Wan Wou Una Kaa Ér Nyi?

MBAMAREN: Ken Iyoukura i Janawari 15, 2010, peeji 16-20 la, se ter kwagh sha kwagh u ne karen iyol vea mbayev enev. Ngeren ne due a mbamhen mba vea wase ne u wan mbayev enev agoyol sha er vea hendan a mbamtaver ken makeranta yô. Ne fatyô u karen iyol sha mbamhen mban shighe u ne lu eren Mcivir u hen Tsombor aikighe yô.

MMBAYEV mba ve lu Mbashiada mba Yehova yô, mba tagher a mbamtaver kpishi. Mbayev mba ken imakeranta ve ka ve shi pinen ve er i hii ve ve soon u eren akaa agen ga yô, er tuta u civir man iniongo i ember iyange i mar man umemyol mbagenev nahan. Aluer i pine wan wou u nomso shin u kwase amba a mpin la nahan, una na mlumun ér nyi?

Mbayev mbagenev mba ve lu Mbakristu yô ka ve gba kaan tsô ér: “Me er nahan ga. Kwaghaôndo wam venda kwagh la.” Doo u wuese mbayev mba ve til dông nahan la. Mlumun ve la una na yô, or a kera seer pinen ve kwagh ga. Nahan kpa, Bibilo wa se kwagh ér se ‘waan ago iyol se veren a ver sha u se na imo sha mpin u hanma or u nana pine se ityôkyaa’ i jighjigh u nan wase yô. (1 Pet. 3:15) Se eren nahan yô, se ôr kwagh a hemba di u gban kaan tsô ér, “Me er nahan ga” la. Aluer mbagenev lumun a vese ga je kpa, alaghga mbagenev vea soo u fan ityôkyaa i i ne ve se er kwagh nahan la.

Agumaior kpishi a a lu Mbashiada yô ka a yar tom a ityakerada amba er Hen Kwagh sha Ikyev i Ortesen UHemban La nahan, sha u pasen mbayev mba ken imakeranta ve akaa a Bibilo. Mkaanem man ma a wase u pasen ityôkyaa i mbayev mba ve lu Mbashiada ve eren akaa agen, shin ve eren ga yô. Mbayevmakeranta mbagenev ka ve kegh ato ve ungwa akaa a Bibilo, man í hii u henen Bibilo a ve mbagenev kpishi sha imba gbenda ne. Alaghga a taver mbayevmakeranta mbagenev u keghen ato ungwan ma kwagh u Bibilo i er la vindi vindi. Aluer i pase akaa a Bibilo agen vighe vighe ga yô, alaghga a taver mbayevmakeranta u kaven. Zum u ijende i wankwase ugen u lun anyom 11, u i yer un ér Minhee, lôhô un iniongo i ember iyange i mar yô, a kaa a ijende na la ér: “Bibilo kaa ér se eren uiniongo mba ember ayange a mar ga. Í ôr kwagh u Yohane u Eren Batisema ken Bibilo ér yange i gber un ityough shighe u i lu eren iniongo i ember iyange i mar i orgen yô.” Nahan kpa, Minhee umbur er ijende na kav mlumun na ga yô.

Ashighe kpishi ka i lu a inja u tesen wanyemakeranta ugen foto shin ngeren ugen ken ityakerada yase. Kpa, aluer mbahemenev mba sha imakeranta gema kaa ér ve soo ér mbayevmakeranta ve tese mbagenev kwagh ken ityakerada i kwaghaôndo ga di ye? Mbayev asev vea fatyô u eren shiada tsembelee shighe u ve lu a takerada wase môm ga je kpaa yôô? U wase mbayev ou u paase jighjigh ve u nan iyol nena?

Karen Iyol Vea Mbayev Ou

Ka a inja kpishi u karen iyol hen ya vea mbayev, nahan ken iyolkaren la mbamaren geman lun mbayevmakeranta mbagenev. Mbayev vea nguren nôngon ér vea paase jighjigh ve u nan iyol yô, a doo u mbamaren vea wuese iniôngon ve la shi vea tese ve er vea fatyô u seer mhen man er i hii ve i doo u vea er nahan yô. Ikyav i tesen yô, due a mhen u ôron asemberakaa a mbayevmakeranta mba sha kov u ônov ou vea kav yô. Wanye ugen u lun anyom ataankaranyiin, mba yer un ér Joshua, a kaa ér  mbayev mba ken makeranta na yange ve kav asember agen er “imoshima” man “mtil sha mimi” nahan ga. Nahan i gba u una lam a ve sha asember a taver ga sha u timen ken Bibilo a ve.—1 Kor. 14:9.

