Ncinzi Mwanaanu Ncayooamba?

NOBAZYALI: Mu ngazi yamu January 15, 2010, amapeeji 16-20, twakabandika mbomukonzya kusobana zibeela eezyo nzyomubala abana banu. Cibalo eeci cilijisi twaambo tubotu tukonzya kumugwasya kutegwa mubagwasye bana banu kuti naa bajana buyumu-yumu kucikolo. Inga mwalibambila kucita oobu ciindi ca Kukomba Mumukwasyi.

BAKAMBONI BA JEHOVA bacili bana balaba amapenzi manji. Basicikolonyina inga kabababuzya ncobatasaliutili ndembela, ncobatasekeleli buzuba bwakuzyalwa alimwi akucita nzintu zijatikizya buzuba bwakulyookezya. Ino kuti bana banu bababuzya mibuzyo iili mbuli yeeyi inga baingula buti?

Bamwi bana Banakristo baingula buyo kuti: “Tandizumizidwe kucita eeco. Cikombelo cangu tacizumizyi.” Bana bali boobu beelede kulumbaizigwa akaambo kakuliiminina. Bwiinguzi bwabo ndiza inga bwapa kuti baleke kubabuzya. Pele Ibbaibbele litukulwaizya kuti ‘kalibambila lyoonse kuliiminina kumuntu uuli woonse uukonzya kutubuzya kaambo’ kujatikizya lusyomo lwesu. (1 Pe. 3:15) Kucita tacaambi buyo kwaamba kuti “tandizumizidwe kucita ceeco.” Nokuba kuti bamwi tabakonzyi kukamvwisya kaambo ncotutacitili nzintu zimwi, bamwi balakkomana kuziba ncotutacitili.

Bakamboni bana banji balabaisya basicikolonyina kubelesya mabbuku aamba zya Bbaibbele mbuli bbuku lyakuti Amwiiye Mwiiyi Mupati. Twaambo tuli mubbuku eeli inga twabagwasya bana ba Bakamboni kupandulula ncobatacitili nzintu zimwi. Basicikolo bamwi balatuswiilila twaano twamu Bbaibbele eeci capa kuti batalisye ziiyo zya Bbaibbele zinji. Basicikolo bamwi cilakonzya kubakatazya kuswiilila twaano twamu Bbaibbele toonse. Kuti kakunyina bupanduluzi, twaano twamu Bbaibbele tulakonzya kubakatazya bana bacikolo kutumvwa. Mwana uumwi musimbi naakatamba mweenzinyina musimbi uuli amyaka iili 11 kukusekelela buzuba bwakwe bwakuzyalwa, Minhee wakamwaambila mweenzyinyina kuti: “Ibbaibbele talitwaambili kusekelela mazuba akuzyalwa. Muntu umwi waambidwe mu Bbaibbele, Johane Mubbapatizi wakajaigwa mubuzuba bwakusekelela kuzyalwa.” Minhee ulayeeya kuti mweenzyinyina tanakabumvwa bupanduluzi bwakwe.

Aabona cilagwasya kutondezya sikwiiya Bbaibbele cifwanikiso naa zilembedwe mumabbuku. Ino kuti beendelezi bacikolo baambila basicikolo kuti tabeelede kutondezya mabbuku aajatikizya bukombi kubeenzinyina? Sena bana besu balakonzya kukambauka kakunyina mabbuku? Ino inga mwabagwasya buti bana kuti kabaliiminina?

Amulibambile Ambabo

Kulibambila abana banu kuŋanda cilakonzya kugwasya, ibazyali kabasobana zibeela zyabasicikolonyina. Ibana nobasola kwiiminina lusyomo lwabo, ibazyali beelede kubalumbaizya alimwi akubatondezya mbobakonzya kutupandulula kabotu  twaambo ambociyandika. Mucikozyanyo, kamubelesya majwi ngobakonzya kubelesya mbobeelene limwi. Joshua, uulaamyaka iili fwuka wakaamba kuti, basicikoloma tabaazyi mabala aali mbuli “manjezeezya” alimwi “akusyomeka.” Aboobo bakabelesya mabala aatakatazyi kutegwa akamvwe kaambo.—1 Ko. 14:9.

Basicikolo bamwi balafwambaana kucimwa kuti naa bwiinguzi kabuli bulamfwu. Kwiinda mukubabikilizya mumubandi akubapanduluda twaambo ntomubandika, cilakonzya kubagwasya bana Babakamboni kuti babe aaluyandisisyo lwakwiiya zyintu. Haneul, musimbi uulaamyaka iili kumi, wakaamba kuti, “Basicikoloma balaciyanda kubandika kutali kupanduludwa.” Kutegwa mubandike amuntu, mweelede kubuzya mubuzyo akuswiililisya naambaula muntu kutegwa mumvwe ncayeeya.

Mubandi uutobela ulatondezya mbuli bana Banakristo mbobakonzya kubandika abasicikolonyina. Tamweelede kwiipeta buya mibandi eeyi, akaambo kakuti bana baliindene anzibayanda  ziliindene. Aboobo, Kamboni uucili mwana weelede kuzizyiba zintu eezi akuzipandulula kabotu kuli basicikolonyina kweelana acicitika aciindi eeco. Ikuti kamujisi bana baciiya, kamusobana zibeela eezyo zimwali kabandika abana banu.

Kwiisya bana citola ciindi. Bazyali Banakristo balayanda kwiisya bana babo njiisyo zili mu Bbaibbele akubaambila kuti kabazibelesya.—Dt. 6:7; 2 Ti. 3:14.

