E Faapefea Ona Tali Atu Lau Tama?

MĀTUA: I le Olomatamata o Ianuari 15, 2010, itulau e 16-20, sa fautua atu ai le faia o ni faataʻitaʻiga ma lau fanau. E maua i lenei mataupu manatu e sauniunia ai lau fanau e faafetaiaʻia luʻitau i aʻoga. E manaia ae faia nei faataʻitaʻiga i taimi o le Tapuaʻiga Afiafi a le Aiga.

E TELE luʻitau e feagai ma tamaiti Molimau a Ieova. E masani ona fia iloa e tamaiti e latou te aʻoʻoga māfuaaga o lo latou lē auai i mea e pei o le faʻalo i le fuʻa, faamanatu o aso fanau, ma isi aso mālōlō. O le ā le tali a lau tama pe a fesiligia i na tulaga?

E faapea atu nisi tamaiti Molimau: “E sā i laʻu lotu.” E faamālō atu i na fanau ona o lo latou tutumau. Ae atonu e lē toe fesili atu se isi pe a tali mai faapena. A ua fautua mai le Tusi Paia, ia tatou “nofosauni pea e tali atu i luma o tagata uma e fesili mai iā [i tatou] i le māfuaaga” o o tatou talitonuga. (1 Pete. 3:15) O lona uiga, e lē lava le tali atu, “E sā i laʻu lotu.” E ui lava ina lē ioe isi i o tatou talitonuga, ae e latou te talisapaia māfuaaga o a tatou filifiliga.

Ua faamatala atu e le toʻatele o talavou Molimau a Ieova i a latou uō i le aʻoga tala mai i lomiga e pei o le tusi, Ia Faalogo i le Faiaʻoga Sili. Ua aogā nei tala e faamalamalama ai māfuaaga e fai ai, pe e lē faia ai e fanau Molimau nisi o mea. E iai nisi tamaiti e fiafia e faalogologo i nei tala, ma e tele suʻesuʻega faale-Tusi Paia ua amata ai. Ae, e faigatā i nisi tamaiti ona faalogo i se tala atoa mai i le Tusi Paia. Ae a lē faamatalaina le tala atoa mai i le Tusi Paia, e faigatā i nisi tamaiti ona malamalama i ai. Ina ua valaaulia Minhee, e 11 ona tausaga i le aso fanau o lana uō, na fai atu o ia i lana uō: “E lē o fai mai le Tusi Paia e faamanatu ni aso fanau. O loo taʻua i le Tusi Paia se tagata e igoa iā Ioane le Papatiso, na fasiotia a o faamanatuina se aso fanau.” Ae na manatua e Minhee, e foliga mai e leʻi malamalama lana uō i lana faamatalaga.

I nisi taimi, e aogā ona faaali i tamaiti se ata po o se tala mai i a tatou lomiga. Ae ā pe a fai mai le pule aʻoga, e lē faatagaina ona faaali a tatou lomiga i isi tamaiti? Pe mafai e a tatou fanau ona avatu se molimau lelei e aunoa ma le faaaogā o a tatou lomiga? E faapefea ona e fesoasoani i lau fanau e faia faapea?

Ia Fai ni Faataʻitaʻiga

E lelei le faataʻitaʻi i le fale, ma ia avea mātua e pei o isi tamaiti i le aʻoga. A o taumafai fanau e molimau atu, e tatau i mātua ona faamālō i ai, ma faasino i ai le auala e faaleleia ai a latou faamatalaga ma le māfuaaga e tāua ai. O se faataʻitaʻiga, ia fai i ai upu e fai atu ai, ia faaaogā upu e malamalama i ai tamaiti e latou te tupulaga. Ua faapea  mai Iosua e iva ona tausaga, e lē malamalama tamaiti o lana vasega i upu e pei o le “lotofuatiaifo” ma le “faamaoni.” O lea, e na te faaaogā ai upu e faigofie ona malamalama i ai.—1 Kori. 14:9.

O nisi tamaiti na fesili mai, e lē fia faalogo pe a umi tele se tali e avatu. O le faaaofia o i latou i talanoaga ma fetufaaʻi ma i latou, e ono faatupu ai pea e talavou Molimau le fiafia o tamaiti e faalogo mai. Ua fai mai Henieli, o se teine e sefulu tausaga, “E fiafia aʻu uō pe a matou talatalanoa, ae aua le na o le faamatala atu.” A fai se talanoaga, ia fesili i ai, ona faalogologo lelei lea a o faamatala mai o latou manatu.

O talanoaga o loo mulimuli mai, ua faailoa atu ai le auala e talanoa ma fetufaaʻi ai fanau a Molimau ma isi tamaiti. E lē manaʻomia ona tauloto tala e fai atu, ona e lē tutusa uma tamaiti, ma e eseese foʻi tulaga ma tali e manaʻomia. O lea, e tatau i se tamaitiiti Molimau ona manatua manatu  tāua, ona faaupu lea i ana upu e tusa ma le tulaga o tamaiti o loo talanoa i ai. Afai e iai sau fanau aʻoʻoga, taumafai e faataʻitaʻi tala nei ma i latou.

E manaʻomia le taimi ma taumafaiga e toleni ai fanau. E naunau mātua Kerisiano e tamau i loto o a latou fanau mataupu silisili o le Tusi Paia, ma faalaeiau i latou ia ola e ōgatusa ma na mataupu silisili.—Teu. 6:7; 2 Timo. 3:14.