Mbayev makeranta mbagenev ka vea pine mpin, man a na ve mlumun sha mi gôgônan yô, i ngôôr duen ve ishima ga. Mbayev Mbashiada vea na ve ian i wan zwa shi pasen mbamnenge vev yô vea fatyô u taver ve ishima u keghen ato. Wanyekwase ugen u lun anyom pue, mba yer un ér Haneul, a kaa ér, “Mbayev mba ken makeranta wam ka ve soo iliam, mba soon ér i pase ve a pase kwagh ga.” Wea soo u zan hemen a iliam yô, pinen mbampin shi keghen ato a orgen u ú lu lamen a nan la er nan lu pasen mnenge u nan la.

Alam a a dondo shin heen ne tese er mbayev mba ve lu Mbakristu vea fatyô u lamen a mbayev mba ken imakeranta ve yô. Saa u kôr alam ne ken ityough ga, sha ci u mlu u hanma wanye ngu kposo a ugen, ka mpin u i pin la una tese mlumun u a na ye. Sha nahan yô, gba u Wanye-Shiada nana fa mhen la a kuma nan, nana ôr un ken mkaanem ma nan, shi nana ôr kwagh a zua sha kwagh u nan lu lamen sha mi la kua sha mlu u wanyemakeranta  la. Aluer u ngu a mbayev mba ve ze makeranta yô, kar iyol a ve imôngo sha alam ne.

Ka i tôô shighe u yesen mbayev shi ka i gba u se nôngo kwagh kpoghuloo ve se er kwagh ne ye. Doo u mbamaren mba ken Kristu vea yese mbayev vev sha akaawan a ken Bibilo shi vea taver ve ishima u dondon akaawan la ken uma ve.—Dut. 6:7; 2 Tim. 3:14.

U nyôron Mcivir u hen Tsombor aikighe ugen yô, kar iyol vea ônov ou sha alam a i dugh a mi shin heen ne, nahan nenge er kwagh la una wase mbayev ou yô. Umbur wer: Awashima u karen iyol yô, ka u kôron asember shin mbamlumun ken ityough ga. Kwagh u ú er yô, u fatyô u karen iyol sha iliam igen acin ahar shin atar, shi nan mbamlumun kposo nahan nengen er mbayev ou vea tsera sha igbenda ne yô. Vea nguren nôngon u pasen atôakyaa a sha akaa a ve ne jighjigh a mi la yô, wase ve ve lu mba eren kwagh sha kwaghfan shi norom sha kwagh ga. U kar iyol vea mbayev ou shighe a karen yô, vea fa u paase jighjigh u nan ve iyol zum u mbayev mba ken imakeranta ve shin mbawanndor a ve gayô atica a ve a pin ve kwagh yô.

[Ngeren u kiriki/Foto u sha peeji 4, 5 la]

UINIONGO MBA EMBER IYANGE I MAR

Erdoo: Bem, i er nena? M soo mer ma u ve iniongo i iyange i mar wam.

Bem: Erdoo, m sugh u er u wem ikyo yô. Man er nan u soo u eren iniongo i iyange i mar youwe?

Erdoo: Ka sha ci u ember iyange yam i mar. We u ember i you gaa?

Bem: Ei, m ember ga.

Erdoo: Er nan u ember ga? Zum u i marem la saan mbamaren av iyol kpishi.

Bem: Hen tsombor wam kpa kape yan lu je la. Zum u i marem la, ve kpa saan ve iyol. Kpa m hen mer ka ityôkyaa i hanma inyom yô me ember la ga. Ior kpishi ka vea eren iniongo i ember iyange i mar ve yô, ve nenge ér ve hemba cii. Kpa ka Aôndo a hembe cii gaa? Shi doo u se sugh un sha ci u uma u a ne se la gaa?

