõn, eo ear kakien armij ro bwe ren barikrik iman juõn ekjõp. Im eor jet armij ro rar makoko in barikrik ñõne, meñe men in ear likit mour eo air ilo kauwatata.

Linda: Mol ke? Ta eo ear walok ñõn ir?

Lynn: Inaj kwalok ñõn yuk ilo ien mõña in raelip.

EKÃLEL OBIJA RO ILO JIKUUL

Mike: Tim, wõn eo kwoj lemnok in kãlet bwe en president ilo kilaj eo ar?

Tim: Ijjab rejetake jabrewõt ro im rej jibarek jea in. 

Mike: Etke?

Tim: Emwij karere an or juõn aõ dri tel emõntata. Einwõt juõn dri Kristian, iar kalimur bwe inaj lor Jisõs. Inem ijjab maroñ kãlet bar juõn bwe en dri tel eo aõ. Kwokõnan ke jela kin etke ij tõmak bwe ej dri Tel eo emõntata?

Mike: Einwõt juõn ijjab kõnan jela.

Tim: Eokwe, elañe eoktõk am lemnok, inaj mõnõnõ in kemeleleik yuk kin etke ijjab bõk kwonaõ ilo men in.

[Pija]

“Yokwe Jon. Ikõnan kirtok yuk ñõn kemem en aõ”

[Pija eo ilo peij 3]

“Etke kwojjab kabuñ ñõn flag eo?”