Ciindi ciboola mwaakucita Ciiyo Camukwasyi, amukasobana abana banu mbuli mbukwaambwa kale. Amubone eeci mbocikonzya kugwasya. Amuyeeye kuti ciyandika nkucizyiba mbotukonzya kwiingula kutali kupeta mabala. Mulakonzya kucisobana eeco cakamucitikila cakwiinduluka-induluka, akwiingula munzila ziindene-indene akubona mbobakonzya kwiingula bana. Nobapandulula nzyobasyoma amubagwasye kuzilanga kabotu zyintu akuti babe bapampu. Mukuya kwaciindi, bana banu bayakucikonzya kwiiminina zyobasyoma kuli basicikolonyina, basimukobonyina abamayi.

Kabbokesi/[Zifwanikiso izili apeeji 4, 5]

KUSEKELELA BUZUBA BWAKUZYALWA

Mariya: Kwaamba, John. Ndakutamba kupobwe lyakusekelela buzuba mbundakazyalwa.

John: Ndalumba, Mariya. Ino nkaambo nzi ncoyakubeda apobwe eeli?

Mariya: Kusekelela buzuba bwangu bwakuzyalwa. Sena yebo tociti oobo?

John: Peepe, tandiciti.

Mariya: Ino nkaambo nzi? Mukwasyi wangu wakakkomana nindakazyalwa.

John: Abalo bamukwasyi wangu bakakkomana. Pele aaka takali nkakaambo kakonzya kundipa kusekelela amwaka. Kumapobwe akusekelela buzuba bwakuzyalwa aabo balaapobwe baboneka mbuli kuti mbebayandika kapati. Pele Leza nguuyandika kapati. Sena tatweelede kumulumba akaambo kakuti nguwakatupa buumi?

Mariya: Sena undaambila kuti tandeelede kusekelela buzuba mbundakazyalwa?

John: Mariya, eeco cili kulinduwe. Koyeeya kuti nokuba kuti bantu banji balakkomana kutambula zipego buzuba mbubakazyalwa, Ibbaibbele lyaamba kuti kupa kulakkomanisya kapati kwiinda kutambula. Muciindi cakubikkila buyo maano kubuzuba mbotwakazyalwa, sena inga taciboti kulumba Leza, akuyeeya bamwi akubacitila zibotu?

Mariya: Taaku nindakaciyeede eeco. Sena waamba kuti bazyali bako tabakupi zipego?

John: Balandipa. Pele bazyali bangu tabalindili buzuba mbondakazyalwa. Balandipa kufwumba ciindi. Mariya, sena ulayanda kuzyiba mbokwakatalika kusekelela buzuba bwakuzyalwa?

Mariya: Kondaambila.

John: Cifwumo ndiyakukwaambila kaano kanonezya kujatikizya buzuba bwakuzyalwa bwakacitika kaindi.

KUSALUTA NDEMBELA

Milimo: Mutinta ino ulekela nzi kusaluta ndembela?

Mutinta: Wacita kabotu kubuzya Milimo. Ino nkaambo nzi ncosalutila ndembela?

Milimo: Ndilaakucita oobo nkaambo ndilaciyanda cisi cangu.

Mutinta: Milimo ndilizyi kuti ulabayanda banyoko pele tosaluti kuli banyoko tee?

Milimo: Mbombubo. Ulizyi kuti ndilasatula ndembela nkaambo ndilacilemeka cisi cangu. Sena toilemeki ndembela?

Mutinta: Ndilailemeka. Pele tatubasaluti bantu azyintu zyoonse nzyotulemeka.

Milimo: Masimpe ndilabalemeka bayi bangu pele tandisaluti. Nkokuti tandicizyi ncondisalutila ndembela.

Mutinta: Milimo, masimpe bantu banji bayeeya kuti ndembela iiminina cisi. Kusaluta ndembela caamba kuti baya kucita cili coonse kugwasya cisi cabo. Pesi tabusyi mbondiyeeya oobo. Aboobo tandikonzyi kupa buumi bwangu kucisi akaambo kakuti Leza nguwakandilenga. Ndasala kuti ndilyaabe kulinguwe. Aboobo nokuba kuti ndilailemeka ndembela tandiisaluti.

Milimo: Ndacizyiba lino ncocitila boobo.

Mutinta: Milimo ndalumba kuti wandaambila makani aaya. Alimwi kuti naa wabona kuti kuli zyondicita anzyonditaciti inga wandibuzya. Ikaindi Ibbaibbele lyakaamba kuti mwami waku Babuloni wakaambila bantu kuti bafwugamine cibumbwa. Bamwi tabakonzyi kufwugama nokuba kuti buumi bwabo buli muntenda.

Milimo: Sena masimpe aayo? Ino ncinzi cakabacitikila?

Mutinta: Ndilakwaambila twanolyokezya sikati.

NCOYEEYA KUJATIKIZYA TWAAMBO TWACISI

Mike: Tim ikuti naa wapegwa coolwe cakusala nguni ngokonzya kusala?

Tim: Kunyina.

Mike: Nkaambo nzi?

Tim: Ndakasala kale.

Mike: Sena waamba kuti tokonzyi kusala alimwi?

Tim: Ndilakonzya ndakasala kale mfwulumende mbotu.

Mike: Ino nimfwulumende nzi eeyo?

Tim: Eeyo mfwulumende yeendelezyegwa a Jesu. Ndisyoma kuti nguweelela kucita oobo. Sena uyanda kuzyiba ncocili boobo?

Mike: Taaku tandiyandi.

Tim: Waakuyanda kuzyiba, ukandaambile.

Cifwanikiso

“Kwaamba John. Ndakutamba kupobwe lyakusekelela buzuba mbundakazyalwa”

[Cifwanikiso icili apeeji 3]

“Ino nkaambo nzi ncomutasalyuuti ndembela?”