Erdoo: Nahan wer m de eren iniongo i ember mar wam ga shinii?

Bem: Ngura ka we u kaa ye. Kpa er nan u hen sha kwagh ne ga? Er ior kpishi ka ve soo ér mbagenev ve na ve uiyua shighe u ve ember iyange i mar ve la nahan kpa, Bibilo gema kaa ér u nan a na kwagh hembe saan iyol a u ngohol a ngohol kwagh. Guda u sughun Aôndo shi henen sha kwagh u mbagenev shi eren a ve doo doo, a u se veren ishima sha ayol a ase sha iyange i mar wase la ga he?

Erdoo: Mayange mhen la vam ken ishima ga. Inja na yô we u ngohol iyua i mbamaren ou ve ne u ga?

Bem: M ngohol. Kpa mbamaren av mba keghen er saa sha iyange i mar wam ga. Mba nem iyua hanma shighe u ve soo cii. U soo u fan er iniongo i ember iyange i mar la yange i hii yôô?

Erdoo: Yange i̱ hii nena?

Bem: De, kper tsô me ôr u kwagh u sha kwagh u iyange i mar, u yange er sha ashighe a tsuaa la, u una doo u ungwan yô.

TUTA U CIVIR

Loho: Mfedoo, er nan u civir tuta ga?

Mfedoo: M sugh u sha mpin la, Loho. Ma i lu mo ma m vande pinen we ga zee, er nan u civir u?

Loho: M civir tuta sha ci u m soo tar wam.

Mfedoo: Loho, m fa u soo ngô u. Kpa u civir un ga, shin u civir unu?

Loho: U ôr ka aie ga. Kpa, u fa, m civir tuta sha ci u m ne u icivir. U ne u icivir gaa?

Mfedoo: M ne. Kpa ka hanma or u se ne nan icivir cii se civir nan ga, shi ka akaa cii se ne a icivir shi se civir a ga, shin ka nahan ga?

Loho: Ka mimi, m ne tica wase icivir, kpa m civir un ga. Kam er m fa ityôkyaa i m civir tuta ga nahan.

Mfedoo: Loho, nen ga̱, ior kpishi hen ér tuta tile sha ityough ki tar ve. Mcivir u ve civir tuta la tese ér vea fatyô u eren nyityokwagh cii sha ci u tar ve. Kpa mo m nengen nahan ga. Me fatyô u nan uma wam sha ci u tar wam ga, sha ci u ka Aôndo a nem uma ye. M tsua mer me na Aôndo uma wam. Nahan, m ne tuta icivir, kpa m civir u ga?

Loho: M zua a mi

Mfedoo: Loho, doom kpishi er u ter kwagh ne yô. Shi aluer u soo u fan ityôkyaa i m eren akaa agen ga yô, gba pinen mo tsô. Bibilo kaa a vese ér, tsuaa la, tor u Babilon ugen yange na ior wada ér ve gure inya ve civir eev. Mbagenev wa uuma vev ikyo ga, ve venda u guren eev mbura inya.

Loho: Mimii? Nahan i er a ve nena?

Mfedoo: A due ahumbe tsô me ôr u.

ISHANGEN I KEN MAKERANTA

Terna: Myomo, ka an u nenge wer doo u nana lu class monitor wase?

Myom: Mba ve lu kperan ian la cii, or ve môm kpa m ngu ken vegher u nan ga.

Terna: Sha ci u nyi?

Myom: M vande ngun a orhemen u hemen na u hembe doon cii yô. Er m lu Orkristu yô, m tsua u dondon Yesu. Nahan me kera tsua orhemen ugen ga. Kpa, u fa er i hii ve m nenge mer ngu Orhemen u vough kpa?

Terna: Ei, shi kwagh gbam sha kwagh la kpaa ga.

Myom: Ka shami, kpa hanma shighe u i gbe u u̱ fan cii yô, a saan mo iyol u ôron we.

[Foto]

“Bem, i er nena? M soo mer ma u ve iniongo i iyange yam i mar”

[Foto u sha peeji 3]

“Er nan u civir tuta ga?”