I le Tapuaʻiga afiafi a le Aiga o sosoo mai, ia taumafai e faataʻitaʻi ma lau fanau talanoaga o taʻua i inei ma iloa ai le aogā o le faia faapea. Ia manatua o le sini e lē o le taumafai e tauloto upu ma tali. A ia taumafai e toe faataʻitaʻi le mea o tupu, ma sui le tali, ia iloa ai po o maua e le fanau manatu. Fesoasoani ia latou iloa fetuutuunaʻi ma ia faautauta, a o faamatala atu o latou talitonuga. A o faagasolo taimi, o le a iloa ai e lau fanau faamatala atu o latou talitonuga i tamaiti aʻoga, tuaoi, ma faiaʻoga.

[Pusa/Ata i le itulau 4]

FAAMANATUINA O ASO FANAU

Maria: E Ioane, e valaaulia oe i le patī o loʻu aso fanau.

Ioane: Faafetai a Maria. O le ā le uiga o lenā patī?

Maria: E faamanatu ai loʻu aso fanau. Ae ā oe, e fai sau patī e faamanatu ai lou aso fanau?

Ioane: E leai, e lē faia se patī.

Maria: Oi, aiseā? O le patī, e iloa ai le fiafia o loʻu aiga ina ua ou fanau mai.

Ioane: Na fiafia foʻi loʻu aiga ina ua ou fanau mai. Ae e lē o se mea lenā e fai ai i tausaga uma se patī. O le toʻatele o tagata e fai patī, e manatu e sili ona tāua i latou i lenā aso. Ae pe lē sili ea ona tāua le Atua? Pe lē tatau la ona tatou faafetai iā te ia mo le ola lea e tatou te ola ai?

Maria: O le uiga o lau tala, e lē tatau ona faia saʻu patī?

Ioane: E pule lava oe. Ae o le ā sou manatu? E toʻatele tagata e fiafia pe a ave i ai se meaalofa, auā, fai mai le Tusi Paia, e sili le fiafia o lē e foaʻi atu i lo o lē e talia. Pe lē sili ea la le faafetai i le Atua, ma fai mea lelei mo isi, i lo o le faamuamua o i tatou pe a fai o tatou aso fanau?

Maria: E, ou te leʻi mafaufau lava i lenā mea. Po o lona uiga, e lē avatua lava e ou mātua ni meaalofa iā te oe?

Ioane: E aumai. Ae e lē faatali seʻi oo i loʻu aso fanau. E aumai lava i so o se taimi. Ae e te fia iloa la po o fea na amata mai ai aso fanau?

Maria: O, o fea?

Ioane: Ia, seʻi oʻu faamatala atu taeao se tala malie e uiga i le faamanatuina o se aso fanau i aso anamua.

FAʻALO I LE FUʻA

Keli: A Kalala, aiseā e te lē faʻalo ai i le fuʻa?

Kalala: Manaia lau fesili Keli. Ae o laʻu fesili iā te oe, ae o le ā le mea e te faʻalo ai i le fuʻa?

Keli: Ona ou te alofa i loʻu atunuu.

Kalala: Ou te iloa e ese lou alofa i lou tinā, ae e te lē o faʻalo i ai, a ea?

Keli: E saʻo oe. Ae e ala ona ou faʻalo i le fuʻa, ona ou te faaaloalo i ai. E ā, e te lē faaaloalo i le fuʻa?

Kalala: Ou te faaaloalo i ai. Ae tatou te lē faʻalo i tagata uma ma mea uma e tatou te alolofa ma faaaloalo i ai, a ea?

Keli: E saʻo foʻi oe, ou te faaaloalo i lo tatou faiaʻoga, ae ou te lē faʻalo i ai. Ia, taʻilo la pe aiseā ou te faʻalo ai fua i le fuʻa.

Kalala: E te iloa e oe Keli, e manatu le toʻatele o tagata, o le fuʻa ua fai ma sui o le atunuu. Ma a faʻalo i le fuʻa, e taʻu atu ai, e latou te faia mea uma e manaʻo i ai le atunuu. Ae lē faapena loʻu manatu. E lē mafai ona foaʻi atu loʻu ola mo loʻu atunuu auā o le Atua na foaʻi maia iā te aʻu. O le mea lenā ua ou filifili ai, e foaʻi atu loʻu ola mo ia. O lea, ou te faaaloalo i le fuʻa, ae ou te lē faʻalo i ai.

Keli: O! o lenā la.

Kalala: Ua lelei ua e fesili mai Keli. E so o se taimi lava e te fia iloa ai le māfuaaga ou te faia pe e lē faia ai se mea, ona fesili mai lea. E te iloa, ua taʻua i le Tusi Paia, i aso anamuā, na poloaʻia e le tupu o Papelonia ona tagata e ifo i se tupua, ae e leʻi ifo nisi, e ui ina lamatia ai.

Keli: E moʻi? O le ā la le mea na tupu iā i latou?

Kalala: Seʻi oo i le mālōlōga, ona ou faamatala atua lea iā te oe.

TIUTEFAI I LE AʻOGA

Mika: A alii Timo, o ai e tatau ona fai ma taʻitaʻi o le tatou vasega?

Timo: O aʻu ia ou te lē ʻau i se isi.

Mika: O, aiseā?

Timo: A lea ua iai loʻu taʻitaʻi e sili ona lelei, e leai se isi e la te tutusa. O aʻu o se Kerisiano, ma ua ou filifili e mulimuli iā Iesu. E lē mafai ona ou toe filifilia se isi taʻitaʻi. Ae e te iloa le mea e sili ai ona lelei Iesu?

Mika: E leai, ma ou te lē o fia iloa foʻi.

Timo: A e fia iloa i se taimi, ou te fiafia e faamatala atu.

[Ata i le itulau 3]

“Aiseā e te lē faʻalo ai i le fuʻa?”

[Ata i le itulau 4]

“E Ioane, e valaaulia oe i le patī o loʻu aso fanau”